<<བོད་ནང་གི་ཐལ་ཆ་ཆེ་རིགས།>>
ཨ་ཚོགས་མཁས་བཙུན།
བོད་ལ་བསང་མཆོད་དང་གཏེར་སྒྲུབ། དར་ལྕོག་བསྒྲེང་འཛུགས་དང་རླུང་རྟ་སྐྱོད་པ་སོགས་ཆོས་དང་། དམངས་སྲོལ། སྲིད་ལུགས་གསུམ་གཞི་གཅིག་ཏུ་འདྲེས་པའི་ཤེས་རིག་དང་། བློ་གྲོས་ཀྱི་སྟོབས་དང་ལོ་རྒྱུས་ཀྱི་རྟོག་སད་རིམ་པའི་རྒྱབ་ལྗོངས་ཅན་གྱི་ཤེས་བྱའི་རྣམ་གྲངས་མཐའ་ཡས་པར་ཡོད།
དེ་ལས་གཏེར་སྒྲུབ་ནི། གཅིག གནའ་བོའི་བོད་ཀྱི་གཏེར་ཁ་འདོན་ལས་མཇུག་གི་རྗེས་གཅོད་ཁོར་ཡུག་སྲུང་སྐྱོང་དང་ཤིན་ཏུ་འབྲེལ་བའི་བཅའ་བཅོས་ཁྱད་པར་བ་ཞིག་དང་། གཉིས་པ། གཏེར་ཁའི་ཕུད་བླ་མ་མཆོག་གསུམ་ལ་མཆོད་པ་དང་། ལྷ་ཀླུ་གཉན་གསུམ་ལ་རྔན་པའི་ཚུལ་ཀྱི་ཆོས་སྤྱོད་དང་འབྲེལ་བ་དང་། གསུམ་པ། བཅའ་དངོས་རྩ་ཆེན་དང་གསང་བ་མན་ངག་རིགས་ཕྱི་འཁྱེར་མི་ཡོང་བའི་གསང་རྒྱ་མཛོད་གཉེར་དང་འབྲེལ་བ་ངེས་ཅན་ཡོད། དེ་ལ་ཡར་མཆོད་པ་དང་འབྲེལ་བའི་གཞི་གཏེར་ཅེས་པ་དང་། མར་རྔན་པ་དང་འབྲེལ་བའི་ས་ཆུའི་གཏེར་ཏེ། གཏེར་གྱི་ལག་ལེན་འདི་གནའ་བོའི་རྒྱ་གར་ལའང་ཡོད་པ་དང་། གཏེར་ཆེན་པོའི་བུམ་པ་ཞེས་མཆོད་པའི་རྣམ་གྲངས་ཆེན་པོ་ཞིག་ཀྱང་རེད། འཕགས་ཡུལ་མཁས་པའི་གསུང་དུ། རྣལ་འབྱོར་ཆེ་ནང་ལྔ་ཚན་ལྔ།། རིན་ཆེན་གྱིས་བྲིས་སྙིང་བོ་བཞུགས།།
ལོངས་སྤྱོད་ཕྱིར་ན་གཏེར་གཟུང་སྟེ།། ཞེས་ཀྱང་གསུང་འདུག རྫ་མའི་བུམ་པ་སོགས་བུམ་པའི་རིགས་ཡིན་དགོས་པ་དང་། དེ་ཡང་ས་ཆུའི་གསང་གནད་ཤེས་རྟོགས་ཤིན་ཏུ་གལ་ཆེ་བ་དང་། སྦ་ཐེངས་རེར་སྦ་གྲངས་ཉུང་མཐའ་གཅིག་དང་མང་མཐའ་དགུ་ལ་མ་འདུས་པ་མེད་ཀྱང་། དེང་སང་གཏེར་དུ་མིང་བཏགས་པའི་འགྱིག་གི་ཁུག་མ་བརྒྱ་ཕྲག་སྟོང་ཕྲག་མང་པོ་ཆུ་ལ་འདེད་པ་དང་ས་ནང་སྦ་བ་ཆོས་ལོག་མིན་ན་སྨྱོན་རྟགས་རང་རེད།
མཚོ་སྔོན་པོའི་མཚོ་གཏེར།
