ཨ་རིའི་དང་བླངས་སྨན་ཞབས་པའི་རུ་ཁག་ཅིག་གིས་བོད་མིའི་སྒྲིག་འཛུགས་དང་མཉམ་ལས་ཀྱིས་བོད་རིགས་གཅེན་གཅུང་ཕན་ཚུན་བར་གྱི་དཀའ་ངལ་སེལ་ཐབས་བྱ་རྒྱུ་ཡིན་འདུག
ཉེ་སྔོན་ནེའུ་ཡོག་དང་ནེའུ་འཇར་སི། བྱང་ཁ་ལེ་ཧྥོ་ནེ་ཡའི་བོད་ཀྱི་སྨན་ཞབས་ཚོགས་པའི་ཚོགས་གཙོ་པདྨ་རྡོ་རྗེ་ལགས་ནས་སྤྱི་ཚོགས་བརྒྱུད་ལམ་ཁག་ཏུ། འབོད་སྐུལ་གསལ་བསྒྲགས་ཤིག་སྤེལ་ཏེ། ད་ལྟའི་ཆར་རྒྱ་གར་ནང་ཏོག་དབྱིབས་གཉན་རིམས་འགོས་ཁྱབ་ཀྱི་ཛ་དྲག་གནས་སྟངས་འོག སྨན་ཞབས་པ་འདང་གི་མེད་པའི་དཀའ་ངལ་སེལ་ཐབས་སླད། ཨ་རིར་གནས་བཞུགས་དང་བླངས་སྨན་ཞབས་པ་བསྡུ་རུབ་དང་འབྲེལ་བའི་བརྙན་ཞིག་བོད་རིགས་མི་མང་ནང་ཁུལ་དུ་བརྒྱུད་སྐུར་བྱེད་བཞིན་ཡོད་སྟབས། འདི་གའི་གསར་འགོད་པས་པདྨ་ལགས་སྒེར་གྱི་ངོ་དེབ་བརྒྱུད་གནས་ཚུལ་དེ་དངོས་བདེན་གང་ཡིན་དང་ད་ལྟའི་གནས་སྟངས་ཇི་ཆགས་བཅས་ཀྱི་སྐོར་བཀའ་འདྲི་ཞུས་པར། པདྨ་ལགས་ནས་གནས་ཚུལ་དེ་བདེན་པ་ཡིན་པ་དང་ད་ལྟའི་ཆར་ཨ་རིའི་དང་བླངས་སྨན་ཞབས་རྣམས་འགྲིམས་འགྲུལ་གྱི་ཐོངས་མཆན་བཀའ་འཁྲོལ་འཐོབ་རྒྱུར་སྒུག་བཞུགས་ཡོད་སྐོར་བརྗོད་བྱུང་།
དེ་འབྲེལ་གྱི་གནས་ཚུལ་ཐད་པདྨ་རྡོ་རྗེ་ལགས་ནས་ངོ་སྤྲོད་གནང་བ་ལྟར་ན། ནེའུ་ཡོག་དང་ནེའུ་འཇར་སི། བྱང་ཁ་ལེ་ཧྥོ་ནེ་ཡའི་སྨན་ཞབས་ཚོགས་པས། བོད་མིའི་སྒྲིག་འཛུགས་ཀྱི་འཕྲོད་བསྟེན་ལས་ཁུངས་དང་སྐུ་ཚབ་དོན་གཅོད་ལས་ཁུངས་གཉིས་ལ་འབྲེལ་བ་གནང་བ་བརྒྱུད། ད་ལྟའི་ཆར་རྒྱ་གར་ནང་སྨན་ཞབས་དགོས་མཁོ་ཆེ་བའི་སྐབས་དང་བསྟུན། ཨ་རིར་གནས་བཞུགས་དང་བླངས་སྨན་ཞབས་པའི་སྡེ་ཁག་ཅིག་རྒྱ་གར་ནང་རོགས་སྐྱོར་སླད་གཏོང་རྒྱུ་བྱས་པ་དང་། ད་ལྟའི་ཆར་དང་བླངས་སྨན་ཞབས་པ་ཁྱོན་ ༡༡ བྱུང་ཡོད་ནའང་། ཁོ་ཚོའི་ཚོགས་པའི་དམིགས་ཡུལ་ནི་ཉུང་མཐར་སྨན་ཞབས་པ་ ༡༥ གཏོང་རྩིས་ཡིན་པ་རེད།
