བློ་བཟང་བསམ་འགྲུབ།
ཁོང་ནི་ཕལ་བའི་ཁྱིམ་ཚང་ཞིག་ཏུ་སྐྱེས་པའི་བུ་ཕྲུག་ཞིག་ཡིན་ཞིང་། ཆུང་དུས་ནས་ས་གནས་སྦེལ་ཀོབ་གཞིས་ཆགས་ཀྱི་སློབ་གྲྭར་འགྲིམས་ནས་འཛིན་གྲྭའི་ནང་གི་སློབ་མ་རྩེ་ཕུད་ཀྱི་གྲས་སུ་ཡོད་ལ། སྔ་དགོང་ཞིང་ལས་དང་ཁྱིམ་གྱི་བྱ་བ་ཙག་ཙིག་རྣམས་ཁུར་དུ་ལེན་མཁན་གྱི་བུ་ཕྲུག་སྲི་ཞུ་ཅན་ཞིག་ཀྱང་ཡིན། འཛིན་གྲྭ་དགུ་པ་ནས་ལོ་གསུམ་གྱི་རིང་སྤྱི་ཁྱབ་རྒན་བདག་གནང་བ་དང་། སློབ་གྲྭའི་ནང་གི་འཛིན་སྐྱོང་གི་ལས་དོན་ལ་ཡང་གཟེངས་སུ་ཐོན་པའི་ཁུར་ལེན་རོགས་འདེགས་བྱས་ཡོད། སྐབས་དེ་དུས་ཀྱི་དགེ་རྒན་དཀྱུས་མ་ལྟ་བུས་ཀྱང་ཁོང་ཉིད་དགེ་རྒན་བྱས་ནས་ལོ་ངོ་སུམ་ཅུ་སོ་བདུན་སོང་བའི་བརྒྱུད་རིམ་གྱི་ནང་དུ། སྤེན་པ་ཚེ་རིང་ལྟ་བུའི་རྒན་བདག་ཕུལ་བྱུང་ཞིག་ད་བར་ཁོང་གི་མཐོང་མྱོང་མེད་ཅེས་བསྟོད་བསྔགས་དང་གདེང་འཇོག་ཀྱང་གནང་མྱོང་ཡོད། མདོར་ན་སྐབས་དེ་དུས་ནས་སྐུ་ངོ་སྤེན་པ་ཚེ་རིང་མཆོག་ནི་སྐྱེ་སྟོབས་ཀྱི་ཤེས་རབ་དང་འགོ་ཁྲིད་ཀྱི་ནུས་པ་ལྡན་པ་ཞིག་ཡིན་ཚོད་འདུག
འཛིན་གྲྭ་བཅུ་གཉིས་ཀྱི་ཡིག་རྒྱུགས་སྐབས་སུ་རྒྱ་གར་རྒྱལ་ཡོངས་བོད་པའི་སློབ་ཕྲུག་ཡོངས་ནས་སློབ་མ་རྩེ་ཕུད་ཀྱི་བྱ་དགའ་ཐོབ་ཡོད་པ་དང་། བོད་སློབ་འཛིན་ཚོགས་ནས་ཤེས་ཡོན་གྱི་རོགས་རམ་ཡང་ཐོབ་ཡོད། ཁོང་གིས་མཐོ་སློབ་སྐབས་སུ་དཔལ་འབྱོར་རིག་པ་ལ་ཆེད་སྦྱོང་གནང་ཡོད་པ་དང་། ད་ལྟ་བོད་མིའི་སྒྲིག་འཛུགས་ཀྱི་སྤྱོད་བཞིན་པའི་རྩིས་ཀྱི་སྒྲོམ་གཞི་འདི་ཡང་ཁོང་གིས་འཆར་འགོད་ལས་བྱུང་བ་ཞིག་ཡིན།
ཁོང་གིས་ Madaras ནས་སློབ་སྦྱོང་གནང་བཞིན་པ་དང་མཉམ་དུ་ས་གནས་འཐུས་ཚོགས་སྐྱར་གསོ་དང་འབྲེལ། ས་གནས་སུད་ཚོང་བ་དག་ལ་ཡང་རོགས་འདེགས་གནད་སྨིན་བྱས་ཡོད། དེ་བཞིན་ཁོང་གིས་མཚན་མོ་ཆུ་ཚོད་བདུན་པ་ནས། ཆུ་ཚོད་བཅུ་གཅིག་བར་ཟ་ཁང་དུ་ལས་ཀ་བྱས་ཏེ་རང་ཉིད་ཀྱི་སློབ་ཡོན་ལ་ཁ་སྐོང་ཐུབ་པའི་འབད་བརྩོན་ནུས་པ་ལྡན་པ་འགའ་ཡང་གནང་ཡོད། སྐབས་དེ་དུས་ཉིན་མོར་སློབ་སྦྱོང་དང་མཚན་མོར་ཟ་ཁང་དུ་ལས་ཀ་བྱེད་མཁན་གྱི་སློབ་ཕྲུག་ཞིག་ཧ་ཅང་དཀོན་ལ། དེ་ལྟ་བུའི་རང་ཁ་རང་གསོའི་ཐབས་ལམ་གྱིས་ཁོང་གི་ཡབ་ཡུམ་གྱི་ཐུགས་ལ་ཡང་རེ་བ་གསར་བ་ཞིག་བྱིན་ཡོད། སྐབས་དེར་ཁོང་གི་ཡབ་ཆེན་གྱིས་མ་འོངས་པར་ཁྱེད་རང་མཐོ་སློབ་ཐོན་པ་དང་བོད་གཞུང་ལ་ཞབས་ཞུ་བྱེད་དུ་འགྲོ་དགོས་པ་དང་། ༸གོང་ས་སྐྱབས་མགོན་ཆེན་པོ་མཆོག་གི་དབུ་འོག་དཔུང་འདེགས་དང་། མི་རབས་གསར་བའི་དཔུང་ཁག་གི་རུ་སྣེ་འདྲེན་མཁན་ཞིག་ཡོང་བའི་རེ་བ་དང་ལམ་སྟོན་ཡང་གནང་མྱོང་།
ཁོང་སློབ་མཐར་སོན་པ་ནས་ལོ་ཤས་ཀྱི་རིང་ཚོང་ལས་ཀྱི་བྱ་བར་ཞུགས་ཏེ། ༡༩༩༤ ལོར་ཁོང་གིས་ཡབ་ཆེན་གྱི་བཀའ་མངགས་སེམས་སུ་བཅངས་ནས་༸སྐྱབས་མགོན་༸རྒྱལ་བ་ཡིད་བཞིན་ནོར་བུ་མཆོག་གི་བཞུགས་གནས་ཏེ་རྡ་རམ་ས་ལའི་རི་བོའི་ཕྱོགས་སུ་གོམ་ཁ་བསྒྱུར། ཁོང་ནི་འགོ་འདྲེན་གྱི་སྣེ་ཤན་མེད་ལ་ཁྱིམ་བརྒྱུད་ཀྱི་གོ་མིང་ཡང་མེད་པར་མི་སེར་དཀྱུས་མའི་བུ་ཕྲུག་ཞིག་ཡིན་པས། རྒྱལ་སའི་ཆབ་སྲིད་ཀྱི་ཁོར་ཡུག་ནས་སྲིད་ཞུའི་ལས་དོན་གྱི་འགོ་འཛུགས་ཤིག་ཇི་ལྟར་བྱེད། འདི་ནི་ང་ཚོས་བསམ་ཤེས་དང་ཚོད་དཔག་ཐུབ་པ་ཞིག་རེད།
དེ་ལྟར་ཡང་། ལས་དབང་ཞིག་གིས་མདོ་སྨད་གྱི་ལོ་འཁོར་རྩིས་ཀྱི་ཚོགས་འདུ་ཞིག་དང་བསྟུན། དེ་དུས་ཁོང་གིས་སྐབས་བབ་ཀྱི་རྩིས་རྙོག་ལ་ཉེ་བར་མཁོ་བའི་རྣམ་དཔྱོད་རྩལ་ལ་ཀུན་གྱིས་ཡིད་དབང་འཕྲོག་པ་བྱུང་། དེ་ནས་བཟུང་མདོ་སྨད་སྤྱི་ཁྱབ་དྲུང་ཆེ་ལོ་གཉིས་དང་། མདོ་སྨད་མི་མང་གི་རེ་བ་ལྟར་སྤྱི་འཐུས་ཀྱི་འོས་ཤོག་སྐབས་བཅུ་གཉིས་དང་། བཅུ་གསུམ། བཅུ་བཞི། བཅོ་ལྔ་བཅས་ཀྱི་ལས་ཁུར་ཞུས་ཤིང་། སྐབས་རེར་རྩེ་ཕུད་ཀྱི་འོས་ཐོབ་ཀྱང་བྱུང་ཡོད། ༢༠༠༨ ལོར་གྲོས་ཚོགས་ནས་ཀྱང་མང་མོས་ཀྱིས་ཚོགས་གཙོའི་ཁྲི་ལ་བཀོད་པ་དང་། ཁོང་གིས་ཀྱང་གཟེངས་སུ་ཐོན་པའི་སྣེ་ཁྲིད་གནང་། མ་ཟད་སློབ་དཔོན་ཟམ་གདོང་རིན་པོ་ཆེས་ཀྱང་བཀའ་བློན་གྱི་འོས་མིར་མིང་འདོན་དང་ཐུགས་རེ་གནང་མྱོང་ཡོད་ལ། ཆོལ་ཁ་གསུམ་གྱི་མི་མང་གིས་ཀྱང་ ༢༠༡༦ ལོར་སྲིད་སྐྱོང་གི་འོས་མི་ལ་ཚད་མཐོའི་རྒྱབ་སྐྱོར་བྱུང་ཡོད།
