བླ་མའི་ཡང་སྤྲུལ་དུ་ངོས་འཛིན་བྱས་པའི་རྒྱ་རྒན་ཞིག་ལ་ཁྲིམས་ཐག་ལོ་ ༢༥ བཅད།

ཀོང་སྤྲུལ་རིན་པོ་ཆེའི་ཡང་སྲིད་དུ་ངོས་འཛིན་བྱས་པའི་རྒྱ་རྒན་བློ་བཟང་བསྟན་འཛིན་རིན་པོ་ཆེ་ཞེས་པ་ཞིག་གིས་སློབ་ཚོགས་ལ་མགོ་སྐོར་བཏང་བ་དང་བཙན་གཡེམ་འཇིགས་སྐུལ་བྱས་པའི་ནག་ཉེས་འོག་ལོ་ ༢༥ ཡི་བཙོན་འཇུག་ཁྲིམས་ཆད་དང་བོད་རིགས་ཨ་སྤྲུལ་རིན་པོ་ཆེ་ཞེས་པ་ཞིག་ལའང་ལོ་ ༥ བཙོན་ཁྲིམས་ཐག་བཅད་འདུག

ཁ་སང་ཕྱི་ཚེས་ ༢ ཉིན་རྒྱ་ནག་གི་གཞུང་འབྲེལ་གསར་ལམ་དུ། ཀོང་སྤྲུལ་རིན་པོ་ཆེའི་ཡང་སྤྲུལ་ཡིན་ཚུལ་གྱི་བློ་བཟང་བསྟན་འཛིན་རིན་པོ་ཆེར་འབོད་པའི་རྒྱ་མི་དངོས་མིང་ལ་ཝང་ཤིང་ཧྥུ་ (王兴夫)ཟེར་བ་ཞིག་གིས། འདས་པའི་ལོ་བཅུ་ལྷག་རིང་གཞན་ལ་མགོ་སྐོར་བཏང་སྟེ་རྒྱ་སྒོར་དུང་ཕྱུར་ ༢ མ་ཟིན་ཙམ་གྱི་དངུལ་དངོས་གཡོ་ལེན་དང་། སློབ་ཚོགས་ལ་འཇིགས་སྐུལ་དང་བུད་མེད་ལ་བཙན་གཡེམ་བྱས་པ། ལོག་ཆོས་རྩ་འཛུགས་བྱས་པ་སོགས་ཀྱི་ནག་ཉེས་འོག   ཅི་ནན་འབྲིང་རིམ་མི་མང་ཁྲིམས་ཁང་གིས་ཝང་ཤིང་ཧྥུ་ལ་ལོ་ ༢༥ ཡི་བཙོན་འཇུག་ཁྲིམས་ཆད་དང་། བོ་རོད་དགོན་གྱི་དགོན་བདག་ཨ་སྤྲུལ་རིན་པོ་ཆེ་ལ་རྒྱ་རྒན་དེས་རྒྱ་སྒོར་ས་ཡ་ ༥༠ ལྷག་སྤྲད་ཡོད་ལུགས་བརྗོད་དེ་ལོ་ ༥ ཡི་བཙོན་འཇུག་ཁྲིམས་ཐག་བཅད་ཡོད་སྐོར་བསྒྲགས་འདུག

བཙན་བྱོལ་ནང་དུ་ཡོད་པའི་འབྲེལ་ཡོད་ཅིག་གིས་འདི་གའི་གསར་འགོད་པར། ཕྱི་ལོ་ ༢༠༡༧ ལོར་ཨ་སྤྲུལ་རིན་པོ་ཆེ་རྒྱ་གར་ནང་ཡོང་སྟེ་གསུང་ཆོས་སོགས་ཞུས་ནས་ཕྱིར་ཕ་ཡུལ་དུ་འབྱོར་རྗེས། རྒྱ་ནག་གཞུང་གིས་འཛིན་བཟུང་བྱས་ཡོད་པ་མ་ཟད། ཁོང་གི་སྤུན་མཆེད་སྤྲུལ་སྐུ་ཞིག་དང་ནང་མི་བཅས་གར་སོང་ཆ་མེད་དུ་གྱུར་ནས་ཡུན་རིང་ཕྱིན་ཡོད་ལ། རྒྱ་ནག་གཞུང་གིས་ཁ་གཡར་ས་ཙམ་བཙལ་བ་ཡིན་པའི་ངོས་འཛིན་བྱེད་ཀྱི་ཡོད་སྐོར་བརྗོད་བྱུང་། ད་ལན་རྒྱ་ནག་གཞུང་གིས་བསྒྲགས་པའི་གནས་ཚུལ་ནང་། རྒྱ་རྒན་དེས་ཨ་སྤྲུལ་རིན་པོ་ཆེ་ལ་སྔ་གཞུག་ཏུ་རྒྱ་སྒོར་ས་ཡ་ ༥༠ ལྷག་སྤྲད་ཡོད་སྐོར་དང་། ཁོང་གཉིས་ཁ་མཐུན་བྱས་ཏེ་དད་ལྡན་སློབ་ཚོགས་ལ་མགོ་སྐོར་བཏང་ཡོད་སྟབས། ཨ་སྤྲུལ་རིན་པོ་ཆེ་ལ་ལོ་ ༥ ཡི་བཙོན་འཇུག་ཁྲིམས་ཐག་བཅད་ཡོད་པ་དང་། ཝང་ཤིང་ཧྥུ་ཕྱི་ལོ་ ༢༠༡༧ ལོར་ཅི་ནན་ཉེན་རྟོག་པས་འཛིན་བཟུང་བྱས་ཡོད་སྐོར་བརྗོད་འདུག

