ཁ་སང་ཕྱི་ཚེས་ ༣ ཉིན་རྒྱ་གར་གཞུང་གིས་ཀོ་ཝིཌ་ཤིལ་ཌི་ (Covidshield) དང་ཀོ་ཝེག་སིན་ (COVAXIN) ཏོག་དབྱིབས་སྨན་ཁབ་གཉིས་ལ་ཛ་དྲག་ངང་སྤྱོད་ཆོག་པའི་ཆོག་མཆན་སྤྲད་ཡོད་ཀྱང་བརྟག་དཔྱད་ཀྱི་བརྒྱུད་རིམ་དང་གྲུབ་དོན་སོགས་ཁ་གསལ་མེད་པའི་སྐྱོན་བརྗོད་བྱེད་ཀྱི་འདུག
རྒྱ་གར་གྱི་སྲིད་བློན་མུ་དྷུ་མཆོག་གིས་སྨན་ཁབ་གཉིས་ཛ་དྲག་གིས་སྤྱོད་ཆོག་པ་དེ་ནི་ཏོག་དབྱིབས་གཉན་རིམས་ལ་གདོང་ལེན་བྱེད་པའི་བརྒྱུད་རིམ་ཁྲོད་དཀྱོག་མཚམས་ཆེན་པོ་ཞིག་ཡིན་པའི་ངོས་འཛིན་གནང་འདུག་ལ། འདི་ལོའི་ཕྱི་ཟླ་ ༧ བར་དུ་མི་གྲངས་ས་ཡ་ ༣༠༠ ཙམ་ལ་སྨན་ཁབ་རྒྱག་འཆར་ཡོད་འདུག
དེ་དང་འབྲེལ་ནས་རྒྱལ་ཚོགས་ཀྱི་འཕྲོད་བསྟེན་སྒྲིག་འཛུགས་ཀྱིས་རྒྱ་གར་ནང་ཏོག་དབྱིབས་སྨན་ཁབ་ཛ་དྲག་ངང་བེད་སྤྱོད་ཆོག་པའི་ཆོག་མཆན་ཐོག་མར་ཐོབ་པར་དགའ་བསུ་བྱས་ཏེ། ཐག་གཅོད་དེ་ཡིས་ཏོག་དབྱིབས་གཉན་རིམས་ལ་གདོང་ལེན་བྱེད་པར་ཚགས་ཚུད་དང་ཤུགས་ཆེ་རུ་གཏོང་ངེས་སྐོར་དང་། སྨན་ཁབ་དེ་བཞིན་སྤྱི་དམངས་འཕྲོད་བསྟེན་དང་འབྲེལ་ནས་དགོས་ངེས་ཅན་ཚོར་མཁོ་སྤྲོད་བྱ་རྒྱུ་ནི་གཉན་རིམས་ལ་གདོང་ལེན་བྱེད་པའི་བརྒྱུད་རིམ་ཁྲོད་གནད་དོན་གལ་ཆེན་ཞིག་ཡིན་སྐོར་བཀོད་འདུག
རྒྱ་གར་རྒྱལ་ཡོངས་སྨན་རྫས་སྟངས་འཛིན་ལྷན་ཚོགས་ཀྱིས། ཏོག་དབྱིབས་སྨན་ཁབ་དེ་གཉིས་ཀ་བེད་སྤྱོད་བཏང་ན་བདེ་ཐང་ཡིན་པའི་ཡིག་ཆ་ཁག་ལྷན་ཚོགས་སུ་འབྱོར་ཡོད་སྐོར་བརྗོད་ཡོད་ནའང་། རྒྱ་གར་གྱི་སྨན་བཅོས་ཞིབ་འཇུག་ལྷན་ཚོགས་ (Indian Council of Medical Research) དང་། རྒྱ་གར་གྱི་འབུ་སྲིན་ཞིབ་འཇུག་ལྟེ་གནས་ཁང་ (National Institute of Virology) གཉིས་མཉམ་འབྲེལ་གྱིས་བཟོས་པའི་ (COVAXIN) གྱི་ཕན་ནུས་སོགས་ཀྱི་གནས་ཚུལ་ཁ་གསལ་བསྒྲགས་མེད་པ་དང་། ནང་འདྲེན་བྱས་པའི་ (Covidshield) སྨན་ཁབ་ལ་རྒྱ་གར་ནང་བདེ་ཐང་ཡིན་མིན་གྱི་ཚོད་ལྟའི་མཇུག་འབྲས་ཆ་ཚང་ཁ་གསལ་མེད་པ་སོགས་ལ་བརྟེན། གཞུང་འཛིན་ཁ་གཏད་ཚོགས་པའི་ཆབ་སྲིད་པ་དང་སྨན་པ་ཁག་ཅིག་གིས་སྐྱོན་བརྗོད་བྱེད་བཞིན་ཡོད་པ་དང་། རྒྱ་གར་རྒྱལ་ཡོངས་སྨན་རྫས་ལྟ་ཞིབ་ཁང་ (All India Drug Action Network) གིས་ཐག་གཅོད་དེ་ནི་གློ་བུར་དང་མཐའ་མའི་གྲུབ་འབྲས་ཁག་ཅིག་ཁ་གསལ་ཆགས་མེད་སྐོར་སྐྱོན་བརྗོད་བྱས་འདུག
དེ་བཞིན་རྒྱ་གར་གྱི་མུམ་བྷཡེ་ (Mumbai) གྲོང་ཁྱེར་ལ་རྟེན་གཞི་བྱས་པའི་རིམས་ནད་ཉམས་ཞིབ་པ་ས་ཝབ་ནེལ་པ་རིག་ (Swapneil Parikh) ཡིས། སྨན་ཁབ་ཁག་ལ་གང་མགྱོགས་ཆོག་མཆན་ཐོབ་ཐབས་སུ་བརྒྱུད་རིམ་མང་པོ་ཞིག་མེད་པར་བཟོ་བ་དང་བཅོས་བསྒྱུར་བྱེད་དགོས་ཀྱི་ཡོད་ནའང་། སྲིད་གཞུང་དང་སྟངས་འཛིན་བྱེད་མཁན་ཁག་གིས་སྨན་ཁབ་དང་འབྲེལ་ནས་ཡིག་ཆ་ཁག་ལ་ཕྱི་གསལ་ནང་གསལ་དགོས་པ་དང་། དེ་ལྟར་མ་བྱུང་ཚེ་སྤྱི་དམངས་ཀྱི་སྨན་ཁབ་ལ་ཆོག་མཆན་སྤྲད་པའི་བརྒྱུད་རིམ་ལ་ཡིད་ཆེས་བརླག་འགྲོ་ཚུལ་དང་། ད་ལྟ་སྨན་པ་ཚོ་གནས་སྟངས་ཁག་པོ་ཞིག་གི་འོག་ལྷུང་ཡོད་སྐོར་བརྗོད་དེ་སྨན་ཁབ་ལ་ཆོག་མཆན་སྤྲོད་པའི་བརྒྱུད་རིམ་ལ་ཁ་གསལ་མེད་སྐོར་ཀྱི་སྐྱོན་བརྗོད་བྱས་འདུག
ཀོ་ཝིཌ་ཤིལ་ཌི་ (Covidshield) སྨན་ཁབ་ནི་དབྱིན་ཡུལ་དང་སུ་ཝེ་ཌེན་ (Sweden) གཉིས་ཀྱི་སྨན་རྫས་བརྟག་དཔྱད་ཁང་ཁག་ཅིག་གིས་གསར་བཟོ་བྱས་པ་དང་། དབྱིན་ཡུལ་ནང་སྨན་ཁབ་དེ་ཛ་དྲག་གིས་བེད་སྤྱོད་ཆོག་པའི་ཆོག་མཆན་སྤྲད་དེ། དེ་རིང་ཕྱི་ཚེས་ ༤ ཉིན་ནས་དངོས་སུ་བེད་སྤྱོད་བྱེད་ཀྱི་ཡོད་པ་རེད། ཉེ་ལམ་ནས་རྒྱ་གར་གྱི་སྨན་བཟོ་བསྐྲུན་ཁང་ (Serum Institute of India) གིས་སྨན་ཁབ་དེ་བཟོ་བསྐྲུན་བྱེད་མགོ་བཙུགས་ཡོད་པ་དང་། དེ་ནི་འཛམ་གླིང་གི་སྨན་བཟོ་བསྐྲུན་ཁང་ཆེ་ཤོས་དེ་ཡིན་འདུག འདས་ལོའི་ཕྱི་ཟླ་ ༡༡ ནང་བཟོ་བསྐྲུན་ཁང་དེའི་སྤྱི་གཉེར་བ་ (Adar Poonawalla) ཡིས་བརྗོད་པ་ལྟར་ན། བཟོ་བསྐྲུན་ཁང་དེས་ཟླ་གཅིག་གི་ནང་ཚུད་དུ་ (Covidshield) སྨན་ཁབ་ས་ཡ་ ༡༠༠ ཙམ་བཟོ་བསྐྲུན་བྱེད་པའི་ནུས་པ་ཡོད་པ་དང་། སྐབས་དེ་དུས་ནས་སྨན་ཁབ་དེ་ས་ཡ་ ༤༠ ཙམ་བཟོས་ཟིན་ཏེ་ཟུར་ཉར་བྱས་ཡོད་སྐོར་བརྗོད་ཡོད་པ་རེད།
ཀོ་ཝིཌ་ཤིལ་ཌི་ (Covidshield) སྨན་ཁབ་དེ་བཞིན་ཐེངས་གཉིས་རྒྱག་དགོས་ཀྱི་ཡོད་འདུག་པ་དང་། ཚར་གཅིག་བརྒྱབ་ཚར་རྗེས་བདུན་ཕྲག་ ༤ བར་ཙམ་ནས་སླར་ཡང་གཅིག་རྒྱག་དགོས་ཡོད་འདུག་པ་དང་། དེ་ནི་སྤྱི་སྙོམས་གྲང་ཚད་ ༢ ནས་ ༨ (celsius) བར་དུ་ཉར་ཚགས་བྱས་ཆོག་པ་ཞིག་ཡིན་འདུག་ལ། དེ་ནི་རྒྱ་གར་གྱི་སྨན་ཁབ་གཞན་ལྟར་ཉར་ཚགས་ཐུབ་པ་ཞིག་ཡིན་འདུག དེ་བཞིན་དབྱིན་ཡུལ་གྱི་གྷན་ཌིན་གསར་ཁང་ (The Guardian) གིས་བཀོད་པ་ལྟར་ན། སྨན་ཁབ་དེ་རྒྱ་གར་གཞུང་ལ་ཧིན་སྒོར་ ༢༥༠ དང་། སྒེར་གཉེར་ཁྲོམ་རར་ཧིན་སྒོར་ཆིག་སྟོང་གིས་བཙོང་རྒྱུ་ཡིན་འདུག
རྒྱ་གར་ནི་ཨ་རི་ཕུད་པའི་ཏོག་དབྱིབས་གཉན་རིམས་ཀྱི་ནད་པའི་གྲངས་མང་ཤོས་དེ་ཆགས་ཡོད་པ་དང་། ཉེ་ལམ་ནས་ནད་པའི་གྲངས་ཉུང་དུ་འགྲོ་བཞིན་ཡོད་ནའང་། འདས་པའི་ཆུ་ཚོད་ཉེར་བཞིའི་རིང་རྒྱ་གར་རྒྱལ་ཡོངས་སུ་ཏོག་དབྱིབས་ནད་པ་གྲངས་ ༡༨༡༧༧ ཐོན་ཡོད་པ་རེད། ད་སྔ་བར་རྒྱ་གར་ནང་ཁྱོན་ནད་པ་གྲངས་ས་ཡ་ ༡༠།༢ ལྷག་བྱུང་ཡོད་པའི་ཁྲོད་ནད་པ་ཁྲི་ ༡༥ ཙམ་རྐྱེན་འདས་སུ་ཕྱིན་ཡོད་པ་རེད།
གསར་འགོད་པ། ཀླུ་མགོན་ཐར།
