ཧོང་ཀོང་ལས་འགུལ་བས་ཨ་རིའི་མི་མང་ལ་བློ་སྤོབས་སྦྱིན་བྱུང་།

ཨ་རིའི་སྲིད་འཛིན་གཞོན་པས་རྒྱ་ནག་སྐོར་ལ་གཏམ་བཤད་དང་འབྲེལ་ཐའེ་ཝན་གྱི་དམངས་གཙོ་ནི་རྒྱ་ནག་གི་ལམ་ཁ་ཡག་པོ་ཞིག་ཡིན་པའི་ལམ་སྟོན་བྱས་འདུག

ཁ་སང་ཕྱི་ཚེས་ ༢༤ ཉིན། ཨ་རིའི་རྒྱལ་ས་ཝ་ཤིན་ཊོན་དུ་ཨ་རིའི་སྲིད་འཛིན་གཞོན་པ་མེག་པེན་སི་ (Mike Pence) མཆོག་གིས་རྒྱ་ནག་སྐོར་ལ་གཏམ་བཤད་དང་འབྲེལ། ཧོང་ཀོང་དང་ཐའེ་ཝན། ལྷོ་རྒྱ་ནག་རྒྱ་མཚོ་དང་ས་གནས་ཀྱི་བདེ་སྲུང་། འགྲོ་བ་མིའི་ཐོབ་ཐང་དང་ཆོས་ལུགས་སོགས་ཀྱི་སྐོར་ནས་གླེང་སློང་དང་། རྒྱ་ནག་གཞུང་གིས་ཧོང་ཀོང་ནང་ཐེ་བྱུས་སྔར་ལས་ཆེ་རུ་གཏོང་གི་ཡོད་པ་མ་ཟད། རྒྱལ་སྤྱིའི་སྲོལ་ཡིག་ལ་གསལ་པའི་འགྲོ་བ་མིའི་ཐོབ་ཐང་དང་རང་དབང་ལ་རྡོག་རོལ་གཏོང་བཞིན་ཡོད་པར་སྐྱོན་བརྗོད་ཤུགས་ཆེར་བྱས་འདུག་

སྲིད་འཛིན་གཞོན་པ་མེག་པེན་སི་མཆོག་ནས། ཧོང་ཀོང་མི་མང་གིས་རང་ཉིད་ཀྱི་ཐོབ་ཐང་སྲུང་སྐྱོབ་ཆེད་ཞི་བའི་ཁྲོམ་སྐོར་བྱེད་བཞིན་པར་ཨ་རིས་རྒྱབ་སྐྱོར་བྱེད་ཀྱི་ཡོད་ལ། ཧོང་ཀོང་ལས་འགུལ་བས་ཨ་རི་མི་མང་ལ་བློ་སྤོབས་སྦྱིན་པས་མུ་མཐུད་འཚེ་མེད་ཞི་བའི་ཐོག་སྐྱོད་དགོས་སྐོར་དང་འབྲེལ། འདས་པའི་ལོ་ཤས་ནས་པེ་ཅིན་ཕྱོགས་ནས་ཧོང་ཀོང་ནང་ཐེ་བྱུས་སྔར་ལྷག་བྱེད་བཞིན་པ་དང་། རྒྱལ་སྤྱིའི་སྲོལ་ཡིག་ལ་གསལ་པའི་འགྲོ་བ་མིའི་ཐོབ་ཐང་དང་རང་དབང་ལ་རྡོག་རོལ་གཏོང་བཞིན་པར་སྐྱོན་བརྗོད་གནང་འདུག་པ་མ་ཟད། ཐའེ་ཝན་གྱི་དམངས་གཙོ་ནི་རྒྱ་ནག་གི་ལམ་ཁ་ཡག་པོ་ཞིག་ཡིན་པའི་ལམ་སྟོན་དང་རྒྱ་ནག་གཞུང་གིས་ལྟ་ཞིབ་འཕྲུལ་རིགས་མང་པོ་བཙུགས་ཏེ་ཡུ་གུར་གཙོས་མི་མང་ལ་ལྟ་རྟོག་ནན་མོ་བྱེད་བཞིན་པར་སྐྱོན་བརྗོད་གནང་འདུག

