ཟླ་འདིའི་ཕྱི་ཚེས་ ༡༧ ཉིན། ཨ་རིའི་ཁྲིམས་རྩོད་པ་ཇོན་ཁར་མན་ (John Carman) གྱིས་བརྗོད་པ་ལྟར་ན། བཀག་ཉར་ཁང་དུ་ཏོག་དབྱིབས་གཉན་རིམས་འགོས་ཁྱབ་ཕྱིན་སྐོར་བརྗོད་དེ། ཉིན་དེའི་ཉིན་གུང་ཆུ་ཚོད་ ༡༢།༤༥ ཐོག་ཨ་རིའི་ནེའུ་ཡོག་བོད་མི་སོགས་ཀྱི་སྐོར་ལ་གསང་བའི་མྱུལ་ཞིབ་བྱས་ཡོད་པའི་དོགས་གཞི་ཅན་པདྨ་དར་རྒྱས་ངག་དབང་ཟེར་བ་དེ་ཨ་སྒོར་ས་ཡ་ ༢ གཏའ་དངུལ་དུ་བཞག་སྟེ་བཀག་ཉར་ཁང་ཀློད་གྲོལ་བཏང་ཡོད་འདུག
པདྨ་དར་རྒྱས་ངག་དབང་ཟེར་བ་དེ་ཨ་རིའི་ནེའུ་ཡོག་མངའ་སྡེའི་བཀག་ཉར་ཁང་ (Metropolitan Detention Center) ནང་དུ་བཅུག་སྟེ་ཟླ་བཞི་ཙམ་ཕྱིན་རྗེས། ཟླ་འདིའི་ཕྱི་ཚེས་ ༡༦ ཉིན་ཨ་རིའི་བྷུ་རུག་ལིན་ (Brooklyn) རྫོང་ཁྲིམས་ཁང་གིས་ཉིན་གཅིག་གི་རྗེས་སུ་པདྨ་དར་རྒྱས་ཀྱི་རྐང་པར་གློག་གི་ཚོད་འཛིན་འཕྲུལ་ཆས་ཤིག་བཏགས་རྗེས་ཀློད་དགོས་པ་དང་། རང་ཁྱིམ་ལས་ས་གནས་གཞན་དུ་འགྲོ་སྐྱོད་བྱེད་མི་ཆོག་ལ། གལ་སྲིད་སྨན་པར་བསྟེན་གཏུག་དང་ཁྲིམས་རྩོད་པར་ཐུག་འཕྲད་དགོས་ཚེ་འགྲོ་ཆོག་ནའང་། ས་གནས་ལོང་ཨའེ་ལན་ཌི་ (Long Island) དང་བྷུ་རུག་ལིན་ (Brooklyn) ཁྱུན་སི་ (Queens) སི་ཊན་ཏན་ཨའེ་ལན་ཌི་ (Staten Island) སོགས་ཀྱི་ས་མཚམས་ལས་བརྒལ་མི་ཆོག་པའི་ཐག་གཅོད་བྱས་ཡོད་འདུག
པདྨ་དར་རྒྱས་ངག་དབང་ཟེར་བ་དེ་ཀློད་གྲོལ་གཏོང་དགོས་པའི་རྒྱུ་མཚན་གྱི་སྐོར་ལ་བྷུ་རུག་ལིན་ (Brooklyn) རྫོང་ཁྲིམས་ཁང་གི་ཁྲིམས་དཔོན་ཨེ་རིག་ཀོ་མི་ཊི་ (Eric Komitee) ཡིས། ཁོ་ཀློད་གྲོལ་གཏོང་དགོས་པའི་རྒྱུ་མཚན་གཅིག་ནི་ཉེ་ལམ་བྷུ་རུག་ལིན་ (Brooklyn) རྫོང་གི་པདྨ་དར་རྒྱས་ངག་དབང་བཀག་ཉར་བྱེད་སར་ཏོག་དབྱིབས་གཉན་རིམས་ཁྱབ་བརྡལ་ཤུགས་ཆེ་རུ་འགྲོ་བཞིན་ཡོད་སྟབས་ཡིན་སྐོར་དང་། བདུན་ཕྲག་སྔོན་མར་པདྨ་དར་རྒྱས་ངག་དབང་ལ་ནད་རྟགས་ཐོན་ཡོད་འདུག་ལ། སྐབས་དེར་དྲག་སྐྱེད་བྱུང་རྗེས་ཀློད་གྲོལ་གཏང་རྒྱུའི་ཐག་གཅོད་བྱས་ཡོད་འདུག
