བལ་གཞུང་གིས་རྒྱ་ནག་གི་རྒྱལ་སྲུང་བློན་ཆེན་ཝེ་ཧྥིང་ཧི་ལ་བལ་ཡུལ་བརྒྱུད་རྒྱ་གར་ནང་བཙན་བྱོལ་དུ་ཡོང་མཁན་བོད་མི་རྣམས་ལ་སྔར་ལས་བཀག་སྡོམ་བྱ་རྒྱུ་ཡིན་ལུགས་བཤད།
ཁ་སང་རྒྱ་གར་གྱི་བརྒྱུད་ལམ་ཁག་ཏུ་གནས་ཚུལ་ཐོན་པ་ལྟར་ན། ཉིན་ཤས་སྔོན་རྒྱ་ནག་གི་རྒྱལ་སྲུང་བློན་ཆེན་ཝེ་ཧྥིང་ཧི (Wei Fenghe)་ཟེར་བ་བལ་ཡུལ་ནང་སྐོར་སྐྱོད་དུ་ཡོང་སྐབས། བལ་ཡུལ་གཞུང་གིས་རྒྱ་ནག་གཅིག་གི་སྲིད་བྱུས་ལ་སེམས་ཐག་གཙང་བཅད་ཀྱིས་རྒྱབ་སྐྱོར་བྱེད་རྒྱུའི་ཁས་ལེན་བྱས་ཡོད་པ་མ་ཟད། བོད་དང་ཐའེ་ཝན་གཉིས་ནི་ཁ་བྲལ་ཐབས་མེད་པའི་རྒྱ་ནག་གི་ཆ་ཤས་ཡིན་པ་དང་། བོད་ནས་༧གོང་ས་རྒྱལ་བ་རིན་པོ་ཆེ་མཆོག་ལ་མཇལ་ཁ་ཞུ་མཁན་དང་རྒྱ་གར་ལ་བཙན་བྱོལ་དུ་ཡོང་མཁན་བོད་མི་སྐྱབས་བཅོལ་བ་རྣམས་བཀག་འགོག་བྱ་རྒྱུ་ཡིན་སྐོར་བཤད་འདུག
རྒྱ་གར་གྱི་བརྒྱུད་ལམ་ཁག་གི་གནས་ཚུལ་ལྟར་ན། ཐེངས་འདིའི་རྒྱ་བལ་གཉིས་ཀྱི་མགོ་འཁྲིད་ཐུག་འཕྲད་ཁྲོད། རྒྱ་ནག་གཞུང་གིས་བལ་ཡུལ་གྱི་རང་དབང་དང་ས་ཁོངས་བདག་དབང་སྲུང་སྐྱོབ། དེ་བཞིན། རྒྱ་བལ་གཉིས་ཀྱི་ས་མཚམས་ཞི་གནས་ཡོང་བར་བལ་ཡུལ་གཞུང་ལ་རྒྱབ་སྐྱོར་བརྟན་པོ་བྱེད་རྒྱུ་དང་། དམིགས་བསལ་ཏོག་དབྱིབས་གཉན་རིམས་ཁྱབ་བརྡལ་གྱི་དཀའ་ངལ་ཐད་རོགས་རམ་དང་། མུ་མཐུད་རྒྱ་བལ་གཉིས་གྱི་མཉམ་འབྲེལ་དམག་སྦྱོང་མགོ་འཛུགས་བྱ་རྒྱུའི་འཆར་གཞི་སོགས་བསྒྲིགས་ཡོད་འདུག
རྒྱ་ནག་གི་རྒྱལ་སྲུང་བློན་ཆེན་ཝེ་ཧྥིང་ཧི་ཟེར་བས། ངའི་སྐོར་སྐྱོད་འདི་ནི་རྒྱལ་ཁབ་གཉིས་བར་གྱི་དམག་སྲིད་འབྲེལ་ལམ་གོང་མཐོར་དང་སྔར་ཡོད་ཀྱི་འབྲེལ་ལམ་ཁག་ཟབ་རྒྱས་གཏོང་རྒྱུ་མ་ཟད། རྒྱལ་ཁབ་གཉིས་ཀྱི་འབྲེལ་