དེ་རིང་ཧོང་ཀོང་དང་ཨོ་མིན་ནང་དྲུག་བཞིའི་དོན་རྐྱེན་རྗེས་དྲན་ཞུ་བར་བཀག་སྡོམ་ཤུགས་ཆེན་བྱས་འདུག

རྒྱ་ནག་གཞུང་གིས་རྒྱ་རིགས་འདུས་སྡོད་ཀྱི་ཆེས་མཐའ་མའི་མང་གཙོ་གྲོང་ཁྱེར་རུ་དྲུག་བཞིའི་དོན་རྐྱེན་བཀག་སྡོམ་བྱས་པར་རྒྱལ་སྤྱིའི་ངོས་ནས་རྒྱ་ནག་ལ་སྐྱོན་བརྗོད་དང་མུ་མཐུད་དྲུག་བཞིའི་དོན་རྐྱེན་སྲུང་གཙི་ཞུ་རྒྱུ་ཡིན་སྐོར་བསྒྲགས།

དེ་རིང་ཕྱི་ཟླ་ ༦ ཚེས་ ༤ ཉིན་རྒྱ་ནག་དམར་ཤོག་ཚོགས་པས། ཕྱི་ལོ་ ༡༩༨༩ ལོར་པེ་ཅིན་གྱི་གནམ་བདེ་སྒོ་མོ་ཆེའི་མདུན་ཐང་དུ་དམངས་གཙོའི་ཞི་རྒོལ་ལས་འགུལ་བ་སྟོང་ཕྲག་མང་པོ་དམར་གསོད་བཏང་ནས་ལོ་ངོ་ཧྲིལ་པོ་ ༣༢ འཁོར་བའི་རྗེས་དྲན་གྱི་ཉིན་མོ་ཡིན་པ་དང་སྟབས་བསྟུན། ལོ་ལྟར་ཧོང་ཀོང་གི་ཝིག་ཊོ་རི་ཡ་སྤྱི་གླིང་དུ་འཚོག་བཞིན་པའི་དྲུག་བཞི་དོན་རྐྱེན་རྗེས་དྲན་གྱི་མར་མེ་ཁྲོམ་སྐོར་ལས་འགུལ་དེ་ཉིད་ཏོག་དབྱིབས་གཉན་རིམས་ལ་ཁག་དཀྲིས་ཏེ་བཀག་སྡོམ་བྱས་ཡོད་པ་མ་ཟད། དེ་རིང་ཞོགས་པར་མར་མེ་ཁྲོམ་སྐོར་ལས་འགུལ་གྲ་སྒྲིག་ཞུ་མཁན་ཧོང་ཀོང་མནའ་འབྲེལ་ཚོགས་པའི་ (Hong Kong Alliance) ཚོགས་གཙོ་གཞོན་པ་དང་ཧོང་ཀོང་གི་དམངས་གཙོ་དོན་གཉེར་བའི་སྣེ་ཁྲིད་པ་ཁྲོ་ཧང་ཐུང་(Chow Hang Tung)  ལགས་གཉིས་འཛིན་བཟུང་བྱས་ཡོད་འདུག

