ཨ་རིའི་གྲོས་ཚོགས་འོག་མའི་ནང་ཉེ་སྔོན་ཨ་རིའི་གྲོས་ཚོགས་ཁང་དུ་བྱུང་བའི་དྲག་རྒོལ་དཔུང་འཛུལ་ལ་སྲིད་འཛིན་ཊོམ་ཕུ་མཆོག་ནས་སྐུལ་སློང་བྱས་ཡོད་པའི་ཉེས་འཛུགས་དེ་ཚད་མཐོའི་མང་མོས་ཀྱི་ཐོག་ནས་གཏན་འབེབ་བྱས་ཡོད་འདུག
ཁ་སང་ཕྱི་ཚེས་ ༡༣ ཉིན་ཨ་རིའི་དམངས་གཙོ་ཚོགས་པས་སྟངས་འཛིན་འོག་ཡོད་པའི་གྲོས་ཚོགས་འོག་མའི་ནང་ཆུ་ཚོད་ ༢ ལྷག་གི་རིང་ཉེས་འཛུགས་བགྲོ་གླེང་བྱས་རྗེས། སྲིད་འཛིན་ཊོམ་ཕུ་མཆོག་གིས་ཉེ་ཆར་ཨ་རིའི་གྲོས་ཚོགས་ཁང་ནང་བྱུང་བའི་དྲག་རྒོལ་དཔུང་འཛུལ་ལས་འགུལ་ལ་སྐུལ་སློང་བྱས་པའི་ཉེས་འཛུགས་ལ་སྲིད་དོན་ཚོགས་པ་གཉིས་ཀྱི་འཐུས་མི་ ༡༩༢ གྱིས་དགག་བྱ་དང་། འཐུས་མི་ ༢༣༤ ཡིས་རྒྱབ་སྐྱོར་བྱས་པར་བརྟེན། ཚད་མཐོའི་མང་མོས་ཀྱི་ཐོག་ནས་ཉེས་འཛུགས་ཐག་གཅོད་གཏན་འབེབ་བྱུང་ཡོད་པ་དང་། དེ་ནི་ཨ་རིའི་ལོ་རྒྱུས་ཁྲོད་སྲིད་འཛིན་ཞིག་ལ་གྲོས་ཚོགས་ཀྱིས་ཐེངས་གཉིས་ལ་ཉེས་འཛུགས་བྱས་པ་ཐོག་མ་དེ་ཆགས་ཡོད་འདུག
གྲོས་ཚོགས་འོག་མའི་ཉེས་འཛུགས་དོན་ཚན་ནང། སྲིད་འཛིན་ཊོམ་ཕུ་མཆོག་གིས་ཡང་དང་བསྐྱར་དུ་འདི་ལོའི་སྲིད་འཛིན་འོས་བསྡུ་དེ་དྲང་པོ་བྱུང་མེད་པ་དང་། དེར་ངོས་ལེན་བྱ་རྒྱུ་མེད་པའི་གནས་ཚུལ་རྫུན་མ་བསྒྲགས་ཡོད་པ་མ་ཟད། སྲིད་འཛིན་གྱི་བྱ་སྤྱོད་དེས་ཉེ་ཆར་ཨ་རིའི་གྲོས་ཚོགས་ཁང་ནང་དཔུང་འཛུལ་གྱི་ཁྲིམས་བརྒལ་ལས་འགུལ་དེར་སྐུལ་སློང་བྱས་ཡོད་སྐོར། ད་དུང་སྲིད་འཛིན་ཊོམ་ཕུ་མཆོག་གིས་ཨ་རིའི་བདེ་འཇགས་དང་། གཞུང་གི་རྩ་འཛུགས་བཅས་ལ་གནོད་འཚེ་ཆེན་པོ་བཏང་ཡོད་པ་མ་ཟད། དམངས་གཙོའི་ལམ་ལུགས་ཀྱི་དྲང་ཚུགས་ལ་ཉེན་ཁ་བཟོས་པ་དང་། ལྷིང་འཇགས་ཀྱི་ཐོག་ནས་སྲིད་དབང་རྩིས་སྤྲོད་བྱ་རྒྱུའི་བརྒྱུད་རིམ་ལ་འགོག་རྐྱེན་བཟོས་ཡོད་སྐོར་སོགས་བཀོད་ཡོད་འདུག
