རྒྱ་གར་ནང་ཏོག་དབྱིབས་གཉན་རིམས་རྐྱེན་གྱིས་འགྲོ་འོང་བཀག་སྡོམ་གནང་བཞིན་པར་བརྟེན་དེ་རིང་ནས་སྦག་སྦག་སྐོར་སྐྱོད་གནས་སྐབས་མཚམས་བཞག་འདུག
རྒྱ་གར་རྒྱལ་ཡོངས་སུ་ཏོག་དབྱིབས་གཉན་རིམས་ཀྱི་གནས་སྟངས་ཛ་དྲག་ཏུ་འགྱུར་བཞིན་ཡོད་པ་སོགས་ལ་བརྟེན། རྒྱ་གར་རྒྱལ་ཡོངས་སུ་བོད་དོན་སྦག་སྦག་སྐོར་སྐྱོད་བྱེད་མཁན་ཚེ་རིང་ཡེ་ཤེས་ལགས་ཀྱིས་སྒེར་གྱི་ངོ་དེབ་བརྒྱུད། དེ་རིང་ཕྱི་ཚེས་ ༡༢ ཉིན་ནས་རྒྱ་གར་གྱི་བྱང་ཤར་ཁུལ་གྱི་བསྟན་འཛིན་སྒང་བོད་མིའི་གཞིས་ཆགས་ནང་གནས་སྐབས་རིང་ལས་འགུལ་མཚམས་འཇོག་བྱས་ཡོད་པ་དང་། རྒྱ་གར་ནང་ནད་ཡམས་གནས་སྟངས་ཇེ་ཡག་ཏུ་ཕྱིན་ན་མུ་མཐུད་སྦག་སྦག་སྐོར་སྐྱོད་གནང་རྒྱུ་ཡིན་སྐོར་བསྒྲགས་འདུག
འདི་གའི་གསར་འགོད་པར་སྦག་སྦག་སྐོར་སྐྱོད་ཀྱི་ལས་འགུལ་གནས་སྐབས་རིང་མཚམས་འཇོག་དགོས་དོན་ཀྱི་སྐོར་ལ་ཁོང་གིས། དང་པོ་ནི་ནད་ཡམས་དང་འབྲེལ་ནས་མངའ་སྡེ་ཁག་གིས་བཀག་སྡོམ་བྱེད་མགོ་རྩོམ་བཞིན་ཡོད་པ་དང་། གཉིས་ནས་ང་ཚོ་བོད་མིའི་གཞིས་ཆགས་མང་པོ་ཞིག་གི་ས་གནས་ཀྱི་གནས་སྟངས་ལ་གཞིགས་ནས་བཀག་སྡོམ་མགོ་འཛུགས་བྱས་འདུག་ལ། ལྷག་པར་དུ་ཉེ་ཆར་བཀའ་ཤག་གི་ངོས་ནས་གཞིས་ཆགས་ཁག་གི་ནང་བཀག་སྡོམ་བྱ་དགོས་པའི་བཀའ་ཕེབས་འདུག དེ་བཞིན་གཞིས་ཆགས་ཁག་གི་ནང་ཏོག་དབྱིབས་གཉན་རིམས་ཀྱི་ནད་པ་མང་པོ་ཞིག་འཐོན་བཞིན་པའི་གནས་སྟངས་འདུག གཞིས་ཆགས་ཁག་ལ་དཀའ་ངལ་དེ་འདྲ་ཞིག་འཕྲད་ཡོད་སྟབས། ངས་ཨུ་ཚུགས་ལྟ་བུ་ཞིག་བྱས་ནས་ལས་འགུལ་སྤེལ་ནས་བསྡད་ན་དཀའ་ལས་སྤྲོད་པ་ལས་གང་ཡང་མཐོང་གི་མི་འདུག དེ་བས་སྦག་སྦག་སྐོར་སྐྱོད་ཀྱི་ལས་འགུལ་དེ་འཁྱུག་ཙམ་རིང་མཚམས་འཇོག་དགོས་བྱུང་སོང་། ཞེས་བརྗོད་བྱུང་།
