བོད་ཀྱི་འགྲོ་བ་མིའི་ཐོབ་ཐང་གི་གནས་སྟངས་འཛམ་གླིང་ནང་གི་སྡུག་ཤོས་རེད་འདུག

ཁ་སང་ཕྱི ཚེས་ ༣ ཉིན་རང་དབང་ཁང་པས་ཕྱི་ལོ་ ༢༠༢༡ ལོའི་འཛམ་གླིང་གི་རྒྱལ་ཁབ་དང་ས་ཁུལ་ ༢༠༠ ལྷག་ནང་གི་འགྲོ་བ་མིའི་ཐོབ་ཐང་གི་གནས་བབ་ཀྱི་ལོ་འཁོར་སྙན་ཐོ་བཏོན་པའི་ནང་བོད་ནི་འཛམ་གླིང་གི་འགྲོ་བ་མིའི་ཐོབ་ཐང་གི་གནས་སྟངས་སྡུག་ཤོས་དེ་ཡིན་པ་བཀོད་འདུག

རང་དབང་ཁང་པའི་སྙན་ཐོའི་ནང་། བོད་དང་སི་རི་ཡ་གཉིས་ཀྱི་ནང་སྤྱི་ཡོངས་ཀྱི་རང་དབང་གི་གནས་བབ་གྲངས་ཀ་བརྒྱ་ནས་གཅིག་གམ་ཡང་ན་སྡུག་ཤོས་ཡིན་པ་འདྲ་མཉམ་ཡིན་པ་དང་། བོད་ནང་ཆབ་སྲིད་ཀྱི་རང་དབང་གི་གནས་བབ་ནི་བཞི་བཅུ་ནས་གོར་ཐིག་མན་གྱི་གཉིས་དང་། སྤྱི་དམངས་ཀྱི་རང་དབང་གི་གནས་བབ་ནི་དྲུག་བཅུ་ནས་གསུམ་ཙམ་ཡིན་འདུག འོན་ཀྱང་བོད་དང་འབྲེལ་བའི་སྙན་ཐོ་རྒྱས་པ་གང་མགྱོགས་འདོན་འཆར་ཡོད་སྐོར་འགྲེལ་བརྗོད་བྱས་འདུག ཡང་སྙན་ཐོ་དེའི་ནང་བོད་ཁུལ་གྱི་རྒྱ་རིགས་དང་བོད་རིགས་གཉིས་ལ་རྒྱ་ནག་གཞུང་གིས་གཞི་རྩའི་རང་དབང་སྤྲོད་ཀྱི་མེད་ནའང་། དམིགས་སུ་བཀར་ནས་བོད་མིའི་ཆོས་དད་དང་རིག་གཞུང་དང་འབྲེལ་ནས་བོད་རིགས་རྣམས་ལ་རྒྱ་ནག་གཞུང་གིས་དྲག་གནོན་བྱེད་ཀྱི་ཡོད་སྐོར་དང་། རྒྱ་ནག་གཞུང་གིས་ཆེད་དུ་རྒྱ་རིགས་གང་མང་བོད་ཁུལ་དུ་གནས་སྤོ་བྱེད་དུ་བཅུག་སྟེ་བོད་རིགས་རྩ་མེད་བཟོ་བའི་སྲིད་ཇུས་བཏང་ཡོད་སྐོར་བཀོད་འདུག

སྙན་ཐོ་དེ་དང་འབྲེལ་རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་བུ་ཆུང་ཀེ་ཚེ་རིང་ལགས་ཀྱིས། རྒྱལ་སྤྱིའི་རང་དབང་ཁང་པའི་སྙན་ཐོའི་ནང་བོད་ནི་འཛམ་གླིང་གི་རང་དབང་སྡུག་ཤོས་ཀྱི་གནས་བབ་འོག་ཡོད་པའི་གནས་ཚུལ་ཐོན་པ་དེ་ནི་བོད་ནང་གི་བོད་མིའི་གནས་སྟངས་ཅི་ཙམ་ཇེ་སྡུག་ཏུ་ཕྱིན་ཡོད་པ་མཚོན་ཀྱི་ཡོད་པ་དང་། ང་ཚོའི་རེ་བར་འཛམ་གླིང་གི་རང་དབང་སྡུག་ཤོས་ཡིན་པའི་སྙན་ཐོ་འདི་ཡིས་འཛམ་གླིང་ཁྱོན་ཡོངས་ནས་བོད་དོན་ཐད་ཛ་དྲག་གི་གདོང་ལེན་བྱེད་དགོས་པའི་སྐུལ་མ་ཞིག་བྱས་པ་རེད། ཅེས་བརྗོད་འདུག