གྲོས་ཚོགས་འོག་མའི་ནང་ཉེས་འཛུགས་དོན་ཚན་གཏན་འབེབ་བྱས་རྗེས། སྲིད་འཛིན་ཊོམ་ཕུ་མཆོག་གིས་བརྙན་ལམ་བརྒྱུད་མང་ཚོགས་ལ། ཨ་རིའི་གྲོས་ཚོགས་ཁང་དུ་ལྷགས་པའི་དཔུང་འཛུལ་གྱི་བྱ་སྤྱོད་དེས་ཨ་རི་བ་ས་ཡ་མང་པོའི་སེམས་ལ་ཕོག་ཐུག་བཏང་ཡོད། ངས་འཚེ་བའི་བྱ་སྤྱོད་དེ་དག་ལ་མཐའ་གཅིག་ཏུ་ངོ་རྒོལ་བྱེད་ཀྱི་ཡོད། ང་ཚོའི་རྒྱལ་ཁྱབ་ནང་འཚེ་སྤྱོད་དང་གཏོར་བཅོམ་རིགས་ནི་ངོས་ལེན་བྱེད་ཐབས་མེད་པ་ཞིག་རེད། གཏུམ་ཚོགས་ཀྱི་འཚེ་སྤྱོད་རིགས་ནི་ངའི་ལངས་ཕྱོགས་དང་ང་ཚོའི་ལས་འགུལ་དང་རྒྱབ་འགལ་དུ་གྱུར་ཡོད། ང་ལ་ཞེ་ཐག་པ་ནས་རྒྱབ་སྐྱོར་བྱེད་མཁན་ཚོ་ནམ་ཡང་འདི་ལྟ་བུའི་ཆབ་སྲིད་ཀྱི་འཚེ་སྤྱོད་ལ་ཞུགས་མི་སྲིད་ལ། གལ་ཏེ་ཁྱེད་རང་འདི་ལྟ་བུའི་བྱ་སྤྱོད་ནང་ཞུགས་ཚེ། ཁྱེད་ཀྱིས་ང་ཚོའི་ལས་འགུལ་ལ་རམ་འདེགས་ཞུ་རྒྱུའི་ཚབ་ཏུ་གཏོར་རྒོལ་གཏོང་གི་ཡོད། ཅེས་བརྗོད་འདུག་ལ། འོས་འདེམས་སྲིད་འཛིན་བྷའེ་ཌིན་མཆོག་གི་སྲིད་འཛིན་དམ་འབུལ་མཛད་སྒོའི་ཉིན་ཨ་རིའི་དབུས་སའི་གྲོས་ཚོགས་ཁང་ལ་ངོ་རྒོལ་ལས་འགུལ་སྤེལ་འཆར་ཡོད་པའི་གནས་ཚུལ་ཐོན་བཞིན་དང་འབྲེལ་ཁོང་གིས། མང་ཚོགས་ངོས་ནས་ཨ་རིའི་བཅའ་ཁྲིམས་ཀྱིས་བསྩལ་བའི་སྨྲ་བརྗོད་རང་དབང་བཀོལ་སྤྱོད་བྱ་རྒྱུའི་ཐོབ་ཐང་ཡོད་ནའང་། དེ་ནི་ཁྲིམས་སྒྲིག་ལ་བརྩི་སྲུང་དང་གཏོར་བཅོམ་སོགས་འཚེ་སྤྱོད་མེད་པའི་ཐོག་ནས་སྤེལ་དགོས་སྐོར་འབོད་སྐུལ་ཞུས་ཡོད་འདུག
