རྒྱ་ནག་གི་དྲག་གནོན་འོག་གནས་པའི་བོད་དང་ཡུ་གུར། ཧོང་ཀོང་དང་ཐའེ་ཝན། རྒྱ་རིགས་ལས་འགུལ་བ་སོགས་ཀྱིས་ཁུང་ཙི་ལྟེ་གནས་ཁང་སྒོ་བརྒྱབ་དགོས་པའི་ངོ་རྒོལ་རིམ་པ་སྤེལ་བ་བརྒྱུད། ད་རེས་ཨ་རིའི་ཊའོ་ཧྤི་ཊི་གཙུག་ལག་སློབ་གྲྭ་ཆེན་མོས་ཁུང་ཙི་ལྟེ་གནས་ཁང་ཟེར་བ་སྒོ་བརྒྱག་གཏན་འཁེལ་ཡོད་འདུག
ཨ་རིའི་གསར་འགྱུར་བརྒྱུད་ལམ་ཁག་ཏུ་གནས་ཚུལ་ཐོན་པ་ལྟར་ན། ཉེ་བའི་ལོ་ཤས་རིང་བོད་རང་བཙན་སློབ་ཕྲུག་ཚོགས་པའི་གཙོས་བོད་མི་དང་ཧོང་ཀོང་། ཡུ་གུར་དང་ཐའེ་ཝན་བཅས་དང་། ས་གནས་གྲོང་ཁྱེར་དང་མངའ་སྡེའི་མགོ་ཁྲིད་སོགས་ནས་ལས་འགུལ་བསྟུད་མར་སྤེལ་བ་བརྒྱུད། ཁ་སང་ཨ་རིའི་མངའ་སྡེ་བྷོ་སི་ཊོན་གྱི་གྲོང་ཁྱེར་མའེ་ཌི་ཧྥོར་ཌི་ (Medford) ནང་རྟེན་གཞི་བྱས་པའི་ཊའོ་ཧྥི་ཊི་ (Tufts) གཙུག་ལག་སློབ་གྲྭ་ཆེན་མོས། སློབ་གླིང་དེའི་ནང་རྒྱ་སྐད་རྒྱ་ཡིག་སློབ་འཁྲིད་ཀྱིས་རྒྱ་ནག་དམར་ཤོག་ལྟ་གྲུབ་རྒྱ་སྐྱེད་གཏོང་ཐབས་ཀྱི་ཁུང་ཙི་ལྟེ་གནས་ཁང་འདི་ལོའི་ཕྱི་ཟླ་ ༩ ནང་ནས་བཟུང་སྒོ་བརྒྱབ་རྒྱུ་ཡིན་པ་ཡོངས་བསྒྲགས་གནང་ཡོད་འདུག
དེ་འབྲེལ་ཐད། ཊའོ་ཧྥི་ཊི་གཙུག་ལག་སློབ་གྲྭ་ཆེན་མོའི་རྒྱལ་སྤྱིའི་འཛིན་སྐྱོང་འགན་འཛིན་ (Diana Chigas) ལགས་ཀྱིས་ཁྱབ་ཁོངས་ཡན་ལག་སློབ་གྲྭ་ཁག་ལ་འཕྲིན་ཡིག་ཅིག་བཏང་སྟེ། འདི་ལོའི་ཕྱི་ཟླ་ ༩ ནང་ཁུང་ཙི་ལྟེ་གནས་ཁང་དང་སློབ་གླིང་གཉིས་བར་བཞག་པའི་རྒྱ་སྐད་རྒྱ་ཡིག་སློབ་འཁྲིད་ཀྱི་གྲོས་མཐུན་ཡིག་ཆ་ནུས་མེད་དུ་གཏང་རྒྱུ་ཡིན་སྐོར་བརྗོད་ཡོད་པ་དང་། ཁུང་ཙི་ལྟེ་གནས་ཁང་དེ་ཕྱི་ལོ་ ༢༠༡༥ ལོར་ཐོག་མར་ཊའོ་ཧྥི་ཊི་གཙུག་ལག་སློབ་གཉེར་ཁང་གི་སློབ་གསོའི་ལམ་ལུགས་ནང་ཞུགས་ཤིང་། ཕྱི་ལོ་ ༢༠༡༩ ལོར་ཕྱོགས་གཉིས་དབར་གྱི་གྲོས་ཡིག་བསྐྱར་མཐུད་ཞུས་ཡོད་འདུག
