ཟླ་འདིའི་ཕྱི་ཚེས་ ༡ ཉིན་རྒྱལ་སྤྱིའི་བོད་དོན་ལས་འགུལ་ཁང་གི་ཡུ་རོབ་ཚན་པའི་འཛིན་སྐྱོང་ལྷན་ཚོགས་ངོས་ནས་སྤྱི་ཟུར་བཀྲས་མཐོང་བསྟན་འཛིན་དབང་པོ་ལགས་ཚན་པ་དེའི་ལག་བསྟར་འགན་འཛིན་དུ་བསྐོ་གཞག་ཞུ་རྒྱུའི་ཐག་གཅོད་བྱས་པ་ལྟར་འདི་ལོའི་ཕྱི་ཟླ་ ༡༠ ཚེས་ ༣༡ ནས་འགན་འཛིན་གྱི་ལས་འཁུར་མགོ་འཛུགས་བྱ་རྒྱུ་ཡིན་འདུག
Former MP of TPiE Tethong Wangpo (International Campaign for Tibet)
ཡུ་རོབ་ཀྱི་རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་ལྷན་ཚོགས་ཀྱི་ཚོགས་གཙོ་སྐུ་ཞབས་ཇེན་ཨེན་ཌར་སན་ (Jan Anderson) ལགས་ཀྱིས་ལྷན་ཚོགས་ཀྱི་ཐག་གཅོད་དེའི་སྐོར་ནས་བརྗོད་དོན། ངས་དབང་པོ་ལགས་འདས་པའི་ལོ་ངོ་ ༣༠ ལྷག་གི་གོང་ནས་ངོ་ཤེས་ཏེ། ཁོང་གི་བོད་དོན་འཐབ་རྩོད་ཀྱི་ལས་འགུལ་ལ་བཅངས་པའི་ཆོད་སེམས་དེ་ཡང་མཐོང་མྱོང་། ཁོང་ལ་བཙན་བྱོལ་བོད་མིའི་སྒྲིག་འཛུགས་ཁག་དང་བོད་དོན་རྒྱབ་སྐྱོར་བའི་སྡེ་ཁག དེ་བཞིན་བོད་དོན་མ་ཡིན་པའི་སྤྱི་ཚོགས་དང་ཁོར་ཡུག་གི་ལས་འགུལ་ནང་ཕྱག་ལས་གནང་བའི་ཉམས་མྱོང་ཕུན་སུམ་ལྡན་པ་ཡོད། ཅེས་དང་། དེ་བཞིན་ངས་ད་ལྟའི་འགན་འཛིན་ཚེ་རིང་བྱམས་པ་ལགས་ཀྱིས་འདས་པའི་ལོ་ངོ་ ༢༠ ལྷག་གི་རིང་ཆོད་སེམས་བརྟན་པོའི་ཐོག་ནས་ཕྱག་ལས་ཧུར་ཐག་གནང་བར་བསྔགས་བརྗོད་དང་ཐུགས་རྗེ་ཆེ་ཞུ། ཞེས་བརྗོད་ཡོད་འདུག
ལས་འགུལ་ཁང་དེའི་གཞུང་འབྲེལ་དྲ་ཚིགས་སྟེང་སྤེལ་བའི་གནས་ཚུལ་ལྟར་ན། ཕྱི་ལོ་ ༡༩༩༩ ལོར་ཡུ་རོབ་ཀྱི་རྒྱལ་སྤྱིའི་བོད་དོན་ལས་འགུལ་ཁང་ཐོག་མར་གསར་འཛུགས་བྱེད་མཁན་དང་། ད་ལྟའི་ལག་བསྟར་འགན་འཛིན་ཚེ་རིང་བྱམས་པ་ལགས་འདི་ལོའི་ཕྱི་ཟླ་ ༡༠ ཚེས་ ༣༡ ཉིན་རྒས་ཡོལ་དུ་ཕེབས་ཀྱི་ཡོད་པར་བརྟེན། ཁོང་མོའི་ཚབ་ཏུ་བཀྲས་མཐོང་བསྟན་འཛིན་དབང་པོ་ལགས་བསྐོ་གཞག་གནང་གཏན་འཁེལ་བ་ཞིག་ཡིན་འདུག
ཕྱི་ལོ་ ༢༠༡༤ ལོར་སྐབས་དེའི་ཡུ་རོབ་ཀྱི་སྤྱི་འཐུས་ལས་ཐོག་ཆུང་བདག་ཀོ་རིན་ལགས་ནད་གཞིའི་རྐྱེན་པས་སྤྱི་འཐུས་ལྷན་ཚོགས་ནང་རྩ་དགོངས་ཞུས་པར་བརྟེན། ཡུ་རོབ་སྤྱི་འཐུས་ཀྱི་སྒུག་ཐོ་དང་པོའི་ནང་ཡོད་པའི་བཀྲས་མཐོང་བསྟན་འཛིན་དབང་པོ་ལགས་ལོ་དེའི་ཕྱི་ཟླ་ ༥ ཚེས་ ༦ ཉིན་ཡུ་རོབ་སྤྱི་འཐུས་གསར་བར་དམ་འབུལ་བསྐོ་གཞག་བྱས་ཡོད་པ་རེད། དེ་བཞིན་བོད་དོན་ལས་འགུལ་སྤེལ་བཞིན་པའི་གནས་སྟངས་དང་ནད་ཡམས་ཀྱི་རྐྱེན་པས་སྤྱི་འཐུས་གྲོས་ཚོགས་སུ་སྐབས་གཉིས་བསྟུད་མར་ཚོགས་བཅར་ཞུ་མ་ཐུབ་པའི་རྐྱེན་གྱིས། འདས་ལོར་རང་བཞིན་གྱིས་ཕྱིར་འབུད་སོང་བའི་བོད་མི་མང་སྤྱི་འཐུས་སྐབས་ ༡༦ པའི་ཡུ་རོབ་ཀྱི་སྤྱི་འཐུས་ཐུབ་བསྟན་དབང་ཆེན་ལགས་ཀྱི་ཚབ་ཏུ་བཀྲས་མཐོང་དབང་པོ་ལགས་བསྐོ་གཞག་བྱེད་གཏན་འཁེལ་ཡོད་ནའང་། དམ་འབུལ་ཞུ་མ་ཐུབ་པའི་རྐྱེན་གྱིས་བསྐོ་གཞག་གནང་ཐུབ་མེད་པ་རེད།
བཀྲས་མཐོང་བསྟན་འཛིན་དབང་པོ་ལགས་ནི་སུད་སིར་སྐྱེས་ཤིང་། ཛུ་རིག་གཙུག་ལག་སློབ་གྲྭ་ཆེན་མོ་ནས་སློབ་མཐར་སོང་རྗེས། སུད་སིའི་ཁོར་ཡུག་ཚོགས་པ་གྷི་རིན་པི་སི་ (Greenpeace Switzerland) དང་། སུད་སིའི་རྒྱལ་ས་ཛ་རིག་ཏུ་རྟེན་གཞི་བྱས་པའི་གྷི་རིན་སྲིད་དོན་ཚོགས་པ་ (Green Party Zurich) བཅས་ཀྱིས་མཚོན་པའི་ཁོར་ཡུག་དང་ཚབ་སྲིད་ཚོགས་པ་གནད་ཆེན་ཁག་དང་། དེ་བཞིན་ཡོ་རོབ་བོད་རིགས་གཞོན་ནུའི་མཐུན་ཚོགས་ (Tibetan Youth Association in Europe) དང་། སུད་བོད་མཐུན་གྲོགས་ཚོགས་པ་ (Swiss Tibetan Friendship Society) བཅས་ཀྱིས་མཚན་པའི་བོད་དོན་ལས་འགུལ་ཁང་དང་ཚོགས་པའི་ནང་ཕྱག་ལས་གནང་ཡོད་འདུག
གསར་འགོད་པ། པ་སངས་ཚེ་རིང་།
? ལྟས་ངན་རེད། ཐུ རྣམ་རྟོག་སློང་།