རླུང་རྟ་ནི། གནའ་བོའི་འགྲུལ་སྐྱོད་ཡོ་བྱད་གཙོ་གྲས་རྟ་མཆོག་རིན་པོ་ཆེ་དང་ཤིན་ཏུ་འབྲེལ་ཞིང་། གནའ་བོའི་དུས་སུ་དོན་བྱ་ཉེ་རིང་གང་ལའང་རྟ་ལས་འཇུག་བདེ་བ་དང་མྱུར་ལམ་མེད་ཅིང་། དེ་ཡང་འབྱུང་ལྔའི་རླུང་ཁམས་དང་སྦྱར་བ་དང་། རླུང་སེམས་ཕྲ་མོ་གཉུག་གཤིས་གསང་གནད་དང་ལྡན་པའི་ཆོས་ཀྱི་ཀློང་ཆེན་པོའི་གོ་དོན་ཡང་མཆིས་པས། གསང་སྔགས་ཟབ་མོའི་ལུགས་དང་བསྲེས་པའི་གནད་དང་ལྡན། ད་དུང་འབྱུང་རྩིས་ཤན་ཀྱང་ཞུགས་པ་བཅས། རང་རེས་བསྐྱོད་རྒྱུ་རླུང་རྟ་དང་དར་རྒྱུ་དེ་ཀློང་རྟ་ཡིན་པའི་ཁྱད་ཀྱང་འབྱེད་ཤེས་དགོས། དེ་བསྐྱོད་སའང་ཡུལ་ལུང་ས་སྒང་མཐོ་ས་དང་། རྫ་རྒྱུད་རི་ཆེན་དག་གི་རྩེ་སོགས་ཡིན་ན་ལས། དེང་སང་ནང་བཞིན་ཉག་ལམ་ཐུག་ཚད་དང་། རྒྱུག་ལམ་གང་སར་གང་འདོད་གཏོར་བ་ནི་ཀློང་རྟ་རྒྱུག་དང་ཉམས་གང་ཡིན་མ་ངེས་སོ། ཁ་ལས་རླུང་རྟ། ཁ་རྒྱས་དབང་ཐང་།
ཉི་ཟླ་རི་བོའི་རླུང་རྟ།
བོད་ཀྱི་དར་ལྕོག་ནི། རྒྱལ་བའི་བཀའ་རྒྱལ་མཚན་རྩེ་མོའི་དཔུང་རྒྱན་ལ་ཁུངས་བཅོལ་ཞིང་། དམག་དར་དང་འབྲེལ་བ་དམ་པོ་ཡོད། དཔུང་རྒྱན་ཞེས་པའི་གོ་དོན་ཡང་དེ་ཡིན། འདི་འདྲ་བ་དམག་ཤུགས་ཆོས་ཤུགས་གཉིས་ལྡན་གྱི་རྒྱལ་ཁམས་ཤིག་ལ་མ་གཏོགས་ཡོང་ཐབས་མེད་ཅིང་། ཕྱོགས་ལས་རྣམ་པར་རྒྱལ་བའི་མཚན་མཚོན་ཅན་རྟགས་བརྒྱད་གྲས་ཀྱི་རྒྱལ་མཚན་དང་དོན་སྙིང་གཅིག་པ་དང་། རྒྱལ་སྲིད་སྣ་བདུན་དང་ཡང་རྗེས་འབྲེལ་མ་ཆོག་པ་མེད་ཅིང་དོན་ལ་དམག་དར་ལས་འཕྲོས་པ་ཡིན། ལྷའི་དབང་བོ་བརྒྱ་བྱིན་ཁྱོད་གྱིས་རྒྱལ་མཚན་གྱི་རྩེ་མོའི་དཔུང་རྒྱན་ཞེས་བྱ་བ་གཞན་གྱིས་མི་ཐུབ་པའི་གཟུངས་ཟུངས་ཤིག་ཅེས་སངས་རྒྱས་ཀྱི་བཀས་གནང་བ་བཞིན། ལྷའི་དབང་བོ་བརྒྱ་བྱིན་གྱིས་ཀྱང་དཔུང་རྒྱན་གྱི་གཟུངས་ལྷ་མ་ཡིན་གྱི་དབང་བོ་ཐག་བཟང་རིས་ལས་རྣམ་པར་རྒྱལ་བའི་རྒྱལ་མཚན་ནམ་དམག་དར་གྱི་རྩེ་མོར་བཀོད་པ་དང་འདྲ། དེ་འདྲ་ཡིན་དུས་རང་རེས་བསྒྲེང་དགོས་རྒྱུའི་དར་ལྕོག་དག་གི་རྩེ་མོར་རྒྱལ་མཚན་རྩེ་མོའི་དཔུང་རྒྱན་རེ་ངེས་ཅན་དགོས་པའང་དེ་ཡིན།