ལམ་ལ་གྲུབ་འབྲས་མངོན་ཆགས་པ་ཐོན་སྲིད་པར་ཡིད་ཆེས་ཡོད། ཅེས་བརྗོད་ཡོད་པ་དང་། ཀཱ་ཐི་མན་ཀྲུའུ་ཆ་འཕྲིན་གྱིས་བལ་ཡུལ་ཕྱོགས་ནས་ཝེ་ཧྥིང་ཧི་དང་ལྷན་དུ་བོད་དང་ས་མཚམས་ཡིན་པའི་(Humla)རྫོང་ཁོངས་སུ་རྒྱ་ནག་གིས་ས་ཆ་བཙན་བཟུང་བྱེད་བཞིན་ཡོད་པའི་གནད་དོན་གླེང་སློང་བྱས་ཡོད་སྐོར་བསྒྲགས་འདུག
རྒྱ་གར་ཧིན་རྡུ་གསར་ཁང་གི་གནས་ཚུལ་ནང་། ཝེ་ཧྥེང་ཧི་ཡི་གཞུང་འབྲེལ་སྐོར་སྐྱོད་ཁྲོད། བལ་ཡུལ་གཞུང་ནས་བོད་དང་ཐའེ་ཝན་གཉིས་ནི་ཁ་བྲལ་ཐབས་མེད་པའི་རྒྱ་ནག་གི་ཆ་ཤས་ཤིག་ཡིན་པ་ཁས་ལེན་ཙམ་མ་ཟད། རྒྱ་ནག་གིས་བལ་ཡུལ་གཞུང་ལ་མ་དངུལ་འབོར་ཆེན་གྱི་བུན་གཡར་དང་དཔལ་འབྱོར་ཐོག་ནས་རྒྱབ་སྐྱོར་བྱེད་བཞིན་པ་སོགས་ཕུད་དེ། བལ་ཡུལ་ནང་རྒྱལ་ཁབ་གཅིག་གི་སྲིད་བྱུས་སྲ་བརྟན་དུ་གཏང་སྟེ། བལ་ཡུལ་བརྒྱུད་བཞུགས་སྒར་དྷ་རམ་ས་ལར་༧གོང་ས་མཆོག་ལ་མཇལ་ཁ་ཞུ་བར་ཡོང་མཁན་གྱི་སྐྱབས་བཅོལ་བོད་མི་རྣམས་བཀག་འགོག་བྱེད་དུ་འཇུག་གི་ཡོད་སྐོར་བཤད་ཡོད་འདུག
ཡང་བལ་ཡུལ་གྱི་ཀཱ་ཐི་མན་ཀྲུའུ་ཆ་འཕྲིན་གྱི་གནས་ཚུལ་ལྟར་ན། རྒྱ་ནག་གི་རྒྱལ་སྲུང་བློན་ཆེན་ཝེ་ཧྥེང་ཧི་བལ་ཡུལ་ནང་ཡོང་བར་དམིགས་ཡུལ་ཆེན་པོ་གསུམ་ཡོད་པ་དང་། གཅིག་ད་ལྟའི་ཆར་བལ་ཡུལ་ནང་གཞུང་འཛིན་དམར་ཤོག་ཚོགས་པའི་སྲིད་དབང་སྲ་བརྟན་མིན་པ་དང་། རྒྱ་གར་ཕྱོགས་ནས་བལ་ཡུལ་གྱི་ནང་སྲིད་ཐད་ཤུགས་རྐྱེན་སྤྲོད་ཀྱི་ཡོད་པར་ཞེ་སྣང་སྐྱེས་ཏེ། སྐོར་སྐྱོད་འདིས་ཉེ་སྔོན་རྒྱ་གར་གྱི་ཕྱི་སྲིད་དྲུང་ཆེ་ཧར་ཤ་ཝར་དྷན་ (Harsh Vardhan Shringla)ལགས་བལ་ཡུལ་ནང་ཡོང་བར་བརྡ་ལན་དང་། བལ་ཡུལ་ནང་རྒྱ་ནག་གི་ཆབ་སྲིད་ཀྱི་ཤུགས་རྐྱེན་གང་ཡོད་སྔར་ལྷག་རྒྱ་བསྐྱེད་གཏོང་ཐབས་སུ་དམིགས་ཡོད་པ་དང་། གཉིས་ནས་ཕྱི་ལོ་ ༢༠༡༦ ལོར་བལ་ཡུལ་གཞུང་དང་རྒྱ་ནག་བར་རྒྱུད་གཅིག་ལམ་གཅིག་གི་ཚོང་འབྲེལ་གྲོས་ཆོད་ཅིག་བཞག་ཡོད་ཀྱང་། ད་སྔ་བར་དོན་ཕན་ལྡན་པའི་གྲུབ་འབྲས་ཤིག་ཐོན་གྱི་མེད་སྟབས། ས་བབ་ཐོག་ནས་བལ་ཡུལ་འདི་རྒྱ་ནག་ལ་གལ་ཆེན་པོ་ཆགས་ཀྱི་ཡོད་པ་ལྟར། ད་རེས་ཕྱོགས་སྐྱོད་འདི་བརྒྱུད་རྒྱ་ནག་གིས་ཚོང་འབྲེལ་དང་ཆབ་སྲིད་གཉིས་ཀྱི་ཐོག་ནས་བལ་ཡུལ་གྱི་ཁྱིམ་མཚེས་རྒྱ་གར་དང་རྒྱ་ནག་གི་ཚོང་འབྲེལ་ཁ་གཏད་ཨ་རིའི་གཉིས་ལ་བརྡ་ལན་སྤྲོད་ཀྱི་ཡོད་པ། དེ་བཞིན། གསུམ་ནས་འདས་ལོར་རྒྱ་བལ་གཉིས་བར་རྒྱ་སྒོར་ས་ཡ་ ༣༠༠ ཙམ་གྱི་དམག་སྦྱོང་དང་རིག་གཞུང་བརྗེ་རེས་ཀྱི་གན་རྒྱ་བཞག་ཡོད་པ་མུ་མཐུད་རྒྱུན་སྐྱོང་རྒྱུ་ཡིན་སྐོར་སོགས་བརྗོད་འདུག
བལ་ཡུལ་གཞུང་འཛིན་ཚོགས་པའི་ལས་བྱེད་ཅིག་གིས་ཀཱ་ཐི་མན་ཀྲུའུ་ཆ་འཕྲིན་གསར་ཁང་ལ་གནས་ཚུལ་མཁོ་སྤྲོད་གནང་བའི་ནང་། ཕྱི་ཟླ་ ༡༡ ཚེས་ ༢༤ ཉིན་རྒྱ་ནག་གིས་ཚད་མཐོའི་སྐུ་ཚབ་མི་སྣ་གསུམ་ཆེད་དུ་བལ་ཡུལ་ནང་མངགས་གཏོང་བྱས་ཡོད་པ་དང་། དེ་ནི་རྒྱ་གར་གྱི་གཞུང་འབྲེལ་མི་སྣ་བལ་ཡུལ་དུ་མ་འབྱོར་གོང་ནས་རྒྱ་ནག་གིས་གྲ་སྒྲིག་ཆ་ཚང་བྱས་ཟིན་པ་ཞིག་ཡིན་པ་དང་། ད་རེས་སྐོར་སྐྱོད་འདི་བརྒྱུད་རྒྱ་བལ་གཉིས་བར་ཚད་མཐོའི་སྐུ་ཚབ་མི་སྣ་ཐུག་འཕྲད་ཀྱི་ལས་རིམ་ཞིག་ཀྱང་བཟོས་ཡོད་སྐོར་བརྗོད་ཡོད་པ་རེད།
འབྲེལ་ཡོད་གནས་ཚུལ། བལ་གཞུང་གིས་བོད་མིར་དམ་དྲག་ཆེན་པོ་བྱེད་ཀྱི་འདུག
གསར་འགོད་པ། སྐལ་བཟང་སྦྱིན་པ།
ཉི་རེའི་དུས་བབ་གསར་བཀོད་ཁག་དྲ་ལམ་རྒྱུས་ཐད་གཏོང་་གི་ལས་རིམ་ཡོད་ན་མཁོ་དགོསམཀྱིས་ཡིན།།