རྒྱ་ནག་ནང་ཁྱི་ཤ་ཞིམ་ཤ་ཟ་མི་ཆོག་པའི་ཁྲིམས་ཐོག་མ་དེ་བཟོས།

རྒྱ་ནག་ཧྲིན་ཀྲིན་གྲོང་ཁྱེར་གྱིས་ཁྱི་དང་ཞི་མི་ཉོ་ཚོང་དང་ཟས་སུ་སྤྱོད་མི་ཆོག་པའི་ཁྲིམས་བཟོས་ཡོད་པ་དེར་རྒྱལ་སྤྱིའི་སྲོག་ཆགས་སྲུང་སྐྱོབ་ཚོགས་པའི་རི་སྐྱེས་སྲོག་ཆགས་ཚན་པས་བསྔགས་བརྗོད་བྱས།ཁ་སང་ཕྱི་ཚེས་ ༢ ཉིན་རོའུ་ཊར་སོགས་རྒྱལ་སྤྱིའི་གསར་ཁང་ཁག་གིས་སྤེལ་བའི་གནས་ཚུལ་ལྟར་ན། རྒྱ་ནག་གི་ཧྲིན་ཀྲིན་ (Shenzhen) གྲོང་ཁྱེར་ནང་རི་སྐྱེས་སྲོག་ཆགས་དང་ཁྱི་དང་ཞི་མི་སོགས་ཉོ་ཚོང་དང་ཟས་རིགས་སུ་སྤྱོད་མི་ཆོག་པའི་ཁྲིམས་གཏན་འབེབ་བྱས་ཡོད་འདུག་ལ། དེ་ནི་རྒྱ་ནག་ནང་ཁྱི་དང་ཞི་མི་སོགས་ཀྱི་ཤ་རིགས་སྤྱོད་མི་ཆོག་པའི་ཁྲིམས་གཏན་འབེབ་བྱེད་མཁན་གྲོང་ཁྱེར་དང་པོ་དེ་ཡིན་འདུག

ཧྲིན་ཀྲིན་གྲོང་ཁྱེར་གྱི་ཁྲིམས་ཡིག་དེའི་ནང་། གཞུང་གིས་སྲུང་སྐྱོབ་བྱེད་བཞིན་པའི་རི་སྐྱེས་སྲོག་ཆགས་དང་སྐམ་སའི་རི་སྐྱེས་སྲོག་ཆགས་ཏེ་སྤྲུལ་དང་རྩངས་པ་སོགས་དང་། དེ་བཞིན་ཁྱི་དང་ཞི་མི་བཅས་ཀྱི་ཤ་ཁ་ཟས་སུ་སྤྱོད་མི་ཆོག་པ་དང་། ཕག་པ་དང་བ་གླང་། ལུག་དང་བོང་བུ། རི་བོང་དང་ཁྱིམ་བྱ། ངང་བ་དང་བྱ་གག ཕུག་རོན་སོགས་ཀྱི་ཤ་ཟ་ཆོག་གི་ཡོད་སྐོར་བཀོད་འདུག་ལ། གལ་སྲིད་ཁྲིམས་འགལ་བྱེད་མཁན་ཡོད་ཚེ། སྲོག་ཆགས་དེའི་རིན་འབབ་རྒྱ་སྒོར་ཁྲི་ ༡ གི་སྒང་ཡིན་ན། སྲོག་ཆགས་དེའི་རིན་འབབ་ལས་ལྡབ་ ༣༠ ཡིས་ཉེས་ཆད་གཅོད་རྒྱུ་ཡིན་པ་དང་། ཁྲིམས་དེ་འདི་ལོའི་ཕྱི་ཟླ་ ༥ ཚེས་ ༡ ཉིན་ནས་དངོས་སུ་ལག་བསྟར་བྱ་རྒྱུ་ཡིན་སྐོར་བཀོད་འདུག

ཧྲིན་ཀྲིན་གྱི་ནད་ཡམས་སྔོན་འགོག་དང་སྟངས་འཛིན་ཁང་གི་ལས་མི་ལོའུ་ཅན་ཕིན་(Liu Jianping) གྱིས། གསོ་བྱ་དང་སྒོ་ཕྱུགས། རྒྱ་མཚོ་ནས་བྱུང་བའི་ཉ་རིགས་ཀྱིས་མིའི་རིགས་ལ་འཚོ་བཅུད་ལེགས་པོ་སྤྲོད་ཀྱི་ཡོད་ཀྱང་། རི་སྐྱེས་སྲོག་ཆགས་ཀྱི་ཤ་རྣམས་གསོ་བྱ་དང་སྒོ་ཕྱུགས་ལས་ཟས་བཅུད་ཆེ་བ་ཡོད་པ་ཚན་རིག་གི་ཐོག་ནས་ར་སྤྲོད་བྱུང་མེད་སྐོར་བརྗོད་དེ་ཐག་གཅོད་དེར་རྒྱབ་སྐྱོར་ཡོད་སྐོར་བརྗོད་འདུག