ཡང་ཉེ་སྔོན་པདྨ་ལགས་ནས་བརྙན་ལམ་བརྒྱུད་ཡོངས་ཁྱབ་གསལ་བསྒྲགས་ཤིག་སྤེལ་ནང་། ནེའུ་ཡོག་ནེའུ་འཇར་སི་དང་བྱང་ཁ་ལེ་ཧྥོ་ནེ་ཡའི་སྨན་ཞབས་མཐུན་ཚོགས་ནས། རྒྱ་གར་ནང་ཏོག་དབྱིབས་གཉན་རིམས་དང་འབྲེལ་ནས་རྒྱ་གར་ནང་དཀའ་ངལ་འཕྲད་བཞིན་པའི་བོད་མི་རྣམས་ལ་རོགས་རམ་ཞུ་སླད། ཏོག་ནད་དང་འབྲེལ་བའི་ཆེད་ལས་སྨན་ཞབས་པ་ ༡༥ རྒྱ་གར་ནང་གཏོང་འཆར་ཡོད། བོད་མིའི་སྒྲིག་འཛུགས་ཀྱི་འཕྲོད་བསྟེན་དང་དོན་གཅོད་ལས་ཁུངས་གཉིས་ལ་གྲོས་མོལ་བྱས་པ་ཡིན། སྨན་ཞབས་པ་ཉུང་དྲགས་པའི་དཀའ་ངལ་འདུག་གསུང་གི་ཡིན། ཕར་ལག་ཆ་ཚང་མ་ཡོད་ནའང་ལས་བྱེད་དང་དམིགས་བསལ་མཉམ་མྱོང་ལྡན་པའི་སྨན་ཞབས་པ་འདང་གི་མི་འདུག་ཟེར་གྱི་འདུག དེ་ཡང་བོད་མིའི་སྒྲིག་འཛུགས་ཙམ་མ་ཡིན་པར་བོད་པའི་དགོན་སྡེ་ཁག་གཙོས་པའི་མང་པོར་དཀའ་ངལ་འཕྲད་ཀྱི་འདུག དེར་བརྟེན། རོགས་སྐྱོར་སྨན་ཞབས་པའི་རུ་ཁག་གི་འགྲོ་གྲོན་སླད་རོགས་དངུལ་སྡུད་རོབ་བྱེད་ཀྱི་ཡོད། ཅེས་བརྗོད་འདུག
ད་ལྟའི་ཆར་བོད་པའི་དང་བླངས་སྨན་ཞབས་རུ་ཁག་གི་འགྲོ་གྲོན་མཚོན་པའི་རྒྱ་གར་ནང་རོགས་སྐྱོར་གནང་ཕྱོགས་དང་འབྲེལ་བའི་ལས་དོན་ཐད། རོགས་དངུལ་མུ་མཐུད་ཞུ་མུས་མཐུད་ཞུ་བཞིན་ཡོད་ཅིང་། ཁོ་ཚོའི་དཀའ་ངལ་གཙོ་བོ་ནི་ཏོག་ནད་ཀྱི་ཛ་དྲག་གནས་སྟངས་འོག་རྒྱལ་ཁབ་ཕན་ཚུན་བར་འགྲིམས་འགྲུལ་ཐོངས་མཆན་རག་གི་མེད་པ་དེ་ཡིན་པ་རེད་ལ། དམིགས་བསལ་རྒྱ་གར་ནང་ཏོག་ནད་ཀྱི་ཛ་དྲག་གནས་སྟངས་འོག