ཁ་སང་ཕྱི་ཚེས་ ༡༡ ཉིན་ཐའེ་ཝན་གཞུང་གིས་རྒྱལ་སྤྱིའི་སྟེང་རྒྱ་ནག་དང་ཐའེ་ཝན་གཉིས་མ་ནོར་བའི་ཆེད་དུ་བསྐྱར་བཅོས་བྱས་པའི་ཐའེ་ཝན་གྱི་ཕྱི་བསྐྱོད་ལག་ཁྱེར་གསར་པ་དེ་དངོས་སུ་འགྲེམས་སྤེལ་བྱས་ཡོད་པ་དང་རྒྱ་ནག་གཞུང་གིས་དེ་ནི་བྱབ་ཆུང་གི་བྱེད་སྟངས་ཡིན་སྐོར་སྐྱོན་བརྗོད་བྱས།
ཐའེ་ཝན་གཞུང་གིས་འདས་ལོའི་ཕྱི་ཟླ་ ༡༠ པའི་ནང་གསར་དུ་བཟོས་པའི་ལག་ཁྱེར་གསར་པ་དེའི་མདུན་ཤོག་སྟེང་། རྒྱ་ཡིག་ཐོག་རྒྱ་ནག་སྤྱི་མཐུན་རྒྱལ་ཁབ་ (中華民國) ཞེས་པ་རང་སོར་བཞག་ཡོད་ཀྱང་། དབྱིན་ཡིག་གི་ཡིག་ཆེན་དུ་བཀོད་པའི་ Republic of China ཞེས་པ་མེད་པར་བཟོས་ཏེ། མདུན་ཤོག་དཀྱིལ་དུ་ཡོད་པའི་རྒྱལ་རྟགས་ཉི་མའི་དཀྱིལ་འཁོར་གྱི་མཐའ་རུ་ཡིག་ཆུང་ནང་བཀོད་ཡོད་པ་དང་། དེའི་གཤམ་འོག་ཏུ་བཀོད་པའི་དབྱིན་ཡིག་གི་ཐའེ་ཝན་ (Taiwan) ཞེས་པ་དེ་སྔར་ལས་ཡིག་གཟུགས་ཆེ་རུ་བཏང་སྟེ་མངོན་གསལ་དོད་པོ་བཟོས་ཡོད་སྟབས། དེ་ཉིད་ལག་དེབ་ངོས་ཀྱི་ཆེས་མངོན་པར་གསལ་བའི་མཚོན་རྟགས་ལྟ་བུ་ཞིག་ཏུ་གྱུར་ཡོད་པ་རེད།
ཐའེ་ཝན་གཞུང་གིས་འགྲེལ་བརྗོད་གནང་བ་ལྟར་ན། ཕྱི་བསྐྱོད་ལག་ཁྱེར་རྙིང་པའི་མདུན་ཤོག་སྟེང་དབྱིན་ཡིག་གི་རྒྱ་ནག་སྤྱི་མཐུན་རྒྱལ་ཁབ་ཅེས་པ་ཡིག་ཆེན་དུ་བཀོད་ཅིང་། ཐའེ་ཝན་ཞེས་པ་གཤམ་འོག་ཏུ་ཡིག་ཆུང་དུ་བཀོད་པའི་རྒྱུ་མཚན་གྱིས། ཐའེ་ཝན་གྱི་མི་སེར་རྣམས་རྒྱལ་སྤྱིའི་སྟེང་འགྲུལ་བཞུད་བྱེད་སྐབས། རྒྱ་ནག་གི་མི་སེར་དང་ནོར་བའི་དཀའ་ངལ་འཕྲད་ཀྱི་ཡོད་པ་དང་། ལྷག་པར་དུ་འདས་ལོར་མཚོན་ན། ཏོག་དབྱིབས་གཉན་རིམས་ཀྱི་རྐྱེན་པས་འཛམ་གླིང་གི་རྒྱལ་ཁབ་མང་པོས་རྒྱ་ནག་གི་མི་སེར་རྣམས་རང་གི་རྒྱལ་ཁབ་ནང་ཡོང་རྒྱུར་བཀག་སྡོམ་བྱས་ཡོད་པ་ལྟར། ཐའེ་ཝན་གྱི་མི་སེར་རྣམས་ཀྱང་རྒྱ་ནག་གི་མི་སེར་དུ་ནོར་ནས་འགྲུལ་བཞུད་ལ་བཀག་སྡོམ་བྱས་པའི་གནད་དོན་ལྷགས་ཡོད་པས། ད་ཐེངས་ལག་དེབ་གསར་པ་དེས་འཁྲུལ་བ་དེ་ཉིད་སེལ་རྒྱུའི་རེ་བ་བྱེད་ཀྱི་ཡོད་སྐོར་བཤད་འདུག
ཐའེ་ཝན་གཞུང་གིས་ལག་ཁྱེར་གསར་པ་འདོན་རྒྱུའི་གསལ་བསྒྲགས་བྱེད་སྐབས། རྒྱ་ནག་གི་ཕྱི་སྲིད་མགྲིན་ཚབ་པས་ཐའེ་ཝན་གཞུང་གི་བྱབ་ཆུང་གི་བྱེད་ཐབས་དེ་དག་གིས། ཐའེ་ཝན་རྒྱ་ནག་གི་ཆ་ཤས་ཤིག་ཡིན་པའི་དོན་དངོས་དེར་བསྒྱུར་བཅོས་གཏོང་ཐབས་མེད་སྐོར་སྐྱོན་བརྗོད་བྱས་ཡོད་པ་རེད།