རྒྱ་གཞུང་གིས་བསྒྲགས་པའི་གནས་ཚུལ་ལྟར་ན། ཕྱི་ལོ་ ༢༠༠༧ ཟླ་ ༧ པའི་ནང་རྒྱ་ནག་ཧྲན་ཏུང་ནས་ཡིན་པའི་རང་ལོ་ ༥༢ ཅན་གྱི་ཝང་ཤིང་ཧྥུ་ཟེར་བའི་རྒྱ་རྒན་དེས། སི་ཁྲོན་ཞིང་ཆེན་དཀར་མཛེས་ཁུལ་སེལ་ཤུལ་རྫོང་ཁོངས་ཀྱི་བོ་རོད་དགོན་གྱི་དགོན་བདག་ཨ་སྤྲུལ་རིན་པོ་ཆེར་མཇལ་ཏེ། ཁོ་རང་གིས་ལོ་མང་རིང་བོད་ཁུལ་དུ་ནང་ཆོས་ཉམས་ལེན་བྱས་ཡོད་པ་དང་། ཨ་སྤྲུལ་རིན་པོ་ཆེའི་བླ་མ་ཀོང་སྤྲུལ་རིན་པོ་ཆེར་དད་པ་ཧ་ཅང་ཆེན་པོ་ཡོད་པས། དགོན་པ་དེར་ཁོས་ཆོས་འཆད་ཉན་བྱེད་འདོད་ཡོད་སྐོར་རེ་སྐུལ་ཐེངས་མང་བྱས་པ་མ་ཟད། བོ་རོད་དགོན་གྱི་ལས་དོན་ཆེ་ཆུང་མང་པོར་རྒྱ་སྒོར་ཁྲི་བཅུ་ཕྲག་གི་ཞལ་འདེབས་ཕུལ་བ་སོགས་བྱས་ཏེ་ལོ་ཕྱེད་ཙམ་ཕྱིན་རྗེས། ཨ་སྤྲུལ་རིན་པོ་ཆེ་དང་ཝང་ཤིང་ཧྥུ་གཉིས་བླ་སློབ་ཏུ་གྱུར་བ་མ་ཟད། ཨ་སྤྲུལ་རིན་པོ་ཆེ་ནི་སེལ་ཤུལ་རྫོང་སྲིད་གྲོས་ཀྱི་རྒྱུན་ལས་ཚོགས་གཙོ་ཡིན་པ་དང་། ཁོའི་ནུ་བོ་ཞིག་ཀྱང་རྫོང་མི་མང་འཐུས་མི་ལྷན་ཚོགས་ཀྱི་ཚོགས་གཞོན་ཡིན་ལ། ཁོང་གཉིས་ཀྱི་ཕ་རྒན་ཡང་སེལ་ཤུལ་རྫོང་གི་རྫོང་དཔོན་ཞིག་ཡིན་སྟབས། ཝང་ཤིང་ཧྥུ་ལ་བོད་རིགས་ཀྱི་ཐོབ་ཐང་ལག་ཁྱེར་བཟོས་ཡོད་པ་མ་ཟད། ཕྱི་ལོ་ ༢༠༠༨ ཟླ་ ༨ ཚེས་ ༨ ཉིན་ཝང་ཤིང་ཧྥུ་ཟེར་བའི་རྒྱ་རྒན་དེ་ཀོང་སྤྲུལ་རིན་པོ་ཆེའི་ཡང་སྲིད་དུ་ངོས་འཛིན་བྱས་ཏེ་བོ་རོད་དགོན་དུ་ཁྲི་འདོན་བྱས་ཡོད་པ་མ་ཟད། ཝང་ལ་ཁྲི་གསོལ་དཔང་ཡིག་ཀྱང་བཟོས་ཡོད་འདུག

