༄༅། །བོད་ཀྱི་རྩ་དོན་སྒྲུབ་ཐབས་སོགས་ལ་ད་ལྟ་སྤྱི་ཚོགས་ཁྱོན་ཡོངས་ཀྱིས་ཆོལ་གསུམ་ཆིག་སྒྲིལ་གྱི་ནུས་པ་འདོན་རྒྱུའི་དུས་སྐབས་གནད་འགག་ཅན་ཞིག་ཡིན་སྟབས། ༢༠༢༡ ལོའི་འདེམས་ཐོན་སྲིད་སྐྱོང་དེའི་ལས་འགན་གཙོ་གྲས་ཤིག་ནི། བོད་རིགས་ནང་ཁུལ་གྱི་དཀའ་རྙོག་ཡོད་རིགས་བསམ་ཤེས་གུ་ཡངས་དང་། བསྟུན་མཁས་ཐབས་ཤེས་བཟང་པོ་ལ་བརྟེན་ནས་སེལ་ཐབས་བྱ་རྒྱུ་དེ་ཡིན་པས། འདེམས་ཐོན་བྱུང་བའི་སྲིད་སྐྱོང་དེས་ཀྱང་བློ་རྒྱ་ཡངས་པོ་དང་དགོངས་པ་ཆེར་བཞེས་ཀྱིས་འདེམས་ཐོན་བྱུང་བའི་སྲིད་སྐྱོང་འོས་གྲངས་གཉིས་པ་ཐོན་པ་དེ་རང་གི་བཀའ་བློན་དུ་བསྐོ་བཞག་གནང་རྒྱུ་ནི་ཤིན་ཏུ་གལ་འགངས་ཆེ་བའི་ལས་དོན་ཞིག་ཏུ་མཐོང་གི་འདུག
དེ་བཞིན་རང་རེ་མི་མང་རྣམས་ནས་ཀྱང་འོས་འདེམས་བྱུང་བའི་ ༢༠༢༡ སྲིད་སྐྱོང་དེ་རང་ཉིད་སྒེར་གྱི་འོས་འཕེན་སྲིད་སྐྱོང་ཡིན་མིན་ལ་མ་ལྟོས་པར་སྙིང་ཐག་པ་ནས་གུས་བརྩི་ཞུ་རྒྱུ་དང་། སྤྱི་དོན་བྱ་བ་ལམ་ལྷོངས་ཡོང་རྒྱུར་མཉམ་རུབ་བྱ་རྒྱུ་དེ་ནི་ངོས་རྣམས་ཀྱིས་སྤྱི་ནོར་༸གོང་ས་༸སྐྱབས་མགོན་མཆོག་ལ་རིན་ཆེན་སྣ་བདུན་གྱི་མཎྜལ་འདེགས་འབུལ་ཞུས་པ་ལས་ཀྱང་ཐུགས་མཉེས་ཡོང་རྒྱུ་ཡིན་པ་དང་། བོད་མི་རང་ཉིད་ལའང་ཆོས་དང་འཇིག་རྟེན་གང་ཐད་ནས་བསམས་ཀྱང་དོན་སྙིང་ཆེ་ཤོས་ཀྱི་ལས་འགན་ཞིག་ཡིན་པས། ཀུན་གྱིས་ཐུགས་ལ་འཇགས་པ་ཞུ་རྒྱུའི་རེ་བསྐུལ་ཡིག་ཆུང་དུ། གུས་བཙན་བྱོལ་བོད་མིའི་ཆེས་མཐོའི་ཁྲིམས་ཞིབ་ཁང་གི་བཤེར་དཔང་ཟུར་པ་ཕུར་བུ་རྡོ་རྗེ་ནས།
ཕྱི་ལོ་ ༢༠༢༡ ཟླ་ ༡ ཚེས་༣ ཉིན་ལ་ཕུལ།