རྒྱ་ནག་གི་གྲོང་ཁྱེར་ཝུ་ཧན་ནས་མཆེད་པའི་ཏོག་དབྱིབས་གཉན་རིམས་འདིས་རྒྱ་ནག་གི་རྒྱལ་སྤྱིའི་སྟེང་གི་སྣང་བརྙན་ལ་དོ་ཕོག་ཆེན་པོ་ཐེབས་ཡོད་ཀྱང་། ཐའེ་ཝན་ལ་མཚོན་ན་གོ་སྐབས་གསར་པ་ཞིག་དང་། རྒྱལ་སྤྱིའི་སྟེང་ངོས་འཛིན་གསར་པ་ཞིག་ཐོབ་ཡོད་པ་རེད། སྤྱིར་རྒྱ་ནག་གཞུང་གིས་རྒྱ་ནག་གཅིག་གི་སྲིད་ཇུས་འོག་ནས་རྒྱལ་ཁབ་གཞན་གྱིས་ཐའེ་ཝན་དང་ཕྱི་འབྲེལ་འཛུགས་རྒྱུར་བཀག་འགོག་དང་། ལྷག་པར་དུ་ཐའེ་ཝན་འཛམ་གླིང་འཕྲོད་བསྟེན་ལྷན་ཚོགས་ལྟ་བུའི་རྒྱལ་སྤྱིའི་སྒྲིག་འཛུགས་ནང་ཞུགས་རྒྱུར་དགག་བྱ་ཤུགས་ཆེན་པོ་བྱེད་བཞིན་ཡོད་ནའང་། འདས་ལོར་འཛམ་གླིང་གི་མགོ་འཁྲིད་མི་ཉུང་བའི་ཁྲོད་ཐའེ་ཝན་རྒྱལ་ཚོགས་ཀྱི་འཕྲོད་བསྟེན་སྒྲིག་འཛུགས་ནང་ཞུགས་དགོས་པའི་བསམ་ཚུལ་བཏོན་ཡོད་ལ། ཐའེ་ཝན་གྱི་སྲིད་འཛིན་ཚའེ་ཡེན་ཝུན་གྱིས་ཀྱང་རང་གི་སྲིད་འཛིན་ལས་ཡུན་གཉིས་པའི་སྲིད་ཇུས་གཙོ་བོའི་ཁྲོད། ཐའེ་ཝན་རྒྱལ་སྤྱིའི་ཆབ་སྲིད་ཀྱི་ཁོར་ཡུག་ནང་ཞུགས་ཐབས་དང་། ཐའེ་ཝན་དེ་ཉིད་རྒྱལ་སྤྱིའི་གནད་དོན་ཞིག་ཏུ་བསྐྲུན་རྒྱུ་དེ་ཡིན་པ་རེད།
འདས་པའི་ལོ་གཅིག་ནང་རྒྱ་ནག་གི་གནོན་ཤུགས་དང་སྐྱོན་བརྗོད་སོགས་ལ་མ་འཛེམ་པར། ཨ་རིས་འདས་པའི་ལོ་ངོ་ ༥༠ ལྷག་གི་རིང་ཐེངས་དང་པོར་ཆེས་མཐོའི་གཞུང་འབྲེལ་སྐུ་ཚབ་དང་མི་སྣ་ཐའེ་ཝན་ལ་བསྐྱོད་པ་མ་ཟད། ཟླ་སྔོན་མའི་ཕྱི་ཚེས་ ༢༧ ཉིན་ཨ་རིའི་སྲིད་འཛིན་ཊོམ་ཕུ་མཆོག་གིས་ཨ་རི་དང་ཐའེ་ཝན་དབར་གྱི་འབྲེལ་ལམ་གོང་འཕེལ་ལ་དམིགས་པའི་ཐའེ་ཝན་འགན་ལེན་ཁྲིམས་འཆར་ (Taiwan Assurance Act of 2020) ལ་མཚན་རྟགས་བསྐྱོན་ཡོད་ཅིང་། དེ་བཞིན་ཉེ་ཆར་ཕྱི་ཚེས་ ༩ ཉིན་ཨ་རིའི་རྒྱལ་སྲིད་དྲུང་ཆེ་མེག་པོམ་པེ་ (Mike Pompeo) མཆོག་གིས། ཨ་རིའི་གཞུང་དང་གཞུང་འབྲེལ་མི་སྣ་རྣམས་ཀྱིས་ཐའེ་ཝན་ལ་འབྲེལ་ལམ་འཛུགས་ཐབས་སྐོར་གྱི་བཀག་རྒྱ་རང་བཞིན་གྱི་ཁྲིམས་དེ་ཉིད་རྩིས་མེད་བཏང་སྟེ། འབྱུང་འགྱུར་ཨ་རིའི་གཞུང་འབྲེལ་མི་སྣ་རྣམས་ཀྱིས་ཁྲིམས་ཀྱི་བཀག་འགོག་མེད་པའི་ཐོག་ནས་གང་འདོད་དུ་ཐའེ་ཝན་ལ་འབྲེལ་ལམ་འཛུགས་ཆོག་པའི་ལམ་ཁ་བཤངས་ཡོད་པ་རེད།
གསར་འགོད་པ། པ་སངས་ཚེ་རིང་།
