༧གོང་ས་མཆོག་གིས་ཆབ་སྲིད་ཀྱི་འགྱུར་འགྲོས་ཇི་ཙམ་ཕྱིན་ཡང་ལ་དྭགས་པ་རྣམས་ད་ལྟའང་ཆོས་ཕྱོགས་ཀྱི་དད་པ་དམ་ཚིག་བརྟན་པོར་གནས་ཡོད་པ་རེད་ཅེས་གསུངས་སོང་།
ཇོ་བོ་རྗེ་དཔལ་ལྡན་ཨ་ཏི་ཤས་མཛད་པའི་བྱང་ཆུབ་ལམ་གྱི་སྒྲོན་མེའི་གསུང་ཆོས་ཉིན་གཉིས་པའི་སྔ་དྲོར། ༧གོང་ས་སྐྱབས་མགོན་ཆེན་པོ་མཆོག་གིས། དེང་གི་ཆར་འཛམ་གླིང་འདི་ཡར་རྒྱས་ཆེན་པོ་ཕྱིན་ཡོད་པ་དང་། ཕྱིའི་དངོས་ཁམས་རིག་པ་དང་འབྲེལ་ཚན་རིག་གི་བསམ་བློ་ཤུགས་ཆེན་ལྡན་པའི་སྐབས་སུ། ཆོས་ཀྱི་དགོས་མཁོ་ཡོད་དམ་ཞེས་ན། དངོས་ཡོད་གནས་ཚུལ་ལ་དངོས་པོ་ཡར་རྒྱས་ཇི་ཙམ་ཕྱིན་ནའང། ཕྱིའི་ལུས་པོའི་བདེ་ཐང་ལ་ཕན་ཐོགས་ཡོང་བ་ཞིག་མ་གཏོགས་ནང་སེམས་མ་སྐྱིད་པ་ཡོང་བ་དང་སེམས་འཁྲུག་གི་ཡོད། དེའི་ཕྱིར་ཕྱིའི་དངོས་པོ་ཡར་རྒྱས་ཀྱིས་ནང་སེམས་ཀྱི་བདེ་སྐྱིད་སྐྲུན་ཐབས་མེད་པ་རེད། ཕྱིའི་དངོས་པོའི་ཡར་རྒྱས་དགོས་པ་དང་ཆབས་ཅིག་ནང་བསམ་བློར་ཞི་བདེ་གལ་ཆེན་པོ་རེད། ནང་སེམས་ཀྱི་ཞི་བདེ་ནི་འཕྲུལ་རིགས་དང་ཁབ་རྒྱག་པ་ཙམ་གྱིས། གནས་སྐབས་ཀྱི་རིང་ལ་སེམས་ལྷོད་ལྷོད་ཆགས་པ་མ་གཏོགས། ཕྱིའི་སྨན་བཅོས་ཀྱི་ཐོག་ནས་སེམས་ཀྱི་ཞི་བདེ་བཟོ་མི་ཐུབ། དེར་བརྟེན་ནང་སེམས་ཀྱི་ཞི་བདེ་ནི་ཕྱིའི་དངོས་པོའི་ཡར་རྒྱས་ཀྱིས་སྐྲུན་ཐུབ་པ་ཞིག་མིན། ནང་སེམས་ཀྱི་ཞི་བདེ་ནི་སེམས་ཁམས་རིག་པ་དང་འབྲེལ་བའི་ཐོག་ནས་བློ་སྦྱངས་དགོས་པ་དང་། རྣམ་རྟོག་གང་གིས་སེམས་འཁྲུགས་པ་བྱས་ཡོད་པ་དང་དེའི་གཉེན་པོ་གང་ཡིན་པ་དེར་དཔྱད་ཞིབ་བྱས་ནས་བསམ་གཞིག་བྱ་རྒྱུ་ཧ་ཅང་གལ་གནད་ཆེན་པོ་ཡིན་པ་རེད། དེང་གི་ཆར་ཚན་རིག་པའི་ཁྲོད་སེམས་ཁམས་རིག་པ་དང་འབྲེལ་ནས་ནང་སེམས་ཞི་བདེ་སྐྲུན་ཐབས་ལ་སྒོམ་རྒྱག་པ་དང་། སངས་རྒྱས་པའི་ཆོས་ཀྱི་ཐོག་ནས་བྱམས་བརྩེའི་ཉམས་དང་ཚད་མཐོ་རུ་ཕྱིན་ཚེ། ཞི་གནས་དང་ལྷག་མཐོང་བཅས་སྒོམ་ནས་སེམས་ཀྱི་ཞི་བདེ་སྐྲུན་གྱི་ཡོད། སྐྱེ་བ་སྔ་ཕྱིར་དོ་སྣང་མེད་པའི་རིགས་ཀྱིས་སེམས་ཀྱི་ཞི་བདེ་སྐྲུན་ཐབས་ལ་འབད་འབུངས་དང་དོ་