ཁུང་ཙི་ལྟེ་གནས་ཁང་སྒོ་བརྒྱག་རྒྱུའི་གནས་ཚུལ་དང་འབྲེལ། ས་གནས་བོད་རང་བཙན་སློབ་ཕྲུག་ཚོགས་པས་གསར་འགོད་གསལ་བསྒྲགས་ཤིག་སྤེལ་ཏེ། གནས་ཚུལ་འདི་ནི་བོད་མི་དང་ཡུ་གུར་བ། ཧོང་ཀོང་དང་ཐའེ་ཝན། རྒྱ་རིགས་ལས་འགུལ་བ་དང་། བྷོ་སི་ཊོན་གྲོང་ཁྱེར་ (Somerville) དང་མའེ་ཌི་ཧྥོར་ཌིའི་ཉེ་འཁྲིས་ཀྱི་ང་ཚོའི་མཐུན་གྲོགས་ཚོར་རྒྱལ་ཁ་ཞིག་ཆགས་ཀྱི་ཡོད་པ་དང་། ང་ཚོའི་ལས་འགུལ་འདིས་ཊའོ་ཧྥི་ཊིའི་འཛིན་སྐྱོང་དང་སློབ་གྲྭ་གཉིས་ནས་མི་རིགས་རྩ་གཏོར་གཏོང་མཁན་གྱི་གཞུང་ཞིག་དང་ལྷན་དུ་མཉམ་འབྲེལ་བྱས་ཚེ། ཊའོ་ཧྥི་ཊོའི་སློབ་མ་དང་ཉེ་འཁོར་སྤྱི་ཚོགས་ཀྱི་རིན་ཐང་དང་འགལ་གྱི་ཡོད་པ་གསལ་འདོན་བྱས་ཡོད། ཅེས་བརྗོད་ཡོད་པ་དང་། བོད་དང་ཡུ་གུར། ཐའེ་ཝན་སོགས་ཀྱི་ལས་འགུལ་བ་མང་པོས་སློབ་གླིང་དེས་ཁུང་ཙི་ལྟེ་གནས་ཁང་སྒོ་རྒྱག་སླད་བདུན་རེའི་རེས་གཟའ་ཉི་མ་རྒྱུན་པར་ངོ་རྒོལ་ལས་འགུལ་སྤེལ་གྱི་ཡོད་པ་ལྟར། ད་བར་ཁོ་ཚོས་ཁྱོན་ངོ་རྒོལ་ལས་འགུལ་ཐེངས་ ༡༣ རིང་སྤེལ་ཡོད་པ་རེད་ལ། འབྱུང་འགྱུར་ཕྱི་ཟླ་ ༤ ཚེས་ ༢ ཉིན་ངོ་རྒོལ་ལས་འགུལ་མཐའ་མ་དེ་སྤེལ་གཏན་འཁེལ་ཡོད་པ་རེད།
ཨ་རིའི་ནང་ཁུང་ཙི་ལྟེ་གནས་ཁང་སྒོ་རྒྱག་དགོས་པའི་འདུན་པར་ཨ་རིའི་ཆབ་སྲིད་ཀྱི་མགོ་འཁྲིད་རྣམས་གཙོས་པའི་ལས་འགུལ་བ་དང་མང་ཚོགས་སོགས་མི་མང་པོས་རྒྱབ་སྐྱོར་གནང་གི་ཡོད་པ་ལྟར། ཨ་རིའི་གྲོས་ཚོགས་འཐུས་མི་སི་ཐི་མཱོལ་ཊོན་ (Seth