རྒྱ་རྒན་དེ་ཁྲི་འདོན་བྱས་རྗེས་བོད་ཁུལ་གཙོ་བོར་གྱུར་བའི་སི་ཁྲོན་ཁྲིན་ཏུའུ་དང་ཅི་ནན། ཧྲིན་ཡང་སོགས་རྒྱ་ནག་གི་ས་ཁུལ་མང་པོར་ཕྱིན་ཏེ། ཆོས་ཚོགས་ཆེ་ཁག་ ༨ དང་ཡན་ལག་ཁང་ ༢༠ ལྷག་བཙུགས་ཏེ། ཚོང་པ་དང་ཕྱུག་བདག་གཙོ་བོར་གྱུར་བའི་སློབ་མ་ ༣༠༠༠ བརྒལ་བ་བསྡུས་ཡོད་པ་དང་། སློབ་ཚོགས་ནས་ཁོ་ལ་དད་པ་དང་ཡིད་ཆེས་རྩེ་གཅིག་ཏུ་བྱས་ཏེ། ཆོས་འཆད་ཉན་གྱི་གླ་ཡོན་ཕུལ་བ་དང་བླ་མའི་བྱིན་ཅན་དངོས་རྫས་ཉོས་པ། དེ་བཞིན་བོད་ཁུལ་དུ་དགོན་པ་འཛུགས་སྐྲུན་དང་ཉམ་ཐག་ལ་རོགས་རམ་སོགས་ཀྱི་མིང་ཐོག་ལ་རྒྱ་སྒོར་མང་པོ་ཞལ་འདེབས་སུ་སྤྲད་ཡོད་འདུག་ལ། སྒ་སྐྱེ་རྒུ་མདོར་ས་ཡོམ་གོད་ཆག་བྱུང་སྐབས། བློ་བཟང་བསྟན་འཛིན་དཀར་མཛེས་ཁུལ་གྱི་མགོ་འཁྲིད་དང་ལྷན་དུ་གནོད་ཐེབས་ས་ཁུལ་དུ་ཕྱིན་ནས་རོགས་དངུལ་ཡང་སྤྲད་ཡོད་འདུག

ཝང་ཤིང་ཧྥུ་ཟེར་བའི་རྒྱ་རྒན་དེ་ཕྱི་ལོ་ ༡༩༥༥ ལོར་རྒྱ་ནག་ཧྲན་ཏུང་ཞིང་ཆེན་དུ་སྐྱེས་ཤིང་། དམར་དམག་ནང་འཛུལ་ཞུགས་བྱས་ཏེ་ཕྱིས་སུ་བཙོན་རའི་སྲུང་དམག་གི་ཆེད་ལས་པ་ཞིག་ཏུ་གྱུར། ཡིན་ཡང་། རྩལ་རླུང་སྦྱོང་བརྡར་བྱས་ཏེ་ཡུན་རིང་ལས་ཞུགས་མ་བྱས་པའི་རྐྱེན་གྱིས་གཞུང་ཞབས་ནས་གནས་དབྱུང་བཏང་ཡོད་འདུག དེ་ནས་ཁོས་རྒྱ་ནག་ནང་དུ་ཕེབས་བཞིན་པའི་བོད་ཀྱི་བླ་མ་གང་ཙམ་ཞིག་ངོ་ཤེས་ཡོད་པ་མ་ཟད། རིམ་གྱིས་བོད་ཁུལ་དུ་ཡོང་སྟེ་ནང་ཆོས་དོན་གཉེར་གྱི་ལས་ལ་ཞུགས་པའི་ཐབས་ལམ་རྙེད་པ་དང་། མཐར་བོད་ཀྱི་དགོན་པ་ཞིག་གི་དབུ་བླ་དང་སློབ་ཚོགས་སྟོང་ཕྲག་མང་པོའི་སྐྱབས་ཡུལ་དུ་གྱུར་བའི་བརྒྱུད་རིམ་ཁྲོད། པདྨའི་མེ་ཏོག་གི་འདབ་བརྒྱའི་སྟེང་བཞུགས་ཤིང་དབུ་འཇའ་འོད་ཀྱིས་བསྐོར་བར་བྱས་པའི་ཁོ་རང་གི་འདྲ་པར་བཅས་ནང་ཆོས་འཆད་འཁྲིད་བྱས་པའི་ཆེད་སྡེར་དང་ཐང་ག་ཁྲི་ཕྲག་མང་པོ་ཚོང་འགྲེམས་བྱས་ཏེ། དད་ལྡན་སློབ་ཚོགས་ནས་རྒྱ་སྒོར་ས་ཡ་མང་པོ་བཟོས་ཡོད་སྐོར་བསྒྲགས་པ་དང་འབྲེལ། བོད་བརྒྱུད་ནང་བསྟན་གྱི་དད་ལྡན་དོན་གཉེར་ཅན་ཚོར་བླ་མ་དང་རྩ་བའི་བླ་མ་ཡང་དག་ཅིག་འཐོབ་འདོད་ཡོད་ན། རྒྱ་ནག་གཞུང་གིས་བཟོས་པའི་སྤྲུལ་སྐུ་འཚོལ་བཤེར་མ་ལག་ཟེར་བ་དེའི་ནང་སོང་ནས་འཚོལ་དགོས་པ་དང་། གལ་སྲིད་མ་ལག་དེའི་ནང་དུ་མེད་ན་བླ་མ་ཡིན་ཟེར་མཁན་ཚང་མ་རྫུན་མ་ཡིན་སྐོར་ཡང་བསྒྲགས་འདུག

གསར་འགོད་པ་བསྟན་འཛིན་ཕུར་བུ་དང་རྒྱ་གར་ལྷོ་ཕྱོགས་ཀྱི་གསར་འགོད་པ་དོན་འགྲུབ་བཀྲ་ཤིས།