ཁ་སང་རྒྱ་གར་གྱི་རྒྱལ་སྲུང་བློན་ཆེན་རཱ་ཇི་ནཱ་ཐི་སིང་ (Rajnath Singh)མཆོག་ལ་དྭགས་སུ་ཕྱོགས་ཕེབས་གནང་སྟེ་ཉིན་གནིས་རིང་ས་གནས་སུ་ཡོད་པའི་རྒྱ་གར་གྱི་དམག་ཁུལ་ཁག་གི་དཔོན་རིགས་རྣམས་དང་ཐུག་འཕྲད་ཀྱིས་ས་མཚམས་ཁུལ་གྱི་དམག་དོན་ཐད་གཟིགས་ཞིབ་གནང་བཞིན་ཡོད་འདུག
རྒྱ་གར་གྱི་གསར་ལམ་ཁག་ཏུ་གནས་ཚུལ་ཐོན་བཞིན་པ་ལྟར་ན། འདས་ལོའི་རྒྱ་དཀར་ནག་གི་དམག་མིའི་གདོང་ཐུག་རྗེས་ཕྱོགས་གཉིས་དབར་གྲོས་མོལ་བྱེད་བཞིན་པའི་སྐབས་འདིར། རྒྱ་གར་གྱི་རྒྱལ་སྲུང་བློན་ཆེན་གྱི་ཕྱོགས་སྐྱོད་འདི་ནི་རྒྱ་དཀར་ནག་གི་དམག་མི་རྣམས་དཔལ་མགོན་མཚོ་ཁུལ་ནས་ཕྱིར་འཐེན་བྱས་རྗེས་ཀྱི་ཐོག་མ་དེ་ཡིན་པ་མ་ཟད། ད་ལན་གྱི་ཕྱོགས་སྐྱོད་སྐབས་རྒྱ་གར་གྱི་དམག་སྤྱི་ཆེན་མོ་མ་ནོ་ཇི་མུ་ཀུན་ཌི་ན་ར་ཝེན་(Gen. Manoj Mukund Naravane)ལགས་ཀྱང་ཕེབས་ཡོད་འདུག་ལ། རྒྱལ་སྲུང་ལྷན་ཁང་གིས་བསྒྲགས་པ་ལྟར་ན། དེ་རིང་རྒྱལ་སྲུང་བློན་ཆེན་མཆོག་ནས་རྒྱ་གར་གྱི་ས་མཚམས་ཀྱི་གཞུང་ལམ་འཛུགས་སྐྲུན་དོ་དམ་ལས་ཁུངས་(Border Roads Organization)ཀྱི་འཛུགས་སྐྲུན་ལས་གཞི་གསར་པ་ ༦༣ ལྷག་དབུ་འབྱེད་གནང་རྒྱུ་ཡིན་འདུག
འདས་ལོའི་ཕྱི་ཟླ་ ༥ པའི་ནང་འཕགས་བོད་ས་མཚམས་ཀྱི་གྷལ་ཝན་ལུང་གཤོངས་སུ་རྒྱ་དཀར་ནག་གི་དམག་མིའི་བར་གདོང་ཐུག་ཁྲོད་ནས་ཕྱོགས་གཉིས་ཀའི་དམག་མི་ལ་ཤི་རྨས་ཚབས་ཆེར་བྱུང་རྗེས། ད་བར་རྒྱ་གར་དང་རྒྱ་ནག་དབར་ས་མཚམས་ཀྱི་རྩོད་རྙོག་ཞི་འཇགས་ཀྱི་ཆེད་དུ་ཕྱི་འབྲེལ་མི་སྣའི་སྐུ་ཚབ་ཀྱི་རིམ་པ་དང་། དམག་དོན་སྐུ་ཚབ་ཀྱི་རིམ་པ་བཅས་རིམ་པ་གཉིས་ཀྱི་སྟེང་ནས་གྲོས་མོལ་བྱེད་མུས་ཡིན་ལ། ད་བར་ཕྱོགས་གཉིས་ཀྱི་དམག་དོན་སྐུ་ཚབ་བར་ལ་གྲོས་མོལ་ཐེངས་ ༡༡ བྱས་ཟིན་ལ། འདི་ལོའི་ཕྱི་ཟླ་ ༢ པའི་ནང་གྲོས་མོལ་བརྒྱུད་དཔལ་མགོན་མཚོ་ཁུལ་དུ་འགྲེམ་འཇོག་བྱས་པའི་ཕྱོགས་གཉིས་ཀྱི་དམག་མི་དང་གོ་མཚོན་མེ་སྒྱོགས་རྣམས་ཕྱིར་འཐེན་བྱས་པ་མ་ཟད། དམག་གི་འཛིང་ར་རྣམས་མར་བཤིག་ཟིན་པ་རེད།
འོན་ཀྱང་ད་ལྟའི་ཆར་ལ་དྭགས་ཀྱི་ཤར་རྒྱུད་བྱང་ཆེན་མོ་རྒྱུག་ཆུ་ (Chang Chenmo River Valley) རྒྱུད་དུ་ཆགས་པའི་ས་ཁུལ་གསུམ་སྟེ། བཀའ་བློན་ཆུ་མིག(Hot Springs) གོག་ར་ (Gogra)། འདེབས་བཟང་ལ་ (Depsang La)
བཅས་ནང་རྒྱ་ནག་གིས་རང་གི་དམག་མི་རྣམས་ཕྱིར་འཐེན་བྱེད་ཀྱི་མེད་པའི་རྒྱུ་མཚན་གྱིས་ཁུལ་དེར་ད་དུང་ཕྱོགས་གཉིས་ཀྱི་དམག་མི་རྣམས་གནས་མུས་ཡིན་པ་རེད། ཉེ་ཆར་རྒྱ་གར་དམག་སྤྱི་ཆེན་མོས་རྩོད་རྙོག་འབྱུང་སའི་ས་ཁུལ་ཚང་མ་ནས་དམག་མི་དང་གོ་མཚོན་ཕྱིར་འཐེན་མ་བྱས་བར་དུ་རྩོད་རྙོག་ཞི་འཇགས་ཡོང་ཐབས་མེད་པ་དང་། རྒྱ་གར་གྱི་དམག་མི་རྣམས་ངེས་གཏན་མེད་པའི་འབྱུང་འགྱུར་གྱི་གནས་ཚུལ་གང་ལའང་གྲ་སྒྲིག་ཨང་གསར་ཡིན་སྐོར་བརྗོད་འདུག ཡང་ཉེ་ཆར་ཕྱི་ཚེས་ ༢༥ ཉིན་ཕྱོགས་གཉིས་ཀྱི་ཕྱི་འབྲེལ་མི་སྣའི་གྲོལ་མོལ་སྐབས་མི་རིང་བར་དམག་དོན་སྐུ་ཚབ་ཀྱི་གྲོས་མོལ་ཞིག་ཚོགས་ཏེ་ད་ཡོད་ཀྱི་རྩོད་རྙོག་ལྷག་འཕྲོ་རྣམས་ཞི་འགྲིག་བྱ་རྒྱུ་ཡིན་སྐོར་བསྒྲགས་ཡོད་འདུགགཞན་ཡང་། རྒྱ་གར་གྱི་གསར་ལམ་ཁག་ཏུ་དེ་འབྲེལ་གྱི་གནས་ཚུལ་ཞིག་ཐོན་པ་ལྟར་ན། རྒྱ་གར་གྱིས་འདས་པའི་ཟླ་བ་འགའ་ཤས་ནང་འཕགས་བོད་ས་མཚམས་སུ་ཁྱོན་དམག་མི་ཁྲི་ ༥ ལྷག་ཁ་སྣོན་བྱས་ཏེ། ད་ལྟ་ཧིན་བོད་ས་མཚམས་ཁུལ་དུ་རྒྱ་གར་གྱི་དམག་མི་འབུམ་ ༢ ལྷག་འགྲེམ་འཇོག་བྱས་ཡོད་འདུག