གསར་འབྱོར་རྒད་པོ།
འདས་པའི་ལོ་ངོ་བཅོ་ལྔའི་སྔོན་ཏག་ཏག་ཅིག་རེད། ང་རྒྱ་གར་དུ་འབྱོར་ནས་རིང་པོ་ཞིག་ཕྱིན་མེད། ངའི་བུ་མོ་དེ་དུས་ལོ་བཞི་དང་ཕྱེད་ཡས་མས་ཤིག་ཡིན། མ་གཞི་ངེད་ནས་བོད་ཁྱིམ་གྱི་སྒྲིག་གཞི་ལྟར་ལོ་དྲུག་ལ་མ་སོན་པར། རང་གི་བུ་མོ་སློབ་འཇུག་མི་ཆོག་པ་ཤེས་ཀྱི་ཡོད། སྟབས་ཉེས་པ་ཞིག་ལ། སྐབས་དེར་བུ་མོའི་ཨ་མ་གློ་བུར་ནད་གཞི་ལྕི་མོ་ཞིག་བྱུང་། བུ་མོ་ཡང་སྨན་ཁང་དུ་མཉམ་འཁྲིད་མི་བྱེད་ག་མེད་ཆགས། སྨན་པས་བུ་མོ་སྨན་ཁང་དུ་ཁྲིད་ཡོང་མི་ཆོག་པར་སྐོར་བཤད། རྒྱུ་མཚན་སྨན་ཁང་དུ་བྱིས་པའི་རིགས་ལ་ན་ཚ་ཅི་ཞིག་ཡིན་ཡང་འགོས་སླ། དེར་བརྟེན་བྱིས་པ་སྨན་ཁང་དུ་འཁྲིད་ཡོང་མི་ཆོག་པ་སྨན་ཁང་གི་སྒྲིག་སྲོལ་ཡིན་ཟེར། དེ་དུས་བྱ་ཐབས་ཟད་དེ། རང་གི་བུ་མོ་ལོ་བཞི་དང་ཕྱེད་ཅན་དེ་འཁྲིད་ནས་བོད་ཁྱིམ་སློབ་གྲྭའི་སྤྱི་ཁྱབ་ཡིག་ཚང་དུ་བཅར། འབྲེལ་གཏུག་བྱེད་ཡུལ་དེ་བོད་ཁྱིམ་གྱི་འབྲེལ་ཡོད་ལས་བྱེད་གནད་ཡོད་ཅིག་རེད། ཁོང་གི་མཚན་ལ་ཅི་ཟེར་དེ་སྐབས་དོ་སྣང་མ་བྱུང་། ངེད་ནས་བུ་མོའི་ཨ་མ་སྨན་ཁང་དུ་ཡོད་ཚུལ་སོགས་ཀྱི་གནས་ཚུལ་རྣམས་གསལ་བོར་སྙན་གསན་ཞུས། འབྲེལ་ཡོད་ལས་བྱེད་དེས་བུ་མོ་སློབ་ལོ་མ་སོན་པར་སློབ་འཇུག་བྱེད་ཐབས་མེད་སྐོར་ནན་གྱིས་གསུངས་བྱུང་།
ད་ནི་བྱ་ཐབས་མི་འདུག་སྙམ་པའི་སྐབས་དེར། འབྲེལ་ཡོད་ལས་བྱེད་དེས་བུ་མོ་ཁོང་གི་མདུན་དུ་བཀུག་སྟེ། བྱིས་པའི་སེམས་ཁམས་དང་མཐུན་པའི་བཀའ་མོལ་འགའ་གནང་རྗེས། ཤོག་བུ་ཞིག་དང་སྨྱུ་གུ་ཞིག་བླངས་ནས་ཀ་མད་སུམ་ཅུ་དང་། གཅིག་ནས་བརྒྱ་བར་གྲངས་གནས་རྣམས་ངོས་འཛིན་དུ་བཅུག་སོང་། མ་གཞི་ནས་ངེད་ཀྱི་བུ་མོ་ཧ་ཅང་བློ་རིག་རྣོ་ཞིང་གྲུང་པོ་ཞིག་ཡིན། ཀ་མད་སུམ་ཅུ་དང་། གཅིག་ནས་བརྒྱ་བར་གྱི་གྲངས་གནས་སོགས་འབྲི་ཀློག་རང་