ཤེས་རིག་དྲུང་ཆེ་ཀརྨ་སེང་གེ་ལགས་ཨོ་གླིང་དོན་གཅོད་དུ་བསྐོ་བཞག་གནང་འདུག

བོད་མིའི་སྒྲིག་འཛུགས་ཤེས་རིག་དྲུང་ཆེ་ཀརྨ་སེང་གེ་ལགས་ཨོ་གླིང་དོན་གཅོད་དུ་བསྐོ་བཞག་བྱུང་ཡོད་པ་ལྟར་དོན་གཅོད་གསར་རྙིང་བར་རྩིས་སྤྲོད་རྩིས་ལེན་གནང་བཞིན་པ་རེད་འདུག

འདས་ལོར་བོད་མིའི་སྒྲིག་འཛུགས་ཀྱི་ཤེས་རིག་དྲུང་ཆེ་ཀརྨ་སེང་གེ་ལགས་ཨོ་གླིང་སྐུ་ཚབ་དོན་གཅོད་དུ་བསྐོ་བཞག་བྱུང་ཡོད་པ་ལྟར། ཟླ་འདིའི་ཕྱི་ཚེས་ ༦ ཉིན་ནས་ཨོ་གླིང་དོན་གཅོད་ཀརྨ་སེང་གེ་ལགས་དང་ལས་ཐོག་དོན་གཅོད་མཚོ་སྒོ་ལྷག་པ་གཉིས་བར་རྩིས་སྤྲོད་རྩིས་ལེན་གྱི་ལས་རིམ་མགོ་འཛུགས་བྱས་ཏེ། སང་ཉིན་ཕྱི་ཚེས་ ༡༤ ཉིན་དོན་གཅོད་གསར་རྙིང་བར་རྩིས་སྤྲོད་རྩིས་ལེན་གྱི་ཉིན་མཐའ་མ་ཆགས་ཀྱི་ཡོད་པ་དང་། ཀརྨ་སེང་གེ་ལགས་ཟླ་འདིའི་ཕྱི་ཚེས་ ༤ ཉིན་དངོས་སུ་ཨོ་གླིང་དུ་འབྱོར་ཡོད་པ་རེད།

དེ་ཡང་བོད་མིའི་སྒྲིག་འཛུགས་ཤེས་རིག་དྲ་རྒྱ་ལྟར་ན། ཀརྨ་སེང་གེ་ལགས་འདས་ལོའི་ཕྱི་ཟླ་ ༡ པོའི་ནང་ཨོ་གླིང་སྐུ་ཚབ་དོན་གཅོད་དུ་བསྐོ་བཞག་གིས། ཕྱི་ཟླ་ ༦ ཚེས་ ༡ ཉིན་ནས་དོན་གཅོད་ཀྱི་ལས་འཁུར་ཞུ་དགོས་ཀྱང་། ད་ལྟའི་བར་རྒྱ་ནག་གི་གྲོང་ཁྱེར་ཝུ་ཧན་ནས་མཆེད་པའི་ཏོག་དབྱིབས་གཉན་རིམས་ཀྱི་རྐྱེན་པས་ལས་བཅར་ཞུ་མ་ཐུབ་པར་ལྷག་ཡོད་འདུག

ཤེས་རིག་ལས་ཁུངས་ཀྱི་དྲུང་ཆེའི་ལས་ཚབ་ཀརྨ་སེང་གེ་ལགས་ནི་ཕྱི་ལོ་ ༡༩༧༠ ཟླ་ ༡ ཚེས་ ༢༥ ཉིན་རྒྱ་གར་བྱང་ཕྱོགས་ལ་དྭགས་སུ་སྐྱེས་ཤིང་། ཕྱི་ལོ་ ༡༩༨༩ ལོར་རྡ་སྟེང་བོད་ཁྱིམ་ནས་འཛིན་རིམ་བཅུ་གཉིས་དང་ཕྱི་ལོ་ ༡༩༩༣ ལོར་ཅན་དྷི་སྒར་མཐོ་སློབ་ནས་རིག་གནས་གཙུག་ལག་རམས་བྱམས་པ་ཐོན། ཕྱི་ལོ་ ༡༩༩༥ ལོ་ནས་དྲུང་གཞོན་ལས་རོགས་ཀྱི་གནས་རིམ་ཐོག་ལས་ཞུགས་གནང་སྟེ། ལ་དྭགས་མཉམ་འབྲེལ་གྱི་རྩིས་པ་དང་ལ་བྱང་མཉམ་དྲུང་དུ་བསྐོ་བཞག་གནང་། ཕྱི་ལོ་ ༡༩༩༨ ནས་༡༩༩༩ བར་སྤོན་ཊ་ཆོལ་གསུམ་གྱི་ས་གནས་མགོ་འཛིན་གནང་། ཕྱི་ལོ་ ༡༩༩༩ ལོར་ལ་དྭགས་གཞིས་སྤྱིའི་ལས་འགན་དུ་བསྐོས། ཕྱི་ལོ་ ༢༠༠༩ ནས་ ༢༠༡༢ བར་ཀོ་ལི་གྷལ་དོན་ལྡན་གླིང་གི་ས་གནས་མགོ་འཛིན་དང་ལྷོ་སྤྱིར་བསྐོས། ཕྱི་ལོ་ ༢༠༡༥ ནས་ཤེས་རིག་ནང་གནས་སྤོས་བགྱིས་ཏེ། ཕྱི་ལོ་ ༢༠༡༦ ཟླ་ ༨ ཚེས་ ༡ ནས་ཤེས་རིག་དྲུང་ཚབ་ཏུ་བསྐོ་བཞག་དང་། ཕྱི་ལོ་ ༢༠༡༧ ཟླ་ ༥ ཚེས་ ༨ ཉིན་ཤེས་རིག་དྲུང་ཆེར་བསྐོ་བཞག་བྱུང་ཡོད་པ་རེད།

གསར་འགོད་པ། སྐལ་བཟང་སྦྱིན་པ།