ཟླ་འདིའི་ཚེས་ ༡༥ ནས་ཨ་རིའི་ནང་ཏོག་དབྱིབས་སྨན་ཁབ་དགྲམ་རྒྱུ་རེད།

ཟླ་འདིའི་ཕྱི་ཚེས་ ༡༥ ཉིན་ནས་ཨ་རི་རྒྱལ་ཡོངས་སུ་ཏོག་དབྱིབས་སྨན་ཁབ་བགོ་འགྲེམས་བྱས་ཏེ་ཨ་རིའི་ནང་ཛ་དྲག་ཏུ་གྱུར་བའི་མི་མང་གི་དཀའ་ངལ་སེལ་ཐབས་བྱ་རྒྱུ་ཡིན་སྐོར་བསྒྲགས་འདུག་ལ་འཛམ་གླིང་རྒྱལ་ཁབ་མང་པོས་སྨན་ཁབ་དེ་གཉིས་མངག་ཉོ་བྱས་འདུགདེ་རིང་རྒྱལ་སྤྱིའི་བརྒྱུད་ལམ་ཁག་ཏུ་གནས་ཚུལ་ཐོན་པ་ལྟར་ན། ད་ལྟ་ཨ་རིའི་ནང་ཏོག་དབྱིབས་འགོས་ཁྱབ་ཀྱི་དཀའ་ངལ་ཉིན་རེ་བཞིན་ཇེ་ཆེར་འགྲོ་བཞིན་ཡོད་སྟབས། ཨ་རིའི་འཕྲོད་བསྟེན་ལྷན་ཁང་གིས། ཨ་རིའི་ཧྥེ་ཛར་(Pfizer)དང་མོ་ཌེ་ན་ (Moderna) སྨན་རྫས་བཟོ་གྲྭ་གཉིས་ཀྱི་ཏོག་དབྱིབས་གཉན་རིམས་ཀྱི་སྨན་ཁབ་ལེགས་འགྲུབ་བྱུང་ཡོད་པ་ལྟར། ཟླ་འདིའི་ཕྱི་ཚེས་ ༡༥ ཉིན་ཧྥེ་ཛར་དང་། ཕྱི་ཚེས་ ༢༢ ཉིན་མོ་ཌེ་ན་ཡིས་ཨ་རི་རྒྱལ་ཡོངས་སུ་བགོ་འགྲེམས་བྱ་འཆར་ཡོད་སྐོར་བསྒྲགས་འདུག་ལ། འཛམ་གླིང་རྒྱལ་ཁབ་མང་པོས་ཨ་རིའི་སྨན་སྦྱོང་ཁང་དེ་གཉིས་ཀྱི་སྨན་ཁབ་ས་ཡ་མང་པོ་མངག་ཉོ་བྱས་འདུག

ཨ་རིའི་འཕྲོད་བསྟེན་ལས་ཁུངས་ཀྱི་ལུས་ཟུང་མ་ལག་གོང་མཐོར་གཏོང་བའི་སྡེ་ཚན་གྱིས་སྤྱི་ཁྱབ་འགན་འཛིན་ཧན་ནན་ (Claire Hannan)ལགས་ཀྱིས། ད་ལྟ་ཨ་རིའི་མངའ་སྡེ་ཚང་མའི་ནང་མི་མང་ལ་ཏོག་དབྱིབས་སྨན་ཁབ་མཁོ་སྤྲོད་ལྟེ་གནས་གོ་སྒྲིག་ཆེད་གཞུང་སྒེར་གཉིས་ཀྱི་སྨན་ཁང་ཁག་ལ་ཞིབ་འཇུག་བྱས་ཏེ། ཏོག་དབྱིབས་སྨན་ཁབ་བགོ་འགྲེམ་བྱེད་པར་གྲ་སྒྲིག་བྱེད་བཞིན་པའི་སྒང་ཡིན། ཞེས་བརྗོད་ཡོད་པ་དང་། ད་ལྟ་ཨ་རིའི་ནང་ཏོག་དབྱིབས་སྨན་བགོ་འགྲེམས་ཀྱི་གནད་དོན་དེ་གློ་བུར་ཛ་དྲག་གི་གནས་སྟངས་འོག་བགོ་འགྲེམས་བྱེད་དགོས་བྱུང་བ་དང་། ཟླ་འདིའི་ཕྱི་ཚེས་ ༨ ཉིན་སྲིད་འཛིན་ཊོམ་ཕུའི་གཞུང་གིས་ཨ་རིའི་རྒྱལ་ཡོངས་མངའ་སྡེ་ཁག་གི་མགོ་འཁྲིད་དང་དམག་དཔོན། སྨན་པ་དང་ཚན་རིག་པ་བཅས་གནད་ཡོད་མི་སྣ་རིང་བཞིན་གྱི་ཚོགས་འདུ་ཞིག་བསྡུས་ཏེ། ཏོག་དབྱིབས་སྨན་ཨ་རི་རྒྱལ་ཡོངས་སུ་བགོ་འགྲེམས་ཐུབ་པ་ཡོངས་བསྒྲགས་བྱ་རྒྱུ་ཡིན་འདུགཨ་རིའི་ཌོག་གཙུག་ལག་སློབ་གྲྭ་ཆེན་མོའི་གོ་ལའི་འཕྲོད་བསྟེན་གསར་གཏོད་ཞིབ་འཇུག་ཁང་ལྟར་ན། མོ་ཌེ་ན་སྨན་ཁབ་དེ་ཨ་རིའི་ནང་ཁྱོན་ས་ཡ་ ༡༠༠ དང་ཁེ་ན་ཌས་ས་ཡ་ ༥༦། དེ་བཞིན། དབྱིན་ཡུལ་གཞུང་གིས་སྨན་ཁབ་ས་ཡ་ ༥༠ མངག་ཉོ་བྱས་ཡོད་པ་དང་། མོ་ཌེ་ན་སྨན་སྦྱོར་ཁང་གིས་ཏོག་དབྱིབས་སྨན་ཁབ་རྐང་གཅིག་ལ་ཨ་སྒོར་ ༣༢ ནས་ ༣༧ བར་ལེན་གྱི་ཡོད་པ་དང་། ཕྱི་ལོ་ ༢༠༢༡ ལོར་འཛམ་གླིང་ཁྱོན་ཡོངས་ནང་ཏོག་དབྱིབས་སྨན་ཁབ་ས་ཡ་ ༥༠༠ ནས་ཐེར་འབུམ་ ༡ བར་མཁོ་སྤྲོད་ཐུབ་ཀྱི་ཡོད་སྐོར་བརྗོད་ཡོད་པ་རེད།