དེ་བས་དར་ལྕོག་ནི་ཆོས་ཚན་བམ་དང་དུམ་པ་བགྱིས་ཏེ་དཔར་རྒྱུ་མ་ཡིན་པར། འཕགས་པ་རྒྱལ་མཚན་རྩེ་མོའི་དཔུང་རྒྱན་གྱི་གཟུངས་གཙོ་བགྱིས་ཏེ། ཆོས་ཚན་ཁག་གི་གཟུངས་སྔགས་ཟབ་མོ་དག་ཁོལ་དུ་ཕྱུང་ན་ལས། དེང་སང་ཆོས་ཚན་ཡོད་ཚད་འགྱིག་དང་རས་ལ་དཔར་པའི་སྟོང་དར་ཁྲི་དར་གྱི་མིང་འདོགས་ཅན་དེ་འདྲ་ག་ལ་ཡིན། ད་དུང་དེ་དག་ཀྱང་ཁྱིམ་གྱི་ཁྱམས་དང་། ཕྱུགས་རྭའི་སྒོ། རྩྭ་རྭའི་མཐའ། ཇ་ཁང་ཆང་ཁང་གི་ནང་། རྩེ་ཁང་ཚོགས་ཁང་གི་ཀླད་སོགས། མདོར་ན་ཡར་གྱི་ཁེ་ག་ཉག་ལམ་ནས་མར་གྱི་ཟམ་ཐོག་ལམ་ཁ་སོགས། ཡར་འགྲོ་སྟོང་གི་ལག་ནོག མར་འགྲོ་བརྒྱ་ཡིས་རྐང་ནོག་གི་གནས་སུ་གྱུར་བ་ནི་ཡི་མུག་པའི་གནས་སོ།།
དེ་ཡང་འཕགས་པ་རྒྱལ་མཚན་རྩེ་མོའི་དཔུང་རྒྱན་ལས། རྒྱལ་པོ་ཆེན་པོ་རྒྱལ་མཚན་གྱི་རྩེ་མོའི་དཔུང་རྒྱན་ཞེས་བྱ་བ་གཞན་གྱིས་མི་ཐུབ་པ་ཆེན་པོའི་གཟུངས་འདི་རྒྱལ་མཚན་གྱི་རྩེ་མོའམ་མགུལ་ཏུ་བཏགས་ན་ཞེས་དང་། གདུགས་དཀར་མཆོག་གྲུབ་མ་ལས་ཀྱང་། གཞན་གྱིས་མི་ཐུབ་པའི་རིག་སྔགས་ཀྱི་རྒྱལ་མོ་འདི། གྲོ་གའམ། རས་སམ། ཤིང་ཤུན་ལ་བྲིས་ཏེ་ལུས་སམ་མགུལ་དུ་བཏགས་སམ་ཀློག་པར་བྱེད་ན་ཞེས་དང་། རིག་སྔགས་ཀྱི་རྒྱལ་མོ་འདི་རྒྱལ་མཚན་གྱི་རྩེ་མོ་ལ་བཏགས་ཏེ་ཞེས་དང་། ལྗོངས་སམ་དགོན་པའི་གནས་སུ་གཟུགས་སོ། ཞེས་ལུས་སམ་མགུལ་དང་རྒྱལ་མཚན་གྱི་རྩེ་མོར་འདོགས་པར་གསུངས་པས་། སྤྱིར་རྟེན་འབྲེལ་གྱི་གནད་ཀྱིས་དར་ལྕོག་བསྒྲེང་སའི་གནས་ནི། རྫ་བརྒྱུད་རི་ཆེན་དག་གི་དབུས་དང་རྩེ་མོ་དང་། ས་བབ་མཐོ་ཞིང་རྣམ་པ་གཙང་ས་ཡིན་རྒྱུ་ཤིན་ཏུ་གལ་ཆེ། སྒྲེང་ཚུལ་ཡང་། དེ་ཉིད་ལས། ལྗོངས་སམ་དགོན་པའི་གནས་སུ་གཟུགས་སོ་ཞེས་གཟུགས་པར་གསུངས་པ་དང་། ཕྱོགས་ལས་རྣམ་པར་རྒྱལ་བའི་རྒྱལ་མཚན་ཡིན་དུས། གྱེན་ཏུ་བསྒྲེང་ཞིང་མཐོན་པོར་སློང་ན་ལས། ཐད་དང་ཐུར་ལ་འཐེན་འདོགས་སོགས་རྟེན་འབྲེལ་ལ་ཉེ་ལ་མི་རུང་ངོ་།།
