དྷ་ས་གངས་སྐྱིད་སིལ་སྤོལ་རྩེད་ཐང་ལ་སྒོ་ལྕགས་བརྒྱབས་པར་བརྟེན་རྩེད་མོ་བ་ཚོས་རྩེད་ཐང་གི་ལྕགས་ར་གཏོར་ཏེ་ནང་དུ་གད་སྙིགས་མང་པོ་གཡུགས་འདུག
བཞུགས་སྒར་དྷ་རམ་ས་ལའི་གངས་སྐྱིད་བོད་ཀྱི་གཞོན་ནུའི་རུ་ཁག་གིས་སྤྱི་ཚོགས་ནང་ཞལ་འདེབས་བསྡུ་སློང་བྱས་པ་བརྒྱུད། ཕྱི་ལོ་ ༡༩༨༠ ཡས་མས་སུ་གངས་སྐྱིད་སིལ་སྤོལ་རྩེད་ཐང་གསར་དུ་བརྒྱབས་ཡོད་པ་དང་། ཕྱི་ལོ་ ༢༠༡༥ ལོར་བོད་མིའི་སྒྲིག་འཛུགས་ནང་སྲིད་ལས་ཁུངས་ནས་དྷ་ས་ཁུལ་གྱི་ན་གཞོན་ཚོའི་འཕྲོད་བསྟེན་བདེ་ཐང་ཆེད་སིལ་སྤོལ་རྩེད་ཐང་ལ་བཟོ་བཅོས་གནང་སྟེ་རྩེད་ཐང་སྔར་ལས་འཐུས་སྒོ་ཚང་བ་ཞིག་ཏུ་བཟོས་གནང་ཡོད་ཀྱང་། ད་ལྟའི་ཆར་རྩེད་ཐང་ལ་སྒོ་ལྕགས་བརྒྱབས་ནས་བཞག་ཡོད་པར་བརྟེན། རྩེད་མོ་རྩེ་མཁན་ཚོས་རྩེད་ཐང་སྒོ་ཆེན་འགྲམ་གྱི་ལྕགས་ར་གཏོར་ཏེ་ནང་དུ་འཛུལ་བ་མ་ཟད། རྩེད་ཐང་གི་གྲུ་ག་བཞི་ལ་གད་སྙིགས་སྒམ་བཞག་ཡོད་ཀྱང་རྩེད་མོ་བ་ཚོས་གད་སྙིགས་གང་བྱུང་དུ་གཡུགས་འདུག
འདི་གའི་གསར་འགོད་པས་ཁ་པར་བརྒྱུད་དྷ་ས་ས་གནས་གཞོན་ནུའི་ལམ་སྟོན་པ་བསྟན་འཛིན་བརྩོན་འགྲུས་ལགས་དང་ས་རྒྱུན་སྐལ་བཟང་ལགས་སུ་རྩེད་ཐང་གི་སྐོར་ལ་སྐད་ཆ་དྲིས་པ་ལྟར་ན། ད་ལྟའི་ཆར་སིལ་སྤོལ་རྩེད་ཐང་ལ་ས་གནས་གཞོན་ནུས་ལྟ་རྟོག་གནང་གི་ཡོད་པ་དང་། ཉེ་སྔོན་བོད་མིའི་སྒྲིག་འཛུགས་ནས་རྩེད་ཐང་རྩིས་སྤྲོད་དགོས་པའི་ཡིག་ཆུང་ཞིག་ས་གནས་གཞོན་ནུར་འབྱོར་ཡོད་ཀྱང་། གཞོན་ནུ་ལྷན་ཚོགས་ནས་གནས་མཆོག་རྡོ་རྗེ་གདན་དུ་སྤྱི་ཚོགས་ཞབས་ཞུ་ཞུ་ཡི་ཡོད་པ་དང་། རྒྱ་གར་རྒྱལ་ཡོངས་ནང་བོད་དོན་གོ་རྟོགས་སྤེལ་བའི་སྐོར་སྐྱོད་ལས་འགུལ་འགྲོ་བཞིན་པ་སོགས་ཀྱིས་རྒྱུན་ལས་མང་པོ་ཞིག་བྲེལ་བ་ཆེན་པོ་ཡིན་སྟབས། སིལ་སྤོལ་རྩེད་ཐང་རྩིས་སྤྲོད་སྐོར་ལ་ཐག་གཅོད་ཐུབ་མེད་ཀྱང་། གཞོན་ནུ་ལྷན་ཚོགས་ནས་རྩེད་ཐང་ལ་ལྟ་རྟོག་ཆེད་རྒྱུས་ཡོད་སིལ་སྤོལ་རྩེད་མཁན་འགའ་ཞིག་ལ་ལྟ་རྟོག་བྱེད་རོགས་ཞེས་རེ་སྐུལ་གནང་ཡོད་སྐོར་བརྗོད་བྱུང་།