༢༠༡༦ གི་ལོར་༸གོང་ས་སྐྱབས་མགོན་ཆེན་པོ་མཆོག་གིས་ཐུགས་རེ་དང་དཔལ་ལྡན་སྲིད་སྐྱོང་གིས་ཐུག་ཐག་བཅད་པ་ལྟར་ཨ་རིའི་དོན་གཅོད་ཀྱི་ཁྲི་ལ་བཀོད། ཆེས་སྐལ་བཟང་གི་ཉིན་མོ་ཞིག་ནི་༸གོང་ས་སྐྱབས་མགོན་ཡིད་བཞིན་ནོར་བུ་མཆོག་གིས་ཨ་རིའི་མཐོ་རིམ་མི་སྣ་དུ་མའི་དབུས་སུ། སྐུ་ངོ་སྤེན་པ་ཚེ་རིང་མཆོག་ལ་ལྡིང་ཆའི་དབུས་སུ་༸གསུང་གནང་ནས། ༸ཕྱག་གཡས་པས་སྐུ་ངོ་སྤེན་པ་ཚེ་རིང་གི་ཕྲག་པ་ནས་འཇུས་གནང་སྟེ། འདི་ནི་དེང་དུས་ཀྱི་སློབ་སྦྱོང་ཆ་ཚང་བ་ཐོབ་པའི་མི་སྣ་ཞིག་ཡིན་པས། ཁྱེད་རྣམས་ཀྱིས་འདི་ལ་རྒྱབ་སྐོར་གང་ཐུབ་གནང་རོགས་ཞེས་གསུང་གི་གནང་བ་ཐོབ་མྱོང་བ་ནི་ཆེས་རིན་ཐང་བྲལ་བ་ཞིག་དང་ལོ་རྒྱུས་ཀྱི་རྡོ་རིང་འོད་སྟོང་འཕྲོ་བ་ཞིག་ཀྱང་ཡིན།
ཡང་སྐུ་ངོ་སྤེན་པ་ཚེ་རིང་མཆོག་ཨ་རིའི་དོན་གཅོད་གནང་བས་དུས་ཡུན་ཐུང་ངུ་ཞིག་གི་ནང་དུ། ཨ་རིའི་ཕོ་བྲང་དཀར་པོའི་གྲོས་ཚོགས་ཀྱི་ཚོགས་ཁང་རང་གི་ནང་དུ་༧གོང་ས་མཆོག་གི་༸སྐུའི་འཁྲུངས་སྐར་ལ་སྲུང་བརྩི་དང་བསུ་བ་ཞུ་ཐུབ་པ་བྱུང་ཡོད་པ་དང་། སྐབས་དེར་གྲོས་ཚོགས་ཀྱི་འཐུས་མི་དང་གནད་ཡོད་མི་སྣ་སུམ་བརྒྱ་ལྷག་ཙམ་མཉམ་ཞུགས་ཐུབ་པ་བྱུང་ཡོད། མ་ཟད་ཨ་རིའི་གྲོས་ཚོགས་ཀྱི་ཚོགས་གཙོའི་དབུས་པའི་མང་གཙོ་ཚོགས་པ་དང་། སྤྱི་མཐུན་ཚོགས་པའི་མི་སྣ་བརྒྱད་ཙམ་རྡ་རམ་ས་ལ་རུ་༸སྐྱབ་མགོན་ཡིད་བཞིན་ནོར་བུ་མཇལ་བཅར་གྱིས་བོད་དོན་ལ་རྒྱབ་སྐྱོར་དང་། འཛམ་གླིང་སྤྱི་དང་བོད་ནང་གི་བོད་མི་ཡོངས་ལ་ཨ་རི་ལྟ་བུའི་སྟོབས་ཆེན་རྒྱལ་ཁབ་དག་གིས་རོགས་མགོན་ཚད་མཐོར་ཡོད་པའི་དཔེ་སྟོན་དང་གདེང་སྤོབས་སྟེར་ཐུབ་པ་བྱུང་ཡོད་ལ། འདི་དག་ནི་ད་བར་བྱུང་མ་མྱོང་བའི་དཔེ་མཚོན་རང་བཞིན་ཅན་ཞིག་ཀྱང་ཡིན།
ཧ་ཅང་གལ་ཆེ་བ་ཞིག་ནི་ལོ་གཅིག་དང་ཟླ་བ་གཉིས་ཙམ་གྱི་ནང་དུ་ཨ་རིར་ཡོད་པའི་ཆོལ་གསུམ་གྱི་མི་མང་རྣམས་གཅིག་སྒྲིལ་གྱི་ཕྱོགས་སུ་ཁྲིད་ཐུབ་པ་བྱུང་ཡོད། དཔེར་ན། ས་གནས་ཁ་འཐོར་དུ་གནས་ཡོད་པའི་སྤྱི་མཐུན་ཚོགས་པ་ཁག་མཉམ་རུབ་ཀྱིས་ཚོགས་ཆེན་ཐེངས་གཉིས་ཙམ་ཚོགས་ཐུབ་པ་བྱུང་ཡོད་པ་དང་། རིས་མེད་ཆོས་བརྒྱུད་ཁག་གི་ཆོས་ཚོགས་ཆེས་མང་པོ་ཞིག་ཏུ་འབྲེལ་འདྲིས་གནང་སྟེ་མཉམ་རུབ་ཀྱིས་ཆོས་རིག་གི་ཕྱོགས་ལ་ནུས་པ་མཉམ་སྤུངས་ཐུབ་པ་བྱུང་ཡོད།
ད་དུང་ཨ་རིར་ཡོད་པའི་བོད་པའི་གཟའ་མཇུག་སློབ་གྲྭའི་སློབ་ཚན་བསྐྱར་བསྒྲིགས་ཀྱི་མཚོན་ཚོགས་ཆེན་ཐེངས་གཉིས་ཙམ་ཚོགས་ཐུབ་པ་བྱུང་ཡོད། ལོ་དེའི་སྤྱི་ཟླ་༡༢་ནང་དུ་སྤྱི་འཐུས་ཚོགས་པ་ཁག་མཉམ་རུབ་ཀྱིས་བོད་དོན་ལས་འགུལ་ཆེན་པོ་ཞིག་སྤེལ་རྒྱུའི་གྲ་སྒྲིག་རྒྱ་ཆེར་གནང་ཡོད་ལ་ཁོང་དོན་གཅོད་འཕོ་འགྱུར་གྱི་རྗེས་སུ་ཡང་། ཁོང་གིས་མི་མང་ཚང་མའི་ལས་དོན་དེར་མུ་མཐུད་མཉམ་རུབ་བྱེད་དགོས་པའི་འབོད་སྐུལ་ཤུགས་ཆེར་གནང་ཡོད་པ་དེས། ཁོང་གི་གཞུང་སེམས་དང་ལྷག་བསམ་ལ་སེམས་འགུལ་ཐེབས་དགོས་པ་ཞིག་ཡིན། འདི་དག་ནི་སྐུ་ངོ་སྤེན་པ་ཚེ་རིང་མཆོག་ལ་འདས་པའི་སྤྱི་ཚོགས་ཀྱི་ནང་དུ་༸གོང་ས་མཆོག་གི་དབུས། སློབ་དཔོན་ཟམ་གདོང་རིན་པོ་ཆེ་མཆོག་དང་། མི་མང་། གྲོས་ཚོགས་བཅས་ཀྱིས་གནང་བའི་ངོས་འཛིན་དང་། རེ་བ། ཆེ་མཐོང་དག་ཡིན་ལ། ཁོང་གིས་ལོ་མང་གི་རིང་བོད་པའི་ཆབ་སྲིད་ཀྱི་སྣེ་ཁྲིད་གནང་བས་བརྒྱུད་རིམ་ལ་ངོས་འཛིན་བྱེད་འོས་པའི་བདེན་དཔང་ཡང་ཡིན།