Moulton) ལགས་ཀྱིས། ཊའོ་ཧྥི་ཊོན་གཙུག་ལག་སློབ་གྲྭ་ཆེན་མོས་ཁུང་ཙི་ལྟེ་གནས་ཁང་སྒོ་བརྒྱབ་རྒྱུའི་ཐག་གཅོད་བླངས་པ་ནི་ཧ་ཅང་འགྲིག་པ་ཞིག་ཡིན་ལ། དེ་ནི་རྒྱ་ནག་དམར་ཤོག་ཚོགས་པས་ང་ཚོའི་རྒྱལ་ཁབ་དང་མཐོ་སློབ་ཁག་ལ་ཉེན་ཁ་བསྐྲུན་གྱི་ཡོད་པ་ཚོར་ཡོད་པའི་རྟགས་མཚན་ཞིག་ཀྱང་རེད། ཅེས་བརྗོད་ཡོད་པ་དང་། ཕྱི་ལོ་ ༢༠༡༩ ལོར་ཨ་རི་རྒྱལ་ཡོངས་སུ་ཁུང་ཙི་ལྟེ་གནས་ཁང་ ༡༠ ཙམ་སྒོ་བརྒྱབས་ཡོད་པ་རེད།
ཡང་ཕྱི་ལོ་ ༢༠༡༩ ལོར་ཨ་རིའི་གྲོས་ཚོགས་ཀྱི་ཞིག་འཇུག་སྙན་ཐོ་ཞིག་གི་ནང་། རྒྱ་ནག་དམར་ཤོག་ཚོགས་པས་འདས་པའི་ལོ་ ༡༣ ལྷག་རིང་ཨ་སྒོར་ས་ཡ་ ༡༥༨ འགྲོ་གྲོན་བཏང་སྟེ། ཨ་རིའི་རྒྱལ་ཡོངས་ཀྱི་གཙུག་ལག་སློབ་གཉེར་ཁང་ ༡༠༠ ལྷག་གི་ནང་ཁུང་ཙི་ལྟེ་གནས་ཁང་བཙུགས་པ་བརྒྱུད་རྒྱ་སྐད་རྒྱ་ཡིག་སློབ་འཁྲིད་ཀྱི་ཐོག་ནས་དམར་ཤོག་ཚོགས་པའི་ལྟ་གྲུབ་དང་རྒྱ་ནག་གི་འཇམ་པོའི་སྟོབས་ཤུགས་རྒྱ་སྐྱེད་གཏོང་གི་ཡོད་པ་མ་ཟད། ཨ་རིའི་སྔོན་འགྲོའི་སློབ་གྲྭ་ནས་འཛིན་རིམ་བཅུ་གཉིས་པའི་ནང་རྒྱ་ཡིག་དང་རྒྱའི་རིག་གཞུང་ལ་སློབ་སྦྱོང་བྱེད་དགོས་པའི་དྲིལ་བསྒྲགས་སྤེལ་གྱི་ཡོད་སྐོར་སོགས་བརྗོད་ཡོད་པ་རེད།
ཁུང་ཙི་ལྟེ་གནས་ཁང་ནི་རྒྱ་ནག་གིས་ཕྱིའི་རྒྱལ་ཁབ་ཁག་ཏུ་དམར་ཤོག་ཚོགས་པའི་ལྟ་གྲུབ་ཁྱབ་སྤེལ་དང་་རྒྱ་ནག་དམར་ཤོག་ཚོགས་པའི་ཆབ་སྲིད་རྒྱ་བསྐྱེད་ཀྱི་ལག་ཆ་ཞིག་ཏུ་གྱུར་ཡོད་པ་ལྟར། རྒྱ་ནག་གཞུང་ཕྱོགས་ཀྱི་གྲངས་ཐོ་ལྟར་ན། འདས་པའི་ལོ་ཤས་ནང་ཕྱིའི་རྒྱལ་ཁབ་ ༡༦༢ ཀྱི་མཐོ་སློབ་ཁག་ནང་ཁུང་ཙི་ལྟེ་གནས་ཁང་ ༥༥༠ ལྷག་མཉམ་འབྲེལ་འཛུགས་སྐྲུན་དང་ཁུང་ཙི་སློབ་ཆུང་ཟེར་བ་ ༡༡༧༡ བཙུགས་ཡོད་པ་དང་། ད་ལྟའི་བར་སློབ་གྲྭ་དེ་དག་ནང་སློབ་གཉེར་བ་ཁྲི་ ༩༡༦ དང་། མི་གྲངས་ཁྲི་ ༡ ལྷག་གིས་ཁུང་ཙི་རིག་གནས་ལ་དང་ལེན་བྱས་ཡོད་སྐོར་སོགས་བརྗོད་ཡོད་པ་རེད།
གསར་འགོད་པ། སྐལ་བཟང་སྦྱིན་པ།
