ཧོང་ཀོང་གི་རྔམ་སྟོན་ཁྲོམ་སྐོར་བསྐྱར་དུ་སྤེལ་འཆར་འདུག

རྒྱ་ནག་གཞུང་གིས་ཕྱིའི་བརྒྱུད་ལམ་དང་སྤྱི་ཚོགས་དྲ་ལམ་ཁག་དམ་དྲག་བྱས་ཏེ་ཧོང་ཀོང་ནང་གི་ངོ་རྒོལ་ལས་འགུལ་སྐོར་རྒྱ་ནག་མི་མང་གིས་ཤེས་རྟོགས་མི་ཡོང་བར་ཐབས་ལམ་ཡོད་རྒུ་འདོན་གྱི་ཡོད་འདུགདེ་རིང་རྒྱལ་སྤྱིའི་ཨལ་རྗེ་ཛ་ར་(aljazeera)གསར་ཁང་གིས་སྤེལ་བའི་གནས་ཚུལ་ལྟར་ན། ཧོང་ཀོང་གི་ཉེས་ཅན་རྩིས་སྤྲོད་ཀྱི་ཁྲིམས་འཆར་རྩིས་མེད་གཏོང་ཐབས་ཀྱི་རྔམ་སྟོན་ཁྲོམ་སྐོར་གྱི་ལས་འགུལ་མགོ་འཁྲིད་པ་སྤྱི་དམངས་འགྲོ་བ་མིའི་ཐོབ་ཐང་ཚོགས་པའི་(Civil Human Rights Front)ཚོགས་གཙོ་ཇི་མི་ཤེམ་(Jimmy Sham)ལགས་སོགས་ཀྱིས། བདུན་ཕྲག་འདིའི་གཟའ་ཉི་མའི་ཉིན་བསྐྱར་དུ་གཞི་རྒྱ་ཆེ་བའི་ལས་འགུལ་སྤེལ་རྒྱུ་ཡིན་པས་མི་མང་གང་མང་མང་འདུ་འཛོམས་ཡོང་བའི་འབོད་སྐུལ་གསལ་བསྒྲགས་གནང་འདུག

ལས་འགུལ་སྣེ་འཁྲིད་པ་ཇི་མི་ཤེམ་ལགས་ཀྱིས་གསར་འགོད་པར་གཟའ་ཉི་མའི་ཉིན་ང་ཚོས་བསྐྱར་དུ་རྔམ་སྟོན་ཁྲོམ་སྐོར་གྱི་ལས་འགུལ་སྤེལ་འཆར་ཡོད་ལ། ང་ཚོས་ཉེས་ཅན་རྩིས་སྤྲོད་ཀྱི་ཁྲིམས་འཆར་རྩིས་མེད་མ་གཏང་བར་དང་ཧོང་ཀོང་མི་མང་གི་ཆེད་དུ་གནད་དོན་ཐག་གཅོད་མ་བྱུང་བར་དུ་མུ་མཐུད་ལས་འགུལ་སྤེལ་རྒྱུ་ཡིན།  སྲིད་གཞུང་གིས་ང་ཚོར་ཡ་ལན་མ་བྱས་པ་དང་དྲག་སྤྱོད་རྩུབ་རྡུང་སྤེལ་བ་དེས་ང་ཚོ་དེ་བས་ཀྱང་བློ་སྤོབས་དང་སྟོབས་ཤུགས་ཆེ་རུ་ཕྱིན་ཡོད་པ་དང་། མ་འོངས་པར་མུ་མཐུད་ཧོང་ཀོང་མི་མང་དེ་ལས་མང་བ་ལས་འགུལ་ནང་མཉམ་ཞུགས་བྱ་རྒྱུ་ཡིན་པ་རེད། ཅེས་བརྗོད་འདུག

གསར་འགྱུར་བརྒྱུད་ལམ་ཁ་ཤས་ནང་ད་ལྟའི་ཆར་ཧོང་ཀོང་མི་མང་གི་རྔམ་སྟོན་ཁྲོམ་སྐོར་ཁྲོད་མི་གྲངས་ ༡༠༠ ལྷག་ལ་རྨས་སྐྱོན་ཕོག་ཡོད་པ་དང་།  མི་ཁ་ཤས་ཀྱི་མགོ་ལ་འགྱིག་མདེལ་གྱིས་བརྒྱབས་ཏེ་རྨས་སྐྱོན་བྱུང་ཡོད་སྐོར་བརྗོད་འདུག ཡིན་ནའང་། ཧོང་ཀོང་ཉེན་རྟོག་ལས་ཁུངས་ཀྱིས་ད་ལྟའི་བར་ལས་འགུལ་ཁྲོད་མི་གྲངས་ ༧༩ ཙམ་ལ་མ་གཏོགས་རྨས་སྐྱོན་བྱུང་མེད་སྐོར་བརྗོད་འདུག་ལ།  གྲོང་ཁྱེར་སྨན་ཁང་གིས་རྨས་སྐྱོན་བྱུང་བའི་ཁྲོད་མི་མང་དང་ཉེན་རྟོག་པ་གཉིས་ཀ་ཡོད་སྐོར་བརྗོད་འདུག

