བོད་རང་སྐྱོང་ལྗོངས་ཟེར་བའི་གཞིས་ཀ་རྩེ་དང་རྫོང་ཁག་ལྔ་ཡི་འབྲོག་ས་རྣམས་རིམ་གྱིས་དམག་སར་བསྒྱུར་བཞིན་འདུག
དེ་རིང་ཕྱི་ཚེས་ ༢༩ཉིན་གྱི་ཞོགས་པར་བོད་ནང་ནས་འདི་གར་གནས་ཚུལ་མཁོ་སྤྲོད་གནང་བ་ལྟར་ན། བོད་རང་སྐྱོང་ལྗོངས་གཞིས་ཀ་རྩེ་དང་། གམ་པ་རྫོང་། དིང་རི་རྫོང་། ངམ་རིང་རྫོང་། རུ་ཐོག་རྫོང་། གཉའ་ལམ་རྫོང་བཅས་ཀྱི་ནང་ཕྱི་ལོ་༢༠༡༡་ནས་བཟུང་རྒྱ་ནག་གཞུང་གི་བཀོད་ཁྱབ་འོག འབྲོག་པ་རྣམས་རྫོང་ཁག་སོ་སོའི་ནང་གྲོང་རྡལ་ཅན་དུ་བསྒྱུར་ཏེ། ལོ་བཅུ་ཙམ་རིང་འབྲོག་པ་དུད་ཁྱིམ་དེ་ཚོར་རྩྭ་རིན་ཆུ་རིན་སྤྲད་ཡོད་པ་དང་། འབྲོག་པའི་ས་སྟོང་དེ་དག་རྒྱལ་ཁབ་བདེ་འཇགས་ཨུ་ཡོན་ལྷ་ཁང་ཟེར་བར་སྤྲད་དེ། དམིགས་བསལ་དམག་གི་ས་གནས་ཤིག་ཏུ་སྒྱུར་བཞིན་ཡོད་འདུག
ཡང་གནས་ཚུལ་མཁོ་སྤྲོད་པས་དེ་རིང་ཞོགས་པར་དིང་རི་ར་བོད་མི་ཚོ་ཚོགས་ཆེན་ཞིག་ཚོགས་ཏེ། འབྲོག་པ་དེ་ཚོར་མུ་མཐུད་དུ་རྩྭ་རིན་དང་ཆུ་རིན་དེ་སྔར་བཞིན་རག་གི་ཡོད་ཀྱང་། གལ་སྲིད་སྤྱི་ཚོགས་ནང་དཀྲོག་གཏམ་བརྒྱུད་སྐུར་བྱས་པ་སོགས་བྱུང་ན། གཞུང་གི་རོགས་སྐྱོར་ཚང་མ་མེད་པ་བཟོ་རྒྱུ་དང་ཁྲིམས་ཆད་ནན་མོ་གཅད་རྒྱུ་ཡིན་སྐོར་བརྗོད་དེ་འཇིགས་སྐུལ་བྱེད་བཞིན་ཡོད་འདུག
གཞན་ཡང་། འདི་གར་སྟོད་དིང་རི་ནས་ཡིན་པའི་བོད་མི་ཞིག་གིས། ཉེ་སྔོན་ཁོང་ཚོའི་ས་ཆ་དེར་མི་མང་ལ་ཚོགས་འདུ་བསྡུས་ཏེ། སོ་སོའི་སྤུན་མཆེད་ཕྱི་རྒྱལ་གང་དུ་ཡོད་ནའང་ངེས་པར་དུ་སྐད་བཏང་ན་ཡག་པོ་ཡོད་པ་དང་། གལ་སྲིད་ཕྱིར་མ་ལོག་ན་ཁྱིམ་ཐོའི་ནང་ནས་ཕྱིར་འབུད་གཏང་སྟེ། ཐོབ་སྐལ་ཞིང་ཁའི་ནང་དུ་ས་གནས་ཉེན་རྟོག་ཁང་གིས་འབྲས་འདེབས་རྒྱུ་ཡིན་སྐོར་བརྗོད་ཡོད་པ་དང་། ལས་གཞི་དེ་འདི་ལོའི་ཕྱི་ཟླ་༢པ་ནས་བཟུང་། ས་གནས་ཉེན་རྟོག་པ་དང་འབྲོག་མི་རྒན་པ་ཚོ་དངོས་སུ་ས་གནས་ས་ཐོག་ཏུ་ཡོང་ནས་ཞིབ་འཇུག་བྱེད་དུ་བཅུག་ཡོད་འདུག
རྒྱ་གར་ལྷོ་ཕྱོགས་ཀྱི་གསར་འགོད་པ་དོན་འགྲུབ་བཀྲ་ཤིས།
