ཨ་རིའི་ཚད་མཐོའི་གཞུང་འབྲེལ་སྐུ་ཚབ་ཚོགས་ཆུང་ཞིག་ཡོངས་གྲགས་མ་ཡིན་པའི་ཐོག་ནས་ཐའེ་ཝན་ནང་གཟིགས་སྐོར་དུ་ཕེབས་ཡོད་འདུག
རྒྱལ་སྤྱིའི་བརྒྱུད་ལམ་ཁག་ཏུ་གནས་ཚུལ་ཐོན་པ་ལྟར་ན། ཁ་སང་ཨེ་ཤ་ཡའི་ཞི་བདེ་རྒྱ་མཚོའི་ཁུལ་གྱི་ཨ་རིའི་གསང་བའི་མཚོ་དམག་གི་དམག་སྤྱི་ཞིག་ཐའེ་ཝན་ནང་འབྱོར་ཡོད་པ་དང་། ཐའེ་ཝན་ཕྱི་སྲིད་ལྷན་ཁང་གིས་ཨ་རིའི་གཞུང་འབྲེལ་ལས་བྱེད་ཐའེ་ཝན་ནང་འབྱོར་ཡོད་ཅེས་གསུངས་ཡོད་ཀྱང་། ཐེངས་འདིའི་གཞུང་འབྲེལ་སྐོར་སྐྱོད་ཀྱི་དགོས་དམིགས་གཙོ་བོ་གང་ཡིན་སོགས་གསལ་ཁ་བཟོས་མེད་འདུག
གནས་ཚུལ་དེ་ཐོག་མར་རོའུ་ཊར་གསར་ཁང་ལ་མིང་བརྗོད་འདོད་མེད་པའི་ཐའེ་ཝན་གྱི་གཞུང་འབྲེལ་ལས་བྱེད་ཅིག་གིས་མཁོ་སྤྲོད་གནང་ཡོད་པ་དང་། ཁོང་གིས་ཐེངས་འདིའི་ཨ་རིའི་གཞུང་འབྲེལ་ཕྱོགས་སྐྱོད་ཁྲོད་ཨ་རིའི་མཚོ་དམག་གི་གསང་བའི་ལས་དོན་གྱི་དམག་སྤྱི་ཆེན་མོ་མའེ་ཁེལ་སི་ཊའོ་མན་ (Michael Studeman) ལགས་ཡོད་པ་མིང་འདོན་བྱས་ཡོད་པ་དང་། དེ་མིན་གཞུང་འབྲེལ་ལས་བྱེད་སུ་ཡོད་པ་དང་ལས་བྱེད་ག་ཚོད་ཅིག་ཡོད་མེད་སོགས་ཀྱི་གནས་ཚུལ་གང་ཡང་བཤད་མེད་པ་རེད།
ཐའེ་ཝན་ཕྱི་སྲིད་ལྷན་ཁང་གིས། ང་ཚོས་ཨ་རིའི་གཞུང་འབྲེལ་ཕྱོགས་སྐྱོད་ལ་ཕེབས་བསུ་ཞུ་ཡི་ཡོད། འོན་ཀྱང་། ཕྱོགས་སྐྱོད་འདི་ཨ་རི་དང་ཐའེ་ཝན་གཉིས་བར་གྲོས་བསྡུར་བྱས་པ་བརྒྱུད་ཡོངས་བསྒྲགས་བྱས་མེད་སྟབས། ཐེངས་འདིའི་གཞུང་འབྲེལ་ཕྱོགས་སྐྱོད་སྐོར་གྱི་གནས་ཚུལ་རྒྱས་པ་འགྲེལ་བརྗོད་བྱེད་ཀྱི་མིན། ཞེས་ལན་འདེབས་བྱས་ཡོད་པ་དང་། ད་རེས་གཞུང་འབྲེལ་ཕྱོགས་སྐྱོད་དེ་ནི་ཨ་ཐའེ་གཉིས་བར་འབྲེལ་མོལ་རིམ་པ་བརྒྱུད་བྱུང་བ་ཞིག་ཡིན་འདུག
རོའུ་ཊར་གསར་ཁང་གི་གནས་ཚུལ་ནང་། ཉེ་སྔོན་ཕྱི་ཟླ་ ༨ ནང་ཨ་རིའི་འཕྲོད་བསྟེན་དྲུང་ཆེ་ཨ་ལེག་སི་ཨ་རྫར་(Alex Azar)ལགས་ཐའེ་ཝན་ནང་གཞུང་འབྲེལ་ཕྱོགས་སྐྱོད་གནང་སྐབས། རྒྱ་ནག་གཞུང་གིས་ཨ་རིར་ངོ་རྒོལ་སྐྱོན་བརྗོད་བྱས་ཡོད་པ་དང་། ཕྱི་ཟླ་ ༩ ནང་ཨ་རིའི་དཔལ་འབྱོར་དྲུང་ལས་(Keith Krach)ལགས་ཀྱིས་ཐའེ་ཝན་ནང་གཞུང་འབྲེལ་ཕྱོགས་སྐྱོད་བྱས། དམིགས་བསལ་ད་རེས་ཕྱོགས་སྐྱོད་དེ་ནི་ཉེ་བའི་ལོ་ཤས་རིང་ཐའེ་ཝན་ནང་ཨ་རིའི་ཚད་མཐོའི་དམག་སྤྱི་ཆེན་མོ་ཞིག་ཕྱིན་པ་ཐོག་མ་ལྟ་བུ་ཆགས་ཡོད་སྟབས། རྒྱ་ནག་གཞུང་གིས་ལན་འདེབས་བྱེད་ངེས་ཡིན་པ་ལྟ་བུ་ཞིག་ཏུ་གྱུར་ཡོད་སྐོར་བརྗོད་འདུག་པ་མ་ཟད། ཟླ་རྗེས་མར་ཨ་རིའི་བློན་ཆེན་རིམ་པའི་མགོ་ཁྲིད་ (Andrew Wheeler) ལགས་ཐའེ་ཝན་ནང་གཞུང་འབྲེལ་ཕྱོགས་སྐྱོད་བྱེད་གཏན་འཁེལ་ཡོད་འདུག
སྤྱིར་ཨ་རི་དང་ཐའེ་ཝན་བར་ཐད་ཀར་རྒྱལ་འབྲེལ་མེད་ཀྱང་། ཨ་རྒྱ་གཉིས་བར་ཚོང་འབྲེལ་གཙོ་བོར་བཟུང་བའི་འཕྲུལ་རིག་དང་ལྟ་གྲུབ་སོགས་ཕྱོགས་ཡོངས་ནས་འགལ་ཟླ་བྱུང་གི་ཡོད་པ་དང་། དམིགས་བསལ་སྲིད་འཛིན་ཊོམ་ཕུའི་ལས་ཡུན་རྫོགས་ལ་ཉེ་བའི་སྐབས་འདིར། ཨ་རིའི་གཞུང་གིས་ཐའེ་ཝན་དང་། ཡུ་གུར། བོད་དོན་སོགས་ཀྱི་གནད་དོན་གླེང་སློང་བྱས་ཏེ་རྒྱ་ནག་ལ་ཕྱོགས་ཡོངས་ནས་ཁ་གཏད་གཅོག་ཐབས་དང་སུན་གཙེར་བཟོ་ཡི་ཡོད་པ་རེད།
གསར་འགོད་པ། སྐལ་བཟང་སྦྱིན་པ།