ད་ནི་ང་ཚོས་ཁོང་གི་འདས་པའི་ལོ་རྒྱུས་ཀྱི་ནང་དུ་ཕྱི་འབྲེལ་གྱི་ཐབས་ཇུས་དང་། ནང་སྲིད་འཛིན་སྐྱོང་ཇི་ལྟར་གནང་ཡོད་པའི་སྐོར་ལ་ཕྱི་མིག་ཅིག་ལྟ།
དང་པོ་ཕྱི་འབྲེལ་གྱི་ཐབས་ཇུས།
དང་པོ།
༢༠༠༡ བོད་ཀྱི་གྲོས་ཚོགས་དང་སྲིད་ཇུས་ཉམས་ཞིབ་ཁང་གི་འགན་འཛིན་གནང་ནས་ལོ་གཅིག་ཙམ་གྱི་ནང་དུ་རྒྱ་གར་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པ་སླར་གསོ་ཐུབ་པ་བྱུང་།
གཉིས་པ།
ཉམས་མྱོང་།
རྒྱལ་སྤྱིའི་བོད་དོན་རྒྱབ་སྐྱོར་ཚོགས་པའི་ཚོགས་ཆེན་གསུམ་པ་དང་བཞི་བ་གོ་སྒྲིག་ལས་ཁུར་འཛིན་སྐྱོང་དང་མཉམ་དུ་ཞུས་ཤིང་། རྒྱལ་སྤྱིའི་བོད་དོན་རྒྱབ་སྐྱོར་ཚོགས་པ་ཁག་དང་འབྲེལ་བ་དམ་ཟབ་དང་འབྲེལ་བ་རྒྱུན་གནས་ཐུབ་པ་བྱུང་ཡོད།
གསུམ་པ།
ཐབས་ཤེས།
སྤྱི་འཐུས་སྐབས་བཅུ་གསུམ་པའི་ཚོགས་གཙོས་འབོད་བསྐུལ་གནང་བ་བཞིན་མི་ལོ་བརྒྱད་ཀྱི་རིང་ཚོགས་མ་ཐུབ་པའི་རྒྱལ་སྤྱིའི་གྲོས་ཚོགས་བོད་དོན་རྒྱབ་སྐྱོར་ཚོགས་པ་དེ་ཉིད་སླར་གསོ་དང་འབྲེལ་སླར་ཡང་འཚོགས་ཐུབ་པ་བྱུང་ཡོད། དེ་ཡང་ ༢༠༠༥ ལོར་སུ་ཁོར་ལན་སྒྲིའི་རྒྱལ་ས་ཨེ་སྒྲོན་བྷི་རོག་དང་། ༢༠༠༩ ལོར་ཨེ་ཏྲ་ལིའི་རྒྱལ་ས་རོམ་ ༢༠༡༢ ལོར་ཁེ་ན་ཏྲ་རྒྱལ་ས་ཨོ་ཀྲོ་ཝ་དང་། ༢༠༡༦ གི་ལོར་ཨ་རིའི་རྒྱལ་ས་ཝ་ཤིང་ཀྲོན་དུ་གོ་སྒྲིག་དང་ལྟ་གོན་ཆ་ཚང་བ་བྱས་ཡོད། མདོར་ན་རྒྱལ་སྤྱིའི་བོད་དོན་རྒྱབ་སྐྱོར་ཚོགས་པ་དང་། གྲོས་ཚོགས་བོད་དོན་རྒྱབ་སྐྱོར་ཚོགས་པ་གཉིས་ལ་འབྲེལ་འདྲིས་གཏིང་ཟབ་དང་ཉམས་མྱོང་རྒྱུས་ལོན་ཆ་ཚང་བ་ཡོད་པ་ནི་བཙན་བྱོལ་གྱི་ནང་དུ་ཁོང་ལས་ལྷག་པ་མེད་བཅས་བཤད་ཀྱང་མ་འགྲིག་པ་མེད།
བཞི་བ།
རང་སྐྱོང་གི་གནས་བབ་ལ་རྒྱུས་ལོན་དང་ཉམས་ཞིབ།
དབུ་མའི་ལམ་གྱི་སྲིད་ཇུས་ནི་རང་སྐྱོང་གི་གནས་བབ་དང་འབྲེལ་ཡོད་པའི་རྒྱལ་སྤྱིའི་སྟེང་གི་རང་སྐྱོང་གི་གནས་བབ་ཁག་ལ་གོ་རྟོག་ངེས་པར་དུ་དགོས་པ་ཡིན་པས། རང་སྐྱོང་གི་གནས་བབ་ལྡན་པའི་ཡུལ་ལུང་ཁག་དཔེར་ན། ཨ་རི་དང་། རྒྱ་གར། རྒྱ་ནག ཁེ་ན་ཌ། དབྱིན་ཇིའི། སྒྲེལ་མག སུ་པེན། ཨེ་ཊ་ལིས། ར་ཤི་ཡ། བཅས་ཀྱི་ཡུལ་ལུང་ཁག་གི་རང་སྐྱོང་གི་གནས་བབ་ལ་ཉམས་ཞིབ་དང་འབྲེལ། དབུས་དང་ས་གནས་ཀྱི་བར་དུ་དབང་ཆ་ཁྱབ་བགོས་བྱེད་ཕྱོགས་སོགས་ལ་རྒྱུས་ལོན་དང་། ཡུལ་ལུང་དེ་ཚོའི་གྲོས་ཚོགས་ཀྱི་འཐུས་མི་དང་མཁས་དབང་། ཆབ་སྲིད་པ་སོགས་ལ་འབྲེལ་བ་བརྟན་པོར་བཙུགས་ཐུབ་པ་བྱུང་ཡོད། དཔེར་ན། ༢༠༠༥ ལོར་ཐེངས་དང་པོར་སྤྱི་འཐུས་༡༡ ཡུ་རོབ་ཀྱི་ལུང་པ་ཁག་གཅིག་ལ་སྐོར་སྐྱོད་ཁྲིད་གནང་བ་དང་། ལུང་པ་དེ་དག་གི་རང་སྐྱོང་གནས་སྟངས་ལ་ཉམས་ཞིབ་དང་འབྲེལ། ཡུ་རོབ་སྤྱི་མཐུན་གྱི་འགྲོ་སྟངས་ག་འདྲ་ཡིན་མིན་དང་། དེའི་ནང་ལ་གྲོས་ཚོགས་ཀྱི་ལས་འགན་ག་རེ་ཡིན་མིན། འཛིན་སྐྱོང་གི་ལས་འགན་ག་རེ་ཡིན་མིན། ལྷན་ཚོགས་སྤྱིའི་འགྲོ་སྟངས་ག་འདྲ་ཡིན་མིན། ང་ཚོས་བདེ་སྡུག་གི་གནས་སྟངས་ཞིག་ཞུ་དགོས་བྱུང་ན་གང་དུ་ཞུ་དགོས་མིན་སོགས་ལ་ཉམས་ཞིབ་དང་། ཡང་ཨེ་ཊ་ལིར་ལྟ་བུར་མཚོན་ན་ལྷོ་ཏྲེ་ལོར་གྱི་ནང་གི་རང་སྐྱོང་གི་གནས་སྟངས་ལ་ཉམས་ཞིབ་དང་ ། འཛིན་སྐྱོང་གི་གནས་སྟངས། དབུས་དང་ས་གནས་ཀྱི་འགྲོ་སྟངས། ཕན་ཚུན་དབང་ཆ་བགོ་འགྲེམས་སོགས་ལ་ཡང་ཉམས་ཞིབ་དང་། དེ་བཞིན་དབྱིན་ཡུལ་དབུས་གཞུང་གིས་ཀྱང་རང་སྐྱོང་ལ་བལྟ་སྟངས་ག་འདྲ་ཡོད་མིན་དང་། ཡང་སུ་ཁོར་ལན་སྒྲི་ལྟ་བུའི་ས་གནས་ཀྱིས་དབུས་ལ་ལྟ་སྟངས་ག་འདྲ་ཡོད་མིན། ས་གནས་ཀྱི་འགྲོ་སྟངས་བཅས་ལ་ཉམས་ཞིབ་མཐར་ཕྱིན་པ་དང་གྲོས་ཚོགས་དེ་དག་ལ་བོད་དོན་ངོ་སྤྲོད་དང་འབྲེལ། དུས་དེ་ནས་བཟུང་ལོ་ལྟར་སྤྱི་འཐུས་ཁག་ཕྱོགས་སྐྱོད་གནང་འགོ་བཙུགས་ཡོད་ལ་འདི་ནི་ཆེས་ཐོག་མ་ཡང་ཡིན།།
