བསླེབ་ལ་ཉེ་བའི་བོད་མིའི་རང་དབང་སྒེར་ལངས་ཉིན་མོ་ཐེངས་རེ་གཉིས་པའི་བར་ཐའེ་ཝན་དང་ཧྥ་རན་སིའི་ནང་རྣམ་པ་འདྲ་མིན་ཐོག་ནས་བོད་དོན་ལས་འགུལ་སྤེལ་གྱི་འདུག
ཟླ་འདིའི་ཕྱི་ཚེས་ ༡༡ ཉིན་ནས་མགོ་འཛུགས་ཀྱིས། བོད་དང་ཐེ་ཝན་འགྲོ་བ་མིའི་ཐོབ་ཐང་འབྲེལ་མཐུད་ཁང་གི་གོ་སྒྲིག་འོག ༧གོང་ས་མཆོག་གི་སྐུའི་བླ་གཟའ་སྟེ་རེས་གཟའ་ལྷག་པ་འཆར་ཅན་དུ། ཐའེ་ཝན་ནང་བོད་དོན་གསལ་བཤད་ཀྱི་རྐང་འཁོར་སྐོར་སྐྱོད་ཀྱི་ལས་འགུལ་ཞིག་སྤེལ་ཏེ། བསླེབ་ལ་ཉེ་བའི་བོད་མིའི་རང་དབང་སྒེར་ལངས་ཐེངས་ ༦༢ པ་སྟེ་ཕྱི་ཟླ་ ༣ ཚེས་ ༡༠ བར་ལས་འགུལ་མུ་མཐུད་སྤེལ་རྒྱུ་ཡིན་པ་དང་། དེ་རིང་རེས་གཟའ་ལྷག་པ་ཉིན་ཐའེ་ཝན་ནང་རྐང་འཁོར་སྐོར་སྐྱོད་ཀྱི་ལས་འགུལ་ཐེངས་གསུམ་པ་དེ་ཆགས་ཀྱི་ཡོད་པ་རེད།
རྐང་འཁོར་སྐོར་བསྐྱོད་ཀྱི་ལས་འགུལ་དེ་ཕྱི་ལོ་ ༢༠༡༡ ལོར་བཀྲ་ཤིས་ཚེ་རིང་མི་སྒེར་གྱིས་ཐོག་མར་ཐའེ་ཝན་ནང་མགོ་འཛུགས་གནང་ཡོད་པ་དང་། ད་ལྟ་མི་མང་གི་ལས་འགུལ་ཞིག་ཏུ་གྱུར་ཡོད་པ་རེད་ལ། ནམ་རྒྱུན་ཡིན་ན་ལས་འགུལ་དེ་ལོ་ལྟར་གསུམ་བཅུའི་དུས་དྲན་གྱི་ཟླ་གཉིས་ཙམ་སྔོན་ནས་རེས་གཟའ་ལྷག་པ་ནམ་ཡིན་ལ་རྒྱལ་ས་ཐའེ་པེ་ནང་སྐོར་སྐྱོད་ལས་འགུལ་སྤེལ་བཞིན་ཡོད་པ་ཞིག་རེད་འདུག
གཞན་ཡང་། ཡུ་རོབ་རྒྱལ་ཁབ་ཧྥ་རན་སིར་གནས་བཞུགས་བོད་མི་བསྟན་པ་དར་རྒྱས་ལགས་ཀྱིས། ཟླ་འདིའི་ཕྱི་ཚེས་ ༡༢ ཉིན་ནས་མགོ་འཛུགས་ཀྱིས། བསླེབ་ལ་ཉེ་བའི་བོད་མིའི་རང་དབང་སྒེར་ལངས་ཐེངས་ ༦༢ པའི་བར་ཧྥ་རན་སིའི་རྒྱལ་སའི་ལྕགས་སྡོང་ (Eiffiel Tower) མདུན་དུ། བོད་དོན་དྲིལ་བསྒྲགས་ཀྱི་ལས་འགུལ་ཞིག་སྤེལ་བཞིན་ཡོད་མོད། ད་ལྟ་ཁོང་གི་ལས་འགུལ་སྤེལ་ཡུལ་ལ་འགོག་རྐྱེན་འཕྲད་དེ་ས་གནས་གཞན་ནས་བོད་དོན་ལས་འགུལ་མུ་མཐུད་སྤེལ་གྱི་ཡོད་པ་རེད།
གསར་འགོད་པ། སྐལ་བཟང་སྦྱིན་པ།
