རྒྱ་གར་གཞུང་གིས་དབུལ་ཕོངས་མི་མང་ས་ཡ་ ༡ ལྷག་གི་ཁྱིམ་ཚང་རེར་ལོ་གཅིག་ནང་ཧིན་སྒོར་འབུམ་ ༥ རེས་སྨན་བཅོས་ལྟ་སྐྱོང་གནང་སྟེ་འཛམ་གླིང་ཐོག་འཕྲོད་བསྟེན་ལས་གཞི་ཤུགས་ཆེ་ཤོས་དེ་སྤེལ་རྒྱུ་ཡིན་སྐོར་བསྒྲགས་འདུག
རྒྱ་གར་གྱི་བརྒྱུད་ལམ་ཁག་གིས་གནས་ཚུལ་སྤེལ་བ་ལྟར་ན། ཟླ་འདིའི་ཕྱི་ཚེས་ ༢ ཉཱིན་རྒྱ་གར་གྱི་དཔལ་འབྱོར་བློན་ཆེན་སྐུ་ཞབས་ཨ་རོན་ཇའེ་ཊི་ལེ་(Arun Jaitley)ལགས་ནས་རྩིས་ལོ་ ༢༠༡༨ དང་ ༢༠༡༩ ཡི་སྔོན་རྩིས་གཏན་འབེབས་གསལ་བསྒྲགས་གནང་ཡོད་པ་དང་། འདི་ལོར་རྒྱ་གར་གཞུང་ནས་འཕྲོད་བསྟེན་ཐོག་ལས་གཞི་ཆེན་པོ་གཉིས་བཟོས་ཡོད་པ་ནི་ཧིན་སྒོར་དུང་ཕྱུར་ ༡༢༠ གཏང་སྟེ། རྒྱ་གར་རྒྱལ་ཡོངས་སུ་འཕྲོད་བསྟེན་བདེ་ཐང་དང་འབྲེལ་བའི་ལྟེ་གནས་ཁང་འབུམ་ ༡.༥ འཛུགས་སྐྲུན་གྱི་ལས་གཞི་མགོ་འཛུགས་རྒྱུ་དང་། ད་ལྟའི་རྒྱ་གར་གྱི་སྨན་བཅོས་ལྟ་སྐྱོང་གི་ལས་གཞིའི་ནང་འཛུལ་ཞུགས་བྱེད་ཐུབ་ཀྱི་མེད་པའི་དབུལ་ཕོངས་མི་མང་ས་ཡ་ ༡ ལྷག་ལ་སྨན་བཅོས་ལྟ་སྐྱོང་གི་ལས་གཞི་གསར་པ་ཞིག་བཟོས་ཏེ། ལོ་རེར་དབུལ་ཕོངས་མི་ཚང་རེར་ཧིན་སྒོར་འབུམ་ ༥ རེ་ཡི་འཕྲོད་བསྟེན་ལྟ་སྐྱོང་གནང་རྒྱུ་ཡིན་སྐོར་སོགས་བསྒྲགས་ཡོད་འདུག
རྒྱ་གར་གྱི་སྲིད་བློན་མུ་དྷི་མཆོག་གིས། འདི་ནི་སྲིད་གཞུང་གིས་མ་དངུལ་བཏང་སྟེ་བཙུགས་པའི་འཛམ་གླིང་གི་འཕྲོད་བསྟེན་ལས་གཞི་ཤུགས་ཆེ་ཤོས་དེ་ཆགས་ཀྱི་ཡོད་ཅེས་གསུངས་ཡོད་པ་དང་། དཔལ་འབྱོར་བློན་ཆེན་སྐུ་ཞབས་ཨ་རོན་ལགས་ཀྱིས། ང་ཚོའི་རྒྱལ་ཁབ་ནང་མི་མང་འབུམ་ཕྲག་མང་པོས་རང་ཁྱིམ་གྱི་རྒྱུ་ནོར་བཙོང་བ་དང་མི་གཞན་གྱི་ལག་ནས་དངུལ་གཡར་བ་སོགས་བྱས་ཏེ། སྨན་བཅོས་ཐབས་འཚོལ་བྱེད་ཀྱིན་ཡོད་པ་ང་ཚོ་ཚང་མས་ཤེས་གསལ་རེད། དེར་བརྟེན་གཞུང་ངོས་ནས་དབུལ་ཕོངས་དང་ཉེན་ཁའི་ནང་ལྷུང་བའི་མི་མང་གི་དཀའ་ངལ་སེལ་ཐབས་སུ་བསམ་ཞིབ་ནན་ཏན་བྱེད་ཀྱིན་ཡོད། ཅེས་གསུངས་འདུག
འཕྲོད་བསྟེན་ལྟ་སྐྱོང་གི་ལས་གཞི་གསར་པའི་ནང་རྒྱ་གར་རྒྱལ་ཡོངས་སུ་སྨན་གྱི་མཐོ་སློབ་ཁག་ ༢༤ གསར་འཛུགས་ཀྱིས། མངའ་སྡེ་རེ་རེའི་ནང་གཞུང་འབྲེལ་སྨན་གྱི་མཐོ་སློབ་རེ་ཡོད་པ་བཟོ་རྒྱུ་དང་། དེ་བཞིན། རྫོང་རིམ་པ་ཁག་གི་ནང་ཡོད་པའི་གཞུང་གི་སྨན་ཁང་ཁག་རྒྱ་སྐྱེད་དང་གསར་འཛུགས་སོགས་གནང་སྟེ། རྒྱ་གར་མི་མང་ལ་འཕྲོད་བསྟེན་གྱི་མཐུན་རྐྱེན་འཕེལ་རྒྱས་གཏོང་རྒྱུ་ཡིན་པ་མ་ཟད། ན་ཚ་མང་ཆེ་བར་རིན་མེད་ཐོག་སྨན་བཅོས་བྱ་རྒྱུ་ཡིན་འདུག
