ཀོ་ཝེན་ཀུའེ་ཡི་བསྒྲགས་གཏམ་དང་གཤེ་གཏམ་ལས་བྱུང་བའི་བསམ་གཞིགས།

  རིགས་ཞེན་རལ་གྲི།

ཉེ་ཆར་ཕྱི་ཟླ་ ༦ ཚེས་ ༤ སྟེ། རྒྱ་དམར་གྱིས་རྒྱ་རིགས་སློབ་ཕྲུག་ཐོག་དྲག་གནོན་དམར་གསོད་བཏང་སྟེ་མི་ལོ་༣༡ འཁོར་བའི་ཉིན་མོ། ཨ་རིར་སྐྱབས་བཅོལ་དུ་ཡོད་པའི་རྒྱ་མིའི་ཚོང་པ་ཀོ་ཝེན་ཀུའེ་དང་ཨ་རིའི་ཕོ་བྲང་དཀར་པོའི་སློབ་སྟོན་པ་ཟུར་བ་Stephen Bannon. རྒྱ་ནག་གི་རྐང་རྩེད་སྤོ་ལོ་པ་གྲགས་ཅན་ཧི་ཧེ་ཏུང་སོགས་ཀྱིས་ཐུན་མོང་ཐོག“རྒྱལ་ཕྲན་མཉམ་འབྲེལ་གྱི་རྒྱ་ནག་གསར་བ་”ཟེར་བའི་བསྒྲགས་གཏམ་སྤེལ་ཞིང་། དེ་ལ་བོད་མི་ཁག་ཅིག་གིས་ཕྲལ་དུ་རྒོལ་གཏམ་སྤེལ། དེ་ལ་ཡང་རྒྱ་མི་ཀོ་ཡིས་ཁ་ཕོ་ཆེ་བའི་ལན་འདེབས་གཤེ་གཏམ་སྤེལ། དེའི་རྗེས་གཡམ་རྒྱུག་ལ་དགའ་བའི་བོད་པ་དྲ་ཉུལ་པ་མང་པོས་སོ་སོས་ཞེ་འདོད་ཀྱི་ལབ་གླེང་སྣ་ཚོགས་བྱེད་པར་མཐོང་ཞིང་། དོན་དངོས་ཐོག་ཀོ་སོགས་ཀྱི་བསྒྲགས་གཏམ་ནང་ཅི་ཞིག་སྤེལ་ཡོད་མེད་དང་། ཀོ་ཡིས་ཁ་ཕོ་ཆེ་བའི་ལན་འདེབས་སུ་ལ་དམིགས་ཡོད་མེད། བོད་པ་རྣམས་དེའི་རྗེས་སུ་འུར་ལང་ན་དགོས་ཕན་ཡོད་མེད་ཀྱི་གནད་དོན་གསུམ་ལ་ཐུག་ཅིང་། དེའི་ཐོག་བསམ་གཞིགས་ཞིབ་མོ་བྱེད་མཁན་ད་བར་མ་མཐོང་བས། འདིར་གོང་གི་དོན་ཚན་གསུམ་གྱི་ཐོག་རང་གིས་གཟུ་བོའི་བློས་དབྱེ་ཞིབ་དཀྱུས་གཅིག་ཏུ་བྱས་ན།

