བོད་དོན་གོམ་བགྲོད་གནང་སྟེ་ཟླ་གཅིག་ཧྲིལ་པོ་ཕྱིན།

བོད་ཀྱི་ས་མཚམས་སྣ་ཐོད་ལ་བར་བོད་དོན་གོམ་བགྲོད་གནང་མཁན་བསྟན་འཛིན་དོན་འགྲུབ་ལགས་དང་བསྟན་འཛིན་ཉི་མ་ལགས་གཉིས་ཀྱིས་མུ་མཐུད་གོམ་བགྲོད་ཀྱིས་བོད་དོན་དྲིལ་བསྒྲགས་གནང་བཞིན་འདུག

དྷ་རམ་ལ་ས་ནས་བོད་ཀྱི་ས་མཚམས་སྣ་ཐོད་ལ་བར་དུ་བོད་དོན་གོམ་བགྲོད་པ་བསྟན་འཛིན་དོན་འགྲུབ་ལགས་ཀྱིས་གོམ་བགྲོད་བྱས་ཏེ་ཁ་སང་ནས་ཟླ་གཅིག་ཧྲིལ་པོ་ཟིན་ཡོད་པ་དང་། སྣ་ཐོད་ལ་བར་དུ་ད་དུང་ཟླ་གཅིག་དང་ཕྱེད་ཙམ་ལ་འགོར་སྲིད་ཀྱི་ཡོད་འདུག་ལ། ཅན་དི་སྒར་ནས་བཟུང་ཁོང་གི་བོད་དོན་གོམ་བགྲོད་ནང་བོད་རིགས་གཞོན་ནུ་བསྟན་འཛིན་ཉི་མ་ལགས་ཀྱང་མཉམ་ཞུགས་གནང་འདུག

བསྟན་འཛིན་དོན་འགྲུབ་ལགས་དང་བསྟན་འཛིན་ཉི་མ་ལགས་གཉིས་མདང་དགོང་ (Uttar Pradesh) མངའ་སྡེའི་གྲོང་ཁྱེར་ཨི་ཊའི་ (Etah) ཉེ་འགྲམ་དུ་ཞག་སྡོད་བྱས་འདུག་པ་དང་། དེ་ནི་བཞུགས་སྒར་དྷ་ས་ནས་གོམ་བགྲོད་བྱས་ཚེ་སྤྱི་ལེ་ ༨༠༠ མ་ཟིན་ཙམ་གྱི་མཚམས་ཡིན་འདུག གོམ་བགྲོད་སྐབས་རྒྱལ་ས་ལྡི་ལི་དང་གྲོང་ཁྱེར་ཇན་ལྡི་གྷར་གྱི་ནང་ས་གནས་གསར་འགོད་པ་བསྡུ་བསྐོང་བྱས་ཏེ་བོད་ནང་གི་ཛ་དྲག་གི་གནས་སྟངས་ངོ་སྤྲོད་ཀྱི་གསར་འགོད་གསལ་བསྒྲགས་དང་གཏམ་བཤད་སོགས་གནང་ཡོད་འདུག