འགྲོ་བ་མིའི་ཐོབ་ཐང་ལས་འགུལ་བ་དང་ཁྲིམས་རྩོད་པ་ཁྲོ་ཧང་ཐུང་གིས་ཉིན་ཤས་གོང་རང་གི་རྗེས་འབྲང་བ་རྣམས་ལ། ཧོང་ཀོང་གཞུང་གི་བཀག་སྡོམ་ལ་མ་ལྟོས་པར་རང་ཉིད་ཝིག་ཊོ་རི་ཡ་སྤྱི་གླིང་དུ་བསྐྱོད་དེ་དྲུག་བཞིའི་དམར་གསོད་དོན་རྐྱེན་རྗེས་དྲན་ཆེད་མར་མེ་སྒྲོན་རྒྱུ་ཡིན་པ་དང་། ཧོང་ཀོང་བ་གཞན་རྣམས་ཀྱིས་ཀྱང་དེ་ལྟར་བྱ་དགོས་པའི་འབོད་སྐུལ་ཞུས་ཡོད་ལ། ཉེ་ཆར་སྤེལ་བའི་བྷི་བྷི་སི་གསར་ཁང་གི་བཅར་འདྲི་ཞིག་གི་སྟེང་ཁོང་མོས། ང་རང་ཉེན་རྟོག་པས་འཛིན་བཟུང་བྱ་རྒྱུར་གྲ་སྒྲིག་ཡོད། འདི་ནི་ད་ལྟའི་ཧོང་ཀོང་གི་གནས་བབ་རེད། གལ་ཏེ་ཁྱེད་ཀྱིས་སྒེར་གཅོད་སྲིད་གཞུང་གི་འོག་ནས་དམངས་གཙོའི་ཆེད་འཐབ་རྩོད་བྱས་ཚེ། ཁོ་ཚོས་ཁྱེད་རང་འཛིན་བཟུང་བྱ་རྒྱུར་ཐེ་ཚོམ་མེད། ངས་དམངས་གཙོའི་ཆེད་དུ་བློས་གཏོང་བྱ་རྒྱའི་ཆོད་སེམས་བརྟན་པོ་ཡིན། ཞེས་བརྗོད་འདུག་ལ། ཡང་ཁོང་མོས། ད་ལན་ནི་རྒྱལ་ཁབ་བདེ་འཇགས་ཁྲིམས་ཡིག་ཟེར་བ་གཏན་འབེབ་བྱས་རྗེས་ཀྱི་དྲུག་བཞི་དོན་རྐྱེན་རྗེས་དྲན་ཐོག་མ་དེ་ཆགས་ཀྱི་ཡོད། མི་མང་པོས་མར་མེ་ཁྲོམ་སྐོར་ལས་འགུལ་དེ་ཡལ་འགྲོ་རྒྱུའི་དོགས་པ་བྱས་པ་རེད། འོན་ཀྱང་དོན་དངོས་ཐོག་ང་ཚོས་ལས་འགུལ་འདི་འདས་པའི་ལོ་ངོ་ ༣༠ ལས་མང་བར་རྒྱུན་བསྟུད་པར་བརྟེན། རྗེས་དྲན་ལས་འགུལ་འདི་ཧོང་ཀོང་བའི་རྒྱུད་ལ་འཇགས་ཟིན་པ་རེད། ཅེས་བརྗོད་ཡོད་འདུག

ཧོང་ཀོང་གི་ཉེན་རྟོག་པས་ཁྲོ་ཧང་ཐུང་གིས་སྤྱི་ཚོགས་དྲ་ལམ་བརྒྱུད་བཀག་སྡོམ་ཟིན་པའི་མི་མང་གི་འདུ་འཛོམས་(མང་རེ་ཁྲོམ་སྐོར་ལས་འགུལ་)དེ་ཉིད་ཁྱབ་བསྒྲགས་བྱས་པ་དང་། མི་མང་རྣམས་ལ་འདུ་འཛོམས་དེར་མཉམ་ཞུགས་དགོས་པའི་སྐུལ་སློང་བྱས་པའི་དོགས་གཞིའི་འོག་འཛིན་བཟུང་བྱས་ཡོད་སྐོར་བཤད་འདུག་ལ། ཁོང་མོ་དང་ལྷན་དུ་ད་བར་ཧོང་ཀོང་གི་བཟའ་མ་སྐྱེལ་འདྲེན་ཞབས་ཞུ་བ་ཞིག་གིས་ཀྱང་རང་གི་སྤྱི་ཚོགས་དྲ་ལམ་སྟེང་འདུ་འཛོམས་དེ་ཁྱབ་བསྒྲགས་བྱས་པའི་དོགས་གཞིའི་འོག་འཛིན་བཟུང་བྱས་ཡོད་འདུག