ཡང་སྦག་སྦག་སྐོར་སྐྱོད་ཀྱི་ལས་འགུལ་དེ་ག་དུས་བསྐྱར་དུ་མགོ་འཛུགས་བྱ་རྒྱུ་ཡིན་མིན་ཐད་ཁོང་གིས། མཚམས་འཇོག་གི་དུས་ཡུན་དེ་ནི་ཕལ་ཆེར་ཕྱི་ཟླ་ ༦ དང་ ༧ གཉིས་ཡིན་པ་དང་། ཕྱི་ཟླ་ ༨ ནང་ལས་འགུལ་མུ་མཐུད་མགོ་འཛུགས་བྱ་འཆར་ཡོད་སྐོར་དང་། ད་ལྟ་རྒྱ་གར་རྒྱལ་ཡོངས་སུ་འགོག་ཁབ་རྒྱག་པའི་ཐད་རྒྱ་གར་རྒྱལ་ཡོངས་སུ་འབད་བརྩོན་ཆེན་པོ་བྱེད་ཀྱི་ཡོད་པ་དང་། སྒེར་ངོས་ནས་ཟླ་གཉིས་ཀྱི་ནང་འགོག་ཁབ་གང་འཚམ་ཞིག་བརྒྱབས་ཚར་འགྲོ་བའི་ཚོད་དཔག་བྱེད་ཀྱི་ཡོད་པ་དང་། ད་ལྟ་བཀག་སྡོམ་བྱེད་ཀྱི་ཡོད་སྟབས་ཏོག་དབྱིབས་གཉན་རིམས་ཀྱི་འགོས་ཚད་ཉུང་དུ་ཕྱིན་ན། མངའ་སྡེ་ཁག་གི་ནང་བཀག་སྡོམ་རིམ་པས་མེད་པ་བཟོ་བའི་རེ་བ་བྱེད་ཀྱི་ཡོད་པས། གནས་སྟངས་དེ་འདྲ་ཞིག་ཆགས་པ་ཡིན་ན་ཕྱི་ཟླ་ ༨ ནས་ད་ལྟ་ལས་འགུལ་མཚམས་འཇོག་བྱེད་ས་ནས་མུ་མཐུད་མགོ་འཛུགས་བྱས་ཏེ་མཇུག་སྐྱོང་བྱ་རྒྱུ་ཡིན་སྐོར་བརྗོད་བྱུང་།
འདི་ལོའི་ཕྱི་ཟླ་ ༣ ཚེས་ ༢༡ ཉིན་བཞུགས་སྒར་དྷ་སའི་མེག་གྷན་ཁྲོམ་གཞུང་དུ། བོད་མི་ཚེ་རིང་ཡེ་ཤེས་ལགས་དང་འཆི་མེད་རྟ་མགྲིན་ལགས་རྣམ་གཉིས་ཀྱིས། རྒྱ་གར་གཞུང་གིས་༧གོང་ས་རྒྱལ་བ་རིན་པོ་ཆེ་མཆོག་ལ་རྒྱ་གར་གྱི་སྤྱི་དམངས་ཀྱི་ཆེས་མཐོའི་གཟེངས་རྟགས་བྷ་ར་ཊི་ར་ཊི་ནཱ་འབུལ་ལམ་ཞུ་བའི་སྦག་སྦག་སྐོར་སྐྱོད་བརྒྱུད་བོད་མིའི་ཚོགས་པ་ཁག་ནས་མཚན་རྟགས་བསྡུ་རུབ་ཀྱི་ལས་འགུལ་མགོ་འཛུགས་བྱས་ཡོད་ནའང་། ལས་འགུལ་བ་གཉིས་ཅན་དྷི་གྷར་དུ་འབྱོར་སྐབས་སྐུ་སྒེར་ཡིག་ཚང་གི་དྲུང་ཆེ་འཆི་མེད་རིག་འཛིན་མཆོག་ནས་ཞལ་པར་འབྱོར་ཏེ། ༧གོང་ས་རྒྱལ་བ་རིན་པོ་ཆེ་མཆོག་རྒྱ་གར་ནང་སྐུ་མགྲོན་གྱི་ཚུལ་དུ་བཞུགས་ཡོད་སྟབས། རྒྱ་གར་གཞུང་དང་དཔོན་རིགས་ལ་སུན་པོ་མ་བཟོས་ན་ཡག་པོ་ཡོད་པ་དང་། བོད་མིས་བོད་མིར་རྒྱ་གར་གྱི་གཟེངས་རྟགས་དེ་འབུལ་དགོས་འདུག་ཅེས་རྒྱ་གར་གཞུང་ལ་ཞུས་པ་ཡིན་ན་མཛེས་པོ་ཞེ་དྲགས་མེད་ལ། རྒྱ་གར་གྱི་གཟེངས་རྟགས་དེ་རྒྱ་གར་གཞུང་དང་མི་མང་གི་འདོད་པ་དང་ཁོང་ཚོས་དང་དུ་བླངས་ནས་ཕུལ་བ་ཡིན་ན་ཡག་པོ་ཡོད་སྐོར་སོགས་གསུངས་ཡོད་སྟབས། མཚན་རྟགས་བསྡུ་རུབ་ཀྱི་ལས་འགུལ་དེ་མཚམས་འཇོག་བྱས་ཡོད་ནའང་། ཁོང་གཉིས་ཀྱིས་མུ་མཐུད་རྒྱ་གར་རྒྱལ་ཡོངས་སུ་སྦག་སྦག་སྐོར་སྐྱོད་ཀྱི་ལས་འགུལ་དེ་མཚམས་མ་བཞག་པར། ལས་འགུལ་གྱི་མིང་ལ་ (Ride for Pride) ཞེས་བཏགས་ཏེ། བོད་མི་རྣམས་བཙན་བྱོལ་དུ་གྱར་ནས་ལོ་ངོ་ ༦༢ འཁོར་ཚར་ཡོད་པ་དང་། རྒྱལ་སྤྱིའི་བོད་དོན་གནས་བབ་སོགས་ལ་བརྟེན། བོད་མིའི་ཚོགས་པ་དང་མི་སྒེར་གྱི་ངོས་ནས་བོད་དོན་གྱི་ལས་འགུལ་འདྲ་མིན་སྤེལ་དགོས་སྐོར་ལ་བོད་མིའི་གཞིས་ཆགས་ཁག་གི་ནང་རེ་སྐུལ་ཞུ་བཞིན་ཡོད་པ་རེད།
སྦག་སྦག་སྐོར་སྐྱོད་པ་གཉིས་ཀྱིས་ད་ལྟ་བར་ཟླ་གཅིག་དང་ཕྱེད་ཀ་ཙམ་གྱི་རིང་ཧི་མ་ཅལ་མངའ་སྡེའི་ནང་གི་བོད་མིའི་གཞིས་ཆགས་ཁག་དང་ལྡི་ལི་སོགས་ཀྱི་གཙོས་རྒྱ་གར་བྱང་ཁུལ་གྱི་བོད་མིའི་སྡོད་ཁུལ་གྲངས་ ༣༩ ཙམ་གྱི་ནང་སྐོར་སྐྱོད་གནང་གྲུབ་ཡོད་པ་དང་། དེ་རིང་ཨ་རུ་ན་ཅལ་མངའ་སྡེའི་བསྟན་འཛིན་སྒང་གཞིས་ཆགས་སུ་གནས་སྐབས་རིང་སྐོར་སྐྱོད་མཚམས་འཇོག་བྱས་ཡོད་པ་རེད་ལ། ཉིན་ཤས་གོང་སྦག་སྦག་སྐོར་སྐྱོད་པ་འཆི་མེད་རྟ་མགྲིན་ལགས་ཀྱིས་ལས་འགུལ་ནས་ཕྱིར་འཐེན་བྱས་ཡོད་པ་རེད། རྒྱ་གར་ནང་ཏོག་དབྱིབས་གཉན་རིམས་ཀྱི་གནས་སྟངས་ཡག་ཏུ་ཕྱིན་མ་ཐག ཚེ་རིང་ཡེ་ཤེས་ལགས་ནས་མུ་མཐུད་རྒྱ་གར་ལྷོ་ཕྱོགས་ཀྱི་བོད་མི་འདུས་སྡོད་ཁུལ་ཁག་དང་མོམ་བྷེ། གྷོ་ཝ་དང་གྷོ་ཇི་ར་དྷི་མངའ་སྡེ། ཧི་མ་ཅལ་མངའ་སྡེའི་དྷ་ལ་ཧོ་སི་གཞིས་ཆགས་དང་ལ་དྭགས་སོགས་སུ་ཕྱིན་རྗེས། རྒྱ་གར་གྱི་རྒྱལ་ས་ལྡི་ལིར་སྦག་སྦག་སྐོར་སྐྱོད་ཀྱི་ལས་འགུལ་མཇུག་བསྒྲིལ་རྒྱུ་ཡིན་པ་རེད།
གསར་འགོད་པ། ཀླུ་མགོན་ཐར།
