ཨ་རིའི་ནང་གནས་སྡོད་བོད་མི་དྲུག་ནས་ཉིན་གྲངས་བཅུའི་རིང་རང་བཙན་གོམ་བགྲོད་གནང་སྟེ་རྒྱལ་སྤྱིའི་ཐོག་ནས་རྒྱ་ནག་ལ་གནོན་ཤུགས་སྤྲོད་དགོས་པའི་འབོད་སྐུལ་ཞུ་ཡི་འདུག
ཁ་སང་ཕྱི་ཚེས་ ༢༣ ཉིན། ཨ་རིའི་ནང་གནས་སྡོད་བོད་མི་ ༦ གིས། བོད་རང་བཙན་ཤོར་ནས་ལོ་ངོ་ ༧༠ འཁོར་བར་མྱ་ངན་དང་། རྒྱ་ནག་གཞུང་གིས་བཙན་འོག་ཏུ་གྲོས་མཐུན་དོན་ཚན་བཅུ་འདུན་ཟེར་བ་བཞག་པ་དང་། བོད་ཞི་བས་བཅིངས་འགྲོལ་བཏང་ནས་ལོ་ངོ་ ༧༠ འཁོར་བ་ཟེར་བར་ངོ་རྒོལ་བཅས་ཀྱི་ཆེད་དུ། ཉིན་གྲངས་བཅུའི་རིང་ཨ་རིའི་མངའ་སྡེ་པེན་སིལ་ཝེ་ནི་ཡའི་གྲོང་ཁྱེར་ཧྥི་ལ་ཌ་ཧྥི་ཡའི་(Philadelphia, Pennsylvania) རང་བཙན་ཚོགས་ཁང་མདུན་ནས་ཨ་རིའི་རྒྱལ་ས་ཝ་ཤིང་ཊོན་དུ་ཡོད་པའི་ཨ་རིའི་གྲོས་ཚོགས་ཚོགས་ཁང་བར་ཞི་བའི་གོམ་བགྲོད་ལས་འགུལ་ཞིག་མགོ་འཛུགས་གནང་འདུག
ཐེངས་འདིའི་གོམ་བགྲོད་ལས་འགུལ་གཉིས་པའི་ནང་བོད་དོན་འཐབ་རྩོད་པ་དོན་གྲུབ་ལྷ་དར་ལགས་དང་། བསྟན་འཛིན་དབང་འདུས་ལགས། ཐུབ་བསྟན་ཆོས་ཉིད་ལགས། བློ་བཟང་ཡེ་ཤེས་ལགས། སྤེན་པ་ཚེ་རིང་ལགས། མིག་དམར་སྒྲོལ་མ་ལགས་བཅས་མཉམ་ཞུགས་གནང་ཡོད་ཅིང་། ཁོང་རྣམ་པའི་གོམ་བགྲོད་ལས་འགུལ་གྱི་དགོས་འདུན་གཙོ་བོ་ནི། རྒྱ་ནག་གཞུང་གིས་ད་བར་ཏོག་དབྱིབས་གཉན་རིམས་ཀྱི་རྐྱེན་པས་འཛམ་གླིང་ཁྱོན་ཡོངས་ནང་མི་གྲངས་ས་ཡ་ ༢ དང་ཕྱེད་ཀ་ལྷག་འདས་གྲོངས་སུ་གྱུར་བ་དེར་འགན་ལེན་བྱེད་དགོས་པ་མ་ཟད། རྒྱལ་སྤྱིའི་སྤྱི་ཚོགས་ངོས་ནས་རྒྱ་ནག་ལ་དེའི་ཐད་གནོན་ཤུགས་སྤྲོད་དགོས་པ། རྒྱ་ནག་གི་ཕྱི་ལོ་ ༢༠༢༢ ལོའི་དགུན་དུས་ཨོ་རྩལ་འགྲན་བསྡུར་ནང་མི་ཞུགས་རྒྱུ་དང་། རྒྱ་ནག་གི་ཅ་དངོས་བཀོལ་མཚམས་འཇོག་དགོས་པ། རྒྱ་ནག་གིས་བོད་ནང་མི་སེར་སྤེལ་བའི་སྲིད་ཇུས་ལག་བསྟར་བྱེད་བཞིན་པར་ངོ་རྒོལ་གྱིས། བོད་མིའི་རང་བཙན་འཐབ་རྩོད་ཀྱི་ལས་འགུལ་ལ་རྒྱབ་སྐྱོར་གནང་དགོས་པ་བཅས་ཡིན་འདུག
