དེ་རིང་གསུང་ཆོས་ཀྱི་ཉིན་གཉིས་པར་༧གོང་ས་མཆོག་གིས་བཤད་སྒྲུབ་ཟུང་འབྲེལ་བྱས་ནས་མང་ཚོགས་ཀྱི་ནང་དུ་ནང་ཆོས་སྐོར་ལ་བགྲོ་གླེང་གནང་དགོས་གསུངས། 
བཀའ་འདྲི་བཀའ་ལན་གྱི་ལས་རིམ་ནང་སྦེང་ལོར་མཐོ་སློབ་སྡོད་ཁང་གི་སློབ་མ་བསྟན་འཛིན་ལྷ་དབང་ལགས་ཀྱིས། མི་གཞན་གྱི་བྱ་སྤྱོད་ངན་པ་ལ་བརྟེན་ནས་རང་ངོས་ནས་བཟོད་བསྲན་ཞུ་ཐབས་གང་ཡོད་སྐོར་བཀའ་འདྲི་ཞུས་པར་༧གོང་ས་མཆོག་གིས། མི་གཞན་གྱིས་གནོད་པའི་བྱ་བ་བརྩམས་ཡོང་དུས་དེ་ལ་ལྷག་པར་དུ་སྙིང་རྗེ་སྐྱེས་དགོས་པ་ཞིག་རེད། དེ་འདྲའི་མི་དེ་དག་ང་ཚོ་ལྟར་བདེ་བ་འདོད་པ་དང་སྡུག་བསྔལ་མི་འདོད་པ་ཤ་སྟག་རེད། སྡུག་བསྔལ་མི་འདོད་པ་རེད་དེ་སྡུག་བསྔལ་གྱི་རྒྱུ་གཞན་ལ་གནོད་སེམས་བྱེད་པ་དང་མགོ་སྐོར་བཏང་བ་ལ་སོགས་བྱས་པ་དེ་སྡུག་བསྔལ་ཡོང་བའི་རྒྱུ་དྭང་དུ་བླངས་ནས་བྱེད་ཀྱི་ཡོད་པས་ལྷག་པར་དུ་བརྩེ་བ་སྐྱེས་པའི་རྒྱུ་མཚན་འདུག དཔེར་ན་རྒྱ་མི་གུང་ཁྲན་གྱིས་བོད་པ་ལ་དབང་ཡོད་བཤད་ཀྱི་ཡོད་པ་དེས་ལྷག་པར་དུ་བརྩེ་བ་སྐྱེས་ཀྱི་ཡོད་པ་རེད། སྤྱོད་འཇུག་ནང་རང་གི་དགྲ་བོ་དེ་དགེ་བའི་བཤེས་གཉེན་མཆོག་རེད། རྒྱུ་མཚན་ནི་རང་གི་དགྲ་བོ་ལ་དམིགས་ནས་བཟོད་པ་སྒོམ་ཐུབ་ཀྱི་ཡོད་རེད། བཟོད་པའི་ཉམས་ལེན་དགྲ་བོ་ལ་བརྟེན་ནས་བྱུང་ཡོད་པས་དགྲ་བོ་དེ་དགེ་བའི་བཤེས་གཉེན་མཆོག་རེད་གསུངས་ཀྱི་ཡོད་པ་རེད། དེར་བརྟེན་བྱ་བ་ངན་པ་བསམ་མཁན་གྱིས་སྡུག་བསྔལ་མི་འདོད་པ་ང་ཚོ་དང་གཅིག་པ་རེད། ཡིན་ནའང་སྡུག་བསྔལ་གྱི་རྒྱུ་ལ་བླང་དོར་གྱི་གནད་ལ་རྨོངས་པ་དང་ཁ་ཤས་ཤེས་བཞིན་དུ་བྱེད་ཀྱི་ཡོད་པ་རེད། དེ་ལྟར་སྡུག་བསྔལ་གྱི་རྒྱུ་དྭང་དུ་བླངས་ནས་འཇུག་པ་དེ་དག་ལ་ལྷག་པར་བརྩེ་བ་སྐྱེས་དགོས་ཀྱི་ཡོད་རེད། ཅེས་བཀའ་སློབ་ལམ་སྟོན་གནང་སོང་།