རྒྱ་ནག་ནས་བྱུང་བའི་ཏོག་དབྱིབས་ནད་ཡམས་ནི་རི་སྐྱེས་སྲོག་ཆགས་ལས་བྱུང་ཡོད་པའི་གྲུབ་དོན་བཏོན་ཡོད་པ་དང་། ཏོག་དབྱིབས་ནད་རྟགས་ངོས་འཛིན་བྱུང་བའི་ནད་པ་སྔ་མ་རྣམས་ནི་རྒྱ་ནག་ཝུ་ཧན་གྲོང་ཁྱེར་གྱི་རི་སྐྱེས་སྲོག་ཆགས་ཁྲོམས་ར་སྟེ། ཕ་ཝང་དང་། སྤྲུལ། རུས་སྤལ། ཞི་མི་སོགས་ཉོ་ཚོང་བྱེད་སའི་ལྟེ་བ་དེའི་སྦྱིན་བདག་སོགས་ས་ཁུལ་ནས་ཡིན་པ་དང་། ནད་ཡམས་དེ་རྒྱ་ནག་ནང་ཁྱབ་བརྡལ་ཤུགས་ཆེན་ཕྱིན་པར་བརྟེན། རྒྱལ་ཡོངས་སུ་གནས་སྐབས་རིང་རི་སྐྱེས་སྲོག་ཆགས་ཉོ་ཚོང་དང་ཁ་ཟས་སུ་སྤྱོད་མི་ཆོག་པའི་བཀའ་རྒྱ་བསྒྲགས་ཡོད་པ་རེད།

རྒྱལ་སྤྱིའི་སྲོག་ཆགས་སྲུང་སྐྱོབ་ཚོགས་པའི་རི་སྐྱེས་སྲོག་ཆགས་ཚན་པའི་འགན་འཛིན་གཞོན་པ་ (Teresa M. Telecky) ཡིས་ཧྲིན་ཀྲིན་གྲོང་ཁྱེར་ནི་ཏོག་དབྱིབས་ནད་ཡམས་ལས་བསླབ་བྱ་ལེན་མཁན་གྱི་འཛམ་གླིང་གི་གྲོང་ཁྱེར་དང་པོ་དེ་ཡིན་པ་དང་། འབྱུང་འགྱུར་འཕྲད་སྲིད་པའི་ནད་ཡམས་གཞན་ལ་གཡོལ་བའི་དགོས་ངེས་ཀྱི་བཅོས་བསྒྱུར་བྱས་ཡོད་སྐོར་དང་། ཧྲིན་ཀྲིན་གྲོང་ཁྱེར་གྱིོ་རི་སྐྱེས་སྲོག་ཆགས་ཉོ་ཚོང་དང་ཟས་རིགས་སུ་མི་སྤྱོད་པའི་ཐག་གཅོད་དེ་ནི་འཛམ་གླིང་གི་སྲིད་གཞུང་གཞན་ཁག་གི་མིག་དཔེ་ལྟ་ས་ཞིག་ཡིན་སྐོར་ཀྱང་བརྗོད་འདུག

རི་སྐྱེས་སྲོག་ཆགས་མང་པོ་ཞིག་ནི་སྟོང་ཉེན་དུ་གྱུར་ཡོད་པ་དང་གོ་ལའི་འབྱུང་ཁམས་འཁྲུག་པར་འཇིགས་ཏེ། རྒྱལ་སྤྱིའི་སྒྲིག་འཛུགས་མང་པོས་འབྱུང་ཁམས་དང་སྲོག་ཆགས་ལ་སྲུང་སྐྱོབ་བྱེད་ཐབས་སུ་ཁྲིམས་གཏན་འབེབ་བྱེད་པ་དང་། གོ་རྟོགས་སྤེལ་བ། ཆེད་དུ་སྲུང་སྐྱོབ་ས་ཁུལ་འཛུགས་པ་སོགས་བྱེད་ཀྱི་ཡོད་པ་རེད་ལ། ཁྱི་དང་ཞི་མི་གཉིས་ནི་འཛམ་གླིང་ཡོངས་སུ་ཁྱིམ་ཚང་དུ་གཅེས་ཉར་བྱས་པའི་སྲོག་ཆགས་མང་ཤོས་དེ་ཡིན་པ་རེད། ཨེ་ཤ་ཡའི་ནང་ཐའེ་ཝན་ནི་ཁྱི་དང་ཞི་མིའི་ཤ་རིགས་སུ་སྤྱོད་མི་ཆོག་པའི་ཁྲིམས་གཏན་འབེབ་བྱེད་མཁན་གྱི་རྒྱལ་ཁབ་ཐོག་མ་དེ་ཡིན་འདུག་ལ། རྒྱ་ནག་ནི་འཛམ་གླིང་གི་ཁྱི་ཤ་དང་ཞི་མིའི་ཤ་ཟ་མཁན་མང་ཤོས་གྲས་ཀྱི་གཅིག་ཡིན་པ་དང་། ལོ་རེར་ཁྱི་ས་ཡ་ ༡༠ ཙམ་དང་ཞི་མི་ས་ཡ་ ༤ ཙམ་ཉོ་ཚོང་བྱས་ཏེ་ཟས་སུ་སྤྱོད་ཀྱི་ཡོད་འདུག

གསར་འགོད་པ། ཀླུ་མགོན་ཐར།