རྨ་ཆེན་གངས་འདབས་ཀྱི་དར་ལྕོག
བོད་ཀྱི་རི་གྲོང་གང་སར་ཕུད་མཆོད་བྱེད་བཞིན་པའི་བསང་རྫས་ཞེས་པ་ནི་དོན་ལ་བསང་རྩི་ཟེར་དགོས། བསང་རྩི་ཞེས་པའི་བསང་གི་གོ་དོན་ནི། ལྷ་སྲུང་གཞི་བདག་རིགས་ཀྱི་མནོལ་བ་བསང་ཞིང་རྩོག་གྲིབ་དག་པའི་དོན་མ་གཏོགས། བཟའ་འབྲུ་ཕྱེ་རྩམ་དེ་བཟའ་བཏུང་ནང་བཞིན་བཞེས་དགོས་རྒྱུའི་དོན་གཏན་མིན། གཞན་ཏུ་ན་བོད་མིའི་ཁ་རྒྱུན་ལ། ལྷ་ལ་ལྷ་བསང་དང་། ཀླུ་ལ་ཀླུ་བསང་། མི་ལ་མནོལ་བསང་ཞེས་པ་ལྟར་མིས་མནོའ་བསང་བཟའ་དགོས་ཐུག་པས་དེ་མ་རེད་དེ། རྒྱགས་རྔན་བསང་མཆོད་དང་ཁྱད་ཞུགས་པས་གཏན་མི་འདྲ།
རྒྱགས་རྔན་ལ་གཟོད་ཕྱེ་རྩམ་གྱི་བཅའ་བཟོ་དང་ཆོ་ག་ཕྱག་ལེན་རྒྱ་ཆེ་བས། རང་དགར་ལུད་ལྟར་སྤུངས་རྒྱུ་ཞིག་མ་ཡིན་ཞིང་། གང་ཡིན་ཡིན་དེ་འཇུག་བདེ་བོ་ཞིག་ཀྱང་དེ་བས་མིན། དེ་ལ་ཕྱེ་རྩམ་གྱི་གྲུ་བཞི་བང་རིམ་བཞི་བའི་རི་རབ་ཀྱི་མཁར་དཀོན་མཆོག་ལ་གཏོར་མ་འདབ་བཞི་ཅན་དང་། བརྟན་མ་བཅུ་གཉིས་ཀྱི་གཏོར་མ་སྙིང་གཟུགས་ཅན། སྡེ་བརྒྱད་ལ་ཟོར། མགོན་པོ་ཡོན་ཏན་གྱི་འགྲོན་ལ་བཤོས་བུ། སྲིད་ཞིའི་འགྲོན་ལ་འབྲང་རྒྱས། ཡར་ལྷ་ཤམ་པོ་སོགས་ལ་ཟོར་ལ་ར་ལུག་གཡག་གསུམ་གྱིས་མཚན་པ། ད་དུང་གཟུགས་འགྲོའི་རིགས་ལ། ས་ལ་འཛུལ་དགུ གནམ་ལ་འཕུར་དགུ བར་ལ་འགྲིམ་དགུ་སོགས་དང་། གཞན་ལན་ཆགས་བུ་ལོན་གྱི་འགྲོན་ལ་གླུད་ཅིག་དང་། དེ་བས་ཀྱང་བཀྲ་རྫས་རྟགས་བརྒྱད་ཀྱི་མཆོད་པ་སོགས་མཆོད་པའི་རྣམ་གྲངས་རྒྱ་གང་ཆེ་ཆེ་དེ་འདྲ་ལ་རྒྱག་རྔན་བསང་མཆོད་ཞུ་བ་ཡིན་ཞིང་། དེ་ལ་ནི་ལྷ་སྲུང་གཞི་བདག་རིགས་ཀྱིས་བཞེས་རྒྱུ་འཁྱེར་རྒྱུ་གསོག་རྒྱུ་སོགས་ཀུན་འཛོམས་ཀྱི་འདུན་ཤེས་དང་ལྡན་པར་ཕུད་མཆོད་དགོས་ཤིང་། རྣམ་པ་ཐམས་ཅད་དུ་བསང་རྩི་དང་རྒྱག་རྔན་གྱི་ཁྱད་ཕྱེ་དགོས།