དེ་བཞིན་ཧྥེ་ཛར་སྨན་སྦྱོར་ཁང་གི་ཏོག་དབྱིབས་སྨན་ཁབ་གཅིག་ལ་རིན་གོང་ཨ་སྒོར་ ༢༠ ཡིན་སྟབས། རིན་གོང་གི་ཆ་ནས་མོ་ཌེ་ནའི་སྨན་ཁབ་ལས་གོང་ཁེ་བ་ཡོད་པ་དང་། ཡུ་རོབ་མཉམ་འབྲེལ་མཐུན་ཚོགས་ཀྱིས་ཧྥེ་ཛར་སྨན་ཁབ་ས་ཡ་ ༣༠༠ དང་ཉི་ཧོང་གིས་སྨན་ཁབ་ས་ཡ་ ༡༢༠ ། དེ་བཞིན། ཨ་རིའི་ནང་ནས་ས་ཡ་ ༡༠༠ མངག་ཉོ་བྱས་ཡོད་པ་དང་། དབྱིན་ཡུལ་དང་ཁེ་ན་ཌ། ཨོ་གླིང་། ལྷོ་ཨ་རིའི་རྒྱལ་ཁབ་ཆི་ལེ་སོགས་ནས་སྨན་ཁབ་ས་ཡ་ ༡༠ རེ་མངག་ཉོ། སྦེལ་ཇམ་གྱིས་ས་ཡ་ ༧།༦ མངག་ཉོ་བྱས་ཡོད་འདུག གཞན་ཡང་། ད་ལྟ་དཔལ་འབྱོར་གྱི་ཡོང་འབབ་མཐོ་བོ་ཡིན་པའི་འཛམ་གླིང་རྒྱལ་ཁབ་ ༦༤ ཡིས་གྲུབ་པའི་མཉམ་འབྲེལ་རྒྱལ་ཚོགས་ཀྱི་ (COVAX Facility) ཏོག་སྨན་མཁོ་སྤྲོད་ཚན་པས། འཛམ་གླིང་རྒྱལ་ཁབ་སྐྱོ་བོ་ཁག་དང་ཡར་རྒྱས་འགྲོ་བཞིན་པའི་རྒྱལ་ཁབ་ཁག་ལ་ཏོག་སྨན་དེ་གཉིས་ཀྱི་རིན་གོང་ཕྱེད་བཅག་བྱས་ཏེ་བགོ་འགྲེམས་བྱ་རྒྱུའི་ཁས་ལེན་བྱས་ཡོད་ཀྱང་། དབྱེ་ཞིབ་པས་སྔོན་ཐོན་གྱི་རྒྱལ་ཁབ་ཁག་ཕུད་པའི་རྒྱལ་ཁབ་གཞན་གྱིས་མོ་ཌེ་ན་དང་ཧྥེ་ཛར་སྨན་གཉིས་རིན་གོང་ཆེ་དྲགས་པའི་དཀའ་ངལ་འོག་ཉོ་སྒྲུབ་བྱེད་ཐུབ་ཀྱི་མེད་སྐོར་བརྗོད་འདུག