མདོར་ན་རྒྱལ་སྤྱའི་སྟེང་དུ་བོད་དོན་རྒྱབ་སྐྱོར་ཚོགས་པ་ཁག་ལ་འབྲེལ་བ་བྱེད་སྟངས་དང། རྒྱལ་སྤྱིའི་ནང་དུ་རང་སྐྱོང་གྱི་གནས་བབ་ལ་ཉམས་ཞིབ་དང་། ཚོགས་ཆེན་གོ་སྒྲིགས་བྱེད་སྟངས་སོགས་ཀྱི་ཉམས་མྱོང་ཆ་ཚང་བ་ཞིག་ཁོང་ལ་ལྡན་ཡོད་པ་སོགས་ཆ་ཤས་ཙམ་ཞུས་ན་དེ་ལྟར་ཡིན།
གཉིས་པ་ནང་སྲིད་འཛིན་སྐྱོང་།
དང་པོ།
ཁྲིམས་སྒྲིག་གཏན་འབེབས།
སྐུ་ངོ་སྤེན་པ་ཚེ་རིང་མཆོག་ནི་ ༡༩༩༧ ལོར་ཐོག་མར་སྐབས་བཅུ་གཉིས་པའི་སྤྱི་འཐུས་ལ་རྩེ་ཕུད་ཀྱི་འོས་ཐོབ་བྱུང་བ་དང་། ཁོང་གིས་ཐེངས་དང་པོར་བོད་གཞུང་གི་བརྩིས་ཀྱི་སྒྲོམ་གཞི་ལ་འགྱུར་པ་གཏོང་དགོས་པའི་རྒྱུ་མཚན་ཁུང་ལུང་དང་བཅས་པར་གྲོས་ཚོགས་ཀྱི་དབུས་སུ་ཤུགས་ཆེར་གླིང་སློང་གནང་ཡོད་པ་དང་། རིག་པའི་སྒྲུབ་བྱེད་ཀྱང་ཡིད་དབང་འཕྲོག་པ་འགའ་གནང་ཡོད་ཀྱང་། སྐབས་དེར་ནུས་པ་ཆེར་ཐོན་མེད། སྤྱི་འཐུས་སྐབས་བཅུ་གསུམ་པའི་སྐབས་སུ་སློབ་དཔོན་ཟམ་གདོང་རིན་པོ་ཆེར་བཀའ་བློན་ཁྲི་བར་ཕེབས་པ་དང་། སྐབས་དེར་ཚོགས་ཆུང་ཆེས་དང་པོར་དངུལ་བརྩིས་འབུལ་ཕྱོགས་ཀྱི་ཚོགས་ཆུང་བཙུགས་གནང་པ་དང་། དེའི་ནང་དུ་གྲོས་ཚོགས་ཀྱི་འཐུས་མི་སྐུ་ངོ་པདྨ་འབྱུང་གནས་མཆོག་དང་། སྐུ་ངོ་སྤེན་པ་ཚེ་རིང་གཉིས་ཀྱང་ཚོགས་ཆུང་དེའི་ནང་དུ་བཞག་གནང་མཛད་ཡོད་པ་དང་། སྐུ་ངོ་སྤེན་པ་ཚེ་རིང་ནི་དཔལ་འབྱོར་རིག་པར་སློབ་ཐོན་པ་ཞིག་ཡིན་པའི་ཆ་ནས་དངུལ་རྩིས་ཀྱི་སྒྲོམ་གཞི་མཆར་འགོད་ཆ་ཚང་བ་བྱས་ཏེ་ཚོགས་ཆུང་དུ་སྣམས་ཕེབས་པ་དང་། བཀའ་བློན་ཁྲི་བ་སློབ་དཔོན་ཟམ་གདོང་རིན་པོ་ཆེས་ས་ཡིག་དང་བཅས་ངོས་འཛིན་ལྡན་པའི་ཁྲིམས་སུ་བཅས། དུས་དེ་ནས་བཟུང་བོད་གཞུང་གི་བརྩིས་ཀྱི་སྒྲོམ་གཞི་དེ་ཉིད་དེང་དུས་དང་ལྡན་པ་ཞིག་བྱུང་ཡོད་ལ་ད་ལྟ་ཡང་ལག་ལེན་དུ་བསྟར་བཞིན་པ་ཡིན། ད་ལྟའི་བཅའ་ཁྲིམས་རིན་པོ་ཆེ་སྐྱར་བཅོས་ཀྱི་སྐབས་སུ་ཡང་ཚོགས་ཆུང་གི་སྣེ་ཁྲིད་ནུས་པ་ལྡན་པ་གནང་ཡོད།
གཉིས་པ།
དམངས་གཙོའི་གོ་རྟོགས།
༡༩༩༡ ལོར་བཅའ་ཁྲིམས་རིན་པོ་ཆེ་གཏན་འབེབས་བྱས་པ་ནས་བཟུང་གཞི་རིམ་མི་མང་གི་ནང་དུ་མང་གཙོའི་བསམ་བློ་དང་། མང་གཙོའི་གོ་རྟོག ། མང་གཙོའི་ལེགས་བྱང་གོང་འཕེལ་གཏོང་ཕྱིར་ལོ་མང་གི་རིང་ས་གནས་འཐིས་མིའི་ཚོགས་འདུ་ཁག་ ༣༦ ལ་ཟབ་སྦྱོང་སྤྲོད་ཕྱིར་སྐོར་སྐྱོད་ལན་མང་བྱས་ཏེ་ས་གནས་གྲོས་ཚོགས་ཀྱི་འཛིན་སྐྱོང་བྱེད་ཕྱོགས་དང་མང་གཙོའི་འཕེལ་རིམ་ལ་གཟེངས་སུ་ཐོན་པའི་གྲུབ་འབྲས་བྱུང་ཡོད།
གསུམ་པ།
གཞོན་སྐྱེ་མི་རབས་དང་བོད་མིའི་སྒྲིག་འཛུགས་བར་གྱི་འབྲེལ་བ།
སློབ་གྲ་ཁག་༡༧ གྱི་ནང་ནས་འཛིན་གྲྭ་བཅུ་གཅིག་གི་སློབ་ཕྲུག་དང་། མཐོ་སློབ་ཀྱི་སློབ་ཕྲུག་བཅས་ལ་ལོ་རེར་རྡ་རམ་ས་ལར་ཟབ་སྦྱོང་སྐོར་སྐྱོད་གོ་སྒྲིག་དང་། བོད་མིའི་སྒྲིགས་འཛུགས་ཀྱི་ལྷན་ཁང་ཁག་རེ་རེ་བཞིན་ངོ་སྤྲོད་དང་། སློབ་ཕྲུག་དག་སྲིད་ཞུ་བསྒྲུབ་འདུན་གྱི་བསམ་བློའི་གོ་རྟོག་དང་། བསམ་བློའི་བག་ཆགས ། བསམ་བློའི་ལེགས་བྱང་ཤུགས་ཆེར་བསྐྲུན་ཐུབ་པ་བྱུང་ཡོད། དེ་ནི་སྐུ་ངོ་ཁོང་གིས་གསར་གཏོད་ལྟ་བུ་ཞིག་ཀྱང་ཡིན།
བཞི་པ།
གྲོས་ཚོགས་ཀྱི་འཐུས་མིའི་སྐོར་སྐྱོད།
༢༠༠༣ ལོ་ནས་གྲོས་ཆོད་བཞགས་ཀྱང་ལག་ལེན་དངོས་སུ་བསྟར་ཐུབ་མེད་པ་གྲོས་ཚོགས་འཐུས་མིའི་རྒྱ་བལ་འབྲུག་གསུམ་གྱི་ས་གནས་ཁག་ལ་སྐོར་སྐྱོད་ཀྱི་སྒྲིག་གཞི། ཁོང་ཚོགས་གཙོ་བཞེངས་བ་དང་ལག་ལེན་དངོས་སུ་གནང་སྟེ་རྒྱ་བལ་འབྲུག་གསུམ་གྱི་ས་གནས་༡༧ ལ་གྲོས་ཚོགས་འཐུས་མིའི་སྐོར་སྐྱོད་ལོ་རེར་ཐེངས་གཉིས་གནང་རྒྱུར་འགོ་འཛུགས་གནང་ཡོད་པ་དང་། ས་གནས་ཀྱི་བདེ་སྡུག་རྣམས་གྲོས་ཚོགས་ལ་སྐྱེལ་ཐུབ་པ་བྱུང་ཡོད་ལ། གྲོས་ཚོགས་ཀྱི་ཆེ་མཐོང་ཡང་གོང་མཐོར་ཐུབ་པ་བྱུང་ཡོད།