གཅིག

དང་པོ་“རྒྱལ་ཕྲན་མཉམ་འབྲེལ་གྱི་རྒྱ་ནག་གསར་བ་”ཞེས་པའི་བསྒྲགས་གཏམ་གྱི་ནང་དོན་ཅི་ཡིན་ཤེས་དགོས་པ་དེ་ཡིན་ལ།  བསྒྲགས་གཏམ་དེ་ཞིབ་ཏུ་ཀློག་རྗེས། བསྒྲགས་གཏམ་ཧྲིལ་པོ་དངོས་གཞི་དང་ཟུར་བཀོད་གཉིས་ལས་གྲུབ་འདུག་ཅིང་། དངོས་གཞིའི་ནང་(༡)གླེང་བརྗོད་དང་། (༢)རྒྱ་དམར་རྩ་གཏོར་གཏོང་བའི་བདེན་པའི་དགོས་པ། (༣) རྒྱལ་ཕྲན་མཉམ་འབྲེལ་གྱི་རྒྱ་ནག་གསར་བའི་དམིགས་འདུན། (༤)ཧི་མ་ལ་ཡའི་ལྟ་སྐུལ་ལས་ཁུངས་ཀྱི་དམ་བཅའ། (༥)བསྒྲགས་གཏམ་འདོན་མཁན་དང་གཏན་འབེབས་བྱེད་མཁན། བཅས་ལས་གྲུབ་འདུག

ཟུར་བཀོད་ནང་(༡) ཧི་མ་ལ་ཡའི་ལྟ་སྐུལ་ལས་ཁུངས་དང་། (༢)རྒྱ་དམར་གྱི་གཏུམ་སྤྱོད་ཀྱི་ངོ་བོ། (༣)ཁྲིམས་ཀྱི་དབང་བསྒྱུར་གྱི་ཐེབས་རྩ་དང་སྤྱི་ཚོགས། (༤) རྒྱལ་ཕྲན་མཉམ་འབྲེལ་གྱི་རྒྱ་ནག་གསར་བའི་(༥)སྲིད་གཞུང་དང་(༦)རྩ་ཁྲིམས། (༧)རྒྱ་དམར་གྱི་བཙན་འཕྲོག་བྱས་པའི་རྒྱུ་དངོས་གཞུང་བཞེས། (༨)རྒྱལ་ཕྲན་མཉམ་འབྲེལ་གྱི་རྒྱ་ནག་གསར་བའི་རྒྱལ་དར་དང་དེའི་འགྲེལ་བཤད་སོགས་ལས་གྲུབ་འདུག

གོང་གི་བསྒྲགས་གཏམ་དངོས་གཞིའི་ནང་། “རྒྱ་དམར་ནི་འཇིགས་སྐུལ་གྱི་རྩ་འཛུགས་ཤིག་ཡིན་པ་དང་།” “རྒྱ་དམར་གྱིས་རྒྱ་ནག་ལ་སྲིད་དབང་སྒེར་འཛིན་གྱིས་དབང་བསྒྱུར་བྱེད་པ་ནི་འགྲོ་བ་མིའི་རིགས་ལ་རྒོལ་པའི་དྲག་སྤྱོད་ཡིན་སྟེ། འགྲོ་བ་མིའི་ཐོབ་ཐང་རྩིས་མེད། དམངས་གཙོ་རྡོག་རོལ་བཏང་བ། ཁྲིམས་ཀྱིས་དབང་བསྒྱུར་དང་འགལ་བ། ཧོང་ཀོང་ལ་ཁྲག་གི་འཁོར་ལོ་བསྐོར་བ། བོད་མི་དམར་གསོད་བཏང་བ། ལྐོག་ཟ་རུལ་སུངས་བྱེད་པ་སོགས་རྒྱ་དམར་གྱི་ནག་ཉེས་གནམ་ས་ལ་མི་ཤོངས ”ཞེས་དང་། ཡང་“རྒྱལ་ཕྲན་མཉམ་འབྲེལ་གྱི་རྒྱ་ནག་གསར་བས་ནུབ་ཕྱོགས་ཀྱི་མང་གཙོའི་སྲིད་ལུགས་ལ་དཔེ་བླངས་ཏེ། མང་གཙོའི་ཀ་བ་གསུམ་གྱི་གཞུང་འཛུགས་རྒྱུ་དང་། མི་རེས་འོས་ཤོག་རེ་བླུག་པའི་ལམ་ནས་སྲིད་གཞུང་གསར་པ་འཛུགས་རྒྱུ། ”སོགས་བཀོད་འདུག

