རྒྱ་ནག་གཞུང་གིས་གསར་འགོད་རང་དབང་ཐོག་དམ་དྲགས་ཤུགས་ཆེན་བྱེད་ཀྱི་ཡོད་པ་ལྟར་འདི་ལོ་རྒྱ་ནག་སླར་ཡང་འཛམ་གླིང་གི་གསར་འགོད་པ་འཛིན་བཟུང་བཀག་ཉར་དང་བཙོན་འཇུག་བྱེད་པའི་རྒྱལ་ཁབ་སྡུག་ཤོས་དེ་ཆགས་ཡོད་འདུག
ཁ་སང་རྒྱལ་སྤྱིའི་བརྒྱུད་ལམ་ཁག་ཏུ་གནས་ཚུལ་ཐོན་པ་ལྟར་ན། ལོ་རེར་རྒྱལ་མཚམས་མེད་པའི་གསར་འགོད་མཐུན་ཚོགས་ཀྱིས་འཛིན་བཟུང་བཙན་འཁྲིད་དང་བཀག་ཉར། དེ་བཞིན། བཙོན་འོག་ཏུ་ཡོད་པའི་གསར་འགོད་པའི་གནས་སྟངས་རྟོག་ཞིབ་ཀྱི་སྙན་ཐོ་ཞིག་འདོན་སྲོལ་ཡོད་པ་ལྟར། ཕྱི་ལོ་ ༢༠༢༠ ལོར་འཛམ་གླིང་ཁྱོན་ཡོངས་སུ་གསར་འགོད་པ་ཁྱོན་ ༣༨༧ འཛིན་བཟུང་དང་གསར་འགོད་པ་ ༥༤ གཏའ་མར་བཟུང་བ། དེ་བཞིན། གསར་འགོད་པ་ ༤ གར་སོང་ཆ་མེད་དུ་གྱུར་བ་སོགས་འཛམ་གླིང་ནང་གསར་འགོད་རང་དབང་ལ་སྔར་བཞིན་རྡོག་རོལ་ཤུགས་ཆེན་ཐེབས་བཞིན་ཡོད་སྐོར་བརྗོད་འདུག་པ་མ་ཟད། འདི་ལོར་བུད་མེད་གསར་འགོད་པ་འཛིན་བཟུང་བྱས་པའི་གྲངས་འབོར་ཇེ་མང་དུ་ཕྱིན་ཡོད་འདུག
ཡང་འཛམ་གླིང་ནང་གསར་འགོད་པ་བཙོན་འཇུག་མང་ཤོས་ཀྱི་རྒྱལ་ཁབ་ལྔ་ཐེར་འདོན་བྱས་ཡོད་སྐོར་ལ་སྙན་ཐོའི་ནང་། རྒྱ་ནག་གཞུང་གིས་འདི་ལོར་ཁྱོན་གསར་འགོད་པ་ ༡༡༧ བཙོན་འཇུག་བྱས་ཏེ་འཛམ་གླིང་གི་གསར་འགོད་པ་མང་ཤོས་བཙོན་འཇུག་བྱེད་པའི་རྒྱལ་ཁབ་སྡུག་ཤོས་དང་སོ་ཌའེ་ཨ་རབ་བྷེ་ཡའི་ནང་གསར་འགོད་པ་ཁྱོན་ ༣༤ བཙོན་འཇུག དེ་བཞིན། ཨི་ཇབ་ཊི་གཞུང་གིས་གསར་འགོད་པ་ཁྱོན་ ༣༠ དང་། ཝེ་ཏི་ནམ་གྱིས་གསར་འགོད་པ་ ༢༨ ། སི་རེ་ཡས་གསར་འགོད་པ་ ༢༧ བཅས་བཙོན་འཇུག་གིས་འཛམ་གླིང་ནང་གསར་འགོད་པ་བཙོན་འཇུག་བྱེད་མཁན་མང་ཤོས་ཀྱི་རྒྱལ་ཁབ་སྡུག་ཤོས་ལྔ་དེ་ཡིན་པ་རེད།