ནང་སྲིད་ལས་ཁུངས་ས་ཁང་འགན་འཛིན་དངོས་གྲུབ་འོད་ཟེར་ལགས་ཀྱིས་གསར་འགོད་པར། བོད་མིའི་སྒྲིག་འཛུགས་ངོས་ནས་བོད་རིགས་གཞོན་སྐྱེས་ཚོའི་འཕྲོད་བསྟེན་བདེ་ཐང་ཡོང་ཆེད། ཕྱི་ལོ་ ༢༠༡༥ ལོར་འགྲོ་གྲོན་ཧིན་སྒོར་འབུམ་ ༦༠ ལྷག་ཙམ་བཏང་ནས་བཟོ་བཅོས་གནང་ཡོད་པ་མ་ཟད། བོད་མིའི་སྒྲིག་འཛུགས་དང་ས་གནས་བོད་ཀྱི་གཞོན་ནུ་ལྷན་ཚོགས་བར་གྲོས་ཆོད་ཅིག་བཞག་སྟེ། གཞོན་ནུ་ལྷན་ཚོགས་ནས་མུ་མཐུད་གངས་སྐྱིད་སིལ་སྤོལ་རྩེད་ཐང་ལ་ལྟ་རྟོག་བྱེད་པའི་འོས་འགན་སྤྲད་ཡོད་ཀྱང་། ཉེ་སྔོན་རྩེད་ཐང་དུ་བྱིས་པ་ཚོས་རྐང་འཁོར་ཞོན་པ་དང་གད་སྙིགས་གང་བྱུང་དུ་གཡུགས་པ་སོགས་ཀྱིས་ནང་སྲིད་ལས་ཁུངས་ནས་སྒོ་ལྕགས་བརྒྱབས་ཡོད་པ་མ་ཟད། འཛིན་སྐྱོང་བཀའ་ཤག་ནས་རྩེད་ཐང་ལ་ལྟ་རྟོག་བྱེད་པའི་འགན་དབང་རྩིས་ལེན་གནང་འཆར་ཡོད་སྐོར་བརྗོད་བྱུང་།
ཕྱི་ལོ་ ༢༠༡༥ ལོར་བོད་མིའི་སྒྲིག་འཛུགས་དང་གཞོན་ནུའི་བར་བཞག་པའི་གྲོས་ཆོད་ནང་དུ། སིལ་སྤོལ་རྩེད་ཐང་གི་ས་ཆའི་བདག་དབང་དངོས་དེ་བོད་མིའི་སྒྲིག་འཛུགས་ལ་ཡོད་པ་དང་། གཞོན་ནུ་ལྷན་ཚོགས་ནས་མུ་མཐུད་རྩེད་ཐང་བདག་ཉར་གནང་བའི་བཀའ་འཁྲོལ་ཐོབ་ཡོད་ཀྱང་། གལ་སྲིད་བོད་མིའི་སྒྲིག་འཛུགས་ལ་དགོས་མཁོ་བྱུང་ཚེ་ཀ་ཀོར་མེད་པར་རྩིས་འབུལ་ཞུ་དགོས་སྐོར་བཀོད་ཡོད་འདུག་ལ། ད་ལྟ་བར་དུ་བོད་ཀྱི་གཞོན་ནུ་ལྷན་ཚོགས་ནས་རྩེད་ཐང་ལ་ཆེད་དུ་སྒོ་སྲུང་བ་བཞག་སྟེ་གཙང་སྦྲ་བདག་ཉར་བྱས་ཡོད་ཀྱང་། ཐེངས་གཉིས་ལ་སྒོ་ལྕགས་གཏོར་ཡོད་འདུག
གསར་འགོད་པ། སྐལ་བཟང་སྤྱིན་པ།
གསར་འགྱུར་རྫོགས་ནས།
ལག་རྩེད་སྤོ་ལོ་རྩེད་ཐང་དུ་སྤོ་ལོ་རྩེད་མ་བཅུག་ན་ད་ག་རེ་བྱས་ཏེ་བརྒྱབ་པ་རེད། མཐུན་རྐྱེན་ཡོད་བཞིན་དུ་བཞག་ན་ག་རེ་འདུག
རྩེད་ཐངས་ལ་སྒོ་ལྕག་རྒྱབ་ནས་ལྷ་ཁང་བཟོ་འདོད་མ་རེད་དམ་ཧཧཧ
རྩེད་ཐང་རེད་དམ་རྩོད་ཐང་རེདཧཧཧ
བོད་མི་མང་དག་ཞིག་གི་ཚེ་འདིར་ཕྱི་དང་ལས་རྒྱུས་འབྲས་།ད་དུང་ཕན་མ་ཐོག་ན་གནོད་མ་སྐྱེལ་ཟེར་བཤད་བཞིན་ཡོད་པ་རེད།འོན་ཀྱང་དོན་དངོས་ལ་བོད་མི་མི་ཉུང་བས་ཀྱི་བྱེད་སྟངས་དེ་ལྟར་རེད།མ་ཚད་སྤྱི་ཚོགས་ལ་འགན་འཁུར་ནས་ལས་ཀ་བྱེད་མཁན་ཉུང་ཉུང་རེད།
འོས་བསྡུའི་གོང་ལ་གངས་སྐྱིད་དང་དེ་བཞིན་ས་གནས་གཞན་མང་པོར་དངུལ་སྒོར་འབུམ་ཕྲག་མང་པོ་བཏང་སྟེ་རྩེད་ཐང་བཟོས་པ་རེད། འོས་བསྡུ་ཚར་རྗེས་རྩེད་ཐང་མང་ཆེ་བ་གད་སྙིགས་གཡུག་ས་ཆགས་པ་རེད། ཐོག་མའི་ཀུན་སློང་ནས་ནོར་ཚར་སྟབས་ད་ཐབས་ཤེས་གང་ཡང་ཡོད་མ་རེད།