གོང་གི་བསྒྲགས་གཏམ་ནང་དོན་དེ་དག་ང་ཚོ་བོད་མི་རང་དབང་འཐབ་རྩོད་པ་ཞིག་ལ་མཚོན་ན། དགའ་དགོས་པ་ཞིག་ལས་ངོ་རྒོལ་བྱེད་དགོས་དོན་གཏན་ནས་མེད་མོད། འོན་ཀྱང་བསྒྲགས་གཏམ་དངོས་གཞིའི་“རྒྱལ་ཕྲན་མཉམ་འབྲེལ་གྱི་རྒྱ་ནག་གསར་བོའི་དམིགས་འདུན”ཞེས་པའི་ནང་། རྩ་ཁྲིམས་གསར་བའི་སྙིང་དོན་བརྗོད་སྐབས་“ཧོང་ཀོང་དང་། མཱ་ཁོ། བོད་སོགས་ཀྱི་ས་ཁུལ་དུ་དམིགས་བསལ་རང་སྐྱོང་གི་སྲོལ་ཡིག་བཏོན་ཏེ་ལག་བསྟར་མཐིལ་ཕྱིན་བྱེད་དགོས”ཞེས་པར། བོད་མི་ཁག་ཅིག་གིས་“བོད་ལ་དམིགས་བསལ་རང་སྐྱོང་”ཞེས་པར་མི་འདོད་པའི་རྣམ་འགྱུར་བསྟན་པ་རེད་སྙམ།

འོན་ཀྱང་བོད་མི་དེ་དག་གིས་བསྒྲགས་གཏམ་ཞིབ་མོར་མ་ཀློག་པ་ལས། བསྒྲགས་གཏམ་ཟུར་བཀོད་“(༤)རྒྱལ་ཕྲན་མཉམ་འབྲེལ་གྱི་རྒྱ་ནག་གསར་བའི་(༥)སྲིད་གཞུང་དང་(༦)རྩ་ཁྲིམས།”ཞེས་པའི་དོན་ཚན་བཞི་པའི་ནང་དུ།  “ཧོང་ཀོང་དང་། མཱ་ཁོ། བོད་སོགས་ལ་རྒྱལ་ཕྲན་མཉམ་འབྲེལ་གྱི་ལམ་ལུགས་འོག་ཏུ་དམིགས་བསལ་རང་བཙན་(མགོ་)རང་སྐྱོང་ལག་བསྟར་བྱེད་རྒྱུ་(香港、澳門和西藏等實行聯邦制下的特別獨立自治)དང་། རྒྱལ་སྲུང་དང་ཕྱི་འབྲེལ་ལས་གཞན་པའི་སྲིད་གཞུང་བདག་སྐྱོང་དབང་ཆ་ཆ་ཚང་ཡོད”ཅེས་དང་། དེའི་འོག་ཏུ་“ཧོང་ཀོང་རང་སྲིད་རང་སྐྱོང་། ཐེ་ཝན་རང་སྲིད་རང་སྐྱོང་། མཱ་ཁོ་རང་སྲིད་རང་སྐྱོང་། བོད་མི་རང་སྲིད་རང་སྐྱོང་(實現港人治港、臺人治臺、澳人治澳和藏人治藏)མངོན་འགྱུར་བྱེད་རྒྱུ་”ཞེས་འཁོད་པ་སོགས་ལ་གཞིགས་ན། བསྒྲགས་གཏམ་འདི་འགྲུབ་མིན་ཇི་ལྟར་ཡང་། བོད་ལ་མཚོན་ན་སྔར་ཕྱི་ལོ་ ༡༩༨༨ ལོར་༧གོང་ས་མཆོག་གིས་བཏོན་པའི་སི་ཀྲ་སི་སྦག་གི་གྲོས་གཞི་དང་གཅིག་མཚུངས་ཡིན་ལ། རང་གཞུང་གིས་བཏོན་པའི་༼བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་གི་བསམ་འཆར་༽ལས་ཚད་མཐོ་བ་སྙམ། དེས་ན་དེ་ལ་བོད་གཞུང་མང་གིས་དགའ་བསུ་ཞུ་དགོས་པ་ཞིག་མ་ཡིན་ནམ། བོད་རང་བཙན་རྩོད་མཁན་ཞིག་གིས་ངོས་ནས་ཀྱང་འདི་རང་བཙན་གྱི་གོམ་པ་དང་པོ་ལ་རྩིས་ན་མི་འགྲིག་པ་ཅི་ལ་ཡོད། མ་གཞི་འདི་རྒྱ་རྒན་ཁོ་པ་སོགས་ཀྱིས་སྲིད་དོན་གྱི་རྩེད་མོ་ཡིན་པ་ལས་འགྲུབ་ཐབས་མེད་པ་སྨིག་རྒྱུའི་གྲོང་ཁྱེར་ལྟ་བུ་ལ་ངོས་འཛིན་བྱེད་ན། དེ་ལ་དགའ་བསུ་དང་རྒོལ་གཏམ་གང་ཞིག་སྤེལ་ཡང་རང་ཉིད་བྱབ་ཆུང་དུ་གྱུར་པ་ལས་གཞན་གང་ཡང་མེད་མོད། གང་ལྟར་ཚོགས་པ་འགས་རྒོལ་གཏམ་སྤེལ་ཟིན་པ་མ་ཟད། དེ་ལ་ཀོ་ཡིས་ཁ་ཕོ་ཆེ་བའི་ལན་འདེབས་སྡུག་དམོད་བྱས་ཟིན་པ་རེད།

གཉིས།

ངས་ཀོ་ཡིས་ལན་འདེབས་ལ་ཞིབ་མོར་ཉན་པ་ཡིན། མ་གཞི་ཁ་ཕོ་ཤོད་པ་ནི་ཁོ་པའི་རང་གཤིས་ཞིག་ཡིན་པ་སྔར་གྱི་གཏམ་བཤད་མང་པོ་ལས་ཤེས་ཐུབ། ཁོང་ཁྲོ་དང་འདྲེས་ནས་སྐད་ཆ་མི་ཉུང་བ་ཞིག་ཤོད་འདུག་ལ། ཁོ་པའི་ཁ་ཕོ་ཤོད་པ་དང་གཤེ་གཤེ་བཏང་བར་ངོས་ལེན་མེད་ཀྱང་། སྐད་ཆ་ལ་དབྱེ་གསེས་ཡག་པོ་འབྱེད་དགོས་པ་ནི།

༡) ཁ་རྡུང་གཏོང་ཡུལ་ཁོ་པར་ངོ་རྒོལ་བྱེད་མཁན་ཚོ་ཡིན་པ་ལས། བོད་མི་བཙན་བྱོལ་བ་སྤྱི་ལ་རེད་མི་འདུག།
ཁོ་པའི་གཤེ་གཏམ་འགོ་བཙུགས་མ་ཐག་ཏུ་“བོད་མིས་ག་རེ་ཁྱབ་བསྒྲགས་ཟེར་བ་སྤེལ་བ་གོ་སོང་། ཀོ་ཝེན་ཀུའེ་ཡི་བོད་ཀྱི་སྐོར་ག་རེ་ག་རེ་རེད་ཟེར་གྱི་འདུག  གང་བྱུང་མང་བྱུང་མ་ལབ། ཁྱོད་ཚོ་སུ་ཡིན། ཁྱོད་ཚོས་སུས་བོད་ཀྱི་ཚབ་བྱེད་ཐུབ་ཀྱི་ཡོད། ཁྱོད་ཚོས་་་་་་ཁྱོད་ཚོ་་་་ཁྱོད་ཚོས་བོད་པ་གཅིག་སྐྱོབ་མྱོང་ཡོད་དམ། གསལ་བསྒྲགས་འདྲ་སྤེལ་ཁུལ་བྱས་ནས། ཁྱོད་ཚོས་གུང་ཁྲན་ཏང་ལ་བསྒྲགས་གཏམ་སྤེལ་གདའ་་་་་ཁྱོད་ཚོའི་བསྒྲགས་གཏམ་ལ་རྒྱབ་སྐྱོར་པའི་བོད་མི་ཁྲི་གཅིག་གི་ས་ཡིག་བསྡུ་ཐུབ་བམ།་་་་” མདོར་ན་ཁོ་པའི་གཤེ་གཏམ་གྱི་མགོ་ནས་མཇུག་བར་ཁོ་ལ་བསྒྲགས་གཏམ་སྤེལ་མཁན་ཚོ་ལ་གཤེ་བ་ལས། བོད་མི་སྤྱི་ལ་གཤེ་གི་མེད་པ་གསལ་བོ་རེད།