རྐྱ་འཕེལ་བ་ཡོད། ཅུང་ཟད་ནས་འབྲེལ་ཡོད་ལས་བྱེད་དེའི་གདོང་ཡོངས་འཛུམ་གྱིས་ཁེངས་ཏེ་ཕྲན་ལ་བཤད་རྒྱུར། ཁྱེད་ཀྱི་བུ་མོ་ཧ་ཅང་བློ་རིག་རྣོ་པོ་འདུག་ཅེས་བརྗོད་པ་དང་དུས་མཚུངས། འདི་གའི་སློབ་ལོ་སོན་པའི་འཛིན་གྲྭ་དང་པོའི་སློབ་ཕྲུག་ཁྲོད་ཀ་མད་སུམ་ཅུ་དང་། གྲངས་གནས་གཅིག་ནས་བརྒྱ་བར་ཁྱེད་ཀྱི་བུ་མོ་འདི་དང་བསྡུར་ན། རང་སྐྱ་འཕེལ་བར་འབྲི་ཀློག་མི་ཐུབ་མཁན་ཡང་སྐོར་ཞིག་ཡོད། ལར་ཁྱེད་ཀྱི་བུ་མོ་འདི་རྣམ་རིག་ཧ་ཅང་གསལ་བོ་འདུག་པས་དགའ་ཚོར་བྱུང་། སློབ་ལོ་མ་སོན་ཡང་སློབ་ལོ་སོན་པ་དང་འཚམས་པའི་ཤེས་ཡོན་ཡག་པོ་འཇགས་འདུག ཁྱེད་ཕ་མ་གཉིས་ལ་ཐུགས་རྗེ་ཆེ་ཞུ། ངེད་བོད་ཁྱིམ་སློབ་གྲྭས་དེ་རིང་ནས་ཁྱེད་ཀྱི་བུ་མོ་སློབ་འཇུག་བྱེད་ཀྱི་ཡིན་ཟེར།
ཨ་ཙི་འདི་ནི་རྨི་ལམ་ཡིན་ནམ། ངས་ལམ་སེང་ཁོང་ལ་བཀའ་དྲིན་ཆེ། ངེད་ཀྱིས་བུ་མོ་སློབ་འཇུག་གི་ཐོག་མར་བརྟེན་ཚེ་གྲངས་ལ་བལྟས་ནས་གང་མྱུར་སྐྱེལ་གྱི་ཡིན་ཞེས་བརྗོད་པར་ཁོང་གིས་མོས་མཐུན་གནང་བྱུང་། སྟབས་ཡག་པ་ཞིག་པ་ཉིན་དེའི་ཕྱི་མ་ཉི་བཟང་སྐར་བཟང་རེད་ཟེར། གྱོན་ཆས་སོགས་གྲ་སྒྲིག་བྱས་ཏེ་ཕྱི་ཉིན་བུ་མོ་ཁྲིད་ནས་བོད་ཁྱིམ་སྤྱི་ཁྱབ་ཡིག་ཚང་གི་འབྲེལ་ཡོད་ལས་བྱེད་དེའི་སར་བཅར། འབྲེལ་ཡོད་ལས་བྱེད་དེས་ཅི་ཞིག་ལ་མཁྱེན་པ་ཡོད་པ་ལྟར། བུ་མོ་འདུག་སའི་ཁྱིམ་ཚང་དང་མ་མ་བཅས་སྔོན་ཚུད་ནས་གྲྭ་སྒྲིག་བྱས་འདུག ངས་འབྲེལ་ཡོད་ལས་བྱེད་དེར་རང་གི་བུ་མོ་སྔོན་འགྲོར་འཇུག་པའི་རེ་སྐུལ་ཞུ་སྐབས། ཁོང་གིས་དེ་སྐོར་ལ་ངས་བསམ་བློ་ཞིབ་ཚགས་བཏང་བ་ཡིན། ཁྱེད་ཀྱི་བུ་མོ་བློ་རིག་རྣོ། སྔོན་འགྲོ་ནས་སྦྱང་དགོས་པ་ཚང་མ་ཤེས་ཚར་འདུག གལ་སྲིད་སྔོན་འགྲོར་བཅུག་ན། ལོ་གཅིག་གཉིས་ཤིག་གི་དུས་ཚོད་འཕྲོ་བརླག་རེད་ཟེར། ད་ཆ་ངའི་བུ་མོས་བོད་ཁྱིམ་གྱི་འཛིན་གྲྭ་སོ་སོ་ནས་སྦྱངས་འབྲས་ལེགས་པོ་བྱུང་སྟེ། སྦང་ལོར་རུ་མཐོ་སློབ་འགྲིམ་བཞིན་ཡོད།