དེ་ནས་ལ་དྭགས་བོད་ཕྲུག་ཁྱིམ་སྡེའི་སློབ་མ་བསྟན་འཛིན་ལུང་རྟོགས་ལགས་ཀྱིས། ཁོང་ཁྲོ་ལངས་པའི་སྐབས་སུ་སེམས་ཞི་བདེར་འགྲོ་བའི་ཐབས་ལམ་ཡག་ཤོས་གང་ཡིན་སྐོར་བཀའ་འདྲི་ཞུས་པར་༧གོང་ས་མཆོག་གིས། ཕྱོགས་གཅིག་ནས་དུས་རྒྱུན་དུ་བྱམས་བརྩེའི་བློར་ཡང་ཡང་བསམ་བློ་བཏང་ནས་སོ་སོའི་སེམས་གཏིང་ནས་བྱང་ཆུབ་ཀྱི་སེམས་སྒོམ་དགོས་ཀྱི་ཡོད་པ་རེད། གཞན་ཕན་གྱི་བློ་ཟེར་བ་དེ་རང་བདེ་བ་དང་གཞན་བདེ་བ། འཕྲལ་དུ་བདེ་བ། རང་གཞན་དོན་ནི་རང་བསྒྲུབ་ཕྱིར། བྱང་ཆུབ་སེམས་ནི་བསྐྱེད་པར་བགྱི། ཟེར་བ་དེ་བྱང་ཆུབ་ཀྱི་སེམས་མཚན་ཉིད་ཚང་བ་རེད། མདོར་ན་སེམས་པ་བཟང་པོ་ཡོད་ན་སོ་སོའི་སེམས་སྐྱིད་པ་དང་སོ་སོའི་ཉེ་འཁོར་དུ་ཡོད་པའི་གྲོགས་པོ་ཚོའི་སེམས་བཟང་བ་ཡོང་གི་རེད། དཔེར་ན་ངོས་ནས་དུས་རྟག་ཏུ་བྱམས་བརྩེ་ཉམས་ལེན་བྱས་ནས་བློ་ལྷོད་ལྷོད་བསྡད་དེ་གདོང་འཛུམ་ཤིག་ཤིག་བྱེད་ཀྱི་ཡོད་པ་རེད། གལ་ཏེ་ངོས་རང་གཏུམ་པོ་བྱས་ནས་སྡོད་ན་འདིའི་ཁོར་ཡུག་མ་བདེ་བ་ཆགས་ཀྱི་རེད། ཁོང་ཁྲོའི་གཞན་དབང་དུ་ཕྱིན་ན་རང་མི་སྐྱིད་པ་དང་རོགས་པ་ཚོའང་སྐྱིད་པོ་ཡོང་གི་མ་རེད། དེར་བརྟེན་རང་དོན་བསྒྲུབ་ནའང་བྱང་ཆུབ་ཀྱི་སེམས་བསྐྱེད་དགོས་པ་དང་གཞན་དོན་བསྒྲུབ་ནའང་བྱང་ཆུབ་སེམས་བསྒོམ་དགོས་ཀྱི་ཡོད་པ་རེད། དེ་བཞིན་འཕྲལ་དུ་ལུས་བདེ་བ་དེ་བྱང་ཆུབ་ཀྱི་སེམས་སྒོམ་ན་སེམས་ཀྱི་ཞི་བདེ་ཡོང་བ་དང་སེམས་ལ་དངངས་སྐྲག་མ་ཡོང་བའི་ཕན་ཐོགས་ཡོང་གི་རེད། བྱང་ཆུབ་ཀྱི་སེམས་གཞན་ཕན་གྱི་བློ་སྒོམ་ན་འཕྲལ་དུ་བདེ་བ་དང་ཕུགས་ལ་ཕན་པ་ཡོང་གི་རེད། སེམས་པ་བཟང་པོ་བྱས་པ་དེས་འཕྲལ་དུ་བདེ་བ་དང་ཕུགས་ལ་ཕན་པ་ཡོང་གི་ཡོད་དུས་ཁོང་ཁྲོའི་ཉེས་དམིགས་དང་བྱམས་བརྩེའི་ཕན་ཡོན་ཤེས་ཀྱི་ཡོད་ན་ཁོང་ཁྲོ་ཡོང་ལ་ཉེ་བའི་སྐབས་ཡིད་གཟབ་བྱེད་ཐུབ་ཀྱི་རེད། གཙོ་བོ་བརྩེ་བའི་ཕན་ཡོན་དང་ཁོང་ཁྲོའི་ཉེས་དམིགས་ལ་ཡང་ཡང་བསམ་བློ་བཏང་དགོས་འདུག ཅེས་བཀའ་ལན་གནང་སོང་།
