སྲིད་སྐྱོང་བློ་བཟང་སེང་གེ་མཆོག་ནས་དབྱིན་ཡུལ་གྱི་སྲིད་བློན་བྷོ་རི་སི་ཇོན་སན་མཆོག་ཅུང་དྲག་སྐྱེད་ཡོང་བཞིན་པར་འཚམས་འདྲི་དང་སྦྲགས་ཏོག་དབྱིབས་ནད་ཡམས་ཀྱིས་འདས་གྲོངས་སུ་ཕྱིན་པའི་དབྱིན་ཡུལ་མི་མང་གི་ཤུལ་ལུས་རྣམས་ལ་ཐུགས་གསོ་གནང་འདུག
དེ་རིང་དབྱིན་ཡུལ་གྱི་སྲིད་བློན་སྐུ་ཞབས་བྷོ་རི་སི་ཇོན་སན་མཆོག་མྱུར་སྐྱོབ་སྨན་བཅོས་ཁང་ནས་ཕྱིར་ཐོན་ཏེ་སྤྱིར་བཏང་གི་སྨན་ཁང་ཞིག་ཏུ་མུ་མཐུད་སྨན་བཅོས་གནང་བཞིན་ཡོད་པ་དང་བསྟུན། བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་ནས་སྲིད་བློན་བྷོ་རི་སི་མཆོག་ཏོག་དབྱིབས་ནད་ཡམས་ལས་གང་མགྱོགས་དྲག་སྐྱེད་བྱུང་སྟེ། བསྐྱར་དུ་དབྱིན་ཡུལ་གྱི་རིམས་འགོག་ལས་དོན་གྱི་སྣེ་འཁྲིད་ཐུབ་པའི་ཐུགས་རེ་གནང་བཞིན་ཡོད་སྐོར་གསུངས་འདུག
སྲིད་སྐྱོང་མཆོག་ནས་སྲིད་བློན་བྷོ་རི་སིའི་མཚན་ཐོག་ལ་ཕྱག་ཡིག་ཅིག་བསྐུར་གནང་བའིི་ནང་། སྲིད་བློན་ཁྱེད་སྙུང་གཞི་བཞེས་ཏེ་སྨན་ཁང་དུ་བཞུགས་དགོས་བྱུང་བར་བློ་ཕམ་བྱུང་ཡང་། ད་ལྟ་ཁྱེད་རང་དྲག་སྐྱེད་འབྱུང་བཞིན་པའི་གནས་ཚུལ་དེ་ཐོས་པར་དགའ་པོ་བྱུང་། ངས་བོད་མིའི་སྒྲིག་འཛུགས་དང་བོད་མི་ཡོངས་ཀྱི་ཚབ་ཞུས་ཏེ། ཁྱེད་རང་གང་མགྱོགས་དྲག་སྐྱེད་ཡོང་རྒྱུའི་རེ་སྨོན་ཞུ་བཞིན་ཡོད། ཅེས་དང་། ཏོག་དབྱིབས་ནད་ཡམས་ལས་རྐྱེན་འདས་སོང་བའི་དབྱིན་ཡུལ་གྱི་མི་སེར་ཚོའི་ཤུལ་ལུས་ནང་མི་ཚོར་སྙིང་ཐག་པ་ནས་སེམས་གསོ་བྱེད་ཀྱི་ཡོད་ལ། རང་དོན་དོར་ནས་ལྷག་བསམ་ཟོལ་མེད་ཀྱིས་ཏོག་དབྱིབས་ནད་ཡམས་ལ་འགོག་རྒོལ་གྱི་ལས་འགུལ་ནང་ཞུགས་པའི་དབྱིན་ཡུལ་གྱི་རྒྱལ་ཡོངས་སྨན་བཅོས་ཞབས་ཞུ་བ་དང་། གཞུང་གི་ལས་བྱེད་ཡོངས་ལའང་སྨོན་ལམ་འདེབས་ཀྱིན་ཡོད། ཅེས་གསུངས་འདུག
མཐའ་མཇུག་དེར་སྲིད་སྐྱོང་བློ་བཟང་སེང་གེ་མཆོག་ནས་དབྱིན་ཡུལ་གྱིས་སྲིད་བློན་བྷོ་རི་སི་མཆོག་ཏོག་དབྱིབས་ནད་ཡམས་འདི་ནས་གང་མྱུར་དྲག་སྐྱེད་བྱུང་སྟེ། ཡུལ་དེའི་ཏོག་དབྱིབས་རིམས་འགོག་ལསདོན་གྱི་སྣེ་འཁྲིད་རྒྱུར་རེ་ལྟོས་བྱེད་བཞིན་ཡོད་སྐོར་གསུངས་འདུག
རང་ལོ་ ༥༥ ཡིན་པའི་དབྱིན་ཡུལ་གྱི་སྲིད་བློན་བྷོ་རི་སི་མཆོག་གིས་ཟླ་བ་སྔོན་མའི་ཚེས་ ༢༧ ཉིན། རང་ཉིད་ལ་ཚ་བ་དང་གློ་བསྟུད་མར་བརྒྱབ་པའི་རྐྱེན་གྱིས་བརྟག་འབྲས་སུ་ཏོག་དབྱིབས་ནད་ཡམས་འགོས་ཡོད་པ་གསལ་བསྒྲགས་བྱས་ཏེ། ཟུར་བཅད་འོག་མུ་མཐུད་སྲིད་བློན་གྱི་ལས་འཁུར་ཞུས་ཡོད་ཀྱང་། ཉིན་གྲངས་བཅུའི་རྗེས་ཏེ་ཟླ་འདིའི་ཕྱི་ཚེས་ ༥ ཉིན་གནས་སྟངས་ཅུང་ཛ་དྲག་ཏུ་གྱུར་བའི་རྐྱེན་གྱིས་སྨན་ཁང་དུ་སྡོད་དགོས་བྱུང་ཡོད་པ་མ་ཟད། ཕྱི་ཚེས་ ༦ ཉིན་ཁོང་གི་གནས་སྟངས་དེ་བས་ཛ་དྲག་ཏུ་གྱུར་བའི་རྐྱེན་གྱིས་ཛ་དྲག་མྱུར་སྐྱོབ་བྱེད་སའི་སྨན་བཅོས་ཁང་དུ་སྡོད་དགོས་བྱུང་བ་རེད།
ཨ་རིའི་ཇོན་ཧོབ་སི་ཀིན་གཙུག་ལག་སློབ་གྲྭའི་ཏོག་དབྱིབས་ནད་ཡམས་ཞིབ་འཇུག་ཁང་གི་གྲངས་ཐོ་ལྟར་ན། དེ་རིང་ཉིན་གུང་ཆུ་ཚོད་བར་དབྱིན་ཡུལ་ཡོངས་སུ་ཁྱོན་ཏོག་དབྱིབས་ནད་པའི་གྲངས་འབོར་ ༦༥,༨༧༢ ལ་འཕར་ཡོད་ཅིང་། དེའི་ཁྲོད་ནས་ད་བར་ནད་པ་ ༧,༩༧༨ རྐྱེན་འདས་སོང་ཡོད་འདུག
གསར་འགོད་པ། པ་སངས་ཚེ་རིང་།
