ཨ་རིས་ཧོང་ཀོང་མི་མང་ལ་སྐྱབས་བཅོལ་བའི་གནས་བབ་སྤྲོད་རྒྱུ་ཡིན་འདུག

ཨ་རིའི་གྲོས་ཚོགས་ཀྱི་ཕྱི་སྲིད་ལས་དོན་ཚོགས་ཆུང་གིས་རྒྱ་ནག་ལ་ཁ་གཏད་གཅོག་ཐབས་སླད་ཁྲིམས་འཆར་གསར་པ་ཞིག་བཏོན་ཏེ། རྒྱལ་ནང་དང་རྒྱལ་སྤྱིའི་སྟེང་གི་ཨ་རིའི་གནས་བབ་སླར་གསོ་ཡིས་མང་གཙོ་དང་འགྲོ་བ་མིའི་ཐོབ་ཐང་སྲུང་སྐྱོབ་དང་དཔལ་འབྱོར་དང་ཆབ་སྲིད་སོགས་ཀྱི་ཐོག་ནས་རྒྱ་ནག་ལ་ཁ་གཏད་གཅོག་རྒྱུ་ཡིན་པ་རེད།

དེ་རིང་རྒྱལ་སྤྱིའི་བརྒྱུད་ལམ་ཁག་ཏུ་གནས་ཚུལ་ཐོན་པ་ལྟར་ན། ཨ་རིའི་གྲོས་ཚོགས་འཐུས་མི་གྷེར་གྷོར་མེག་(Gregory W. Meeks) ལགས་ཀྱིས། ཨ་རིའི་གྲོས་ཚོགས་ལ་(EAGLE Act) ཞེས་པའི་ཁྲིམས་འཆར་གསར་པ་ཞིག་ངོ་སྤྲོད་ཀྱིས། རྒྱལ་ནང་དང་རྒྱལ་སྤྱིའི་སྟེང་ནས་རྒྱ་ནག་ལ་ཁ་གཏད་ཀྱི་སྲིད་ཇུས་འཛིན་རྒྱུ་ཡིན་སྐོར་བསྒྲགས་ཡོད་པ་རེད་ལ། ད་ལྟའི་ཆར་སྲིད་ཇུས་གསར་པའི་ནང་བོད་དོན་ཚུད་ཡོད་མེད་གསལ་ཁ་མེད་ནའང་ཐའེ་ཝན་དང་ཧོང་ཀོང་གི་མང་གཙོའི་ལས་འགུལ་སོགས་ལ་མུ་མཐུད་རྒྱབ་སྐྱོར་བྱ་རྒྱུ་ཡིན་པ་གཏན་འཁེལ་ཡོད་འདུག

དེ་འབྲེལ་ཐད་ཁྲིམས་འདོན་མཁན་གྲོས་ཚོགས་འཐུས་མི་གྷེར་གྷོར་མེག་ལགས་ཀྱིས། ངས་རྒྱ་ནག་ལ་ཁ་གཏད་གཅོག་ཆེད། ཨ་རི་འཛམ་གླིང་གི་སྣེ་འཁྲིད་པ་ཡིན་ཞིང་རྒྱལ་ནང་དང་རྒྱལ་སྤྱིའི་སྟེང་གི་ཨ་རིའི་སྲིད་ཤུགས་སླར་གསོ་ཡིས་རྒྱ་ནག་ལ་ཁ་གཏད་གཅོག་ཐབས་ཀྱི་ཁྲིམས་འཆར་འདི་འདྲ་ཞིག་ངོ་སྤྲོད་གནང་ཐུབ་པར་སྤོབས་པ་ཡོད། ཅེས་བརྗོད་ཡོད་པ་དང་། གྷེར་གྷོར་མེག་ལགས་ནི་ཨ་རིའི་གྲོས་ཚོགས་ཀྱི་ཕྱི་སྲིད་ལས་དོན་ཚོགས་ཆུང་གི་ཚོགས་གཙོ་ཡིན་པ་རེད།