དེ་བཞིན། ནུས་པ་བརྒྱ་ཆ་ ༩༤ ཐོན་གྱི་ཡོད་པའི་མོ་ཌེ་ནའི་སྨན་ཁབ་དེ་གནམ་གཤིས་གྲང་ཚད་ (Celsius) ༢།༢༢ ནས་ ༧།༧༨ བར་གྱི་སྨན་ཁང་གི་འཁྱག་སྒམ་ལྟ་བུའི་ནང་ཉིན་གྲངས་ ༣༠ རིང་འཇོག་ཐུབ་ཀྱི་ཡོད་པ་དང་། གོར་ཐིག་འོག་གི་གྲང་ཚད་ ༤ སྟེང་ནས་ཟླ་ ༦ རིང་ཉར་ཚགས་བྱེད་ཐུབ་ཀྱི་ཡོད་འདུག དེ་བཞིན། ཧྥེ་ཛར་གྱི་སྨན་ཁབ་ལ་ནུས་པ་བརྒྱ་ཆ་ ༩༠ ཐོན་གྱི་ཡོད་པ་དང་། ཉར་ཚགས་བྱེད་པར་རྒྱུན་ལྡན་གྱི་འཁྱག་སྒམ་ནང་ཉིན་གྲངས་ ༥ ལས་ལྷག་ཉར་མི་ཐུབ་པ་དང་། གྲང་ཚད་གོར་ཐིག་འོག་གི་(Celsius) ༧༠ འོག་འཇོག་དགོས་ཀྱི་ཡོད་པར་བརྟེན། སྨན་དེ་ཉར་ཚགས་བྱེད་པར་དམིགས་བསལ་གྱི་བླུག་སྣོད་དགོས་པ་མ་ཟད། སྐྱེལ་འདྲེན་བྱེད་པར་དཀའ་ངལ་ཆེན་པོ་ཡོད་འདུག

ད་ལྟ་ཨ་རིའི་ནང་ཉིན་རེར་ཏོག་དབྱིབས་ནད་པའི་གྲངས་འབོར་འབུམ་ ༡ མ་ཟིན་ཙམ་འབྱུང་གི་ཡོད་པ་དང་། ཉེ་སྔོན་ཨ་རིའི་སྲིད་འཛིན་གྱི་འོས་བསྡུའི་སྐབས་ནས་བཟུང་ཨ་རིའི་ནང་ཏོག་དབྱིབས་ནད་པའི་གྲངས་ལྡབ་འགྱུར་གྱིས་ཇེ་མང་དུ་གྱུར་ཡོད་ལ། དེ་ཡང་རྒྱུ་རྐྱེན་གཙོ་བོ་ཞིག་ནི་སྲིད་འཛིན་ཊོམ་ཕུའི་འཛིན་སྐྱོང་གིས་མི་མང་འདུ་འཛོམས་དང་ཁ་རས་མི་གྱོན་པ་སོགས་སྔོན་འགོག་དོ་ནན་མ་བྱས་པའི་རྐྱེན་གྱིས་ཡིན་པར་བཤད།

འདས་ལོར་རྒྱ་ནག་ནས་མཆེད་པའི་ཏོག་དབྱིབས་གཉན་རིམས་འཛམ་གླིང་གང་སར་ཁྱབ་སྟེ། ད་བར་ཨ་རི་གཅིག་པུའི་ནང་མི་གྲངས་ས་ཡ་ ༡༤ ལྷག་ལ་ནད་མནར་བྱུང་བ་དང་། མི་གྲངས་འབུམ་ ༣ མ་ཟིན་ཙམ་རྐྱེན་འདས་སུ་ཕྱིན་ཏེ། ཨ་རི་ནི་ཏོག་དབྱིབས་ཀྱིས་ཆེས་ཤུགས་རྐྱེན་ཆེ་བའི་འཛམ་གླིང་རྒྱལ་ཁབ་དང་པོ་དེ་ཆགས་ཡོད་པ་རེད། འཛམ་གླིང་ཁྱོན་ཡོངས་སུ་ད་ལྟའི་བར་ཏོག་དབྱིབས་ནད་པ་ས་ཡ་ ༦༤ ལྷག་བྱུང་བ་དང་མི་གྲངས་ས་ཡ་ ༡ དང་ཕྱེད་ཀ་མ་ཟིན་ཙམ་རྐྱེན་འདས་སུ་ཕྱིན་ཡོད་འདུག

གསར་འགོད་པ། སྐལ་བཟང་སྦྱིན་པ།