ལྔ་བ།
ས་ཁང་བསྲུང་སྐྱོབ་དང་ཁང་བརྩིག་འཛུགས་བསྐྲུན།
སྐུ་ངོ་སྤེན་པ་ཚེ་རིག་མཆོག་གིས་སྤྱི་འཐུས་སྐབས་བཅུ་བཞི་དང་བཅོ་ལྔའི་སྐབས་སུ་འགན་བཞེས་ཁུར་ལེན་གནང་སྟེ། གངས་སྐྱིད་དུ་གཞུང་ལས་ཁང་གསར་བསྐྲུན་དང་ཚོགས་ཁང་གསར་རྒྱག་གི་མཚོན་པའི་འཛུགས་བསྐྲུན་གྱི་ལས་གཞི་ཡང་ཕུལ་དུ་བྱུང་པ་གནང་ཡོད། སྐབས་དེར་བཀའ་ཟུར་འགའ་ཞིག་གིས་ལས་ཤག་ཕྱིར་འབུལ་གྱི་ཐད་ལ་བསམ་ཚུར་རྣོ་ངར་ཅན་འགའ་བྱུང་ཡོད་ཀྱང་། མཐར་གཞུང་གི་ས་ཆ་གཞུང་རང་ལ་བདག་ཐུབ་པ་བྱུང་ཡོད་པ་ནི་སྐུ་ངོ་ཁོང་གི་བློས་གཏང་ཆེན་པོས་འབྲས་བུ་ཞིག་ཡིན་ཞིང་། དེ་ལྟ་བུའི་བློས་གཏོང་དང་གདོང་ལེན་ཆེན་པོ་ཞིག་བྱ་ཐུབ་མེད་ཚེ། ད་ལྟའི་བཀའ་ཤག་གི་ཁང་བརྩེགས་འདི་དག་ཀྱང་བསྐྲུན་ས་མེད་པ་ཞིག་ཡིན། དེ་ལྟར་ཡང་། སྐུ་ངོ་སྤེན་པ་ཚེ་རིང་མཆོག་རང་ལ་ནི་སྤྱི་བའི་ལས་དོན་གྱིས་དབང་གིས་ཆབ་སྲིད་ཀྱི་གྲིབ་ནག་ཡིད་མུག་པ་འགའ་གདོང་ལེན་བྱེད་དགོས་པ་བྱུང་ཡོད་ལ། འདི་དག་ནི་དཀར་ནག་གོ་ལྡོག་གི་བྱ་བ་ཞིག་ཀྱང་ཅི་ལ་མིན།
མདོར་ན། འདི་དག་ནི་འདས་པའི་ནང་སྐུ་ངོ་ཁོང་གི་ཉམས་མྱོང་དང་ནང་སྲིད་འཛིན་སྐྱོང་གི་སྐོར་ལ་ང་ཚོས་ངོ་ཤེས་དགོས་པ་དག་ཡིན།
གོང་དུ་ཞུས་པ་འདི་དག་ཀྱང་གོ་རིམ་བསྒྲིགས་ཏེ་དཔེ་མཚོན་ཙམ་དུ་ཞུས་པ་ལས་ཁོང་གིས་གནང་བས་ཕྱག་ལས་མཐའ་དག་དེའི་ཁུངས་སུ་འདུས་བ་མིན་པ་ཡང་མཁྱེན་དགོས་སོ།
༢༠༡༦ གི་ལོར་ཁོང་སྲིད་སྐྱོང་གི་འོས་མིར་བཞེངས་སྐབས་ཁོང་གིས་མ་འོངས་བྱེད་ཕྱོགས་ཀྱི་ཐད་ལ་རིག་ལམ་ཆེན་མོ་བཞི་གཏན་ལ་ཕབས་ཡོད་པ་དེ་དག་གི་སྐོར་ལ་རྒྱུས་ལོན་བྱེད།
རིག་ལམ་ཆེན་མོ་བཞི།
དང་པོ། འཛིན་སྐྱོང་གི་ལས་དོན་ཐད། རིག་ལམ་ཆེན་པོ་བཞི་གཏན་ལ་ཕབས་ཡོད། ལས་དོན་གང་ཞིག་སྒྲུབ་པས་སྐབས་སུ་གསལ་བོ་དང་། བརྟན་པོ། དྲང་པོ་དང་། ཕྱོགས་སུ་མ་ལྷུང་བ་བཅས་ཡིན།
གཉིས་པ། ཆབ་སྲིད་ཀྱི་ཕྱག་ལས་གནང་ཕྱོགས་ཀྱི་ཐད། ནུས་པ་གསུམ། ༡ མི་ནུས་པ་དང་། ༢ དཔལ་འབྱོར་གྱི་ནུས་པ། ༣ དུས་ཚོད་ཀྱི་ནུས་པ། བཅས་ཡོད་ཚད་ཆབ་སྲིད་ཀྱི་སྟེང་དུ་སྤུང་གི་ཡིན་གསུང་ཡོད་པ་ནི་ཁོང་གི་ཆབ་སྲིད་ཀྱི་ཕུགས་འདུན་ཡིན།
གསུམ་པ། མཐའ་གཉིས་སུ་མ་ལྷུང་བས་དཔལ་འབྱོར་གྱི་ཕུགས་འདུན། ༡ གཞན་བསྟན་ཁོ་ན་མ་ཡིན་པ། ༢ གཞན་གྱིས་མཐུན་འགྱུར་མེད་པ་མ་ཡིན་པ། ༣ མཐའ་གཉིས་སུ་མ་ལྷུང་བའི་ལངས་ཕྱོགས་བཅས་ནི་ཁོང་གི་དཔལ་འབྱོར་གྱི་ཕུགས་འདུན་ཡིན།
བཞི་བ། རིག་གཞུང་དང་ཤེས་ཡོན་སྲིད་ཇུས་ལ་ཐབས་ཤེས་གསུམ། ༡བསམ་བློའི་གོ་རྟོག་སད་པའི་ཐབས། ༢བསམ་བློའི་བག་ཆག་འཇོག་པའི་ཐབས། ༣བསམ་བློའི་ལེགས་བྱང་བསྐྲུན་པའི་ཐབས་བཅས་ནི་ཁོང་གི་རིག་གཞུང་དང་ཤེས་ཡོན་གྱི་ཕུགས་འདུན་ཡིན།
ལྔ་བ། མདོར་ན་ཆབ་དཔལ་རིག་གསུམ་གྱི་ལས་དོན་གང་ཞིག་བསྒྲུབ་ཀྱང་མཐུན་པ་གསུམ། ༡ ལས་དོན་གང་ཞིག་བསྒྲུབ་ཀྱང་རྒྱལ་སྤྱིའི་གནས་བབ་དང་མཐུན་པ། ༢ བོད་ནང་གི་དངོས་ཡོད་གནས་སྟངས་དང་མཐུན་པ། ༣ བོད་ཕྱི་ནང་གི་བོད་མིའི་སེམས་ཁམས་དང་མཐུན་པ་བཅས་ནི་ཁོང་གི་ཆབ་དཔལ་རིག་གསུམ་གྱི་ཕུགས་འདུན་ངོ་མ་དེ་ཡིན།
དྲུག་པ། བོད་རྒྱ་འབྲེལ་མོལ་ལ། འབྲེལ་བ་གསུམ། དེ་ཡང་ཕྱི་ཡི་གནོན་ཤུགས་ཁོ་ན་ལ་བསྟན་པ་མ་ཡིན་པའི་འབྲེལ་བ་གསུམ།
༡ ཆེས་མཐོས་མི་སྣ་དང་འབྲེལ་བ། ༢ ཚོང་པ་འབྱོར་ལྡན་དང་འབྲེལ་བ། ༣ ཤེས་ཡོན་ཅན་དང་རྩོམ་པ་པོ་ལ་འབྲེལ་བ་བཅས་ནི་སྐབས་དེ་དུས་སུ་ཁོང་གིས་བོད་རྒྱ་འབྲེལ་མོལ་གྱི་དམིགས་ཡུལ་དང་ཐབས་བྱུས་ཡིན།
བདུན་པ། དམ་བཅའ། ཆེན་པོ་བློས་གཏོང་མི་བྱེད། ཆུང་ཆུང་རྩོད་པ་མི་བརྒྱག་བཅས་པ་ནི་ཁོང་གི་དམ་བཅའ་ཡིན།