ཡང་དྷ་སྟེང་བོད་ཕྲུག་ཁྱིམ་སྡེའི་སློབ་མ་བསྟན་འཛིན་འགྱུར་མེད་ལགས་ཀྱིས། སྙིང་རྗེ་ཆེན་པོ་དང་བྱང་ཆུབ་ཀྱི་སེམས་གཉིས་ཀྱི་ཁྱད་པར་དང་དེའི་སྒོམ་སྟངས་སྐོར་བཀའ་འདྲི་ཞུས་པར་༧གོང་ས་མཆོག་གིས། སྙིང་རྗེ་ཆེན་པོ་དེ་བྱང་ཆུབ་ཀྱི་སེམས་འདྲེན་རྒྱུའི་རྒྱུ་ཆགས་ཀྱི་ཡོད་པ་རེད། སྙིང་རྗེ་ཟེར་བ་དེ་སེམས་ཅན་སྡུག་བསྔལ་གྱིས་མནར་བ་ལ་སྡུག་བསྔལ་མེད་པ་ཡོང་ན་བསམ་པའི་བློ་དེ་རེད། དེ་ནས་སྙིང་སྟོབས་བསླེབས་དུས་སྡུག་བསྔལ་ལས་བྲལ་ན་བསམ་པ་མིན་པར་སྡུག་བསྔལ་ལས་ངས་སྐྱོབ་བསམ་པའི་སྐྱོབ་འདོད་ཀྱི་བློ་བསླེབ་ཡོང་གི་ཡོད་པ་དེ་རེད། བྱང་ཆུབ་ཀྱི་སེམས་དེ་འདུན་པ་གཉིས་ལྡན་གཞན་དོན་དོན་གཉེར་གྱི་རྒྱུ་དང་གཞན་སྔུག་བསྔལ་མཐའ་དག་ལས་སྐྱོབ་པ་བྱ་རྒྱུའི་ཆེད་དུ་ད་ལྟ་ང་ལ་ནུས་པ་མི་འདུག ནུས་པ་ཆ་ཚང་ཡོང་བར་གསང་ལམ་གྱི་རྟོགས་པ་གྲོལ་ནས་རྣམ་མཁྱེན་རྒྱལ་བའི་གོ་འཕང་ཐོབ་པ་བྱུང་ན། དཔེར་ན་སྔོན་ལ་མཐོང་ལམ་དུ་ཆ་བཞག་པ་ཡིན་ན་སྦྱོར་ལམ་གྱི་རྟོགས་པ་བསྐྱེད་པར་ཁ་ཡོད་ལག་ཡོད་ཀྱིས་མི་ལ་ཕན་ཐོགས་བྱེད་ཐུབ་རྒྱུ་དེ་རེད། དེ་བཞིན་མཐོང་ལམ་བསྐྱེད་ན་ཐེག་ཆེན་མཐོང་ལམ་བསླེབས་དུས་སྟོང་ཉིད་མངོན་སུམ་དུ་རྟོགས་པའི་ཉམས་མྱོང་ལ་བརྟེན་ནས་མི་ལ་རོགས་བྱས་པ་དང་ཕན་ཐོགས་བྱེད་ཐུབ་པ་ཡོང་གི་རེད། དེ་ལྟར་གསང་ལམ་དུ་འགྲོ་ཡི་ཡོད་པ་རེད། ཇི་ཙམ་གྱིས་སོ་སོའི་གསང་ལམ་གྱི་རྟོགས་པ་གོང་ནས་གོང་དུ་འཕེལ་བ་དེ་ཡིས་གཞན་དོན་བསྒྲུབ་པའི་ནུས་པ་ཆེ་རུ་འགྲོ་ཡི་ཡོད་པ་རེད། སྙིང་རྗེ་དེ་སྡུག་བསྔལ་ལས་བྲལ་ན་བསམ་པ་དང་སྡུག་བསྔལ་ལས་སྐྱོབ་བསམ་པ་འདིའི་སྒང་བསླེབས་ཡོང་དུས་བྱང་ཆུབ་ཀྱི་སེམས་ཟེར་བ་འདུན་པ་གཉིས་ལྡན་ཆེད་དུ་སེམས་ཅན་ལ་དམིགས་ནས་རྣམ་མཁྱེན་དོན་གཉེར་གྱི་སེམས་བསླེབས་ཡོང་གི་ཡོད་པ་རེད། བྱང་ཆུབ་ལས་བྱང་ནི་སྐྱོན་གྱི་རིགས་ལ་གཉེན་པོ་བསྟེན་ནས་་བྱང་ནས་སྤང་བ་དང་གཉེན་པོ་བསྟེན་ནས་ཉོན་མོངས་པའི་སྒྲིབ་པ་སྤངས་ནས་ཉོན་མོངས་པའི་སྒྲིབ་པས་བཞག་པའི་ཤེས་བྱའི་སྒྲིབ་པ་སྤངས་ཏེ་ཤེས་བྱ་ཐམས་ཅད་ཐུགས་ལ་ཆུབ་པ་དེ་བྱང་ཆུབ་ཀྱི་སེམས་རེད། སྐྱོན་རིགས་མཐའ་དག་བྱང་བ་དང་ཡོན་ཏན་གྱི་རིགས་མཐའ་དག་ཐུགས་སུ་ཆུབ་ནས་སྤངས་རྟོགས་ཀྱི་ཡོན་ཏན་དམིགས་བསལ་ཡོད་པའི་རྣམ་མཁྱེན་གྱི་གོ་འཕང་ཅི་ནས་ཀྱང་ཐོབ་བྱའོ་བསམ་པའི་ཡང་ཡང་བསམ་བློ་བཏང་བ་དེ་བྱང་ཆུབ་ཀྱི་སེམས་རེད། སྙིང་རྗེ་ནི་བྱང་ཆུབ་ཀྱི་སེམས་སྐྱེད་པའི་རྒྱུ་གཙོ་བོ་རེད། སྙིང་རྗེ་ལ་སྡུག་བསྔལ་ལས་བྲལ་འདོད་ཀྱི་སྙིང་རྗེ་དང་སྡུག་བསྔལ་ལས་སྐྱོབ་འདོད་ཀྱི་སྙིང་རྗེ་ལ་བསླེབས་ན་བྱང་ཆུབ་ཀྱི་སེམས་ལ་འགྲོ་ཡི་ཡོད་སྐོར་གསུངས་སོང་།
མཇུག་ཏུ་༧གོང་ས་མཆོག་གིས། བཤད་སྒྲུབ་ཟུང་འབྲེལ་ཟེར་བ་དེ་གལ་ཆེན་པོ་རེད། སངས་རྒྱས་པའི་ཆོས་ཉམས་ལེན་བྱེད་པར་དད་པ་གཅིག་པོས་འདང་གི་མི་འདུག ཆོས་ཟེར་བ་དེ་རྣམ་དཔྱོད་ཀྱི་ཤེས་རབ་ཀྱིས་བསམ་བློ་བཏང་ནས་དེ་ལ་སློབ་གཉེར་མ་བྱས་ན་ཡོང་གི་མ་རེད། དེར་བརྟེན་བཤད་སྒྲུབ་ཟུང་འབྲེལ་བྱས་ནས་འགྲོ་དགོས་དེ་དགེ་འདུན་པ་གཅིག་པོ་མིན་པར་སེར་སྐྱ་མི་མང་ཕོ་མོ་ཚང་མས་སངས་རྒྱས་པའི་ཆོས་སློབ་སྦྱོང་བྱས་ནས་ཡོང་དགོས་པ་ཞིག་ལས་དད་པ་གཅིག་པོས་གདང་གི་མེད་པ་ཁྱེད་རང་ཚོས་སེམས་ལ་ངེས་དགོས། བཤད་པ་དང་སྒྲུབ་པ་ཟུང་འབྲེལ་བྱས་ནས་མང་ཚོགས་ཀྱི་ནང་དུ་ནང་ཆོས་སྐོར་ལ་བགྲོ་གླེང་བྱེད་པ་དང་། སྤྱོད་འཇུག་དང་དབུ་མ་འཇུག་པ་དེ་དག་གྲྭ་སའི་དཔེ་ཆ་གཅིག་པོ་མིན་པར་སེར་སྐྱ་ཕོ་མོ་ཚོས་ཀྱང་དུས་ནས་དུས་སུ་ལྟ་དགོས་པ་དང་ད་ལྟའི་ཆར་འཕྲུལ་ཆས་བརྒྱུད་ནས་བགྲོ་གླེང་བྱེད་ན་ཕན་གྱི་རེད། ཅེས་གང་ཐུབ་ཀྱིས་བཤད་སྒྲུབ་ཟུང་འབྲེལ་ཡོང་བར་འབད་བརྩོན་གནང་དགོས་སྐོར་གསུངས་སོང།
གསར་འགོད་པ། བསྟན་འཛིན་ཕུར་བུ།
