ད་ལོའི་རྒྱ་གར་རྒྱལ་ཡོངས་འཛིན་རིམ་བཅུ་གཉིས་ཀྱི་ཡིག་རྒྱུགས་ཆེན་མོའི་ཁྲོད་སུ་ཇ་བོད་ཁྱིམ་དང་སེ་ལ་ཁུ་བོད་ཁྱིམ། སྤོན་ཊ་གཏན་སློབ་བཅས་ནས་ཡིག་རྒྱུགས་ཀྱི་བརྒྱ་ཆ་བརྒྱ་བླངས་འདུག
ཕྱི་ལོ་ ༢༠༡༧ ལོའི་རྒྱ་གར་རྒྱལ་ཡོངས་འཛིན་རིམ་བཅུ་གཉིས་ཀྱི་ཡིག་རྒྱུགས་ཆེན་མོའི་ནང་བོད་པའི་སློབ་གྲྭ་ཁག་ ༡༧ ནས་ཁྱོན་སློབ་ཕྲུག་ ༡༢༩༢ མཉམ་ཞུགས་གནང་ཡོད་པའི་ཁྲོད་ནས་སློབ་ཕྲུག་ ༡༡༢༣ ཀྱིས་ཡིག་ཚད་འཕྲོད་ཡོད་པ་དང་། བསྐྱར་རྒྱུགས་གཏོང་དགོས་མཁན་སློབ་ཕྲུག་ ༡༢༨ ། རྒྱུགས་མ་འཕྲོད་པའི་སློབ་མ་ ༤༠ བཅས་ཡོད་ལ། བུ་མོའི་ཡིག་རྒྱུགས་འཕྲོད་ཚད་བརྒྱ་ཆ་ ༩༢.༥༩ དང་། བུའི་བརྒྱ་ཆ་ ༨༡.༡༣ ཡིན་ལ། ན་ནིང་ཡིག་རྒྱུགས་ཁྲོད་བརྒྱ་ཆ་བརྒྱ་ལེན་མཁན་བཞི་བྱུང་ཡོད་ཀྱང་ད་ལོར་སུ་ཇ་བོད་ཁྱིམ་དང་སེ་ལ་ཁུ་བོད་ཁྱིམ། སྤོན་ཊ་གཏན་སློབ་བཅས་གསུམ་བྱུང་འདུག
འདི་ལོར་སྒྱུ་རྩལ་སྡེ་ཚན་ནང་བརྒྱ་ཆ་ ༧༥ ཡན་ལེན་མཁན་སློབ་ཕྲུག་ ༡༥༢ དང་། ཚོང་རིག་ནང་བརྒྱ་ཆ་ ༧༥ ཡན་ལེན་མཁན་སློབ་ཕྲུག་ ༢༠། ཚན་རིག་ནང་བརྒྱ་ཆ་ ༧༥ ཡན་ལེན་མཁན་སློབ་ཕྲུག་ ༨༦ ཡོད་པ་དང་། བོད་ཡིག་ཡིག་རྒྱུགས་ཁྲོད་བརྒྱ་ཆ་ ༧༥ ཡན་ལེན་མཁན་ཁྱོན་སློབ་ཕྲུག་ ༣༩༨ བྱུང་ཡོད་པ་མ་ཟད། དེའི་ནང་ནས་སློབ་ཕྲུག་ ༡༦ ཡིས་བརྒྱ་ཆ་ ༩༩ བླངས་ཡོད་འདུག
ད་ལོའི་དགའ་ལྡན་ཕོ་བྲང་གི་བྱ་དགའ་ཐོབ་པའི་ཚན་རིག་དང་ཚོང་རིག འབྱུང་རིག་བཅས་ཀྱི་ཁོངས་ནས་བརྒྱ་ཆ་རྩེ་ཕུད་ཐོབ་མཁན་དག་ནི། སྒྱུ་རྩལ་སྡེ་ཚན་ཁོངས་ནས་ཨང་དང་པོ་མ་སུ་རི་(THS)སློབ་གྲྭའི་སློབ་མ་བསྟན་འཛིན་འཆི་མེད་ལགས་ལ་བརྒྱ་ཆ་ ༩༢.༢ དང་། ཨང་གཉིས་པ་སུ་ཇ་བོད་ཁྱིམ་གྱི་སློབ་མ་རིན་ཆེན་སྐྱིད་དང་གྷོ་པལ་པུར་བོད་ཁྱིམ་གྱི་སློབ་མ་བསྟ་འཛིན་མཚོ་གཉིས་ལ་བརྒྱ་ཆ་ ༩༠.༤ རེ། ཨང་གསུམ་པ་སུ་ཇ་བོད་ཁྱིམ་གྱི་སློབ་མ་བསྟན་འཛིན་གཡང་སྒྲོན་ལ་བརྒྱ་ཆ་ ༩༠.༢ ཡིན་འདུག
ཚོང་རིག་ཁོངས་ནས་ཨང་དང་པོ་དྷ་སྟེང་བོད་ཁྱིམ་གྱི་སློབ་མ་བསྟན་འཛིན་བཟང་མོ་ལ་བརྒྱ་ཆ་ ༨༧.༨། ཨང་གཉིས་པ་ལྷག་པ་བསོད་ནམས་དང་དབང་མོ་ལ་བརྒྱ་ཆ་ ༨༧.༨ རེ། ཨང་གསུམ་པ་མོན་གྷོར་གཏན་སློབ་ཀྱི་སློབ་མ་བསྟན་འཛིན་དབང་ལྡན་ལ་བརྒྱ་ཆ་ ༨༢ ཡིན་འདུག
ཚན་རིག་ཁོངས་ནས་ཨང་དང་པོ་ཀ་ལིམ་སྤུང་གཏན་སློབ་ཀྱི་སློབ་མ་བསམ་གཏན་ལ་བརྒྱ་ཆ་ ༩༠.༦ དང་། ཨང་གཉིས་པ་སྦེལ་ཀོབ་བོད་ཁྱིམ་གྱི་སློབ་མ་སངས་རྒྱས་ཆོས་སྐྱོང་ལ་བརྒྱ་ཆ་ ༩༠། ཨང་གསུམ་པ་མོན་གྷོར་གཏན་སློབ་ཀྱི་སློབ་མ་ཀུན་དགའ་འཆི་མེད་དང་ལྷ་མོ་ཆོས་སྒྲོན་ལ་བརྒྱ་ཆ་ ༨༨.༨ རེ་ཡིན་འདུག
གསར་འགོད་པ། པདྨ་མཚོ།
ཡག་པོ་རེད་
བཀྲ་ཤིས་བདེ་ལེགས་རྟེན་འབྲེལ་ཞུ། དགེ་སློབ་ཚང་མ་ལ་ཡི་རང་བསྔགས་བརྗོད་ཞུ།