གོང་དུ་བྲིས་པ་འདི་དག་ནི་སྐུ་ངོ་སྤེན་པ་ཚེ་རིང་མཆོག་གི་འདས་མ་ད་གསུམ་གྱི་གཏམ་བཤད་ཁག་ལ་ཞིབ་ཏུ་ཉན་བསམ་པ་དང་རྒྱུས་ལོན་བྱས་ཏེ། ཁོང་གིས་གཏམ་བཤད་དག་ཇི་བཞིན་ཡིག་ཐོག་ཏུ་ཕབས་པ་ཞིག་ཡིན། འདི་ལ་ཚིག་ནོར་དང་དོན་ནོར་གྱི་འཁྲུལ་བ་འདྲ་བྱུང་ཡོད་ན་དགོངས་སེལ་དང་བསྒྲགས་ཁོང་གིས་ ༢༠༡༦ ལོའི་ཨ་རིའི་ནི་འུ་ཡོག་ཏུ་སྲིད་སྐྱོང་འོས་མིའི་གཏམ་བཤད་དང་དེ་བཞིན་ས་གནས་ཁག་གི་གཏམ་བཤད་ཁག་ལ་གཟིགས་ཞུབ་གནང་སྟེ་བསྐྱར་བཅོས་གནང་རོགས་གནངས་ཞེས་ཞུ་རྒྱུ་ཡིན། བཀྲིན་ཆེ།།
མཆན། གོང་གསལ་བསམ་ཚུལ་རྩོམ་ཡིག་དེ་ནི་རྩོམ་པ་པོའི་དགོངས་ཚུལ་ཡིན་པ་ལས་འདི་ག་གསར་ཁང་གི་ལྟ་བ་ལངས་ཕྱོགས་ཡིན་པས་མ་ཁྱབ།
རྩོམ་པ་པོ་ལགས། ངས་མཆན་ཐུང་ཅིག་བྲིས་ནས་བཏང་བ་དེ་འདོན་རོགས་གནང་།
ཁྱེད་ནས་བཀོད་པ་ལྟར་རང་རེའི་དབུ་འཁྲིད་མཆོག་ནས་ཨ་རིའི་མི་སྣའི་དབུས་སུ་ཁོང་ལ་ཆེ་འོས་གནང་རེད།་དེའི་རྒྱུ་མཚན་ནི་ཁོ་ཆེ་བའི་ཨེ་ཡིན་དེ་ནི་ཁོའི་ལས་འགན་བོད་པའི་བདེན་མཐའ་གསལ་ཐབས་ཀྱི་ལས་གནད་དུ་ཁོང་རྣམ་པའི་མཐུན་བསྒྱུར་ཐོབ་ཐབས་སུ་ངེས་པར་ཡིན། དེ་ལྟ་བུ་བོད་སྤྱི་བའི་ལས་གནས་ཡོད་པ་སུ་ལའང་གནང་སྲིད། ད་ལྟའི་སྲིད་སྐྱོང་ལའང་གནང་ཡོད་སྙམ། མཐར་བསྡོམས་ན་རང་མཐོང་ཆེ་བས་རྐང་རྗེས་ལག་བསུབས་དང་གྲོད་པས་ཆུ་གློད་རེད། ད་ལྟ་སྤེན་ཚེ་ལ་ཐུགས་དགོངས་དག་བའི་གནས་ཚུལ་གོ་མ་སོང། འདི་དོན་དངོས་དེ་རེད། འདི་ལས་དོན་མ་བསྒྲུབས་པའམ་བསྒྲུབས་ནོར་གྱུར་བའི་བཀའ་སྐྱོན་མ་རེད། དེ་ལས་ཀྱང་ནོར་འཕྲུལ་ཆེ་བའི་གནད་དོན་ཡིན།
ཕོ་བྲང་དཀར་པའི་ནང་སྐུའི་འཁྲུངས་དཀར་ཞུ་རྒྱུ་དེ་སྤེན་ཚེ་འཇོན་ཆེ་བའི་ཨེ་ཡིན། སྤེན་ཚེ་༢༠༡༦ ཟླ་ ༩་ནང་ལས་འགན་ཞུས་དུས་ཚོད་དེ་ཙམ་མ་ཕྱིན་པར་ལས་གནད་ཆེན་པོ་དེ་འདྲ་ཞུ་ཐུབ་རྒྱུ་དཀའ། དམའ་མཐར་ཡང་ལོ་གཅིག་ལྷག་སྔོན་ཙམ་ནས་ངོ་བཞེས་ཐོབ་དགོས་སྙམ། དེ་བཞིན ICT དང་དོན་ཟུར་སོགས་ནང་ཀྱང་མཉམ་རུབ་ཡོད་ངེས། ལོ་རྒྱུས་མང་པོ་འདིར་མི་ཞུ།
བོད་པའི་གཟའ་འཇུག་སློབ་གྲྭའི་སློབ་ཚན་བསྐྱར་བསྒྲིགས་ཀྱི་ལས་ཚན་དུ་མཚོན་ན་ཁོ་བས་ད་ཡོད་གཞུང་བཞེས་ཡོད་པའི་ཀློག་དེབ་དེ་ཐོན་ཐབས་སུ་འབད་པ་དེ་ཙམ་གནང་མ་སོང་བའི་བསམ་ཚུལ་ཡོད་མཁན་ཡོད་འདུག ཀློད་དེབ་དེ་ཡང་ཚོགས་བཅར་བའི་ཨུ་ནན་བཤད་པས་འགྲོ་ཐུབ་ཙམ་བྱུང་ངེས། གཞན་གཟིགས་སྐོར་དང་ཚོགས་འདུ་སོགས་སྐོར་ཞུས་ན་ང་ནི་ཞུ་རྒྱུ་འདི་ལས་མང་པ་ཡོད་དགོས། གང་གི་ན་བོད་གཞུང་ལས་དོན་ཞུ་བར་བཏང་ཡོད།
སློབ་དཔོན་ཟམ་གདོང་རིན་པོ་ཆེ་མཆོག་བཅས་ཀྱིས་གནང་བའི་ངོས་འཛིན་དང་། རེ་བ། ཆེ་མཐོང་དག་ཡིན་ལ། འདི་རྣམས་ཁྱེད་ཚོས་མཐོང་བའི་ཞེན་ཆགས་དེ་རེད། དོན་དངོས་སམ་ཟམ་གདོང་རིན་པོ་ཆེ་མཆོག་གི་མཐའ་མིའི་སྤེན་ཚེ་ལགས་ཀྱི་བསྡོམས་ནི་་་་་་དེ་ཡང་ཨ་རི་དོན་གཅོད་མ་ཞུས་གོང་དང་དེ་འབྲེལ་རྙོགས་ཕྲ་མ་བྱུང་གོང་གསུང་གསལ་དུ། ང་ནི་ཅེས་པ་རིན་པོ་ཆེ་མཆོག་ལ་གོ་བ་ལེན་རོགས། ང་ནི་བློ་སེང་དང་སྤེན་ཚེ་གཉིས་ཀར་ལ་ཡིད་སྨོན་མེད་པའམ་སྲིད་སྐྱོང་དུ་འོས་མཆོད་མི་མཐོང་བས་ ༢༠༡༦ སྲིད་སྐྱོང་འོས་བསྡུར་འོས་འཕེན་གྱི་མིན་ཅེས་བཀའ་གནང་བ་སྤྱི་ཡོངས་ཀྱི་གནས་ཚུལ་མ་རེད་དམ། བཀའ་མོལ་འདི་མ་ཕེབས་གོང་དུ་བབ་ནས་གསལ་བཤད་གནང་པ་ལྟར་སྤེན་ཚེ་རིན་པོ་ཆེའི་བཀའ་བློན་དུ་བཀོད་རྒྱུའི་གཟིགས་པ་གནང་རེད་ཀྱང་མཐའ་བསྡོམས་གོང་ཞུས་ལྟར་ ༢༠༡༦ ལ་འོས་གནང་མེད། གང་གི་ཕྱིར།
ས་གནས་གནད་ཡོད་དང་ཞུ་འགན་ཆེ་བ་གཟིགས་ནས་ཨ་རིས་གྲོས་འཐུས་རྣམས་སུ་མཐུན་བསྒྱུར་ཡོངས་པའི་རེ་འདུན་ཞུས་ཀྱང་མཐར་སྤེན་ཚེས་འཐུས་ཚང་མེད་པའི་ཨ་རི་མཐོ་རིམ་མི་སྣས་སྙན་གསེང་ཞུས་པ་གོ་རྒྱུ་འདུག་ན་ཕྱི་རྒྱལ་མི་སྣས་ཆེ་མཐོང་ཇི་འདྲ་ཡོང་རེ་འདུག་གམ།