འདིའི་རྩི་ཡང་བསང་བྱེད་ཀྱི་རྫས་ཤིང་སྣ་སྨན་ཏོག་རིགས་ལ་ཟེར་གྱི། བཟའ་འབྲུ་ཕྱེ་རྩམ་རྗེན་མར་རྩི་ཡི་ཐ་སྙད་མི་ཐོགས་ཤིང་། དེ་འབོར་ཆེན་བསང་དུ་གཏོང་བའི་དོན་ཡང་གཏན་མ་རེད། དེ་བས་གཞི་རིམ་མང་མ་ནས་སྡིག་སྤོང་དགེ་སྒྲུབ་དང་། ཆོ་ག་ཕྱག་ལེན་གང་ཐད་འདྲི་རྟོག་རྩད་གཅོད་ཀྱིས་ཧ་གོ་དོན་རྟོགས་ཡོང་བ་ཞིག་ཤིན་ཏུ་གལ་ཆེ་བ་ཡིན། དེ་མིན་ཆོས་འཇིག་རྟེན་གང་ཡང་མིན་པའི་སྟེང་འདི་ལྟར་འཕྲོ་བརླག་ཆུད་འཛའ་བ་དང་། མཐའ་མ་རྒྱལ་ཁྲིམས་ཆོས་ཁྲིམས་གཉིས་ཀར་འགལ་བར་ཡང་དོགས་སོ།།
སྤྱིར་ལག་ལེན་དང་རྒྱུན་སྲོལ་འདི་གོ་ནོར་མ་ཐེབས་ཤིང་ཐལ་ཆ་མ་ཆེ་ན་ཚན་རིག་གི་རང་བཞིན་ཆེས་ཆེར་ལྡན་པ། གཞན་ལ་ཡོད་ན་སྨོན་རྒྱུ་དང་རང་ལ་ཡོད་ན་ངོམ་རྒྱུ། ཁྱད་པར་དེང་སང་དུས་ངན་སྙིགས་མར་སོང་བས་དུག་རྫས་སྣེ་མང་དང་། དུག་རླངས་འདྲ་མིན་བཅས་ཀྱིས། ཕྱི་ཁོར་ཡུག་ནས་ནང་འགྲོ་བ་ཡོངས་ལ་དངོས་ཤུགས་བརྒྱུད་གསུམ་ནས་གཙེས་ཤིང་། འཇིགས་སྣང་དང་དཀའ་ངལ་དུ་མ་སྐྱེལ་ཡོང་བའི་ཁ་གཏད་ལ་བསང་རྩི་འདི་མེད་ཐབས་མེད་པས། ཡབ་མེས་གོང་མ་རྣམས་ཀྱིས་དེའི་ཐད་རང་རེར་བསྩལ་བའི་ནོར་མཆོག་བླ་མེད་ཅིག་དང་། དེ་ཡང་ཆོས་ལུགས་ཀྱི་ར་བ་ལས་བརྒལ་བའི་ཐབས་མཆོག་ཅིག་ཏུ་བརྩི་ཆོག་པ་གཤམ་དུ་གསལ་ཡོང་།
དོན་ལ་བསང་རྩིའི་རྫས་སྣ་དག་ནི་གཤམ་གསལ་དག་ཡིན་དགོས། གསེར་ལོ་འབར་བའི་སྟག་པ། གཡུ་ལོ་འབར་བའི་ཤུག་པ། དུང་ལོ་འབར་བའི་བ་ལུ། འཁན་པ་གསེར་འགོ། སྤེན་དཀར། ཉ་རུབ། འོམ་བུ། ཐང་ལོ། སུར་དཀར་བཅས་བདུད་རྩི་ཅན་གྱི་ཤིང་སྣ་བདུན་དང་། འབྲུ་སྣ་ལྔ་མཚོན་ཙམ་པ་བཅས་དེའི་སྟེང་རབ་ཡིན་ན།