༢) ཁོ་པས་༧གོང་ས་མཆོག་ལ་མཐོང་ཆུང་བྱེད་པ་མ་ཡིན་པར། ཁོ་རང་གིས་ཁ་ཕོ་ཤོད་སྟངས་དང་ལྷག་པར་ཁོ་ཕར་རྒོལ་གཏམ་སྤེལ་མཁན་ཚོར་གཤེ་སྐབས། དོན་དག་འདིའི་ཐོག་“ཏཱ་ལའི་བླ་མས་ཀྱང་ང་ལ་ཤོད་ཕོད་ཀྱི་མ་རེད། ”ཅེས་ཀྱང་སྒྲ་གསལ་བོ་ཐོན་པ་ནི། ཁོ་པས་ཚོར་ཤུགས་དྲག་པོས་ཁ་ཕོ་ཤོད་སྟངས་ལས་༧གོང་ས་མཆོག་ལ་དམའ་འབེབ་མིན་པ་ཧ་ཅང་གསལ།

དེ་མིན་ཚིག་ཉོག་ཁ་ཤས་ཡོད་ན་ཡང་། དོན་གྱི་གནད་འགག་གང་ཡང་མེད་པས་འདིར་བརྗོད་རིན་མེད་ལ། རྒྱ་རྒན་ཁོ་པས་གཤེ་གཏམ་ལ་མོས་མཐུན་མེད་ཀྱང་དངོས་ཡོད་གནས་ཚུལ་གང་ཡིན་གསལ་བོ་མ་བརྗོད་ན། དེང་སང་བཙན་བྱོལ་བོད་པའི་སྤྱི་ཚོགས་ནི་ཁ་ཤུགས་ཆེ་བ་དང་། མི་ཤེས་ཤེས་མདོག་སྟོན་མཁན་གྱི་གྲགས་པའི་རྗེས་སུ་འབྲང་ཞིང་། མང་ཆེ་བ་བླུན་པོ་ཆུ་སྣ་གར་ཁྲིད་ལྟ་བུ་ཁོ་ནའོ།

                            གསུམ།

ལར་ནས་ཀོ་ཝེན་ཀུའེ་སོགས་ཀྱིས“རྒྱལ་ཕྲན་མཉམ་འབྲེལ་གྱི་རྒྱ་ནག་གསར་བ་”བསྒྲགས་གཏམ་སྤེལ་བར་བོད་མི་རྣམས་ཚོར་བའི་དབང་དུ་སོང་ཏེ་རྒོལ་གཏམ་སྤེལ་དགོས་དོན་མེད་པ་ནང་དོན་སོགས་ཀྱི་ཆ་ནས་གོང་དུ་ཞུས་ཟིན་ཅིང་། ལོ་རྒྱུས་ཀྱི་ཆ་ནས་ཞུས་ན། ཕྱི་ལོ་༡༩༩༢་ལོར། དེ་སྔ་རྒྱ་ནག་གི་འགོ་ཁྲིད་ཀྲུའོ་ཙི་དབྱང་གི་དྲུང་ཡིག་བྱེད་མྱོང་མཁན་མཁས་པ་གྲགས་ཅན་ཡན་ཅཱ་ཆི་ནས་རྒྱལ་ནག་རྒྱལ་ཕྲན་མཉམ་འབྲེལ་གྱི་སྒྲོམ་གཞི་དང་རྩ་ཁྲིམས་བཟོས་ཡོད་ལ། དེའི་ནང་བོད་དང་ཤིན་ཅང་སོགས་ཡོད།