ཡང་རྒྱལ་སྤྱིའི་བོད་དོན་ལས་འགུལ་ཁང་གིས་བོད་ནང་གི་བོད་མི་རང་དབང་དང་འབྲེལ་ཉེ་བའི་ལོ་ཤས་ནས་བཟུང་རྒྱ་ནག་གཞུང་གིས་བོད་བརྒྱུད་ནང་བསྟན་གྱི་ཡང་སྲིད་ལ་རྒྱ་ནགགཞུང་གི་ཆོག་མཆན་དགོས་པ་ཁྲིནམས་སུ་བཅོས་ཏེ་༧གོང་ས་རྒྱལ་བ་རིན་པོ་ཆེ་མཆོག་གི་སྐུའི་ཡང་སྲིད་ཞིག་རྒྱ་ནག་གཞུང་གི་འདོད་མོས་ལྟར་བསྒྲགས་རྒྱུར་གྲ་སྒྲིག་བྱེད་ཀྱི་ཡོད་པ་དང་། གྲོང་རྡལ་ཀྱི་བོད་མི་ས་ཡ་ཕྱེད་ཀ་ཙམ་ས་གནས་ནས་གནས་སྤོ་རུ་བཅུག་སྟེ་དམག་དོན་རང་བཞིན་གྱི་ངལ་རྩོལ་སྦྱོང་བརྡར་སྤྲོད་ཀྱི་ཡོད་སྐོར། དེ་བཞིན་བོད་རིགས་ས་ཁུལ་ཁག་གི་སློབ་གྲྭ་ཁག་ཏུ་བཙན་གྱིས་རྒྱའི་ཡིག་ཐོག་སློབ་ཁྲིད་བྱེད་ཐབབས་ཀྱི་ཡོད་པ་དང་། ད་ལྟའི་ཤར་ཏུར་ཀི་སི་ཐན་གྱི་དམར་ཤོག་དྲུང་ཆེ་ཁྲིན་ཆན་གོ་ (Chen Quanguo) དང་དེ་སྔོན་བོད་དུ་རྒྱ་ཆེའི་ཉུལ་ཞིབ་དང་དམག་སྡེ་རྒྱ་ཆེན་འཕེལ་རྒྱས་བཏང་བའི་སྲིད་བྱུས་དག་མུ་མཐུད་རྒྱ་བསྐྱེད་དུ་འགྲོ་བཞིན་ཡོད་པ། ད་ལྟ་བོད་ཀྱི་ཆབ་སྲིད་བཙོན་མ་ ༥༠༠ ལྷག་གི་རྒྱ་ནག་གཞུང་གི་བཙོན་འོག་ཏུ་མནར་གཅོད་མྱོང་བཞིན་པ་དང་། པྱི་ལོ་ ༢༠༠༩ ནས་བཟུང་བོད་མི་ ༡༥༥ ཡིས་རྒྱ་ནག་གཞུང་ལ་ངོ་རྒོལ་བྱས་ཏེ་རང་ལུས་མེར་སྲེག་གནང་ཡོད་སྐོར་བཀོད་འདུག

འདས་ལོའི་རང་དབང་ཁང་པའི་སྙན་ཐོའི་ནང་འཛམ་གླིང་གི་རང་དབང་སྡུག་ཤོས་ནི་སི་རི་ཡ་དང་། སྡུག་ཤོས་གཉིས་པ་ནི་བོད་ཆགས་ཡོད་པ་རེད། འདི་ལོའི་སྙན་ཐོའི་ནང་། རང་དབང་སྡུག་ཤོས་གཉིས་པ་ནི་ཨེ་རི་ཊི་ཡ་ (Eritrea) དང་ལྷོ་སུ་དྷན་ (South Sudan) དེ་བཞིན་ཊོར་ཁི་མེ་ནེ་སི་ཐན་ (Turkmenistan) བཅས་དང་། སྡུག་ཤོས་གསུམ་པ་ནི་བྱང་ཀོ་རི་ཡ་ཡིན་འདུག་ལ། རྒྱ་ནག་ནི་སྡུག་ཤོས་དགུ་པ་དེ་ཡིན་འདུག ནོར་ཝེ་དང་སི་ཝེ་ཌན། ཧྥིན་ལན་ཌི་ ( Finland ) བཅས་གསུམ་ལ་རང་དབང་གི་གནས་བབས་བརྒྱ་ནས་བརྒྱ་ཡིན་འདུག་ལ། འཛམ་གླིང་གི་རང་དབང་གི་གནས་བབས་མཐོ་ཤོས་ཀྱི་རྒྱལ་ཁབ་གསུམ་དེ་ཡིན་འདུག

གསར་འགོད་པ། ཀླུ་མགོན་ཐར།