ཡང་ཉེ་སྔོན་ཟླ་འདིའི་ཕྱི་ཚེས་ ༦ ཉིན་ཨ་རིའི་རྒྱལ་ཡོངས་སིལ་སྤོལ་ལྷན་ཚོགས་ (NBA) ཁོངས་སུ་ཡོད་པའི་ཧོ་སི་ཊོན་རོ་ཀེ་ཊི་ (Houston Rockets) རུ་ཁག་གི་སྤྱི་ཁྱབ་དོ་དམ་པ་ཌ་རིལ་མོ་རེ་ (Daryl Morey) ཡིས་རང་གི་ཊི་ཝི་ཊར་དྲ་ལམ་ཐོག ཧོང་ཀོང་གི་ཞི་བའི་ངོ་རྒོལ་ལས་འགུལ་ལ་རྒྱབ་སྐྱོར་གྱི་གནས་ཚུལ་ཞིག་བཀོད་པར་རྒྱ་ནག་གཞུང་དང་རྒྱ་རིགས་སིལ་སྤོལ་ལ་དགའ་མོས་བྱེད་མཁན་གྱིས་སྐྱོན་བརྗོད་དྲག་པོ་བྱས་ཡོད་པ་མ་ཟད། སིལ་སྤོལ་ལྷན་ཚོགས་ངོས་ནས་རྒྱ་རིགས་མི་མང་རྣམས་ལ་དགོངས་སེལ་ཞུས་པའི་སྐོར་ལ་ཁོང་གིས། རྒྱལ་ཡོངས་སིལ་སྤོལ་ལྷན་ཚོགས་ཀྱི་སྤོལ་རྩེད་བ་དང་སྦྱིན་བདག་ཁ་ཤས་ཀྱིས་རྒྱུན་དུ་རང་དབང་ཐོབ་ཐང་སྤྱད་དེ་རྒྱལ་ཁབ་ལ་སྐྱོན་བརྗོད་སོགས་བྱེད་ཀྱི་ཡོད་ནའང་། མི་གཞན་གྱི་ཐོབ་ཐང་དང་རང་དབང་གི་གནད་དོན་ལ་ཐུག་སྐབས་ཁ་ཁུ་སིམ་པོར་སྡོད་ཀྱི་ཡོད་པ་རེད། རང་དབང་གི་སྨྲ་བརྗོད་འགོག་གི་ཡོད་ནའང་རྒྱ་ནག་དམར་ཤོག་གཞུང་གི་ཕྱོགས་སུ་ལངས་བཞིན་ཡོད་པ་ནི་རྒྱལ་ཡོངས་སིལ་སྤོལ་ལྷན་ཚོགས་ཀྱིས་རང་ཉིད་ཀྱི་དབང་ཆ་ཡོད་ཚད་གཅིག་སྡུད་རིང་ལུགས་ཀྱི་རྒྱལ་ཁབ་ལ་ཡོད་པ་ལྟར་བྱེད་ཀྱི་འདུག་ཅེས་གསུངས་ཡོད་པ་མ་ཟད།  གནད་དོན་དེ་བྱུང་སྐབས་རྒྱ་ནག་ནང་གི་ཨ་རིའི་ནའེ་ཁེ་ (Nike) བཟོ་ཚོང་ཁང་གི་མཛོད་ཁང་ནས་ཧོ་སི་ཊོན་རོ་ཀེ་ཊི་ (Houston Rockets) རུ་ཁག་གི་ཚོང་ཟོང་ཆ་ཚང་བཀག་བསྡོམས་བྱས་པར་ཡང་སྐྱོན་བརྗོད་གནང་འདུག