འདི་གའི་གསར་འགོད་པར་ཁ་པར་བརྒྱུད་བསྟན་འཛིན་ཉི་མ་ལགས་ཀྱིས། བོད་དོན་ལས་འགུལ་ཆེད་བསྟན་འཛིན་དོན་གྲུབ་ལགས་གཅིག་པུ་བཞུགས་སྒར་ནས་གོམ་བགྲོད་གནང་སྟེ་འགྲོ་བཞིན་ཡོད་པ་གོ་ཐོས་བྱུང་བས། ཁོང་ལ་རོགས་པ་ཞིག་དགོས་ཀྱི་ཡོད་པའི་ཚོར་སྣང་བྱུང་། དཔེར་ན་གཅིག་པུ་འགྲོ་དུས་ལམ་ཁ་ནས་སྐད་ཆ་བཤད་རོགས་ཤིག་དང་། གསང་སྤྱོད་ལ་འགྲོ་དུས་ཅ་དངོས་སྲུང་མཁན་ཞིག་དགོས་པ་རེད། རོགས་པ་ཞིག་མེད་ཚེ་གང་ཅིའི་ཐད་ནས་དཀའ་ཁག་ཡོད་སྟབས། ཁོང་གི་ལས་འགུལ་ནང་མཉམ་ཞུགས་བྱས་པ་ཡིན་སྐོར་བརྗོད་བྱུང་ལ། ཉེ་ལམ་བོད་མི་གསུམ་གྱིས་ཧི་མ་ཅལ་མངའ་སྡེའི་མ་ན་ལི་ནས་རྒྱལ་ས་ལྡི་ལི་བར་གོམ་བགྲོད་བྱེད་སྐབས། ཅན་དི་སྒར་ནས་བསྟན་འཛིན་ཉི་མ་ལགས་ཀྱང་ལས་འགུལ་ནང་མཉམ་ཞུགས་གནང་སྟེ་ལྡི་ལི་བར་གོམ་བགྲོད་གནང་ཡོད་པ་རེད།ཁོང་གཉིས་ལ་ལམ་བར་དུ་དཀའ་ངལ་ཆེ་ཤོས་དེ་གང་ཡིན་འདྲི་སྐབས། བསྟན་འཛིན་དོན་གྲུབ་ལགས་ཀྱིས་དཀའ་ངལ་གཙོ་བོ་ནི་ཚ་བ་ཆེ་བ་དེ་ཡིན་པ་དང་། ལམ་ཁར་ཡུལ་མི་རེ་འགས་བལ་ཡུལ་གྱི་མི་དང་ཏོག་དབྱིབས་ན་ཚ་སོགས་ཀྱི་མིང་ནས་བོས་ཏེ་ལྟ་སྟངས་འཛིན་གྱི་འདུག འོན་ཀྱང་ཁོང་ཚོའི་མཉམ་དུ་བསྡད་དེ་ང་ཚོ་བོད་པ་ཡིན་པ་དང་ཧི་མ་ཅལ་མངའ་སྡེའི་ནང་གནས་སྡོད་བྱེད་ཀྱི་ཡོད་པ། བོད་དོན་ཀྱི་གནད་དོན་སོགས་ཀྱི་སྐོར་འགྲེལ་བརྗོད་བྱེད་སྐབས། ཁོང་ཚོའི་ལྟ་སྟངས་འགྱུར་ཏེ་རོགས་རམ་དགོས་ཚེ་ཁོང་ཚོར་བཤད་དགོས་ཚུལ་ཚུར་བཤད་ཀྱི་ཡོད་སྐོར་དང་། ད་ལྟ་རྐང་མཐིལ་མཁྲེགས་པོ་ཆགས་ཡོད་སྐོར་འགྲེལ་བརྗོད་བྱས་སོང་ལ། བསྟན་འཛིན་ཉི་མ་ལགས་ཀྱིས་དཀའ་ངལ་ནི་ཉི་མ་ཚ་བོ་ཡོད་པ་དང་ཐལ་རྡུལ་ཆེ་ཡང་། བོད་དོན་ཆེད་དཀའ་ངལ་དེ་དག་ལ་གདོང་ལེན་ཐུབ་ཀྱི་ཡོད་སྐོར་འགྲེལ་བརྗོད་གནང་བྱུང་།

དེ་བཞིན་བསྟན་འཛིན་དོན་གྲུབ་ལགས་ཀྱིས་མ་འོངས་པར་གཞོན་སྐྱེས་སུ་ཞིག་གིས་བོད་དོན་ཀྱི་ལས་འགུལ་སྤེལ་སྐབས་ལམ་སྟོན་དང་། རོགས་རམ་བྱེད་མཁན་ཡོད་མེད་ལ་ཐེ་ཚོམས་བྱེད་མི་དགོས་པ་ནི་ཐེངས་འདིའི་ཁོང་གི་ལས་འགུལ་ལས་ར་སྤྲོད་ཐུབ་པ་བྱུང་སྟབས། གཞོན་སྐྱེས་ཚོས་བོད་དོན་ལས་འགུལ་གང་མང་སྤེལ་ཐུབ་ཐབས་གནང་དགོས་པ་དང་། ཐེངས་འདིའི་ཁོང་གི་གོམ་བགྲོད་ལས་འགུལ་སྐབས། ཕྱི་ལོ་ ༢༠༢༡ ལོའི་སྲིད་སྐྱོང་འོས་མིའི་ནང་བཞེངས་མཁན་བཀྲ་ཤིས་དབང་འདུས་ལགས་དང་ལྡི་ལིའི་འགྲིམ་འགྲུལ་ཁང་ (SATA Mt Tour and  Travels Agencey) ། ཀོ་ལི་གྷིལ་གཞིས་སྒར་གྱི་ཚེ་རིང་རྡོ་རྗེ་ལགས་དང་བོད་ཁྱིམ་སློབ་ཟུར་ཚོགས་པ། དེ་བཞིན་གཞོན་ནུ་དང་བུད་མེད་ཚོགས་པ་སོགས་ནས་གང་ཅིའི་ཐད་ལམ་སྟོན་དང་རོགས་རམ་གནང་ཡོད་སྐོར་འགྲེལ་བརྗོད་གནང་བྱུང་།

གསར་འགོད་པ། ཀླུ་མགོན་ཐར།