དམག་གི་གྲངས་འབོར་དེ་ནི་སྔར་ལོ་དང་བསྡུར་བརྒྱ་ཆ་ ༤༠ ཡིས་མང་བ་ཡིན་འདུག སྤྱིར་རྒྱ་གར་རང་བཙན་ཐོབ་པ་བཟུང་ད་བར་རྒྱ་གར་གྱི་རྒྱལ་སྲུང་གི་དམིགས་གཏན་གཙོ་བོ་དེ་ཁྱིམ་མཚེས་རྒྱལ་ཁབ་པཱ་ཀི་སི་ཐན་ཡིན་ནའང་། ད་ལྟའི་རྒྱ་གར་གྱི་རྒྱལ་སྲུང་སྲིད་ཇུས་དེ་རྒྱ་ནག་ལ་གཞོལ་ཆེ་བ་དང་། དེ་སྔ་ཡིན་ན་རྒྱ་གར་གྱིས་འཕགས་བོད་ས་མཚམས་སུ་དམག་མི་དང་གོ་མཚོན་འགྲེམ་འཇོག་རྣམས་རྒྱ་ནག་གི་བཙན་འཛུལ་ལམ་དམག་དོན་བྱ་འགུལ་ལ་བཀག་འགོག་དང་ཚོད་འཛིན་བྱ་ཆེད་ཁོ་ན་ཡིན་ནའང་། འདས་པའི་ལོ་གཅིག་ནང་རྒྱ་གར་གྱི་འཕགས་བོད་ས་མཚམས་ཁུལ་སྤྱི་དང་། ལྷག་པར་དུ་ལ་དྭགས་ཁུལ་དུ་འཐབ་འཁྲུག་གནམ་གྲུ་དང་། མེ་སྒྱོགས་གསར་བ་ཁ་སྣོན་བྱས་ཏེ་རྒྱ་ནག་ལ་ཕར་རྒོལ་བྱེད་པའི་ནུས་པ་མཐོར་འདེགས་བྱེད་མུས་སྒང་རེད།
ད་ལྟ་འཕགས་བོད་ས་མཚམས་ཀྱི་བོད་ཕྱོགས་སུ་རྒྱ་ནག་གིས་དམག་མི་ཇི་ཙམ་འགྲེམ་འཇོག་བྱས་ཡོད་མེད་གསལ་ཁ་མེད་ནའང་། འདས་པའི་ལོ་ཤས་ནང་རྒྱ་ནག་གིས་ལ་དྭགས་དང་ས་འབྲེལ་ཆགས་པའི་མངའ་རིས་ཁུལ་དུ་གཞི་རྒྱ་ཆེ་བའི་དམག་སྦྱོང་ལས་གཞི་སྤེལ་བ་དང་། དེ་བཞིན་ས་འབབ་ལ་གཞིགས་ཏེ་ལ་ངོར་འཛེགས་ཐུབ་པ་དང་། འཕེན་ཤུགས་ཆེ་བའི་མེ་སྒྱོགས་གསར་བ་འགྲེམ་འཇོག་དང་། ས་མཚམས་ཁུལ་དུ་འཐབ་འཁྲུག་གནམ་གྲུ་འཇོག་སའི་ས་ཚིགས་འཛུགས་སྐྲུན་དང་། ཉེ་ཆར་རྒྱ་ནག་བཅིངས་གྲོལ་དམག་ཟེར་བས་འཕགས་བོད་ས་མཚམས་སུ་ཉེན་སྲུང་བྱེད་མཁན་གྱི་ཤིན་ཅང་དམག་ཁུལ་ཁང་ (Xinjiang Military Command)ལ་དམག་མི་ཁ་སྣོན་བྱས་པ་སོགས་རྒྱ་ནག་ཕྱོགས་ནས་ཀྱང་དམག་དོན་གྱི་བྱ་འགུལ་སྔར་བས་ཤུགས་ཆེར་སྤེལ་བཞིན་པ་མངོན་གསལ་ཡིན་འདུག
གསར་འགོད་པ། པ་སངས་ཚེ་རིང་།
གཞན་ཡང་། རྒྱ་གར་གྱི་གསར་ལམ་ཁག་ཏུ