ཀློག་མཁན་རྣམ་པ་ལགས། ཐབས་སྐྱོ་བ་ཞིག་ལ། ངས་ད་དུང་འདས་པའི་མི་བཅོ་ལྔའི་སྔོན་གྱི་བོད་ཁྱིམ་སྤྱི་ཁྱབ་ཡིག་ཚང་གི་འབྲེལ་ཡོད་ལས་བྱེད་དེའི་ངོ་གདོང་དྲན་པ་ལས་མིང་ཤེས་ཀྱི་མེད། ད་ལྟ་ཁོང་འཇིག་རྟེན་འདི་ནས་ཡོད་མེད་ཀྱང་མི་ཤེས། གང་ལྟར་མདང་དགོང་ངས་འདས་དོན་མང་པོ་ཞིག་ལ་བསམ་གཞིག་བྱེད་དུས། སྤྱི་སེམས་ཆེ་ཞིང་དྲང་ཚུགས་བརྟན་པ། ངོ་ལྐོག་དང་གཡོ་སྒྱུ་མེད་པའི་བོད་ཁྱིམ་སྤྱི་ཁྱབ་ཡིག་ཚང་གི་འབྲེལ་ཡོད་ལས་བྱེད་དེ་དྲན་བྱུང་། ཁོང་ལ་སེམས་ཁོང་ནས་ཐུགས་རྗེ་ཆེ་ཞུ་བར་འདོད། ༸གོང་ས་མཆོག་དགུང་ནའི་བབ་ཇེ་མཐོར་འགྲོ་བཞིན་པའི་སྐབས་འདིར་ཁྱེད་རང་དང་། ཁྱེད་རང་འདྲ་བ་ལྷག་ཏུ་དྲན་བྱུང་། ད་ལྟ་བཙན་བྱོལ་བོད་མིའི་སྤྱི་ཚོགས་ནང་ཁྱེད་རང་འདྲ་བ་ཅི་ཙམ་ཡོད་དམ།
ཀློག་མཁན་རྣམ་པ་ལགས། མཇུག་མཐའི་རེ་སྐུལ་ཞུ་འདོད་པ་ཞིག་ལ་ད་ལྟའི་བཙན་བྱོལ་བོད་མིའི་ལས་ཀྱི་སྣེ་མོ་བ་ཚོའི་བཟང་སྤྱོད་སྐོར་ལ། ཚང་མས་བློ་གཟུ་བོར་གནས་ཤིང་བདེན་པ་གཞི་ལ་བཞག་སྟེ་བསམ་ཚུལ་བརྗོད་དེ་བགྲོ་གླེང་རེ་གནང་རོགས།
དེང་སྐབས་གཞུང་གི་ལས་བྱེད་ནང་ལའང་། རང་གི་དགའ་མོས་དགའ་ཕྱོགས་ཡར་འཐེན་བྱེད་པ་ལས། དངོས་ནས་དྲང་ནས་མི་དྲང་ཚུགས་ཅན། སློབ་སྦྱོང་ཡོད་མཁན་སོགས་ལ་བདག་པོ་མི་རྒྱག དུས་དེང་སང་རྟ་འདོ་བའི་བོངས་ཁ་ཇེ་དམའ་དང་། བོང་སྐྱ་ལིའི་བསྟན་པ་ཇེ་དར་རེད། མདོར་བསྡུས་ན་ངུ་ཡང་ངུ་མཆི་མ་མི་ཡོང་དུས་རེད།
དུས་སྔ་མོ་མི་བཟང་བཞུགས་ས་ལ་།
དུས་དེང་སང་མི་ངན་འཛོམས་ས་རེད་།
དུས་སྔ་མོ་ལས་འབྲས་སྲུང་མཁན་མང་།
དུས་དེང་སང་ལས་འབྲས་བཤོད་མཁན་མང་།
ཕ་ཨ་ཁུ་ཙནྡ་སྡོང་པོ་རེད་།
རྒྱུད་བུ་ཕྲུག་ཚེར་ཤིང་ལོ་མ་རེད་།