ཨ་རིའི་སྲིད་འཛིན་གཞོན་པས་གཏམ་བཤད་དེ་སྤེལ་བ་དང་འབྲེལ། རྒྱ་ནག་གཞུང་འབྲེལ་གོ་ལའི་དུས་བབ་ཟེར་བའི་སྟེང་། མེག་པེན་སི་ཡིས་ཧོང་ཀོང་དང་ཐའེ་ཝན། རྒྱ་ནག་ལྷོ་རྒྱ་མཚོ་དང་ས་གནས་ཀྱི་བདེ་སྲུང་། འགྲོ་བ་མིའི་ཐོབ་ཐང་དང་ཆོས་ལུགས། ཨ་རིའི་རྒྱལ་ཡོངས་སིལ་སྤོལ་ལྷན་ཚོགས་ཀྱི་གནད་དོན་སོགས་དང་འབྲེལ་ནས་རྒྱ་ནག་ལ་སྐྱོན་འཛུགས་དང་རྒོལ་འཛིངས་དྲག་པོ་བྱས་ཡོད་པ་དེ་ནི་གསར་པ་ཞིག་མིན་པར། རྒྱ་ནག་ལ་སྐྱོན་བརྗོད་ཀྱིས་ཕྱོགས་གཉིས་ཀྱི་འབྲེལ་བ་དྲང་བདེན་དང་བཏང་སྙོམས་མིན་པར་སྙད་དེ། ཁེ་བཟང་ཟ་བཞིན་པ་དང་གཅིག་མཚུངས་ཡིན་པ་མ་ཟད། ཧོང་ཀོང་ཁྲོམ་སྐོར་བའི་ལས་འགུལ་ལ་དྲག་སྤྱོད་ཆེ་རུ་འགྲོ་བཞིན་ཡོད་ནའང་ཨ་རིས་ཧོང་ཀོང་ཁྲོམ་སྐོར་བ་ཚོར་རྒྱབ་སྐྱོར་ཡོད་སྐོར་བརྗོད་ཡོད་པ་རེད། ཅེས་སྐྱོན་བརྗོད་བྱས་འདུག

ཨ་རིའི་སྲིད་འཛིན་གཞོན་པའི་གཏམ་བཤད་དང་འབྲེལ། གནས་ཚུལ་དབྱེ་ཞིབ་པ་ཚོས་ཨ་རྒྱའི་ཚོང་དོན་འབྲེལ་མོལ་གྱི་དཀྱིལ་ལ་སྲིད་འཛིན་གཞོན་པས་རྒྱ་ནག་དང་འབྲེལ་བའི་གནད་དོན་ཐོག་གཏམ་བཤད་སྤེལ་བ་དེ་ནི། ཕྱི་ལོ་ ༢༠༢༠ ལོའི་ཨ་རིའི་སྲིད་འཛིན་འོས་བསྡུའི་ཁྲོད་སྲིད་འཛིན་ཊོམ་ཕུ་མཆོག་ནས་རྒྱ་ནག་ཐོག་ལངས་ཕྱོགས་མཁྲེགས་པོ་འཛིན་གྱི་ཡོད་པའི་བརྡ་ལན་སྤྲོད་ཐབས་ཞིག་ལ་ངོས་འཛིན་བྱེད་ཀྱི་ཡོད་འདུག་ལ། རྒྱལ་གནད་དོན་དབྱེ་ཞིབ་པ་སི་ཁོ་ཊི་(Scott Kennedy) ཡིས་གཏམ་བཤད་དེ་ནི་དེ་ཙམ་གཅིག་གྱུར་མིན་པའི་བདེ་སྲུང་དང་ཆབ་སྲིད། དཔལ་འབྱོར་སོགས་ཀྱི་སྲིད་བྱུས་ཚགས་ཚུད་དུ་གཏོང་ཐབས་ཆེད་སྤེལ་བ་ཞིག་ལ་ངོས་འཛིན་བྱེད་ཀྱི་ཡོད་འདུག

གསར་འགོད་པ། ཀླུ་མགོན་ཐར།