སྙིང་ལ་བཟང་པོར་ཛ་ཏི། གློ་བར་བཟང་པོར་ཅུ་གང་། མཆིན་པར་བཟང་པོར་གུར་གུམ། སྲོག་རྩར་བཟང་པོར་ལི་ཤི། མཁལ་མར་བཟང་པོར་སུག་སྨེལ། མཚེར་བར་བཟང་པོར་ཀ་ཀོ་ལ་བཅས་སྨན་སྣ་དྲུག་ཀྱང་རྫས་ཙམ་པ་བསྣན་ཏེ། དེ་ལྟར་བསང་རྩི་ནི་བོད་གདོད་མའི་སྤོས་སྦྱོར་གྱི་ཐོག་མ་དང་། བོད་སྤོས་ཀྱི་ཨ་མ། སྣོད་བཅུད་གཉིས་ལ་ཁྱབ་པའི་སྨན་གྱི་རིགས་ཤིག་ཡིན་ན་ལས། ལྷ་སྲུང་གཞི་བདག་གི་བཟའ་བཏུང་བཞེས་རྒྱུ་ཞིག་གཏན་མིན་པ་ཀུན་གྱིས་གོ་བར་བགྱིས་ཏེ། རང་སེམས་རང་གིས་གསོས་ནས་དགའ་དྲོག་དྲོག། རང་མགོ་རང་གིས་གཡོག་སྟེ་ནག་འཐོམ་མེར་མི་འགྲོ་བ་ཞིག་གལ་བོ་ཆེ་ལ་ནན་ཏན་ཡིན།
དེ་ལྟ་ན་༧ཀརྟི་སྐྱབས་མགོན་དབུས་པའི་བོད་ཀྱི་བླ་ཆེན་སྐྱེས་ཆེན་གང་མང་ཞིག་གིས་ཀྱང་། ད་ལྟའི་རང་རེས་བསང་ཕུད་ལུགས་གཏོང་སྟངས་འདི་མ་འགྲིག་མི་རུང་བའི་བཀའ་སློབ་ལམ་སྟོན་འགངས་ཐོན་པ་མང་ཡང་། ཡི་གེ་མང་དོགས་པས་འབྲི་མ་དགོས་པ་ཞུས། རབ་ཡིན་ན་བསང་ལ་སྨན་ཏོག་དང་བདུད་རྩི་ཅན་གྱི་ཤིང་སྣ་བདུན་སོགས་ཕུད། གལ་ཏེ་མ་འཛོམས་ན་རྫས་སྣ་འདི་རིགས་མང་བསྐྱེད་པའི་བསང་རྩི་རིགས་འབད་པས་འཚོལ་སྒྲུབ་མ་གཏོགས། བཟའ་འབྲུ་ཕྱེ་རྩམ་རྐྱང་བ་བསང་རྩི་ལ་མི་རུང་ཞིང་། ཆོས་འདུལ་བར་ཡང་སྐྱེ་བ་གཅོད་པའི་ལྟུང་བྱེད་དུ་རྣམ་པ་ཐམས་ཅད་དུ་བཀག་ཅིང་། ཁྲི་བསང་འབུམ་བསང་ཞེས་པའང་རྒྱ་མའི་ལྗིད་ཚད་མིན་པར། རྫས་སྣའི་འཇུག་ཚད་དང་དེའི་ལོ་མེ་འབྲས་གསུམ་གྱི་གྲངས་དང་བོངས་ཚད། རྫས་སྔགས་ནུས་གསུམ་གྱི་ཆོད་ཆེ་ཆུང་བཅས་ལ་ལྟོས་སོ།།
དེ་བས་ད་ལྟ་བོད་ནང་གྲོ་ནས་ཕྱེ་རྩམ་རྗེན་མ་དང་དེ་ཡང་འབོར་ཆེན་པོ་བསགས་པའི་སྟེང་། ད་དུང་དར་གོས་ཀྱི་མིང་བཏགས་པའི་འགྱིག་སྣ་ཚོགས་པའི་སྣོན་མ་དང་བཅས་པའི་རི་ལྟར་སྤུངས་ཏེ། ཆོ་ག་དང་ཕྱག་ལེན་དེ་ཡིན་འདི་ཡིན་མེད་པའི་བསང་གཏོང་བའི་ལུགས་ཀྱི་རྣམ་པ་དང་སྣང་ཚུལ། ཧང་སང་འགྲོ་བའི་ཡུལ་དངོས་དང་པར་གྱི་རྣམ་པར་སྤྱི་ཚོགས་སྟེང་ཐོན་ཡོང་བའི་གནས་སྟངས་འདི་འདྲ་ན། ད་ལྟ་བོད་པའི་ཡུལ་སྡེ་མང་པོ་ཞིག་ཆོ་མེད་པར་ཆགས་འདུག་ཅིང་། ལྷ་ཀླུ་གཉན་གསུམ་མ་གཏོགས། བླ་མ་མཆོག་གསུམ་དང་ཡི་དམ་ཆོས་སྲུང་ཞེས་པ་མ་དགོས་པའི་ཆོས་མིན་སྲིད་མིན་ཕུང་གསུམ་པ་ཞིག་ལ་འཐམ་འདུག གཅིག་བགྱིས་ན་འདིའི་རིགས་འདི་ཆོས་དག་པ་ཞིག་ལ་གང་ཞིག་གི་འཇབ་རྒོལ་ཐེངས་ཅིག་ཡིན་ཡང་སྲིད། ཡང་ན་མི་རིགས་རླབས་ཆེན་་ཞིག་གི་ཤེས་རིག་དང་བློ་གྲོས་ལ་གཏོར་རྒོལ་མུ་ལ་མཐུད་པའི་སེམས་ནག་འདྲ་ཡིན་ཡང་ཐང་། གླེན་རྟགས་འདི་རིགས་ཀྱི་འབྱུང་གནས་གཙོ་བོ་ཨ་མདོའི་ས་ཁུལ་དག་ཡིན། དེའི་ནང་ཁོངས་ནས་ཀྱང་མཚོ་སྔོན་པ་དང་བྱེ་བྲག་ཏུ་མཚོ་ལྷོ་དང་། མགོ་ལོག མཚོ་བྱང་བཅས་དང་དེ་བས་ཀྱང་མཚོ་ལྷོ་ས་ཁུལ་རེད། སྤྱིར་བསང་མཆོད་ཕུད་སྟངས་འདི་འདྲ་མིན་པ་ལྷ་སའི་གཙུག་ལག་ཁང་རྣམ་གཉིས་དང་། བྱང་གི་དགོན་ཆེན་བཞི་གཙོས་བོད་ཆོལ་ཁ་གསུམ་གྱི་དགོན་སྒྲུབ་གྲྭ་ཆེ་ཁག་དང་། ཡུལ་ལུང་ཆེ་སའི་ལྷ་གསོལ་གཏོང་ལུགས་རང་རེར་མཐོང་ཆོས་སུ་ཡོད་པ་ནས། ཁ་ཚ་དགོས་གཏུགས་ཀྱིས་བསླབ་བྱ་བླངས་ཤིང་བློ་སྐྱེད་དང་གོ་རྟོགས་སད་ངེས་པ་ཞིག་ལ་རེམ་དགོས་ཡོད་དོ།།
ད་དུང་ཕྱིའི་ས་བབས་ཀྱི་ཆ་རྐྱེན་དང་། ནང་ལག་ཤེས་ཀྱི་བྱང་ཚད་ཧ་ཅང་དམའ་བའི་དབང་གིས་ཉམ་ཐག་སྙིང་རྗེའི་ཡུལ། ལྷོ་ཨ་ཧྥེ་རི་ཀའི་མི་ནག་དཀའ་ངལ་ཅན་རྣམས་ཀྱིས་མཚོན། རང་བྱུང་གི་གནོད་པ་དང་དམག་འཁྲུག་གི་བྱེད་ཉེས། རྒྱལ་སྐྱོང་གི་ཇུས་ཉེས་བཅས་ལ་བརྟེན་པའི་འཛམ་གླིང་ཕྱོགས་གང་སའི་དབུལ་ཕོངས་ཉམ་ཐག་པ་རྣམས་ཀྱི་ཉིན་རེའི་ལྟོ་གོས་གཏམ་གསུམ་གྱི་གནས་སྟངས་ལ་གཞིག་ན། རང་རེས་བསང་མཆོད་ལ་བསྙད་པའི་བཟའ་འབྲུ་རྗེན་མ་དང་། ཕྱེ་རྩམ་ཕོན་ཆེན་འདི་བཞིན་མེ་ལ་གཏོང་ཞིང་ཆུ་ལ་བསྐྱུར་བའི་གནས་མ་ཡིན་ཞིང་སྐབས་མ་མཆིས་སོ། ལྷག་དོན་འཛམ་གླིང་ས་ཆེན་པོ་འདིའི་སྟེང་བླང་དོར་གྱི་རྣམ་དབྱེ་རྒོད་ཅིང་སྙིང་རྗེའི་འཇུག་པ་ཞིབ་པའི་མི་རིགས་གྲགས་པ་ཅན་ཞིག་གིས་དེ་བས་ཀྱང་ཨ་ཅང་ཅང་། དེ་ནི་གཞན་གྱིས་ཁྲེལ་ཅིང་རང་ཉིད་ཕུང་བའི་རྒྱུ་ཁོ་ནའོ།།
མདོ་སྨད་བྱང་བརྒྱུད་ཀྱི་བསང་མཆོད།
བྱམས་སྙིང་རྗེ་ཅན་གྱི་མི་རིགས།། བློ་རྣམ་དཔྱོད་རྒོད་པའི་མི་བུ།། སྤྱིར་གླེན་རྟགས་མ་སྟོན་ངོ་རེ་ཚ།། སྒོས་བླང་དོར་མ་ནོར་དོན་རེ་ཆེ།། ཞེས་བཟའ་འབྲུ་ཕོན་ཆེན་དང་ཕྱེ་རྩམ་རྐྱང་བ་བསང་དང་བསུར་ལ་རྫུས་ནས་ཚོང་ཁེ་གཉེར་བ་དང་། བཟའ་འབྲུ་དགོས་མེད་ཆུད་འཛའ་བའི་ཚབས་ཆེན་རང་བཞིན་དང་། བོད་བསང་རིག་གནས་གོ་ནོར་ཉམ་ཉེས་སུ་འགྲོ་བཞིན་པར་དམིགས་ཏེ། མདོ་སྨད་མཚོ་ལྷོ་བ་ཨ་ཚོགས་མཁས་བཙུན་གྱིས་དཔལ་ཁ་གསེར་གཞུང་དུ་བྲིས།
འགྲིག་རང་རྩ་ནས་སྡོམ། སྐྱོན་རང་ཐོག་ནས་བཤད།
ད་དུང་ད་ལྟ་གཞི་ནས་ཐལ་ཆེ་བའི་རྟ་རྒྱུག་མདའ་འཕེན་སོགས་ཀྱི་ཁ་དར་བཞིན་འདུག་པས། བོད་ལ་ཁ་བཅོས་ཀི་སོང་ན། སྣ་ཡོ་ནས་འགྲོ་བའི་ཆུ་མི་ཐུབ་ཀི་གནས་སྟངས་མང་དྲགས་པས་དེ་ཙམ་ལས་འབྲི་མ་ལང་ངོ་།
ཕྱི་ལོ་ ༢༠༡༧ ཧོར་ལུགས་ཟླ་ ༡ ཚེས་ ༡༥ ཉིན།
ང་ལའང་གོང་གི་བློ་བཟང་ལགས་ཀྱི་དཔྱད་མཆན་ནང་གསུང་པའི་ཚོར་བ་དེ་ག་རང་བྱུང་སོང་། རྩོམ་ཡིག་འདི་གཏིང་ཟབ་མོ་དང་ཡག་པོ་ཞེ་དྲག་བྲིས་འདུག་ཀྱང་། སྲོལ་རྒྱུན་འབྲི་སྟངས་ཤུགས་ཆེ་དྲག་པའི་དབང་གིས་བསྟན་དོན་རྡོག་རྡོག་དེ་ཁ་གསལ་བོ་དང་རྩེ་རྣོན་པོ་བཟོ་ཐུབ་མེད་པ་ཞིག་འདུག
དུས་ཐོག་ཆར་བ་ལྟ་བུའི་རྩོམ་ཡིག་ཅིག་རེད། ད་དུང་ཁ་ཇེ་གསལ་དུ་བཏང་སྟེ་ད་ལྟའི་ངོ་དེབ་སོགས་ན་ཁ་བརྡར་རེས་བྱེད་ཀྱི་ཡོད་པ་ནང་བཞིན་ཞིག་བྲིས་ཡོད་ན་དེ་ལས་ཀྱང་རྣག་ཐོག་བཙག་འཁེལ་ཆགས་ས་རེད།