གཞན་ཡང་། རྒྱ་ནག་གཞུང་གིས་༸པཎ་ཆེན་རིན་པོ་ཆེ་གཙོས་པའི་བོད་ཀྱི་ཆབ་སྲིད་བཙོན་པ་ཚང་མ་འཕྲལ་དུ་ཀློད་གྲོལ་དགོས་པ་དང་། ཨ་རིའི་གྲོས་ཚོགས་གོང་འོག་གཉིས་ནས་བོད་ནང་གི་རང་ལུས་མེར་སྲེག་དང་བོད་མིའི་སྒེར་ལངས་སོགས་ཀྱི་སྐོར་ནས་ཉན་ཞིབ་འཚོག་དགོས་པ་བཅས་ཀྱི་རེ་སྐུལ་ཞུས་འདུག་ལ། ད་ཐེངས་ཀྱི་གོམ་བགྲོད་ལས་འགུའ་འདི་བརྒྱུད་ནས། རྒྱ་ནག་གཞུང་གིས་བོད་དང་། ཤར་ཊུར་ཀི་སི་ཐན། ལྷོ་སོག མན་ཇུ་རི་ཡ་ལྟ་བུའི་རང་བཙན་གྱི་རྒྱལ་ཁབ་དག་ལ་བཙན་འཛུལ་བྱས་པ་མ་ཟད། སོ་མྱུལ་དང་འཕྲུལ་རིག་ཤེས་བྱ་བརྐུ་འཁྱེར་སོགས་བརྒྱུད་ནས་འཛམ་གླིང་གི་རྒྱལ་ཁབ་གཞན་ལའང་ཉེན་ཁ་སྐྲུན་བཞིན་ཡོད་པའི་ནག་ཉེས་ཐེར་འདོན་གྱིས། རྒྱལ་སྤྱིའི་སྤྱི་ཚོགས་ངོས་ནས་རྒྱ་ནག་གི་ཉེན་ཁ་ལ་གཟབ་ནན་དགོས་པའི་དྲན་སྐུལ་ཞུ་ཡི་ཡོད་སྐོར་བརྗོད་འདུག
ད་ལྟ་ཏོག་དབྱིབས་གཉན་རིམས་ཚོད་འཛིན་གྱི་ཆེད་དུ་ཡུལ་གཉིས་བར་འགྲོ་འོང་བཀག་སྡོམ་བྱས་ཡོད་པའི་རྐྱེན་གྱིས། ཁེ་ན་ཌར་གནས་སྡོད་བོད་མི་བསོད་ནམས་ཞུ་བ་ཞིག་ཨ་རིའི་ནང་གི་གོམ་བགྲོད་ལས་འགུལ་ནང་ཞུགས་ཐུབ་ཀྱི་མེད་པར་བརྟེན། ཁོང་ཉིད་ཀྱིས་ཁ་སང་ཁེ་ན་ཌ་དང་ཨ་རིའི་ས་མཚམས་རེན་བྷོ་བྷི་རི་ཇི་ (Rainbow Bridge border)ནས་ཁེ་ན་ཌའི་གྲོང་ཁྱེར་ཊོ་རོན་ཊོའི་རྒྱ་ནག་གཞུང་ཚབ་ཁང་བར་གོམ་བགྲོད་གནང་མགོ་བརྩམས་ཡོད་འདུག
དེ་སྔ་ཕྱི་ལོ་ ༢༠༡༩ ལོའི་གསུམ་བཅུའི་དུས་དྲན་སྐབས་དོན་གྲུབ་ལྷ་དར་ལགས་དང་བོད་མི་སྐོར་ཞིག་གིས་ཧྥི་ལ་ཌལ་ཧྥི་ཡ་ནས་ནེའུ་ཡོག་གྲོང་ཁྱེར་དུ་་རྟེན་གཞི་བྱས་པའི་འཛམ་གླིང་མཉམ་འབྲེལ་རྒྱལ་ཚོགས་ཀྱི་ལས་ཁུངས་ལྟེ་བའི་བར་རང་བཙན་གོམ་བགྲོད་ཐོག་མ་དེ་གནང་ཡོད་པ་དང་། སྤྱིར་ད་ཐེངས་ཀྱི་གོམ་བགྲོད་གཉིས་པ་འདི་ཉིད་འདས་ལོར་སྤེལ་འཆར་ཡོད་ནའང་། རྒྱ་ནག་གི་གྲོང་ཁྱེར་ཝུ་ཧན་ནས་མཆེད་པའི་ཏོག་དབྱིབས་གཉན་རིམས་འགོས་ཁྱབ་ཤུགས་ཆེར་སོང་བའི་རྐྱེན་གྱིས་གོམ་བགྲོད་ལས་འགུལ་ད་བར་ཕར་འགྱངས་བྱེད་དགོས་བྱུང་ཡོད་འདུག
གསར་འགོད་པ། པ་སངས་ཚེ་རིང་།