ལོ་ལྟར་དེ་རིང་འཛམ་གླིང་གི་གྲོང་ཁྱེར་ཆེ་ཁག་ཊོག་ཀྱོ་དང་། སིཌ་ནེ། ཐའེ་པེ། ལོན་ཌོན། བྷེར་ལིན། ཝ་ཤིང་ཊོན་བཅས་ཀྱི་ནང་དྲུག་བཞིའི་དམར་གསོད་རྗེས་དྲན་གྱི་མར་མེ་ཁྲོམ་སྐོར་ལས་འགུལ་སྤེལ་གཏན་འཁེལ་འདུག་ལ། ཧོང་ཀོང་གཞུང་གིས་སྔར་ལོ་ལྟར་འདི་ལོའང་གཉན་རིམས་ལ་ཁ་གཡར་ཏེ་མར་མེ་ཁྲོམ་སྐོར་ལས་འགུལ་དེར་བཀག་སྡོམ་བྱས་པར་འཛམ་གླིང་གི་འགྲོ་བ་མིའི་ཐོབ་ཐང་གི་ཚོགས་སྡེ་ཁག་གིས་སྐྱོན་བརྗོད་ཤུགས་ཆེན་པོ་བྱས་འདུག་ལ། ཨ་རིའི་གྲོས་ཚོགས་ཀྱི་རྒྱ་ནག་ལས་དོན་ཚོགས་ཆུང་ (Congressional-Executive Commission on China) གིས་བསྒྲགས་གཏམ་ཞིག་སྤེལ་བའི་ནང་། ཉིན་མོ་འདི་རྒྱ་ནག་ནང་ཡོད་པའི་མི་ཚང་མར་རང་དབང་དང་བཀག་སྡོམ་མེད་པའི་ཐོག་ནས་སྲུང་གཙི་བྱ་རྒྱུའི་དུས་ཚོད་ཅིག་མ་ཤར་བར་དུ་ང་ཚོས་ལོ་ལྟར་རྗེས་དྲན་ཞུ་རྒྱུ་ཡིན། ཞེས་དང་། རྒྱ་ནག་གཞུང་གིས་དམར་གསོད་བྱས་ཏེ་ལོ་ངོ་ ༣༢ རྗེས་ལའང་། རྒྱ་ནག་གི་མི་མང་རྣམས་ལ་གཞི་རྩའི་རང་དབང་སྤྱོད་རྒྱུར་དྲག་གནོན་བྱེད་ཀྱི་ཡོད་སྟབས། རྒྱལ་སྤྱིའི་སྤྱི་ཚོགས་ངོས་ནས་ནུས་པ་མཉམ་སྤུངས་ཀྱི་ཐོག་ནས་ཤིན་ཅང་(ཤར་ཊུར་ཀི་སི་ཐན་) ནང་གི་མི་རིགས་རྩ་མེད་ཀྱི་སྲིད་ཇུས་དང་། བོད་མིའི་རིག་གཞུང་རྩ་གཏོར་གྱི་སྲིད་ཇུས། དེ་བཞིན་རྒྱ་ནག་གི་མི་སེར་ས་ཡ་མང་པོའི་ཆོས་དད་རང་དབང་དང་། རྒྱལ་སྤྱིའི་ཆིངས་ཡིག་གིས་ཁས་ལེན་བྱས་པའི་ཧོང་ཀོང་གི་རང་དབང་གི་གནས་བབ་དེ་འཆར་གཞི་ལྡན་པའི་ཐོག་ནས་རྩ་མེད་གཏོང་བཞིན་པ་བཅས་ལ་འགོག་རྒོལ་བྱེད་དགོས། ཞེས་བརྗོད་ཡོད་འདུག

དུས་རྒྱུན་དྲུག་བཞིའི་དམར་གསོད་དོན་རྐྱེན་རྗེས་དྲན་ཞུ་སའི་རྒྱ་ནག་གི་ས་ཁུལ་གཞན་གཅིག་པོ་སྟེ། ཨོ་མིན་ (Macau) ཁུལ་དུའང་འདི་ལོར་ས་གནས་སྲིད་གཞུང་གི་མགོ་ཁྲིད་ཚོས་དྲུག་བཞིའི་མར་མེ་ཁྲོམ་སྐོར་ལས་འགུལ་སྤེལ་རྒྱུ་དེ་ས་གནས་ཀྱི་ཁྲིམས་སྒྲིག་དང་འགལ་ཡོད་སྐོར་བརྗོད་དེ་ལས་འགུལ་སྤེལ་མི་ཆོག་པ་བཟོས་ཡོད་འདུག ད་ལྟའི་ཆར་རྒྱ་ནག་གཞུང་གིས་གཏན་འབེབས་བྱས་པའི་ཧོང་ཀོང་གི་རྒྱལ་ཁབ་བདེ་འཇགས་ཟེར་བའི་ཁྲིམས་ཡིག་འོག་ཧོང་ཀོག་གི་ལས་འགུལ་བ་ ༡༠༠ ཡས་མས་ཤིག་འཛིན་བཟུང་བཀག་ཉར་བྱས་ཡོད་ཅིང་། མར་མེ་ཁྲོམ་སྐོར་ལས་འགུལ་གོ་སྒྲིག་བྱེད་མཁན་ཧོང་ཀོང་མནའ་འབྲེལ་མཐུན་ཚོགས་ཀྱི་ཚོགས་གཙོ་ཚོགས་མི་གཙོས་པའི། དུས་རྒྱུན་ལས་འགུལ་དེར་མཉམ་ཞུགས་ཀྱིས་སྣེ་ཁྲིད་ཀྱི་ནུས་པ་ལྡན་པའི་དམངས་གཙོ་དོན་གཉེར་བ་ཕལ་ཆེ་བ་འཛིན་བཟུང་བཀག་ཉར་ཡོད་པའམ། རེ་འགའ་ཉེན་ཡོལ་སླད་ཕྱི་རྒྱལ་ཁག་ཏུ་བྲོས་ཟིན་ཡོད་པ་རེད། འདས་ལོར་ཧོང་ཀོང་གཞུང་གིས་ཐེངས་དང་པོར་དྲུག་བཞི་རྗེས་དྲན་གྱི་མར་མེ་ཁྲོམ་སྐོར་ལས་འགུལ་དེ་འཚོག་མི་ཆོག་པའི་བཀའ་བཏང་ཡོད་ནའང་། ཉིན་དེར་ཧོང་ཀོང་གི་མི་མང་སྟོང་ཕྲག་བརྒལ་བ་ཝིག་ཊོ་རི་ཡ་སྤྱི་གླིང་དུ་འཛོམས་ཏེ་རྗེས་དྲན་གྱི་མར་མེ་བསྒྲོན་ཡོད་པ་རེད།