ཕྱི་ལོ་ ༢༠༡༩ ལོར་བྷེ་ཇི་ཕི་ཚོགས་པའི་གཞུང་འཛིན་དུས་ཡུན་རྫོགས་ཀྱི་ཡོད་སྟབས། ཁ་གཏད་སྲིད་དོན་པ་མང་པོ་ཞིག་གིས་མུ་དྷི་གཞུང་ནས་མི་མང་གི་བདེ་སྡུག་གཙོ་བོར་བཟུང་བའི་ལས་གཞི་རིགས་ཁྱབ་བསྒྲགས་བྱེད་ཀྱིན་ཡོད་པ་དེ་ཆབ་སྲིད་ཀྱི་དམིགས་འབེན་ཁོ་ན་ལས་ལག་ལེན་ཐོག་གང་ཡང་མེད་སྐོར་དང་། ཡང་ཆབ་སྲིད་དཔྱད་བརྗོད་པ་ཁག་ཅིག་གིས། མུ་དྷི་གཞུང་ནས་འདི་ལོ་རྒྱ་གར་གྱི་དཔལ་འབྱོར་དང་། མི་མང་གི་འཕྲོད་བསྟེན། དེ་བཞིན། ཞིང་ལས་སོགས་ཀྱི་ཐོག་ནུས་ཤུགས་ཡོད་རྒུ་བཏོན་ཏེ། མགྱོགས་མྱུར་ངང་རྒྱལ་ཡོངས་འོས་བསྡུ་ཆེན་མོ་བྱས་ཏེ་ཕྱི་ལོ་ ༢༠༢༢ ལོའི་རྒྱ་གར་གསར་པ་ཞེས་པའི་ཕུགས་མདུན་གྱི་ཕྱོགས་སུ་བསྐྱོད་འདོད་ཡོད་སྐོར་སོགས་བརྗོད་ཀྱི་འདུག
གསར་འགོད་པ། སྐལ་བཟང་སྦྱིན་པ།
![FILE - Venezuelan opposition leader Maria Corina Machado gestures at a protest ahead of the Friday inauguration of President Nicolas Maduro for his third term, in Caracas, Venezuela January 9, 2025. [File photo: Reuters/Maxwell Briceno]](https://tibettimes.net/wp-content/uploads/2025/10/Maria-Corina-Machado--360x180.jpg)
གཞུང་པ་ཚེ་དབང་བསོད་ནམས་ལགས།
ཆོས་ལྡན་རྒྱལ་ཁབ་རྒྱ་གར་གྱི་གཞུང་དེ་བཞིན་ཧ་ཅང་ཡག་པོ་རེད། འོན་ཀྱང་བསམ་ཤེས་མེད་པའི་མི་འགའ་རེས་གཞུང་དངུལ་ལྐོག་བཟའ་བྱེད་པ་དེ་ཤིན་ཏུ་བྱ་སྤྱོད་ངན་པ་ཞིག་རེད། ངས་བྱས་ན་རྒྱ་གར་ནང་གཞུང་དངུལ་ལྐོག་བཟའ་བྱེད་སེམས་བཅངས་མཁན་དེ་དག་ལག་ཏུ་ཐེབས་ཚེ་གཞུང་གིས་རྒྱ་ཡན་དུ་མི་གཏོང་བར་ཉེས་ཆད་ལྗིད་པོ་ཞིག་བཟོས་ན་ད་བཟོད་རྒྱ་གར་གཞུང་དང་མི་མང་ལ་རེ་བ་ཡོད་པ་རེད།
གཞན་རྒྱ་གར་གཞུང་གིས་དངུལ་ག་ཚོད་བཏང་ཡང་མི་མང་སྐྱོ་པོ་དེ་ཚོའི་ལག་ཏུ་རག་གི་མེད་པའི་བསམ་ཚུལ་དང་དངོས་ཡོད་གནས་སྟངས་ང་ཚོས་ཤེས་ཤེས་པ་རེད།
དེར་བརྟེན་གཞུང་པ་ཚེ་བསོད་ལགས་ཀྱི་ཆབ་སྲིད་རིག་པའི་སྒྲུང་སྙན་ཟེར་བ་དེ་ནི་ཧ་ཅང་བློ་ཕམ་དགོས་པའི་བསམ་ཚུལ་རེད། ་དེ་ཚོའི་གྲས་རྒྱ་གར་གཞུང་ལ་ཁ་གཏོང་སྟངས་ཤིག་ཆགས་ཀྱི་རེད་མ་གཏོགས་དོན་དམ་གྱི་དམངས་ཕན་བསམ་ཚུལ་ཞིག་གཏན་ནས་མ་རེད་དོ།
ཆབ་སྲིད་རིག་པས་སྒྲུང་སྙན་མི་མང་བསླུས་།
འོས་ཤོག་ཐོབ་པའི་སྒྲ་སྒྲིག་སྔོན་རྩིས་ནང་།
ཁ་སྙན་ལག་ལྟར་མེད་པའི་སྒྲུང་རིང་འོག་།
ཉམས་ཆུང་མི་མང་བསླུ་བའི་སྔོན་རྩིས་ཙམ་།