ཡང་ཕྱི་ལོ་༡༩༩༣ལོར་ཕྱི་རྒྱལ་ལ་ཡོད་པའི་རྒྱ་ནག་གི་མཁས་པ་ཉི་ཤུ་ལྷག་ཨ་རིའི་ཧོ་ནོ་ལུ་ལུ་རུ་མཉམ་འཛོམས་ཚོགས་འདུ་བསྐོང་སྟེ། “རྒྱ་ནག་རྒྱལ་ཕྲན་མཉམ་འབྲེལ་སྤྱི་མཐུན་རྒྱལ་ཁབ་ཀྱི་རྩ་ཁྲིམས་ཟིན་བྲིས་(中华联邦共和国宪法草案) ”བཟོས་ཤིང་། དེའི་ནང་ཡང་བོད་དང་སོག་པོ་སོགས་ཚུད་ཡོད།

༡༩༩༥ ལོར་ཨ་རིའི་ཁ་ལི་ཧྥོ་ལི་ཡའི་མཐོ་སློབ་ཀྱི་ཤར་ཨེ་ཤ་ཡའི་ཞིབ་འཇུག་ཁང་གི་བསྐོང་ཚོགས་བྱས་པའི་“མ་འོངས་རྒྱ་ནག་རྒྱལ་ཁབ་ཀྱི་སྒྲོམ་གཞི་དང་སྲིད་ཁྲིམས་ལམ་ལུགས་བགྲོ་གླེང་ཚོགས་འདུའི”ཐོག རྒྱལ་ཕྲན་མཉམ་འབྲེལ་ལམ་ལུགས་ལ་ཐུན་མོང་གིས་མོས་མཐུན་བྱུང་ཡོད།

རྒྱ་མི་ནོར་བྷེལ་ཞི་བདེའི་གཟེངས་རྟགས་བཞེས་མཁན་སྐུ་གཤེགས་ལོའུ་ཞའོ་པོ་སོགས་ཀྱིས་བཏོན་པའི་“༨༠རྩ་ཁྲིམས།”གྲགས་ཅན་དེའི་སྙིང་དོན་ཡང་འབྱུང་འགྱུར་རྒྱ་ནག་རྒྱལ་ཕྲན་མཉམ་འབྲེལ་གྱི་ལམ་དུ་བསྐྱོད་དགོས་པ་བཏོན་པ་མ་ཟད། བོད་སོགས་མི་རིགས་ཀྱི་གནད་དོན་ཡང་དེའི་ཐོག་ནས་སེལ་དགོས་པ་བཏོན་ཡོད།

གོང་བརྗོད་ཚང་མ་ལ་བོད་མིས་རྒོལ་གཏམ་སྤེལ་མྱོང་མེད་ལ།  སྤེལ་དགོས་དོན་ཡང་མ་མཐོང་།  གང་ལྟར་མ་འོངས་རྒྱ་ནག་འགྱུར་བ་ཆེན་པོ་ཞིག་འགྲོ་ན། སྐབས་དེར་ང་ཚོར་གོ་སྐབས་ཞིག་དང་ལམ་ཁ་ཞིག་ཏན་ཏན་ཡོད་ངེས་པས། ད་ལྟ་རྒྱ་དམར་ལ་ཁ་གཏད་བྱེད་མཁན་རྒྱ་རིགས་དག་ང་ཚོའི་འཐབ་ཕྱོགས་གཅིག་ལ་བཟུང་ནས། ལས་ཀ་མཉམ་རུབ་བྱས་ན་ནུས་པ་དང་ཕན་པ་ཡོད་པ་ལས། རྒྱ་རིགས་དེ་དག་ལ་རྒོལ་གཏམ་སྤེལ་ནས་དགྲ་རུ་བཟུང་ན་ཕན་ཐོགས་དང་དགོས་པ་ཧ་ཅང་ཆུང་བར་སྙམ་མོ།