གྲོས་ཚོགས་འོག་མའི་ནང་ཉེས་འཛུགས་དོན་ཚན་ཐོག་བགྲོ་གླེང་བྱེད་སྐབས་ཚོགས་གཙོ་ལྕམ་ནེན་སི་པེ་ལོ་སི་མཆོག་གཙོ་བོར་བྱས་པའི་དམངས་གཙོ་ཚོགས་པའི་འཐུས་མི་རྣམས་ཀྱིས་ཊོམ་ཕུ་མཆོག་གི་བྱ་སྤྱོད་ལ་སྐྱོན་བརྗོད་དྲག་པོ་བྱས་ཡོད་ནའང་། གྲོས་ཚོགས་འོག་མའི་སྤྱི་མཐུན་ཚོགས་པའི་འཐུས་མིས། སྲིད་འཛིན་ཊོམ་ཕུ་མཆོག་ནས་བྱས་ཉེས་བསགས་མེད་པ་མིན་ཡང་། དུས་ཡུན་ཐུང་ཐུང་ནང་སྲིད་འཛིན་ལ་ཉེས་འཛུགས་བྱེད་ཐབས་འདི་ནི་ནོར་འཁྲུལ་ཅན་ཞིག་ཡིན་སྐོར་དང་། ཡང་འཐུས་མི་གཞན་ཞིག་གིས་དམངས་གཙོ་ཚོགས་པས་ཆབ་སྲིད་ཀྱི་འཁོན་ལན་སློག་ཆེད་རྒྱལ་ཁབ་དུམ་བུར་གཏོང་བཞིན་ཡོད་སྐོར་སྐྱོན་བརྗོད་བྱས་ཡོད་འདུག
སྤྱིར་གྲོས་ཚོགས་འོག་མའི་ཉེས་འཛུགས་གྲོས་ཆོད་དེ་ནི་སྲིད་འཛིན་གནས་དབྱུང་གཏོང་རྒྱུའི་གོམ་པ་དང་པོ་དེ་ཡིན་པ་དང་། དེའི་རྗེས་ཉེས་འཛུགས་གནད་དོན་ཐད་གྲོས་ཚོགས་གོང་མའི་ནང་དཔྱད་ཞིབ་གནང་རྒྱུ་དང་། གལ་ཏེ་གྲོས་ཚོགས་གོང་མའི་འཐུས་མིའི་གསུམ་ཆ་གཉིས་ཀྱིས་སྲིད་འཛིན་ནས་ནག་ཉེས་བསགས་པར་ངོས་ལེན་རྒྱབ་སྐྱོར་བྱས་ཚེ། སྲིད་འཛིན་ལས་གནས་ནས་གནས་དབྱུང་གཏོང་བའི་ཆ་རྐྱེན་ཚང་གི་ཡོད་འདུག འདས་ལོར་གྲོས་ཚོགས་འོག་མས་སྲིད་འཛིན་ཊོམ་ཕུ་མཆོག་ལ་དབང་ཆ་ལོག་སྤྱོད་དང་གྲོས་ཚོགས་ཀྱི་བྱ་རིམ་ལ་འགལ་རྐྱེན་བཟོས་པའི་ནག་ཉེས་བཙུགས་ཡོད་ཀྱང་། གྲོས་ཚོགས་གོང་མའི་ནང་རྒྱབ་སྐྱོར་མ་ཐོབ་པའི་རྐྱེན་གྱིས་ནག་ཉེས་ཕོག་མེད་པ་རེད། ད་ལན་གྱི་ཉེས་འཛུགས་དང་འབྲེལ་ཏེ་ཨ་རིའི་ནེའུ་ཡོག་དུས་བབ་ནང་། གྲོས་ཚོགས་གོང་མའི་མངས་གཙོ་ཚོགས་པའི་འཐུས་མིའི་ཐོག་ཉུང་མཐར་གྲོས་ཚོགས་གོང་མའི་སྤྱི་མཐུན་ཚོགས་པའི་འཐུས་མི་ ༢༠ ཡིས་ཉེས་འཛུགས་དོན་ཚན་ལ་རྒྱབ་སྐྱོར་བྱ་རྒྱུ་ཡིན་པས་ནག་ཉེས་ཕོག་རྒྱུ་གཏན་འཁེལ་ཡིན་སྐོར་བཀོད་འདུག