ཧོང་ཀོང་ནང་རྔམ་སྟོན་ཁྲོམ་སྐོར་བྱུང་བ་ནས་རྒྱ་ནག་སྐམ་ས་ཆེན་མོའི་ནང་རྒྱ་ནག་གཞུང་གིས་ཕྱིའི་གསར་འགྱུར་བརྒྱུད་ལམ་ཁག་དང་། དོགས་གཞི་ཡོད་པའི་སྐད་འཕྲིན་དང་ཝེ་པོ་དྲ་རྒྱའི་མི་སྒེར་དྲ་ཁུངས་སོགས་ལ་དམ་དྲག་ཆེན་པོ་བྱེད་བཞིན་ཡོད་པ་དང་། རྒྱ་ནག་ནང་ཐེངས་འདིའི་ལས་འགུལ་དང་དྲུག་བཞིའི་དོན་རྐྱེན་སོགས་ཀྱི་གནས་ཚུལ་ཡོངས་རྫོགས་བཀག་བསྡོམ་བྱས་ཏེ། རྒྱ་ནག་མི་མང་ཁྲོད་ཧོང་ཀོང་གི་ངོ་རྒོལ་ལས་འགུལ་ཤེས་རྟོགས་མི་ཡོང་བའི་ཐབས་ལམ་ཡོད་རྒུ་འདོན་གྱི་ཡོད་པ་མ་ཟད། ཧོང་ཀོང་ནས་ཡིན་པའི་རྒྱ་ནག་དམར་ཤོག་ཚོགས་པའི་མཐོ་རིམ་སློབ་གྲྭའི་ཉམས་ཞིབ་པ་རྒན་གྲས་ཤིག་ཧོང་ཀོང་ནང་དངོས་སུ་ཕྱིན་ཏེ། ཐེངས་འདིའི་ལས་འགུལ་གྱི་བྱུང་རྐྱེན་སོགས་ལ་ཞིབ་འཇུག་བྱེད་ཀྱི་ཡོད་པ་དང་། ཁོང་གིས་ཐེངས་འདིའི་ལས་འགུལ་གྱིས་རྒྱ་ནག་སྐམ་ས་ཆེན་མོར་སིམ་འཛུལ་གྱིས་དམར་ཤོག་ཚོགས་པར་འཐོར་ཞིག་ལ་ཉེན་ཁ་ཡོད་སྐོར་བརྗོད་འདུག ཕྱི་ཚེས་ ༡༢ ཉིན་ཧོང་ཀོང་གི་ཉེས་ཅན་རྩིས་སྤྲོད་ཀྱི་ཁྲིམས་འཆར་ཐད་འཐུས་མི་ ༧༠ ལས་གྲུབ་པའི་ཧོང་ཀོང་གི་ཁྲིམས་བཟོ་ལྷན་ཚོགས་ནས་བགྲོ་གླེང་ཐེངས་གཉིས་པ་དེ་འཚོག་གཏན་ཁེལ་ཡོད་ཀྱང་མི་མང་གི་ངོ་རྒོལ་ཤུགས་ཆེན་བྱས་རྐྱེན་ཕྱིར་འཐེན་བྱས་ཡོད་པ་ལྟར། དེ་རིང་ཁ་སང་གཉིས་ལ་མུ་མཐུད་ཕྱིར་འགྱངས་བྱས་ཡོད་པ་མ་ཟད། ད་ལྟའི་ཆར་ཁྲིམས་འཆར་དེའི་ཐོག་ག་དུས་བགྲོ་གླེང་བྱེད་མིན་གྱི་དུས་ཚེས་གཏན་འཁེལ་གསལ་བསྒྲགས་རིགས་བྱས་མེད་པ་དང་། ཕྱི་ཚེས་ ༡༢ ཉིན་ཧོང་ཀོང་གི་ས་གནས་གསར་ཁང་ཞིག་གིས་ཧོང་ཀོང་སྤྱི་ཁྱབ་ལྕམ་ཀེ་རི་ལམ་(Carrie Lam)ལགས་དེའི་སྐོར་བཅར་འདྲི་བྱེད་སྐབས། ལྕམ་ཀེ་རི་ལམ་ལགས་ཀྱིས་ང་རང་ཧོང་ཀོང་མི་མང་མཉམ་དུ་གནས་འདིར་འཚར་ལོངས་བྱུང་བ་དང་། ང་རང་ཧོང་ཀོང་ལ་དགའ་བའི་རྐྱེན་གྱིས་མི་སྒེར་གྱི་ལས་གནད་དོན་མང་པོ་ཞིག་བློས་གཏོང་མང་པོ་ཞིག་བྱེད་དགོས་བྱུང་བ་དང་། ཧོང་ཀོང་གཞུང་གིས་མི་མང་ལ་ཁེ་ཕན་མེད་པའི་ཁྲིམས་གཞི་ཞིག་ལག་བསྟར་བྱ་མི་སྲིད་ལ། ང་རང་གིས་ཧོང་ཀོང་གཞུང་གིས་དུས་རྒྱུན་མི་མང་གི་འདོད་མོས་དང་མཐུན་པའི་ལས་དོན་གཉེར་གྱི་ཡོད་བསམ་ཡོད། ཅེས་བརྗོད་འདུག

