རྒྱ་ནག་གཞུང་གིས་གསུམ་བཅུའི་དུས་དྲན་བསླེབ་ལ་ཉེ་བ་དང་བསྟུན་ཟླ་བཞི་བའི་བར་མཚོ་སྔོན་དང་ཡུལ་ཤུལ་ཕྱོགས་ཀྱི་ཞིང་འབྲོག་མང་ཚོགས་རྣམས་ས་གནས་གཞན་ལ་འགྲོ་སྐྱོད་མི་ཆོག་པ་དང་ལམ་བར་ཞིབ་བཤེར་ས་ཚུགས་གསར་འཛུགས་ཀྱིས་སྔར་ལྷག་དམ་དྲག་བྱེད་ཀྱི་ཡོད་འདུག
ལོ་ལྟར་གསུམ་བཅུའི་དུས་དྲན་བསླེབ་ལ་ཉེ་བའི་སྐབས་སུ་རྒྱ་ནག་གཞུང་གིས་བོད་ནང་གི་བོད་མིའི་འགྲོ་སྐྱོད་རང་དབང་གཙོས་པའི་ཕྱོགས་ཡོངས་ནས་བོད་མིར་དམ་དྲག་སྔར་ལྷག་བྱེད་བཞིན་ཡོད་པ་ལྟར། འདི་གའི་གསར་འགོད་པར་བོད་ནང་གི་བོད་མི་ཞིག་གིས་འདི་ལོར་རྒྱ་ནག་གཞུང་གིས་མཚོ་སྔོན་དང་ཡུལ་ཤུལ་ཕྱོགས་ཀྱི་ཞིང་འབྲོག་མང་ཚོགས་རྣམས་སྐྱོད་སའི་ལམ་བར་དུ་ཞིབ་བཤེར་ས་ཚུགས་གསར་འཛུགས་དང་ས་ཆ་གཞན་ལ་འགྲོ་མི་ཆོག་པ་སོགས་ཀྱི་དམིགས་བསལ་དམ་དྲག་བྱེད་མགོ་བརྩམས་ཡོད་སྐོར་བརྗོད་བྱུང་།
གནས་ཚུལ་མཁོ་སྤྲོད་པས། མཚོ་སྔོན་དང་ཡུལ་ཤུལ་གཉིས་ཀྱི་གྲོང་བརྡལ་དང་འབྲོག་ཁུལ་དུ། རྒྱ་ནག་ཉེན་རྟོག་པ་ཡོང་ནས་ཟླ་བ་བཞི་བའི་བར་དུ་ས་གནས་ཞིང་འབྲོག་མང་ཚོགས་རྣམས་ས་གནས་གཞན་ལ་འགྲོ་སྐྱོད་མི་ཆོག་པ་དང་། གལ་སྲིད་ས་གནས་གཞན་ལ་འགྲོ་སྐྱོད་བྱེད་དགོས་ཀྱི་ཡོད་ཚེ། ངེས་པར་དུ་ས་གནས་བདེ་འཇགས་ལས་ཁུངས་སུ་ཐོ་འགོད་བྱས་ཏེ་འགྲོ་དགོས་པའི་བཀའ་བཏང་སོང་། ཞེས་བརྗོད་བྱུང་།
གནས་ཚུལ་མཁོ་སྤྲོད་པས་བརྗོད་པ་ལྟར་ན། བཀའ་ཁྱབ་འདི་དང་འབྲེལ། འདི་ལོའི་ལོ་མགོར་མགོ་ལོག་གི་ཁྱིམ་ཚང་ཞིག་གནམ་ལོ་གསར་བ་དང་བསྟུན། ཟི་ལིང་ནས་ལྷ་སར་འགྲོ་བའི་ལམ་བར་ནས་ཕྱིར་རང་ཁྱིམ་དུ་ལོག་བཏང་ཡོད་པ་དང་། རྒྱ་ནག་གིས་ཡུལ་ཤུལ་(谢武镇) ས་གནས་སུ་ལམ་བར་ཞིབ་བཤེར་ས་ཚུགས་གཅིག་གསར་འཛུགས་ཀྱིས། ཡུལ་ཤུལ་རྫོང་ཁག་དྲུག་དང་ཞང་བདུན། ཡུལ་ཤོག་ ༣༦ གི་ས་གནས་མང་ཚོགས་ཀྱི་འགྲོ་སྐྱོད་ཀྱི་རང་དབང་ལ་དམིགས་བསལ་དམ་དྲག་དང་ཞིབ་བཤེར་བྱེད་རྒྱུ་ཡིན་པ་དང་། དེ་བཞིན། མཚོ་སྔོན་གྱི་རྫོང་ཁག་ ༣༤ དང་ཞང་ ༨༨ ། ཡུལ་ཤོག ༡༠༣ གྱི་མང་ཚོགས་རྣམས་ཁམས་དང་ཡུལ་ཤུལ་སོགས་སུ་འགྲོ་སའི་ལམ་ཆེན་ཁོ་ནར་གྱུར་བའི་རྨ་སྟོད་རྫོང་མཛོ་རྒན་ར་བར་ (花石峡) ཟེར་སའི་ས་གནས་སུ་ཞིབ་བཤེར་ས་ཚུགས་ཤིག་གསར་འཛུགས་བྱས་ཏེ། ཡུལ་ཤུལ་ནས་ཕར་འགྲོ་མཁན་དང་ཟི་ལིང་ནས་ཚུར་ཡོང་མཁན་ཡོངས་ལ་ཞིབ་བཤེར་ནན་མོ་བྱེད་བཞིན་ཡོད་འདུག
གཞན་ཡང་། ཟླ་འདིའི་ཕྱི་ཚེས་ ༡ ཉིན་ནས་རྒྱ་ནག་གིས་བོད་རང་སྐྱོང་ལྗོངས་ཉིང་ཁྲི་ས་ཁུལ་གྱི་མེ་ཏོག་རྫོང་ཁོངས་སུ། མཐའ་མཚམས་ཀྱི་འགྲོ་འོང་ལ་དམིགས་ཏེ། མེ་ཏོག་རྫོང་ཁོངས་ཀྱི་ཟམ་ཆེན་སྟེང་། དམིགས་བསལ་ཞིབ་བཤེར་མགོ་འཛུགས་བྱས་ཏེ། ཟམ་ཁ་ནས་ཕྱིར་སྐྱོད་དང་ནང་འཛུལ་བྱེད་མཁན་རྣམས་ནས་རྒྱ་ནག་གི་མཐའ་མཚམས་དོ་དམ་གྱི་སྒྲིག་གཞི་ཟེར་བར་སྲུང་བརྩི་ཞུས་པའི་ཐོག་དགོས་ངེས་ཡིག་ཆ་རྣམས་མཁོ་སྤྲོད་བྱས་ཏེ་འགག་སྒོ་བརྒལ་དགོས་སྐོར་བསྒྲགས་ཡོད་པ་རེད།
རྒྱ་ནག་གི་མཐའ་མཚམས་དོ་དམ་སྒྲིག་གཞི་སྲུང་སྐྱོབ་དང་འབྲེལ་བའི་འགྲོ་སྐྱོད་ལག་ཁྱེར་གྱི་དགོས་ངེས་ཡིག་ཆ་ཁག་ནི། རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་གྲོང་མིའི་ཐོབ་ཐང་ལག་ཁྱེར་ཡོད་དགོས་པ་དང་། ཁྱིམ་ཐོ་འཁོད་སའི་རྒྱ་ནག་མི་དམངས་སྲིད་གཞུང་ངམ་ཡང་ན་སྤྱི་བདེ་ལས་ཁུངས་ཀྱིས་སྤྲད་པའི་དཔང་ཡིག་དང་། མཐའ་མཚམས་དོ་དམ་ཁུལ་དུ་ཁྱིམ་ཐོ་ཡོད་པའི་མི་སྣ། རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་གྲོང་མིའི་ཡིག་ཆ་སོགས་ཀྱི་སྟེང་དུ། རང་ཉིད་ཀྱི་ཉེ་ཆར་གྱི་འདྲ་པར་འཁོད་ཡོད་པའི་ར་སྤྲོད་ཀྱི་ཡིག་ཆ་སོགས་ཡིན་པ་རེད།
རྒྱ་གར་ལྷོ་ཕྱོགས་ཀྱི་གསར་འགོད་པ་དོན་འགྲུབ་བཀྲ་ཤིས།