གྲོས་ཚོགས་གོང་མའི་འཐུས་མི་རྒན་གྲས་རྣམས་ཀྱིས་གྲོས་ཚོགས་གོང་མའི་ནང་ཊོམ་ཕུའི་ཉེས་འཛུགས་དཔྱད་ཞིབ་དེ། ཡོང་ལ་ཉེ་བའི་འོས་འདེམས་སྲིད་འཛིན་བྷའེ་ཌིན་མཆོག་གི་དམ་འབུལ་མཛད་སྒོའི་རྗེས་ནས་མ་གཏོགས་ཚུགས་ཐུབ་ཀྱི་མེད་སྐོར་བརྗོད་ཡོད་སྟབས། ཊོམ་ཕུ་མཆོག་སྲིད་འཛིན་གྱི་ལས་གནས་ནས་དངོས་སུ་གནས་དབྱུང་གཏོང་ཐབས་མ་མཆིས་ཀྱང་། དམངས་གཙོ་ཚོགས་པར་མཚོན་ན། གལ་ཏེ་གྲོས་ཚོགས་གོང་མའི་ནང་ཊོམ་ཕུ་མཆོག་ནས་ནག་ཉེས་བསགས་པ་ར་འཕྲོད་བྱུང་ཚེ། རྗེས་ཕྱོགས་ཊོམ་ཕུ་མཆོག་ཨ་རིའི་སྲིད་འཛིན་གྱིས་མཚོན་པའི་གཞུང་འཛིན་ལས་གནས་སུ་ལངས་ཆོག་གི་མེད་པ་རེད་འདུག དེ་བཞིན་བྷའེ་ཌིན་གྱི་དམ་འབུལ་གྲུབ་པ་བསྟུན། གྲོས་ཚོགས་འོག་མའི་སྤྱི་མཐུན་ཚོགས་པའི་འཐུས་མི་མར་ཇོ་རི་ཊེ་ལོར་གྷི་རིན་ (Marjorie Taylor Greene ) གྱིས། བྷའེ་ཌིན་མཆོག་གིས་དབང་ཆ་ལོག་སྤྱོད་བྱས་པའི་ཉེས་འཛུགས་གྲོས་འཆར་འདོན་རྒྱུ་ཡིན་སྐོར་བསྒྲགས་ཡོད་པ་རེད་འདུག
སྤྱིར་ཨ་རིའི་ལོ་རྒྱུས་ཁྲོད་དུ། གྲོས་ཚོགས་འོག་མས་ཕྱི་ལོ་ ༡༩༦༨ ལོར་ཨ་རིའི་སྲིད་འཛིན་བཅུ་བདུན་པ་ཨེན་ཌི་རུའོ་ཇོན་སོན་ (Andrew Johnson) དང་། ཡང་ཕྱི་ལོ་ ༡༩༩༨ ལོར་ཨ་རིའི་སྲིད་འཛིན་ཞེ་གཉིས་པ་བྷིལ་ཀི་ལི་ཊོན་ (Bill Clinton) ལ་ཉེས་འཛུགས་བྱས་ཡོད་ཀྱང་། ཕྱིས་སུ་གྲོས་ཚོགས་གོང་མའི་ནང་འཐུས་མི་གསུམ་ཆ་གཉིས་ཀྱི་རྒྱབ་སྐྱོར་མ་ཐོབ་པར་བརྟེན། སྲིད་འཛིན་གྱི་གོ་གནས་ནས་གནས་དབྱུང་བཏང་ཐུབ་མེད་པ་དང་། དེ་བཞིན་ཨ་རིའི་སྲིད་འཛིན་རི་ཆར་ཌི་ནིག་སོན་ (Richard Nixon) ལ་གྲོས་ཚོགས་འོག་མས་ཉེས་འཛུགས་མ་བྱས་གོང་ནས་སྲིད་འཛིན་ནས་རྩ་དགོངས་ཞུས་ཡོད་པ་རེད།
གསར་འགོད་པ། པ་སངས་ཚེ་རིང་།
