ཚེ་བརྟན་གཡུ་སྒྲོན་ལགས་ཀྱིས་རྒྱ་ནག་རྒྱལ་ཡོངས་ཀྱི་རི་ཁུལ་རྒྱང་རྒྱུག་ཁྲོད་ཨང་དང་པོ་བླངས།

རྒྱ་ནག་རྒྱལ་ཡོངས་ཀྱི་སྤྱི་ལེ་ཉེར་གཅིག་རིང་གི་རི་ཁུལ་རྒྱང་རྒྱུག་ཁྲོད་བོད་རིགས་བུ་མོ་གསུམ་ནས་ཨང་པོ་དང་ལྔ་བ། བདུན་པ་བཅས་ཀྱི་རྒྱལ་ཁ་བླངས་ཡོད་པ་རེད།

ཟླ་འདིའི་ཕྱི་ཚེས་ ༡༨ ཉིན་རྒྱ་ནག་གི་ཅི་ལིན་(Jinlin) རྫོང་ཁོངས་ཀྱི་ཧྲན་རི་བོའི་ས་ཚིགས་དང་སྐབས་གཉིས་པའི་ཁྲང་པའེ་ཧྲན་རི་བོའི་ནགས་ཚལ་གངས་ཁྲོད་དུ། ཕྱི་ལོ་ ༢༠༢༡ ལོའི་རྒྱ་ནག་གི་རི་ཁུལ་རྒྱང་རྒྱུག་འགྲན་བསྡུར་བསྡུས་ཏེ། བུད་མེད་ཀྱི་རྒྱང་རྒྱུག་ཁྲོད་བོད་ཀྱི་བུ་མོ་ཚེ་བརྟན་གཡུ་སྒྲོན་ལགས་ཀྱིས་དུས་ཡུན་ཆུ་ཚོད་ ༡ སྐར་མ་ ༣༩ དང་སྐར་ཆ་ ༣༤ ནང་སྤྱི་ལེ་ ༢༡ རིང་གི་རྒྱང་རྒྱུག་ལས་ཨང་དང་པོ་བླངས་ཡོད་འདུག

རྒྱ་ནག་མི་དམངས་དྲ་བའི་གནས་ཚུལ་ལྟར་ན། ཕྱི་ལོ་ ༢༠༢༡ ལོའི་རྒྱ་ནག་གི་རི་ཁུལ་གྱི་རྒྱང་རྒྱུག་འགྲན་བསྡུར་ཁྲོད་བོད་རང་སྐྱོང་ལྗོངས་ཟེར་བའི་ཁོངས་ནས་བོད་མི་ ༥ ཡིས་མཉམ་ཞུགས་བྱས་ཡོད་པ་དང་། དེ་དག་ལས་བོད་ཀྱི་བུ་མོ་ཨ་ཉི་ལགས་ཨང་ལྔ་པ་དང་གནམ་གང་བུ་ཁྲིད་ལགས་ཀྱིས་ཨང་བདུན་པ་བླངས་ཡོད་འདུག་ལ། ད་ལོའི་རྒྱ་ནག་གི་རི་ཁུལ་རྒྱང་རྒྱུག་འགྲན་བསྡུར་དེར་སྤྱི་ལེ་ ༤༢ དང་སྤྱི་ལེ་ ༢༡ གི་མི་སྒེར་གྱི་འགྲན་བསྡུར་དང་། མང་ཚོགས་ཀྱི་ལུས་སྦྱོང་འགྲན་བསྡུར་སོགས་རྣམ་གྲངས་གསུམ་དང་སྡེ་ཚན་དྲུག་ཡོད་པ་རེད།

གཞན་ཡང་། ཟླ་སྔོན་མའི་ཕྱི་ཚེས་  ༢༠  ཉིན་ཕྱི་ལོ་ ༢༠༢༡ ལོའི་རྒྱལ་ཡོངས་འདུར་རྒྱུག་འགྲན་བསྡུར་དང་ཨོ་རྩལ་འགྲན་ཚོགས་ཀྱི་འདེམས་སྒྲུག་འགྲན་བསྡུར་ལས་སྐྱེས་མའི་སྤྱི་ལེ་  ༢༠ ཅན་གྱི་འདུར་རྒྱུག་འགྲན་བསྡུར་ཁྲོད། བོད་ཀྱི་ལུས་རྩལ་བ་ཆོས་དབྱིངས་སྐྱིད་ལགས་ཀྱིས་ཆུ་ཚོད་ ༡ སྐར་མ་ ༢༤ དང་སྐར་ཆ་ ༤༥ ཡི་མགྱོགས་ཚད་ཐོག་ནས་འགྲན་སྡུར་ཁྲོད་ཨང་གསུམ་པ་བླངས་ཡོད་ཅིང་། མགྱོགས་ཚད་དེ་ཁོང་མོའི་དེ་སྔའི་ཟིན་ཐོ་ལས་བརྒལ་ཡོད་སྟབས། ལོ་རྗེས་མའི་ཉི་ཧོང་གི་ཨོ་རྩལ་འགྲན་ཚོགས་སུ་ཞུགས་པའི་ཐོབ་ཐང་རག་ཡོད་འདུག

གསར་འགོད་པ། སྐལ་བཟང་སྦྱིན་པ།