རྒྱ་ནག་ཅང་སུའུ་ཞིང་ཆེན་གྱི་བྱིས་པའི་སློབ་གྲྭ་ཞིག་ཏུ་འགད་རྫས་དོན་རྐྱེན་བྱུང་སྟེ་མི་ ༨ ཀྱི་ཚེ་སྲོག་ཤོར་བ་དང་མི་ ༦༥ རྨས་སྐྱོན་ཕོགས་ཡོད་པ་དང་། དོན་རྐྱེན་བཟོ་མཁན་དེ་དྲག་སྤྱོད་པ་ཡིན་མིན་བཤད་ཚུལ་གཉིས་ཡོང་གི་ཡོད་འདུག
དེ་རིང་རྒྱ་ནག་ལྷོ་རྒྱུད་ཞོགས་པའི་ཚགས་པར་གྱིས་གནས་ཚུལ་སྤེལ་བ་ལྟར་ན། ཁ་སང་ཕྱི་དྲོའི་ཆུ་ཚོད་ ༤།༥༠ སྟེང་། རྒྱ་ནག་ཅང་སུའུ་ཞིང་ཆེན་ཧྥིང་ཞིན་རྫོང་ (Fengxian County) དུ་ (Chuangxin Kindergarten) ཞེས་པའི་བྱིས་པའི་སློབ་གྲྭ་ཞིག་གི་ནང་འགད་རྫས་དོན་རྐྱེན་བྱུང་སྟེ་མི་ ༨ འདས་གྲོངས་དང་མི་ ༦༥ ལ་རྨས་སྐྱོན་ཚབ་ཆེན་ཕོགས་ཡོད་པ་དང་། འགད་རྫས་དོན་རྐྱེན་དེ་ཇི་ལྟར་བྱུང་མིན་ད་སྔ་གསལ་ཁ་བྱུང་མི་འདུག
ས་ཁུལ་དེའི་ཡུལ་མི་ཚོས་བྱིས་པའི་སློབ་གྲྭར་ཟ་མ་བཟོ་བར་རླངས་གཟུགས་མང་པོ་བེད་སྤྱོད་གཏོང་གི་ཡོད་སྟབས། དོན་རྐྱེན་དེ་རླངས་གཟུགས་འགད་འཐོར་བྱུང་བ་ཡིན་པར་ཡིད་ཆེས་བྱེད་ཀྱི་ཡོད་ཅིང་། ས་གནས་སྤྱི་བདེ་ཉེན་རྟོག་པས་དོན་རྐྱེན་དེའི་ཐད་ཞིབ་བཤེར་བྱེད་ཀྱིན་ཡོད་འདུག
རྒྱ་ནག་མི་དམངས་ཉིན་རེའི་ཚགས་པར་ཁང་གིས་སྤེལ་བའི་གནས་ཚུལ་ནང་། འགད་རྫས་དོན་རྐྱེན་དེ་ནི་ཁྲིམས་འགལ་གྱི་ཉེས་དོན་ཞིག་ཡིན་པ་དང་། ད་ལྟ་དོན་རྐྱེན་བཟོ་མཁན་དོགས་ཡོད་མི་སྣ་ཞིག་ངོས་འཛིན་བྱུང་ཡོད་ལུགས་བཤད་ཡོད་ཀྱང་། མི་སྣ་དེ་སུ་ཡིན་མིན་གསལ་བཤད་བྱས་མེད་པ་རེད།
