སམ་སཱང་ལ་བྱུང་མ་མྱོང་བའི་དཀའ་རྙོག་འབྱུང་ཉེན་འདུག་ཟེར།

 སི་ཨིན་ཨིན་གྱིས་གནས་ཚུལ་སྤེལ་བ་ལྟར་ན། ཁ་སང་སམ་སཱང་གློག་འཕྲུལ་བཟོ་གྲྭའི་འགན་འཛིན་ཀཱ་ཝོན་ཨོ་ཧུ་འུན་(Kwon Oh-hyun)གྱིས་སམ་སཱང་བཟོ་གྲྭ་ནས་རྩ་དགོངས་ཞུས་ཡོད་པ་དང་། ཁ་སང་ནི་རྒྱལ་སྤྱིའི་ཁྲོམ་རའི་ནང་སམ་སཱང་བཟོ་གྲྭའི་མ་འོངས་ཚོང་གི་ཁེ་བཟང་སྔར་ལས་བཞི་ཆ་གཅིག་གིས་མང་དུ་འགྲོ་རྒྱུ་ཡིན་པའི་སྔོན་བརྡ་འབྱོར་བའི་ཉིན་མོའང་ཡིན་འདུག

ཀཱ་ཝོན་གྱིས་རྩ་དགོངས་ཞུས་རྗེས། དུས་ཡུན་རིང་པོ་ཞིག་ནས་རྩ་དགོངས་ཞུ་འདོད་ཡོད་ཀྱང་། ད་ལྟ་བར་དུ་རྩ་དགོངས་ཞུ་མ་ཐུབ་པར་ལྷག་སོང་བ་དང་། དེང་སྐབས་སམ་སཱང་བཟོ་གྲྭ་དེ་ཕྱི་ནང་གཉིས་ཀར་སྔོན་ཆད་བྱུང་མ་མྱོང་བའི་དཀའ་རྙོག་ཅིག་ཡོང་བའི་ཉེན་ཁ་ཡོད་པར་བརྟེན། སམ་སཱང་བཟོ་གྲྭ་འདི་རྣམ་པ་གསར་པ་ཞིག་ལ་ཁ་ཕྱོགས་བསྒྱུར་དགོས་པའི་དུས་ཚོད་བསླེབས་འདུག་དྲན་གྱི་ཡོད། སམ་སཱང་བཟོ་གྲྭ་འདི་མགོ་ཁྲིད་གསར་པ་དང་སེམས་ཤུགས་ཡོད་མཁན་ཚོས་དེང་སྐབས་ཀྱི་འགྱུར་བ་སྐྱེན་པའི་འཕྲུལ་ཆས་བཟོ་གྲྭའི་དཀའ་ངལ་དེ་དག་ལ་གདོང་ལེན་དང་རྣམ་པ་གསར་པ་ཞིག་བསྐྲུན་ཐུབ་པའི་ཡིད་ཆེས་ཡོད། ཅེས་བརྗོད་འདུག

སིང་ག་པུར་རྒྱལ་ཁབ་ཀྱི་བཟོ་ལས་འཕྲུལ་རིག་གི་མི་སྣ་གཙོ་གྲས་རཱ་ཡན་ལཱིམ་(Ryan Lim)གྱིས། ད་ལྟའི་སམ་སཱང་འཛིན་སྐྱོང་གི་སྒྲོམ་གཞི་ནི་མགོ་རྙོག་ཅན་ཞིག་ཡིན་པ་དང་། གནས་སྐབས་དཀའ་རྙོག་དེ་གཙང་སེལ་བྱེད་ཐུབ་རྒྱུ་ཁག་པོ་རེད། གང་ཡིན་ཟེར་ན། དེ་ནི་སམ་སཱང་བཟོ་གྲྭའི་མགོ་འཁྲིད་ཀྱི་དཀའ་རྙོག་ཅིག་རེད། ཅེས་བརྗོད་འདུག

ཀཱ་ཝོན་ཨོ་ཧུ་འུན་ནི་སམ་སཱང་གློག་འཕྲུལ་བཟོ་གྲྭར་འགན་འཛིན་གཙོ་བོ་གསུམ་ཡོད་པའི་ནང་ནས་གཅིག་ཡིན་སྟབས། ཕྱི་ལོ་  ༢༠༡༨ ལོའི་ཟླ་ ༣ བར་དུ་ཁོང་གིས་འགན་འཛིན་ལྷན་ཚོགས་ནང་ལས་ཀ་བྱེད་དགོས་ཀྱི་ཡོད་འདུག སམ་སཱང་བཟོ་གྲྭའི་འབྲེལ་མཐུད་པས་གང་མགྱོགས་སམ་སཱང་གློག་འཕྲུལ་བཟོ་གྲྭའི་འགན་འཛིན་འདེམས་སྒྲུག་བྱ་རྒྱུ་ཡིན་ཡང་། ད་ལྟའི་ཆར་ཟླ་ཚེས་ག་དུས་ཤིག་ལ་འགན་འཛིན་འདེམས་སྒྲུག་བྱ་རྒྱུ་ཡིན་མིན་བཤད་ཐུབ་ཀྱི་མི་འདུག ཅེས་བརྗོད་ཡོད་པ་རེད།

སམ་སཱང་བཟོ་གྲྭའི་སྦྱིན་བདག་ལི་ཇའེ་ཡཱོང་(Lee Jae-yong)གིས་ལྐོག་དངུལ་ཨ་སྒོར་ས་ཡ་ ༣༦ སྤྲད་པའི་ནག་ཉེས་འོག ད་ལོའི་ཕྱི་ཟླ་ ༨ པར་ཁྲིམས་ཁང་ནས་ཁོང་ལ་ལོ་ ༥ བཙོན་འཇུག་ཁྲིམས་ཆད་ཕོག་ཡོད་འདུག ཡིན་ནའང་། སམ་སཱང་གི་ཚོང་ལ་དོ་ཕོག་གང་ཡང་བྱུང་མེད་པ་མ་ཟད། དེང་སྐབས་རྒྱལ་སྤྱིའི་ཁ་པར་ཁྲོམ་རའི་ནང་སམ་སཱང་ནི་ཁེ་བཟང་ཆེས་མང་ཤོས་ཤིག་ཡིན་པ་དང་། ད་ལོ་ནས་སམ་སཱང་གི་ཁ་པར་གྱི་བྱང་བུའི་(Memory Chips)ཤོང་ཚད་སྤར་བར་བརྟེན་ལོ་སྔོན་མ་དང་བསྡུར་ན། ད་ལོའི་ཕྱི་ཟླ་ ༧། ༨། ༩ བཅས་ཀྱི་ནང་ཚོང་གི་ཁེ་བཟང་ལྡབ་གསུམ་གྱིས་འཕར་ཡོད་འདུག

གསར་འགོད་པ། ཉི་མ་ཚེ་རིང་།