དེ་བཞིན་སྙན་ཐོའི་ནང་། འདི་ལོར་ཏོག་དབྱིབས་གཉན་རིམས་འགོས་ཁྱབ་དང་འབྲེལ་བའི་གནས་ཚུལ་ཕྱིར་བསྒྲགས་འོག་གསར་འགོད་པ་ཁྱོན་ ༤༥༠ ཙམ་གང་བྱུང་བཀག་ཉར་དང་དྲག་རྡུང་ཐེབས་ཡོད་པ་དང་། དེའི་ནང་དམིགས་བསལ་འདི་ལོའི་ཕྱི་ཟླ་ ༣ དང་ ༤ ་བར་གསར་འགོད་པ་མང་པོ་ཞིག་གིས་ཏོག་དབྱིབས་འགོས་ཁྱབ་ཀྱི་དཀའ་ངལ་དང་ཁྱིམ་སྡོད་བཀའ་རྒྱའི་སྐོར་གྱི་གནས་ཚུལ་ཕྱིར་བསྒྲགས་བྱས་པར་བརྟེན་ནས། རྒྱ་གར་ནང་ཁྱོན་གསར་འགོད་པ་ ༤༨ ཁྲིམས་གཏུགས་བྱས་ཏེ་གསར་འགོད་པ་ ༡༥ བདུན་ཕྲག་གཅིག་ནས་ཟླ་གཅིག་བར་འཛིན་བཟུང་བཀག་ཉར་བྱས་ཡོད་སྐོར་དང་། བཙོན་འཇུག་བྱས་པའི་གསར་འགོད་པའི་ཁྲོད། རྒྱ་ནག་ཝོ་ཧན་ནས་མཆེད་པའི་ཏོག་དབྱིབས་གཉན་རིམས་འགོས་ཁྱབ་ཀྱི་གནས་ཚུལ་ཕྱིར་བསྒྲགས་དང་རྒྱ་ནག་གཞུང་གིས་ཏོག་ནད་སྟངས་འཛིན་བྱེད་མ་ཐུབ་པའི་གནས་ཚུལ་སོགས་ཕྱི་བསྒྲགས་བྱས་པའི་ཉེས་མིང་འོག རྒྱ་རིགས་གསར་འགོད་པ་ཚའེ་ཝི་ (蔡伟) དང་ཁྲན་མེན་ (陈玫)་སོགས་ཆེས་ཉུང་མཐར་ཏོག་ནད་དང་འབྲེལ་ནས་གསར་འགོད་པ་ ༧ བཙོན་འཇུག་བྱས་ཡོད་སྐོར། དེ་བཞིན། དཀྱིལ་ཤར་ཡུལ་གྲུའི་རྒྱལ་ཁབ་ཨེ་རན་དང་ཡ་མན། སི་རེ་ཡ་བཅས་ནི་གསར་འགོད་པ་གཏའ་མར་འཛིན་མཁན་ཆེ་ཤོས་ཡིན་སྐོར་སོགས་བརྗོད་འདུག
འདི་ལོའི་འཛམ་གླིང་ཁྱོན་ཡོངས་ཀྱི་གསར་འགོད་པ་བཙོན་འཇུག་གི་གྲངས་འབོར་ཁྱོན་ ༢༧༤ བྱུང་སྟེ་འདས་ལོ་དང་བསྡུར་ན་ཇེ་མང་དུ་ཕྱིན་ཡོད་པ་དང་། འདས་ལོར་འཛམ་གླིང་ནང་གསར་འགོད་པ་ཁྱོན་ ༢༥༠ ལྷག་སོ་སོའི་གསར་འགོད་ལས་རིགས་དང་འབྲེལ་ནས་བཙོན་འཇུག་བྱས་ཡོད་པ་རེད།
གཞན་ཡང་འདི་ལོར་ཨ་རིའི་སྲིད་འཛིན་ཊོམ་ཕུ་ལགས་ཀྱི་འཛིན་སྐྱོང་འོག་གནས་ཚུལ་རྫུན་བསྒྲགས་ཟེར་བའི་མིང་བྱང་འོག་ཨ་རིའི་ནང་ཁྱོན་གསར་འགོད་པ་ ༣༤ བཙན་འཇུག་བྱས་ཡོད་པར་བརྟེན། ཨ་རིའི་གསར་འགོད་པ་སྲུང་སྐྱོབ་ཚོགས་པས་བདམས་ཐོན་སྲིད་འཛིན་རྗོ་བྷའེ་ཌན་གཞུང་ནས་ཨ་རིའི་གསར་འགོད་རང་དབང་སླར་གསོ་དང་དམིགས་བསལ་ཕྱི་སྲིད་ལས་དོན་དང་འབྲེལ་བའི་གསར་འགོད་རང་དབང་སྲུང་སྐྱོབ། དེ་བཞིན། གསར་འགོད་རང་དབང་སྲུང་སྐྱོབ་ཡོང་བར་དམིགས་བསལ་སྐུ་ཚབ་ཅིག་བསྐོ་ཡོང་བར་འབོད་སྐུལ་ཞུས་ཡོད་པ་རེད།
གསར་འགོད་པ། སྐལ་བཟང་སྦྱིན་པ།