གཤམ་གྱི་ཚན་པ་གཉིས་པ་རྣམས་ཀློག་ཁམས་མ་བྱུང། མདོར་བསྡུས་ན་ཆོས་ནང་རྒྱུ་དངོས་གཙང་གསུམ་དགོས་གསུངས་པ་ལྟར་སྲིད་གཞུང་པའམ་སྤྱི་ཚོགས་ལས་ལའང་ཐོག་མཐའ་བར་གསུམ་དང་ལྷག་དོན་གནད་འགག་ཐུགས་དུས་བློ་འགྲིམས་དགོས་པ་དེ་སྤེན་ཚེ་ལ་ནས་ཆུ་གློད་རེད།
དེ་མིན་བཀའ་ཟུར་རྒྱ་རི་སྒྲོལ་མ་ལགས་དང་བཀའ་ཟུར་འབྲོང་ཆུང་ལགས་རྣམ་གཉིས་སྤེན་ཚེ་ལགས་ལས་ཆེར་འོས་ཆེ་བས་ཁོང་གཉིས་ལ་བློ་བཅོལ་ན་གང་ཅིས་དོན་ཕན་ཆེ་བ་སྤྱི་དོན་ཆེད་བསམ་འཆར་དུ་ཞུས་ཡིན།།
དང་ཐོག་གུས་རང་ཉིད་དང་ཚོགས་ཟུར་སྤེན་པ་ཚེ་རིང་ལགས་དབར་ཇ་ཕོར་སྒང་གི་འབྲེལ་བ་ཙམ་ཡང་མེད་པའི་གསལ་བཤད་ཞུ་ཆོག་པ་དང་། དྲང་བདེན་དང་གཙང་དང་སྤྱི་སེམས་ཁོ་ནས་རང་གི་བསམ་ཚུལ་ཕྲན་བུ་ཞིག་གླེང་བར་འདོད།
ང་ཚོར་དགོས་རྒྱུའི་ ༢༠༢༡ གི་སྲིད་སྐྱོང་དེ་ཚོགས་ཟུར་སྤེན་པ་ཚེ་རིང་ཉིད་ཤིན་ཏུ་ནས་འོས་པ་མཐོང་། ཁོང་གི་ལྷག་བསམ་དང་སྙིང་སྟོབས་ནི། ལག་དགུ་ཆད་ཀྱང་ལན་དགུ་མཐུད་ཟེར་བའི་དཔེ་ལྟར་ཡིན། ང་ཚོའི་རྩ་དོན་འགྱེལ་ས་ནས་ཡར་ལངས་ཐུབ་པ་དགོས་རྒྱུ་དེ་ཡིན་པས། དེའི་དོན་དུ་གཞུང་དམངས་གིས་ཞབས་ཞུ་བ་ཚད་ལྡན་ཞིག་འདམ་རྒྱུ་དང་། གདམས་པའི་དབུ་ཁྲིད་ཟེར་བ་དེ་ཡང་འགྱེལ་ས་ནས་ཡར་ནམ་ཡང་ལངས་ཐུབ་མཁན་དཔའ་བོ་ཁོག་ཡངས་ཁོང་ལྟ་བུ་ཞིག་དགོས། ཁོང་ནི་དུས་ད་ལྟ་ཡང་བོད་མིའི་སྤྱི་དོན་སླད་མི་ཚེ་སྒང་པོ་གཏོང་རྒྱུར་ཆོད་སེམས་བརྟན་པོ་འཆང་ནས་བཞུགས་ཡོད། ཡང་དགོས་ཁོང་ལ་བོད་མིའི་སེམས་ཁམས་དང་གོམས་གཤིས་ཡི་རྒྱུས་མངའ་ཚད་མཐོ་པོ་ཡོད། དབྱིན་ཧིན་སྐད་ཀྱི་ཆུ་ཚད་ཤིན་ཏུ་ལེགས། བོད་ཀྱི་སྐད་ཡིག་གི་ཆུ་ཚད་ནི་སུས་བལྟས་ཀྱང་སྤོབས་པ་བསྟེར་ངེས་ཞིག་ཡིན་པ་ཡང་མཐོང་ཆོས་སུ་ཡོད། ཁོང་ལ་བོད་དང་རྒྱ་དཀར་ནག་གཉིས། དེ་མཚུངས་རྒྱལ་སྤྱིའི་ཆབ་སྲིད་ཀྱི་འདས་མ་ད་གསུམ་གྱི་གོ་རྟོགས་ཡང་ཚད་མཐོ་པོ་ཡོད། ཁོང་གི་བཀའ་སློབ་དགོངས་སྐོར་ཞུ་ས་ཡང་ནམ་ཡང་ནོར་མེད། ཁོང་གིས་རྒན་གཞོན་གོ་རིམ་ལ་གཙིགས་མཐོང་དང་ཡ་རབས་བཟང་སྤྱོད་ཀྱི་ལྟ་གྲུབ་ལག་ལེན་ཆུང་དུས་ནས་ད་བར་གཞི་རྩ་བརྟན་པོས་རྒྱུན་སྐྱོང་བདག་གཅེས་གནང་ཡོད། བོད་མིའི་འགོ་ཁྲིད་ཞིག་ཡིན་པའི་ཆ་ནས་གཙོ་ཆེར་སྒེར་རང་ངོས་ནས་བློ་སྙིང་བྲང་གསུམ་གཏད་ས་ནམ་ཡང་སྔར་ནས་ནོར་མེད་ལ། དུས་ད་ལྟ་དང་མ་འོངས་པར་ཡང་འགྱུར་མེད་བརྟན་པོར་གནས་ཁོ་ཐག་ཡིན་པ་ལ་ཡིད་ཆེས་བྱེད་ཆོག ༢༠༡༦ འོས་བསྡུའི་སྐབས་སྤྱི་ཚོགས་ནང་སྲིད་སྐྱོང་བློ་སེང་ལགས་དང་འགྲན་རྩོད་ཀྱིས་ལབ་གླེང་ཕྲན་བུ་ཞིག་བྱུང་ཡོད་པ་འདི་ནས་ཁོ་པར་ཆབ་སྲིད་ཀྱི་སློབ་གསོ་དང་། ལྷག་བསམ་སྙིང་སྟོབས་ཀྱི་བསྐུལ་མ་འཕར་མ་འཐེབས་ཡོད། ཁྲིམས་ཀྱི་མདུན་སར་ཡང་ནམ་མཁའ་གཡའ་དག་དང་ས་གཞི་རྡུལ་དག་གི་གོ་ས་སྤོབས་པ་ཆེན་པོས་བརྒྱུད་རིམ་དང་ལྡན་པའི་ཐོག་ནས་བསླངས་མྱོང་བའི་བོད་ཀྱི་མི་སེར་བྱས་རྗེས་ཅན་ཞིག་ཡིན། སྤྱི་ཚོགས་ནང་གཞུང་དམངས་ཀྱི་སྤྱི་རྫས་དངུལ་དངོས་སོགས་ལྐོག་ཟ་རུལ་སུངས་བྱས་པའི་ལབ་གླེང་ཡེ་ནས་མེད། ཆང་རག་མཆོད་རྒྱུ་ནི་ད་ཆ་ཡོངས་སུ་སྤངས་ཡོད་འདུག ད་ཆ་ཡང་། ཁོང་ལ་ཞུམ་པ་མེད་པའི་སྙིང་སྟོབས་དང་ཉམས་མྱོང་། མི་རིགས་ཀྱི་ལར་ཞེན་གསོན་པོ་དང་ཤེས་འཇོན་ཆ་ཚང་འཁུར་དུ་འཁྱེར་བའི་ཆ་རྐྱེན་བཟང་པོ་དང་ལྡན་ཡོད་པས། ད་རེ་ཁོང་ལ་འགྱེལ་ས་དེ་ནས་ཡར་ལངས་རྒྱུའི་གོ་སྐབས་ཤིག་ཚང་མས་ངེས་པར་དུ་འབུལ་དགོས། བོད་མི་དམངས་ནས་ཁོང་ལ་ད་རེ་གོ་སྐབས་ཤིག་འབུལ་མ་ཐུབ་ཚེ་གྱོང་གུན་སྤྱི་པ་རང་ལ་འཕོགས་རྒྱུ་ཡིན་པས། མི་དམངས་ཡོངས་ནས་དགོངས་པ་ཆེ་བཞེད་ཀྱིས་ ༢༠༢༡ ལོའི་སྲིད་སྐྱོང་གི་འོས་ཤོག་ཁོང་ལ་འཕེན་རོགས་ཞུ།།