འགད་རྫས་དོན་རྐྱེན་བྱུང་སྐབས། ཕ་མ་མང་པོས་བྱིས་པའི་སློབ་གྲྭའི་སྒོ་འགྲམ་དུ་འཛོམས་ནས་བྱིས་པ་ལེན་རྒྱུར་སྒུག་སྡོད་པའི་སྐབས་ཡིན་འདུག ཡུལ་ངོས་ཀྱི་དཔང་མི་ཞིག་གིས། འགད་རྫས་དོན་རྐྱེན་དེ་ཕྱི་དྲོའི་སློབ་གྲྭ་གྲོལ་བའི་ཅོང་བརྡ་གྲགས་པ་དང་ལྷན་དུ་བྱུང་ཡོད་སྐོར་བརྗོད་འདུག མི་མང་བདེ་སྲུང་ལྷན་ཁང་གིས་དོན་རྐྱེན་བྱུང་སའི་ཡུལ་ངོས་དེར་ཉེན་རྟོག་རུ་ཁག་ཅིག་ཆེད་གཏོང་གིས་དོན་རྐྱེན་དེར་ཞིབ་བཤེར་བྱེད་ཀྱིན་ཡོད་ཚུལ་རྒྱ་ནག་དབུས་བརྙན་འཕྲིན་ཁང་གིས་བརྗོད་འདུག
སྤྱི་ཚོགས་བརྒྱུད་ལམ་ཁག་ཏུ་དོན་རྐྱེན་དེའི་སྐོར་གྱི་བརྙན་ཐུང་མང་པོ་བཏང་ཡོད་པའི་ནང་། འགད་རྫས་དོན་རྐྱེན་དེ་ནི་བྱིས་པའི་སློབ་གྲྭ་དེའི་རྩེད་ཐང་དུ་བྱུང་ཡོད་པ་དང་། དོན་རྐྱེན་ཁྲོད་ཤི་རྨས་ཐེབས་མཁན་མང་ཆེ་བ་བྱིས་པ་དང་བྱིས་པའི་ཕ་མ་ཡིན་འདུག
ན་ནིང་རྒྱ་ནག་ཧྥི་ཅིན་ (Fujian) ཞིང་ཆེན་གྱི་གཞི་རིམ་སློབ་གྲྭ་ཞིག་གི་ནང་ལག་ཏུ་གྲི་ཐོགས་པའི་རྒྱ་མི་དྲག་སྤྱོད་པ་ཞིག་གིས་སློབ་གྲྭ་དེའི་དགེ་སློབ་ ༡༧ ལ་རྨས་སྐྱོན་ཚབ་ཆེན་བཟོས་ཡོད་པ་དང་། ༢༠༡༠ ལོའི་ཕྱི་ཟླ་ ༣ པར་རྒྱ་ནག་གི་གཞི་རིམ་སློག་གྲྭ་གཞན་ནང་ལག་ཏུ་སྟར་གྲི་དང་ཚལ་གྲི་ཐོགས་པའི་རྒྱ་མི་ཞིག་གིས་སློབ་མ་ ༢༥ བསད་པ་དང་མི་ ༡༡༥ རྨས་སྐྱོན་བཟོས་ཡོད་པ་དང་། སྐབས་དེར་རྒྱ་ནག་གཞུང་ཕྱོགས་ནས་རྒྱ་རིགས་དྲག་སྤྱོད་པ་དེའི་སེམས་ཁམས་ཐང་པོ་མེད་ཚུལ་ལུགས་འགྲེལ་བརྗོད་བྱས་འདུག
ཉེ་བའི་ལོ་ངོ་འདི་དག་རིང་རྒྱ་ནག་གི་བྱིས་པའི་སློབ་གྲྭ་ཁག་ནང་དྲག་སྤྱོད་ཀྱི་དོན་རྐྱེན་མང་པོ་བྱུང་ཡོད་པ་དང་། དྲག་སྤྱོད་སྤེལ་མཁན་མང་ཆེ་བ་ཁྱིམ་མཚེས་དང་སྤྱི་ཚོགས་ཁོར་ཡུག་གི་རྙོག་འཛིང་གི་རྐྱེན་པས་སེམས་ཁམས་ཐང་པོ་མེད་མཁན་རྒྱ་རིགས་ཤ་སྟག་ཡིན་འདུག
གསར་འགོད་པ། པདྨ་རྒྱལ།