བྷི་བྷི་སི་གསར་ཁང་ལྟར་ན། དེ་རིང་ཧོང་ཀོང་གཞུང་གིས་གྲོང་ཁྱེར་གྱི་རྒྱ་ལམ་ཁག་ཏུ་ཉེན་རྟོག་པ་ ༧༠༠༠ ལྷག་འགྲེམ་འཇོག་བྱས་ཏེ། དྲུག་བཞི་རྗེས་དྲན་གྱི་ལས་འགུལ་ལ་དྲག་གནོན་བྱ་རྒྱུའི་རྣམ་འགྱུར་ཤུགས་ཆེར་བསྟན་ཡོད་ནའང་། འདས་པའི་ཉིན་གྲངས་འགའ་ཤས་གོང་ནས་ཧོང་ཀོང་གི་ལས་འགུལ་བ་དང་སྒྱུ་རྩལ་བ་རྣམས་ཀྱིས་ཐབས་མཁས་ཀྱི་ཐོག་ནས་དུས་དྲན་སྲུང་གཙི་བྱ་རྒྱུའི་འདུན་པ་བཏོན་པ་ལྟར། རེ་འགས་རང་ཁྱིམ་གྱི་གློག་གི་མཐུད་སྒོའི་སྟེང་དེ་རིང་གི་ཉིན་མོ་མཚོན་བྱེད་ཀྱི་ཨང་གྲངས་ ༦ དང་ ༤ འབྲི་དགོས་སྐོར་དང་། ཡང་སྒྱུ་རྩལ་བ་ཞིག་གིས་ཚད་གཞི་དཀྱུས་ལ་ ༦ དང་ཞེང་ལ་ ༤ ཅན་གྱི་གྲུ་བཞི་ནར་མོ་ཚོན་མདོག་ནག་པོ་ཅན་ཞིག་བཀོད་པའི་སྟོང་ཐུང་དཀར་གཙང་ཞིག་གྱོན་དགོས་པའི་བསམ་ཚུལ་བཏོན་འདུག་ལ། ཕལ་ཆེ་བས་རང་ཁྱིམ་གྱི་མདུན་དུ་མར་མེ་སྒྲོན་དགོས་པའི་རེ་སྐུལ་ཞུས་ཡོད་འདུག

རྒྱ་ནག་སྐམ་ས་ཆེན་མོ་ནང་མཚོན་ན་དུས་རྒྱུན་ནས་ཕྱི་ལོ་ ༡༩༨༩ ལོའི་གནམ་བདེ་སྒོ་མོ་ཆེའི་གནད་དོན་སྐོར་གླེང་སློང་བྱ་རྒྱུ་ཕར་ཟད། ཐ་ན་དེ་དང་འབྲེལ་བའི་གནད་དོན་དང་ཅ་དངོས་སོགས་ཀྱི་སྐོར་གླེང་སློང་བྱ་ཆོག་གི་མེད་པ་རེད། དེ་རིང་ལྟ་བུར་མཚོན་ན་རྒྱ་ནག་གཞུང་གིས་དམར་གསོད་ཆེན་མོ་དེ་ཉིད་རྗེས་དྲན་གྱི་མཚོན་བྱེད་གཙོ་བོར་གྱུར་བའི་ཨང་ཀི་ ༦ དང་ ༤ ཡང་དྲ་ལམ་སོགས་ནས་བཀག་སྡོམ་བྱེད་བཞིན་ཡོད་པ་རེད།

གསར་འགོད་པ། པ་སངས་ཚེ་རིང་།