དེ་རིང་ཧོང་ཀོང་རང་དབང་གསར་ཁང་གིས་སྤེལ་བའི་གནས་ཚུལ་ནང་། ཨ་རིའི་གྲོས་ཚོགས་གོང་མའི་ཕྱི་འབྲེལ་ལྷན་ཚོགས་ནང་སྐུ་ཞབས་ཊི་ཌ་ཁ་རུ་རྫ་(Ted Cruz)ལགས་དང་གྲོས་ཚོགས་གོང་མའི་འཐུས་མི་སྐུ་ཞབས་ཨེ་དྷི་མཱར་ཁེ(Ed Markey)ལགས་གཉིས་ཀྱིས། ཕྱི་ལོ་ ༡༩༩༢ ལོར་ཨ་རིའི་ཧོང་ཀོང་ཐོག་འཛིན་པའི་སྲིད་བྱུས་ཀྱི་དགོངས་དོན་གཞིར་བཟུང་།  རྒྱ་ནག་གཞུང་གིས་ཧོང་ཀོང་བེད་སྤྱོད་ལོག་པར་བཏང་ནས་ཨ་རིའི་ཁྲིམས་སྒྲིག་ཁག་དང་ཚོང་འབྲེལ་ཐད་གདལ་བཤིག་གཏོང་གི་ཡོད་མེད་ཐད་སྙན་ཐོ་འདོན་དགོས་པའི་ཁྲིམས་འཆར་ཞིག་བཏོན་ཡོད་པ་དང་། དེ་བཞིན་ཨ་རིའི་འཛིན་སྐྱོང་དང་གྲོས་ཚོགས་ཀྱི་རྒྱ་ནག་ལས་དོན་ཁང་གི་ཚོགས་གཙོ་སྐུ་ཞབས་ཇིམ་མེག་གྷ་ཝན་ (Jim McGovern)ལགས་ཀྱིས་གསར་འགོད་གསལ་བསྒྲགས་ཤིག་དང་འབྲེལ། ང་ཚོས་གྲོས་ཚོགས་ནང་བསྐྱར་དུ་ཁྲིམས་འཆར་དེ་གླེང་སློང་བྱེད་དོན་ཧོང་ཀོང་གི་རང་དབང་དང་དམངས་གཙོ་འཇིགས་ཉེན་ཡོད་པའི་རྐྱེན་གྱིས་ཡིན་སྐོར་གསུངས་འདུག

ཁ་སང་རྒྱ་ནག་གི་དབྱིན་ཡུལ་གཞུང་ཚབ་པ་ལོའོ་ཞའོ་མེན་(Liu Xiaoming)ཟེར་བས། བྷི་བྷི་སི་གསར་ཁང་གི་བཅར་འདྲི་དྭང་ལེན་བྱེད་སྐབས་རྒྱ་ནག་གིས་དུས་ནམ་ཡང་ཧོང་ཀོང་གི་ཉེས་ཅན་རྩིས་སྤྲོད་ཁྲིམས་འཆར་ལ་ཐེ་གཏོགས་དང་བཙན་སྐུལ་བྱས་མེད་པ་དང་། ཁྲིམས་འཆར་དེ་ཧོང་ཀོང་གི་གྲོས་ཚོགས་ནས་ཐག་གཅོད་བྱས་པ་ལས་དེའི་རྒྱབ་ན་རྒྱ་ནག་གཞུང་གི་བཀོད་འདོམས་གང་ཡང་མེད་སྐོར་བརྗོད་ཡོད་ཀྱང་། བྷི་བྷི་སི་གསར་ཁང་གིས་སྤེལ་བའི་གནས་ཚུལ་ནང་ཁྲིམས་འཆར་གཏན་འབེབ་ཀྱི་རྒྱབ་ལོག་ན་རྒྱ་ནག་གཞུང་གིས་ཐེ་གཏོགས་ཡོད་པ་དང་། ཐེ་གཏོགས་དེ་ཧོང་ཀོང་གི་རྒྱ་ནག་དང་ལྟ་བ་མི་མཐུན་པའི་ཆབ་སྲིད་པ་དང་ཁྲིམས་རྩོད་པ། གསར་འགོད་པ་སོགས་ལ་ཆེད་དམིགས་ཀྱིས་བཟོ་ཡི་ཡོད་སྐོར་བརྗོད་འདུག

གསར་འགོད་པ། སངས་རྒྱས་དཀོན་མཆོག