ད་རེས་ཁྲིམས་འཆར་གསར་པ་དེ་ནི་དམིགས་བསལ་ཨ་རིས་རྒྱལ་སྤྱིའི་སྣེ་འཁྲིད་དེ་འཛམ་གླིང་ཞི་བདེ་བསྐྲུན་ཐབས་དང་། རྒྱ་ནག་གིས་ཞི་བདེ་རྒྱ་མཚོའི་ཁུལ་དུ་དྲག་ཤུགས་རྒྱ་སྐྱེད་གཏོང་བཞིན་པར་ཁ་གཏད་གཅོག་ཐབས་སུ་ཨ་རིས་རང་གི་མཐུན་གྲོགས་རྒྱལ་ཁབ་ཁག་མང་པོ་ཕན་ཚུན་བར་མཉམ་འབྲེལ་བྱས་ཏེ། ཨ་རིའི་སྟོབས་ཤུགས་རྒྱ་སྐྱེད་གཏོང་ཐབས་བྱེད་ཀྱི་ཡོད་པ་མ་ཟད། རྒྱལ་སྤྱིའི་སྟེང་དཔལ་འབྱོར་གྱི་འགྲན་རྩོད་དང་གནམ་གཤིས་ཚ་དྲོད། འགོག་ཁབ་ཀྱི་འབྲེལ་ལམ། དྲ་རྒྱའི་མཉམ་འབྲེལ་སྲིད་ཇུས་སོགས་ཀྱི་ཐོག་ནས་ཁ་གཏད་གཅོག་རྒྱུ་ཡིན་པ་རེད།

ཁྲིམས་འཆར་དེ་དང་འབྲེལ་ཨ་རིའི་གྲོས་ཚོགས་ཀྱི་ཕྱི་སྲིད་ལས་དོན་ཚོགས་ཆུང་གིས། ཨ་རིས་རང་གི་ཡང་དག་པའི་རིན་ཐང་ཁག་གལ་གནད་དུ་རྩིས་ཏེ། རྒྱ་ནག་གིས་འགྲོ་བ་མིའི་ཐོབ་ཐང་ལ་རྡོག་རོལ་བཏང་སྟེ་ཡུ་གུར་མི་རིགས་བཙན་གྱིས་ངལ་སྩོལ་སྒྱུར་བཀོད་ཁང་དུ་འཇུག་གི་ཡོད་པར་ཡ་ལན་མཇལ་བཅུག་རྒྱུ་དང་། ཧོང་ཀོང་མི་མང་སྲུང་སྐྱོབ་སླད་གནས་སྐབས་རིང་སྐྱབས་བཅོལ་བའི་གནས་འབབ་སྤྲོད་རྒྱུ། དེ་བཞིན། ཨ་རིའི་དཔལ་འབྱོར་དང་རྒྱལ་འབྲེལ་སྲིད་ཇུས་གོང་མཐོར་བཏང་སྟེ། རྒྱལ་སྤྱིའི་ཚོང་སྒྲིག་གི་རང་དབང་སླར་གསོ་བྱ་རྒྱུ། ཨ་རིའི་ངལ་སྩོལ་མི་མང་དང་ཚོང་ལས། མ་འོངས་པའི་འཕྲུལ་རིགས་ཐོག་མ་འཛུགས་བྱ་རྒྱུ་ཡིན་པ་སོགས་ཀྱི་དོན་ཚན་ཁག་ཅིག་འགྲེལ་བརྗོད་གནང་ཡོད་པ་རེད།

ད་རེས་ཁྲིམས་འཆར་དེར་ཁྱོན་ཤོག་ངོས་་༤༧༠ ཡོད་ཅིང་། ཁྲིམས་འཆར་ནང་ཐའེ་ཝན་དང་ཧོང་ཀོང་གི་མང་གཙོའི་ལས་འགུལ། དེ་བཞིན་ཡུ་གུར་མི་རིགས་རྩ་གཏོར་གཏོང་གི་ཡོད་པ་སོགས་མང་གཙོ་དང་འགྲོ་བ་མིའི་ཐོབ་ཐང་སྲུང་སྐྱོབ་བྱ་རྒྱུའི་ཆོད་སེམས་བརྟན་པོ་ཡོད་སྐོར་བརྗོད་འདུག་ལ། ཉེ་སྔོན་ཨ་རིའི་གྲོས་ཚོགས་གོང་འོག་གཉིས་ཐུན་མོང་ཐོག་ཨ་སྒོར་ཐེར་འབུམ་ ༥༢ ཙམ་འགྲོ་གྲོན་བཏང་སྟེ། འབྱུང་འགྱུར་ལོ་ངོ་ལྔའི་རིང་གོ་མཚོན་མ་ལག་དང་ཞིབ་འཇུག་གི་ལས་གཞི་མགོ་འཛུགས་ཀྱིས། རྒྱ་ནག་ལ་ཁ་གཏད་གཅོག་རྒྱུ་ཡིན་སྐོར་བསྒྲགས་ཡོད་པ་རེད།

གསར་འགོད་པ། སྐལ་བཟང་སྦྱིན་པ།