གལ་སྲིད་བོད་མི་རྣམས་ཀྱི་དམིག་ཡུལ་དང་མི་མཐུན་པ་ཙམ་གྱིས་ཁ་ལ་གང་ཡོང་བཤད་པ་དང་། སྔ་གཞུགས་ཀྱི་ཁེ་ཕན་བཅས་ལ་བསམ་བློ་ཙམ་ཡང་མི་གཏོང་བར་ངོ་རྒོལ་བྱས་ན་རང་ཉིད་བྱབ་ཆུང་དང་དེ་ཉིད་མངོན་པ་ཙམ་དུ་ཟད། དཔེར་ན། ཉེ་ཆར་ཨ་རིའི་གྲོས་ཚོགས་འཐུས་མི་ཞིག་ནས་བོད་རང་སྐྱོང་ལྗོངས་རང་བཙན་ངོས་ལེན་དགོས་སྐོར་བཏོན་པར། དོན་གྱིས་རྒྱ་གཞུང་གི་དོན་ཚན་བཅུ་བདུན་བཏོན་པའི་སྒྲོམ་གཞི་ལྟར་མདོ་སྟོད་སྨད་ཀྱི་ས་ཆ་ཕལ་མོ་ཆེ་དང་དང་བོད་མི་ས་ཡ་བཞི་ལྷག་དེའི་ནང་ཚུད་མེད་ན་ཡང་། ང་ཚོའི་དམིགས་ཡུལ་དང་མི་མཐུན་པ་ཙམ་གྱིས་ཁ་ལ་གང་ཡོང་བཤད་ག་ལ་རུང་།

མདོར་ན། ད་ཐེངས་རྒྱ་མི་ཀོ་ཝེན་ཀུའེ་སོགས་ཀྱི་བསྒྲགས་གཏམ་འདི་རྒྱ་ནག་དམར་པོ་རྩ་གཏོར་དགོས་པའི་འབོད་སྒྲ་ཞིག་དང་། དམིགས་འབེན་གཙོ་བོ་རྒྱ་གཞུང་སུན་པོ་བཟོ་ཆེད་ཡིན་པ་ལས། འབྱུང་འགྱུར་རྒྱ་ནག་གི་ལམ་ཁ་དང་ལྷག་པར་མི་རིགས་གཞན་གྱི་ཐོབ་ཐང་སྐོར་བརྗོད་གཞི་གཙོ་བོ་མིན་པས། ང་ཚོས་རྒྱ་ནག་རྩ་མེད་གཏོང་བར་རྒྱབ་སྐྱོར་བྱེད་མི་ཐུབ་ན་ཡང་ངོ་རྒོལ་བྱེད་དགོས་པ་རྩ་བ་ནས་མེད། དེར་བརྟེན་བོད་དོན་ངོ་མ་ཞིག་སྒྲུབ་འདོད་ན། བབ་བརླིང་བརྟན་གསུམ་གྱིས་ལས་ལ་ཞུགས་དགོས་པ་ལས་སྤྲེལ་ཚོགས་ཀྱིས་ཁྲོན་པའི་ནང་གི་ཟླ་བ་ལེན་པའི་ངང་ཚུལ་ཅེས་ཀྱང་བྱ་མི་འོས་པའི་འབོད་སྐུལ་ཞུ་འདོད་དང་བཅས།

ཕྱི་ལོ་༢༠༢༠ ལོའི་ཟླ་ ༦ ཚེས་ ༡༡ ཉིན།