ཨ་རིའི་བོད་པའི་སྨན་ཞབས་པ་རྣམས་ལ་ཛ་དྲག་ཕྱིར་བསྐྱོད་ཀྱི་ཐོངས་མཆན་མ་གཏོགས་རག་རྒྱུ་ཁག་པོ་ཡིན་པ་དང་། ཐོངས་མཆན་རག་ཚེ་མགྱོགས་མྱོར་རྒྱ་གར་རུ་གནས་སྡོད་བོད་མི་རྣམས་ལ་རོགས་སྐྱོར་བྱེད་པར་ཡོང་རྒྱུ་གཏན་འཁེལ་འདུག
ད་རེས་ཀྱི་ཨ་རིའི་བོད་པའི་དང་བླངས་སྨན་ཞབས་རུ་ཁག་དེ་ནི་དམིགས་བསལ་ཏོག་དབྱིབས་གཉན་རིམས་ཀྱི་ཛ་དྲག་གནས་སྟངས་སྐབས་དང་ད་སྔ་བར་བཙན་བྱོལ་བོད་མིའི་ལོ་རྒྱུས་ནང་བོད་པས་བོད་མིར་ཛ་དྲག་རོགས་སྐྱོར་ཞུ་སླད། རང་ཉིད་བློས་གཏོང་གིས་རྒྱལ་ཁབ་ནས་རྒྱལ་ཁབ་བརྒྱུད་ནས་ཡོང་བའི་སྨན་ཞབས་པ་མང་ཤོས་ཆགས་ཀྱི་ཡོད་པ་དང་། ད་ལྟའི་ཆར་བཞུགས་སྒར་དྷ་ས་རམ་ས་ལ་ནི་བཙན་བྱོལ་ནང་ཏོག་ནད་ཀྱི་གནས་སྟངས་ཛ་དྲག་ཤོས་ཆགས་ཡོད་པ་ལྟར། ཨ་རིའི་བོད་རིགས་དང་བླངས་སྨན་ཞབས་རུ་ཁག་དེ་དྷ་ས་གཙོས་པའི་ཏོག་ནད་ཀྱི་ཛ་དྲག་གནས་སྟངས་ཡིན་པའི་བོད་མིའི་གཞིས་ཆགས་ཁག་ཏུ་རོགས་སྐྱོར་གྱི་ལས་དོན་གཉེར་རྒྱུ་ཡིན་ཞིང་། ལས་རིམ་ལྟར་ན་ཁོ་ཚོས་ཟླ་གཅིག་རིང་རྒྱ་གར་ནང་སྤྱི་ཚོགས་ཞབས་ཞུ་ཞུ་རྒྱུ་ཡིན་པ་དང་ཁོ་ཚོ་མང་ཆེ་ཐད་ཀར་ཏོག་དབྱིབས་གཉན་རིམས་སྔོན་འགོག་གི་ཐད་མཉམ་མྱོང་ལྡན་པའི་ཆེད་ལས་པ་རྐྱང་ཆགས་ཀྱི་ཡོད་འདུག་ལ། ཟླ་འདིའི་ཕྱི་ཚེས་ ༡༠ ཉིན་ནས་དངོས་སུ་ཨ་རི་ནས་རྒྱ་གར་རུ་ཐོན་ཐུབ་ཐབས་བྱེད་ཀྱི་ཡོད་འདུག
གསར་འགོད་པ། སྐལ་བཟང་སྦྱིན་པ།
གཤམ་གྱི་དྲ་ཐག་འདི་བརྒྱུད་ཨ་རིའི་བོད་རིགས་དང་བླངས་སྨན་ཞབས་ཚོགས་པར་རོགས་དངུལ་ཕུལ་ཐུབ་ཀྱི་འདུག
https://www.gofundme.com/f/covid19-respond-team?utm_campaign=p_nacp+share-sheet&utm_medium=more&utm_source=customer