ཡང་ཁྲིམས་དཔོན་ཨེ་རིག་ཀོ་མི་ཊི་ཡིས། ད་ལྟ་པདྨ་དར་རྒྱས་ཀྱི་གནས་སྟངས་ལ་འགྱུར་བ་ཐེབས་ཡོད་པ་དང་། ཀློད་གྲོལ་གྱི་གཏའ་དངུལ་ཨ་སྒོར་ས་ཡ་གཅིག་ནས་གཉིས་ལ་ཡར་སྤར་ཡོད་པ། དེ་བཞིན་ཁྲིམས་དཔོན་ཚོས་རྒྱ་ནག་གི་གསང་མྱུལ་བ་ཡིན་པའི་ཉེས་མིང་འོག་འཛིན་བཟུང་བྱས་ཤིང་གྱོད་དོན་ལ་འབྲེལ་བ་མེད་པའི་ཐོག་ནས་ཀློད་གྲོལ་གཏོང་བར་དགག་བྱ་བྱས་མེད་པའི་གནས་ཚུལ་ཁག་ཅིག་བྱུང་ཡོད་པ། དེ་བཞིན་གསང་བའི་གནས་ཚུལ་བརྐུ་འཁྱེར་བྱས་པའི་གྱོད་དོན་དང་འབྲེལ་དམིགས་བསལ་གྱི་འགྲོ་ལུགས་ཤིག་གི་འོག་ཐག་གཅོད་བྱས་པ་ཞིག་ཡིན་ཚུལ་བརྗོད་འདུག
ཨ་རིའི་དབུས་ཉེན་རྟོག་ལས་ཁུངས་ཀྱིས་ནེའུ་ཡོག་མངའ་སྡེའི་བྷུ་རུག་ལིན་ (Brooklyn) རྫོང་གི་དབུས་ཁྲིམས་ཁང་ལ་ཁྲིམས་གཏུག་བྱས་པའི་ཉེས་དོན་ཡིག་ཆ་ལྟར་ན། པདྨ་དར་རྒྱས་ངག་དབང་ཟེར་བས་ཨ་རིའི་ནང་རྒྱ་ནག་གཞུང་གི་ཆེད་དུ་གསང་མྱུལ་བྱས་པ་དང་། དྲ་ཐོག་ནས་གཞན་ལ་མགོ་སྐོར་བཏང་བ། ཨ་རིའི་སྲིད་གཞུང་གི་ལས་དོན་ལ་འགོག་རྐྱེན་བཟོས་པ་དང་གནས་ཚུལ་རྫུན་སྒྲོག་བྱས་པ་བཅས་ཀྱི་ནག་ཉེས་བཙུགས་ཡོད་པ་དང་། ཨ་རིའི་ནང་གི་བོད་མི་བཙན་བྱོལ་བའི་གནས་ཚུལ་ཁག་ཨ་རིར་བཅའ་སྡོད་རྒྱ་ནག་གཞུང་ཚབ་ཁང་ལ་མཁོ་སྤྲོད་བྱེད་ཀྱི་ཡོད་པ་སོགས་བཀོད་ཡོད་པ་རེད། ཁྲིམས་དོན་དབྱེ་ཞིབ་པས་ཚོད་དཔག་བྱས་པ་ལྟར་ན། ཁོའི་ནག་ཉེས་ཆ་ཚང་ར་སྤྲོད་བྱུང་ཚེ་ལོ་ངོ་བཅུ་ལྷག་ལ་བཙོན་འཇུག་ཁྲིམས་ཆད་ཕོག་ཀྱི་ཡོད་འདུག་ནའང་། པདྨ་དར་རྒྱས་ངག་དབང་ཟེར་བའི་ཁྲིམས་རྩོད་པ་ཇོན་ཁར་མན་ (John Carman) གྱིས། པདྨ་དར་རྒྱས་ངག་དབང་གིས་སྤྱི་ཚོགས་ནང་ཡོངས་གྲགས་ཀྱི་གནས་ཚུལ་མཁོ་སྤྲོད་བྱས་ཡོད་པ་ལས་ཨ་རིའི་གསང་བའི་གནས་ཚུལ་མཁོ་སྤྲོད་བྱས་མེད་པ་དང་། དེ་ནི་པདྨ་དར་རྒྱས་སྒེར་དང་བོད་རིགས་ཚོར་ཕྱི་སྐྱོད་མཐོང་མཆན་སྟབས་བདེའི་ངང་རག་ཆེད་ཡིན་སྐོར་འགྲེལ་བརྗོད་བྱེད་ཀྱི་ཡོད་འདུག