སྐུ་ཞབས་ཚེ་དབང་རིག་འཛིན་ལགས། སྲིད་སྐྱོང་འོས་སུ་ལ་གནང་མི་གནང་དེ་ཉིད་ཀྱི་ཐག་གཅོད་རེད། ཡིན་ཀྱང་ཁྱེད་ཀྱི་དགོངས་ཚུལ་ལ་ང་ལན་ཞིག་ཞུ་གམ་བྱུང། ལམ་དགུ་ཆད་ཀྱང་ལན་དགུ་མཐུད་ཟེར་དུས་དབྱིན་སྐད་ལ་ optimistic ཞུ་བ་དེ་རེད་བསམ། སྤེན་པ་ཚེ་རིང་འགྱེལ་ལམ་དེ་སྤྱི་ཚོགས་དང་རྗེས་སུ་རང་དོན་ཆེད་གཙང་བཟོའི་མང་འདེམས་གཞུང་ལ་མ་གུས་པ་དེ་རེད། དེ་དགུ་ཆད་མཐུད་གོང་ཞུས་ optimistic ཞུ་པ་དེ་ཡིན་ན་མཐར་ཡོད་པ་དེ་ཡང་མེད་པ་འགྲོ་ངེས་པ་རེད། དཔའ་བོ་ཁོག་ཡངས་ཞེས་པ་དེ་མི་ཆོས་གཙང་མ་བཅུ་དྲུག་ནང་དཀའ་བ་དཔྱད་བཟོད་པའི་ཐེག་པ་ཆེ་ཞིང་བློ་ཁོག་ཡངས་ཞུ་བར་གོ་ན་སྤེན་ཚེ་ལགས་སྲིད་སྐྱོང་གི་ལས་དོན་ཞུ་ཐུབ་མ་སོང་ཅེས་ལབ་པ་ཙམ་ཀྱང་མ་ཟོད་པའི་རྙོག་ཁྲ་ག་ཚོད་བཟོས་བས་དེ་ཐེག་ཆེ་བློ་ཡངས་པ་ངས་གོ་མི་ལེན།
ཆུང་དུས་ནས་ཡ་རབས་ཡོད་ན་ཁོ་བའི་གྲོགས་དངགཞན་ཁོ་བར་རེ་འདོད་ཡོད་པའི་མི། ་ཁོ་བར་འོས་བསླུགས་འདོད་ཅན་གྱི་བོད་མིས་ཆང་མ་འཐུང་ན་ཡག་པའི་རེ་འདུན་ཞུ་སྐབས་ག་རེ་ཡིན་ནམ་མིན་ནམ་ཆང་བཅད་གྱི་མིན་ཟེར་ལན་སྤྲོད་ཕོད་དམ། བལྟ་བ་ལྷ་དང་མཉམ་ནའང་སྤྱོད་པ་མི་ལྟར་མཚུངས་དགོས་་པའི་བོད་དཔེ་ཡིན་དུས་དམའ་མཐར་ཡང་ཐབས་ཤེས་ཞུ་གི་ཡིན་ཙམ་ཞིག་་ཁ་ནས་ཐོན་མི་དགོས་སམ། དེ་ན་ཡ་རབས་དང་གོ་རིམ་ལ་གཙིགས་མཐོང་སོགས་དེ་ནས་ཤེས།
ངས་ནི་ཁོ་བར་གོ་སྐབས་ཕུལ་ན་ཟེར་མཁན་ཁ་ཤས་མཐོང་བ་ཚང་མར་བརྒྱ་ཆ་བརྒྱ་ཡིད་ཆེས་ཡོད་མཁན་ཕལ་ཆེར་མིན་འདུག། གང་ཡོངས་མི་མཚོད་པའི་སྤེན་ཚེ་ལས་འོས་མི་གཞན་ཁོ་བ་དང་གཅིག་མཚུངས་ཤིག་ལ་འོས་ཕུལ་ན་སྤྱི་བར་སྨན་ཆ་ཆེ། རྒྱ་རི་དང་འབྲོང་ཆུང་གཉིས་སྤེན་ཚེ་ལས་འོས་ཆེ་བས་དེ་གཉིས་གང་རུང་ལ་ང་འོས་འབུལ་ལོ།
རྩོམ་སྒྲིག་པ་ལགས། ཐུགས་རྗེ་ཆེ། ལག་དགུ་ཆད་ཀྱང་་་་་ ཟེར་བ་དེ་ ལན་དགུ་ཆད་ཀྱང་་་་་ལ་བཅོས་རོགས།
དེ་འདྲའི་ནུས་པ་མཉམ་སྤུང་གི་ལྷག་བསམ་ཅན་ཡིན་ན། རང་ཉིད་ཀྱི་ལས་གནས་གཅིག་ཤོར་བ་ཙམ་གྱིས་བོད་གཞུང་གི་ཀ་བ་གཉིས་པ་བཀའ་ཤག་ལ་ཁ་ཆུ་འཛུགས་དོན་གང་རེད། མང་པོ་བཤད་དགོས་མ་རེད། ང་ཚོ་ཡང་གོ་རྟོགས་དང་གནས་ཚུལ་རྟག་དཔྱད་གཏོང་ཐུབ་མཁན། བདེན་རྫུན་ཧ་གོ་མཁན་ཡིན།
༢༠༢༡་་གི་སྲིད་སྐྱོང་འོས་བསྡུའི་དབྱེ་འབྱོར་དེ་བོད་ཀྱི་དུས་བབ་ནས་འགོ་བཙུགས་ཞུས་ཚར་སོང་ངོ། འོས་མི་སུ་གང་དང་མི་འདྲ་བའི་སྤེན་པ་ཚེ་རིང་ལགས་སུ་དམིགས་གསལ་རྒྱས་བཤད་དང་གསར་ཤོག་གིས་ཆེ་བའི་དཔྱད་པ་ཞུས་འདུག དེ་ཡང་ཁོ་རང་ཚོར་དགོས་པའི་མཚམས་སུ་༸གོང་ས་མཆོག་གདན་ཞུས་མི་དགོས་པའི་རིགས་༸་གོང་ས་མཆོག་བཀའ་ཕེབས་པའང་འཕར་བཞག འདི་དབྱེ་འབྱེད་མིན་ན་གང་རེད། དེ་ལས་སྡུག་ཙམ་ཞུས་ནའང་ཞུ་རྒྱུ་འདུག སྤེན་ཚེར་ཅི་ཕྱིར་དམིགས་གསལ་བྱེད་དགོས་དོན་ཡང་ཧ་གོ གཞན་ལ་བཤོད་པ་ཙམ་ལས་བྱེད་རྒྱུ་དེ་ཁྱེད་ཚོས་བྱེད་ཀྱི་འདུག་ག བོད་མི་ཚོ་གཟབ་ཤོག རྒྱལ་ཁབ་ཆེད། རྒྱལ་ཁབ་དོན། རྒྱལ་ཁབ་ལ། གཅེས་ཤོག
སྤྱི་ལོ་ ༢༠༡༦ ལོའི་སྲིད་སྐྱོང་འོས་བསྡུ་དང་དེ་འབྲེལ་བཙན་བྱོལ་བོད་མིའི་སྤྱི་ཚོགས་ནང་ལབ་གླེང་ཟམ་མི་ཆད་པ་བྱུང་ནས་བོད་མིའི་ཆིག་བསྒྲིལ་ལ་གནོད་པའི་གནས་ཚུལ་གཅིག་མཇུག་གཉིས་མཐུད་བྱུང་། ངའི་རེ་བར་རྙོག་གླེང་དེ་དང་འབྲེལ་བ་ཡོད་པའི་མི་སྣ་ཚོ་༢༠༢༡སྲིད་སྐྱོང་འོས་མིར་ལང་རྒྱུ་ལྟ་ཅི། འོས་བསྡུའི་ནང་ཐེ་བྱུས་ཙམ་མ་གནང་ན་བསམ་པའི་རེ་བ་བཅངས་པ་ཡིན། འོན་ཀྱང་ད་ཆ་དེ་དང་དངོས་སུ་འབྲེལ་བ་ཡོད་པ་སྤྱི་འཐུས་ཚོགས་ཟུར་སྤེན་པ་ཚེ་རིང་ལགས་དང་བྱང་ཨ་རིའི་སྐུ་ཚབ་དོན་གཅོད་ཟུར་པ་ཨུ་དཀར་ཚང་སྐལ་རྡོར་ལགས་གཉིས་ཀས་འོས་མིར་ལངས་པ་ཡིན་ཞེས་གསལ་བསྒྲགས་བྱས་ཟིན་སོང་། དེ་ནི་སྟབས་མི་ལེགས་པ་ཞིག་རེད། ༢༠༡༦གི་ཕྱོགས་གཏོགས་གཉིས་ཀྱིས་སླར་ཡང་འུར་ཟིང་མི་བྱེད་པའི་འགན་ཁོང་གཉིས་དང་སྲིད་སྐྱོང་བློ་བཟང་སེངྒེ་ལགས་ཀྱིས་བཞེས་དགོས
།