འདས་ལོའི་ཕྱི་ཟླ་ ༡༠ ནང་པདྨ་དར་རྒྱས་ངག་དབང་ཟེར་བ་དེའི་བཟའ་ཟླ་སོགས་མི་དགུ་ཡིས། ཨ་སྒོར་ས་ཡ་ ༡ གཏའ་དངུལ་དུ་བཞག་སྟེ་ཁོ་ཀློད་གྲོལ་ཡོང་བའི་ཞུ་ཡིག་ཕུལ་ཏེ། ཨ་རིའི་ཁྲིམས་དཔོན་ལཱོ་སི་བྷི་ལོམ་ (Lois Bloom) གྱིས་ངག་དབང་ཀློད་རྩིས་བྱས་ཡོད་ཀྱང་། ཁྲིམས་དཔོན་ལས་རོགས་མཱེ་གཱེལ་ (Michael Keilty) གྱིས་པདྨ་དར་རྒྱས་ཀློད་གྲོལ་བཏང་ཚེ། ཁོ་ནི་ཉེས་ཅན་པ་གཞན་དང་མི་མཚུངས་པར་ནེའུ་ཡོག་གི་རྒྱ་ནག་གཞུང་ཚབ་ཁང་དུ་བྲོས་འགྲོ་རྒྱུ་ལས་སླ་པོ་ཆགས་ཡོད་པ་དང་། གལ་སྲིད་ཁོ་རྒྱ་ནག་གཞུང་ཚབ་ཁང་དུ་བྲོས་པ་ཡིན་ན། ཁོ་བསྐྱར་དུ་འཛིན་བཟུང་བྱེད་ཐུབ་ཀྱི་མེད་སྟབས། དེ་ནི་ཧ་ཅང་ཉེན་ཁ་ཅན་ཞིག་ཡིན་སྐོར་བརྗོད་དེ་མུ་མཐུད་བཀག་ཉར་འོག་བཞག་ཡོད་པ་རེད།
འདས་ལོར་ཨ་རིའི་ཉེན་རྟོག་ཁང་གིས་ཤོག་གྲངས་ ༢༥ ཅན་གྱི་ཉེས་དོན་ཡིག་ཆ་ཞིག་བསྒྲགས་པ་ལྟར་ན། པདྨ་དར་རྒྱས་ངག་དབང་ཟེར་བ་དེ་བོད་རིགས་ཤིག་ཡིན་པ་དང་། ཁོའི་ཕ་མ་གཉིས་དང་གཅེན་པོ་ཞིག་རྒྱ་ནག་ནང་ཡོད་པ་དང་། ཕ་མ་གཉིས་ཀ་དམར་ཤོག་ཚོགས་མི་ཡིན་པ་མ་ཟད། ཁོའི་ཨ་ཕ་དེ་རྒྱ་ནག་མི་མང་བཅིངས་གྲོལ་དམག་མི་ཟུར་པ་ཞིག་དང་། ཨ་མ་དེ་གཞུང་གི་ལས་བྱེད་ཅིག་ཡིན་འདུག དེ་བཞིན་གཅེན་པོ་དེ་ད་ལྟ་རྒྱ་ནག་གི་ཟུར་བཅད་དམག་ཁོངས་སུ་ཡོད་འདུག པདྨ་དར་རྒྱས་ངག་དབང་ཟེར་བ་དེ་རྒྱ་ནག་ནས་རིག་གཞུང་བརྗེ་ལེན་གྱི་ཐོངས་མཆན་ཐོག་ཨ་རིར་སླེབས་ཡོད་པ་དང་། ཐོངས་མཆན་གྱི་དུས་ཡུན་རྫོགས་ཁར་ཁོ་རང་བོད་རིགས་ཤིག་ཡིན་པའི་རྒྱུ་མཚན་གྱིས། རྒྱ་ནག་གཞུང་གིས་བཙོན་འཇུག་དང་མནར་གཅོད་གཏོང་རབས་བཤད་དེ་ཨ་རིའི་ནང་སྐྱབས་བཅོལ་ཞུས་པ་དང་། ཕྱིས་སུ་རང་བཞིན་གྱིས་ཨ་རིའི་མི་སེར་དུ་གྱུར་ཏེ། རིམ་པས་ཨ་རིའི་ཟུར་བཅད་དམག་ཁོངས་སུ་ཞུགས་པ་མ་ཟད། གསང་བ་རིམ་པའི་བདེ་འཇགས་ཆོག་མཆན་ (secret level security clearance) ཡང་ཐོབ་སྟེ་གསང་བའི་ཡིག་ཆ་ཁག་ལ་ལག་པ་འཆང་ཆོག་པའི་དམིགས་བསལ་ཐོབ་ཐང་ཡང་རག་ཡོད་འདུག
གསར་འགོད་པ། ཀླུ་མགོན་ཐར།