སྣང་བྱེད་མུས་ཡིན་པ་དང་། དཀོན་མཆོག་མཁྱེན་ཞེས་སྨོན་ལམ་བཏབ་པ་ཁོ་ནས་སེམས་ཀྱི་ཞི་བདེ་གང་ཙམ་བསྒྲུབས་ཐུབ་ཀྱང་། སེམས་ཀྱི་འགྲོ་སྟངས་ཡག་པོ་ཤེས་ནས་བསམ་བློ་གཏང་རྒྱུ་གལ་ཡིན་པོ་ཡིན་པ་རེད། སྤྱིར་ཆོས་ལུགས་ཚང་མས་བྱམས་བརྩེ་གསུང་གི་ཡོད་པས་ཞེ་དྲག་ཡག་པོ་འདུག་ཀྱང་། ནང་ཆོས་ནི་ནང་སེམས་ཀྱི་ཞི་བདེ་སྐྲུན་པར་ཞིབ་ཚགས་ཤོས་དང་རྒྱ་ཆེ་ཤོས་ཡིན་པ་རེད། ཅེས་གསུངས་སོང་།
ཡང་༧ མགོན་པོ་གང་གིས། ལ་དྭགས་ཀྱི་ཆོས་གྲོགས་ཚོའི་ཕ་མེས་རྣམས་སངས་རྒྱས་བསྟན་པའི་རྗེས་སུ་ཞུགས་མཁན་རེད། ད་ལྟའང་ཆབ་སྲིད་ཀྱི་འགྱུར་འགྲོས་ཇི་ཙམ་ཕྱིན་ནའང་ཆོས་ཕྱོགས་ཀྱི་དད་པ་དམ་ཚིག་བརྟན་པོར་གནས་ཡོད་པ་རེད། ངོས་ནས་ལ་དྭགས་སུ་ཡོད་པའི་དགོན་པ་ཚོས་འདོན་པ་དང་གཏོར་རྒྱག གཡང་སྒྲུབ་ཁོ་ན་མ་ཡིན་པར། སློབ་གཉེར་བྱ་རྒྱུར་མངགས་པ་དང་། སློབ་གྲྭ་ཁག་ཏུ་བློ་རིག་དང་རྟགས་རིགས་སོགས་བསླབ་ཐུབ་ན་ཡག་པོ་འདུག་ཅེས་ཞུས་ཡིན། ནང་ཆོས་འཛིན་མཁན་དག་གི་གཞུང་ཆེན་སྦྱངས་དགོས་ཤིང་དེས་ཕན་ཐོགས་རླབས་ཆེན་ཡོང་གི་ཡོད་པ་རེད། སེམས་ཁམས་རིག་པ་དང་འབྲེལ་ནས་རྒྱུ་མཚན་དང་གནས་ལུགས་ཀྱི་ཐོག་ནས་སེམས་དཀྲུག་མཁན་གང་ཡིན་པ་དང་། སེམས་ཀྱི་ཞི་བདེ་གང་ནས་རག་གི་ཡོད་པར་ཞིབ་ཚགས་ཀྱིས་ཉམས་ལེན་བྱེད་མཁན་ནི་ནང་ཆོས་ཡིན། ཆོས་ཞེས་པ་ནི་དུས་ཚོད་རྙིང་པའི་སྐད་ཆ་ཞིག་གཏན་ནས་མིན་པར། སེམས་འཁྲུགས་ནས་མི་སྐྱིད་པ་ཡོང་བསྡད་པ་དེར་ཆོས་ཕྱོགས་ཀྱི་བསམ་བློ་བཏང་ནས་ནང་སེམས་ཀྱི་ཞི་བདེ་སྐྲུན་ཐུབ་ཀྱི་ཡོད་པ་རེད། ཅེས་གསུངས་སོང་།
དེ་ནས་བཀའ་འདྲི་བཀའ་ལན་ནང་མཐོ་རིམ་སློབ་མ་བསྟན་འཛིན་ལྷ་སྒྲོན་གྱིས། ང་ཚོས་རང་གཞན་གཉིས་ཀར་མི་གནོད་སླད་ཁྲོང་ཚོ་ཇི་ལྟར་ཚོད་འཛིན་དགོས་སྐོར་བཀའ་འདྲི་ཞུས་པར། ༧གོང་ས་མཆོག་གིས། ཁོང་ཁྲོ་ཞེས་པ་ནི་ཚོར་བ་(emotion ) ཤུགས་ཆེན་པོ་ཞིག་རེད། ཁོང་ཁྲོ་ནི་རྒྱུ་མཚན་གང་ཡང་མེད་པར་གློ་བུར་དུ་ལངས་བ་ཞིག་ཡིན། ཕྱོགས་གཅིག་ནས་དོན་གྱི་ངོས་ལ་ཡོད་པ་ཞིག་གཞི་ལ་བཞག་ནས་དེའི་ཐོག་ཏུ་ཁོང་ཁྲོ་ལངས་བ་རེད། སོ་སོར་དགོས་པ་ཞིག་མ་ཐོབ་ཚེ་ཁོང་ཁྲོ་ལངས་ནའང་ཐོབ་ཐབས་མེད། ཆབ་སྲིད་མཁས་པ་ཚོས་ཁོང་ཁྲོ་ལངས་ནས་གདོང་ནག་པོ་བསྟན་ན། ལས་དོན་མི་སྒྲུབ་པ་ཤེས་ཀྱི་ཡོད་པས། ཁོང་ཁྲོ་ལངས་ནའང་ཕྱིའི་རྣམ་པ་ཡག་པོ་བསྟན་ཀྱི་ཡོད། དེའི་རྒྱུ་མཚན་ནི་ཁོང་ཁྲོ་ལངས་ན་ཕན་ཐོགས་མེད་པ་རྟོགས་ཀྱི་ཡོད། ཆོས་ཕྱོགས་ནས་བཤད་ན། ང་ཚོ་ནི་སྤྱི་ཚོགས་སེམས་ཅན་ཡིན་པས། རང་ཉིད་འཚོ་བར་གཞན་ལ་བརྟེན་དགོས་པས། རང་ཉིད་གང་ལ་བརྟེན་པའི་སྤྱི་ཚོགས་ལ་ཁོང་ཁྲོ་ལངས་ན་སོ་སོར་གྱོང་གུད་ཡིན་པ་རེད། ཆོས་ཕྱོགས་ནས་རྒྱལ་སྲས་ཞི་བ་ལྷའི་སྤྱོད་འཇུག་ལྟ་ཀློག་བྱ་དགོས་པ་དང་། བཟོད་པའི་ལེའུ་སོགས་ལྟ་ཀློག་བྱེད་ཐུབ་ན་ཕན་ཐོགས་ཆེན་པོ་ཡོད་སྐོར་གསུངས་སོང་།
ཡང་སློབ་ཕྲུག་མི་ཧག་ཧྥ་ཊི་མཱ( Mehak Fatima) ཡིས། ནང་པ་ཙམ་མ་ཡིན་པར་ཆོས་ལུགས་གཞན་གྱི་མི་མང་པོས་༧སྐྱབས་མགོན་རིན་པོ་ཆེར་དགའ་མོས་ཞུ་ཡི་ཡོད་པར་༧མགོན་པོ་མཆོག་ལ་དགོངས་ཚུལ་གང་ཡོད་སྐོར་བཀའ་འདྲི་ཞུར་པར། ༧གོང་ས་མཆོག་གིས། སེམས་བཟང་པོ་བྱ་རྒྱུ་ཆོས་ལུགས་ཚང་མས་གསུང་གི་ཡོད། དེའི་རྒྱུ་མཚན་དུ་འཇིག་རྟེན་བཀོད་པ་པོ་འདོད་མཁན་ཚོས་འགྲེལ་བཤད་རྒྱག་ལུགས་ཤིག་དང་། འཇིག་རྟེན་བཀོད་པ་པོ་མི་འདོད་མཁན་གྱི་ལས་རྒྱུ་འབྲས་ཁས་ལེན་པའི་ཐོག་ནས་བཤད་ལུགས་ཤིག་ཡོད། སོ་སོའི་ལུགས་ལ་གཞིགས་པའི་རྒྱུ་མཚན་བཀོད་སྟངས་མི་འདྲ་བ་ཙམ་ལས། སེམས་པ་བཟང་པོ་བྱ་རྒྱུ་ཆོས་ལུགས་ཚང་མས་གསུང་གི་ཡོད། འཇིག་རྟེན་བཀོད་པ་པོའི་འདོད་ལུགས་ལྟར་ན། ང་ཚོ་ཚང་མ་དཀོན་མཆོག་གིས་བཀོད་པ་དང་། དཀོན་མཆོག་ཁོང་ཉིད་ནི་བྱམས་བརྩེའི་བདག་ཉིད་ཅན་ཞིག་ལས། ཁོང་ཁྲོའི་བདག་ཉིད་ཀྱི་དཀོན་མཆོག་ཅིག་མེད་པས། དཀོན་མཆོག་གི་རྗེས་སུ་འབྲང་མཁན་ཞིག་ཡིན་ན་བྱམས་བརྩེར་བསམ་བློ་གཏོང་དགོས་པ་ལས་གཞན་ཅི་ཡང་མེད། ཆོས་ཁས་མི་ལེན་མཁན་གྱི་མི་ཞིག་ཡིན་ཡང་། ཁྲོང་ཁྲོ་ལངས་ནས་གདོང་ནག་པོ་བསྟན་ཚེ། ཁྱི་ཞིག་ཡིན་ཡང་མི་དགའ་བ་བྱེད་པ་དང་། དེ་ལས་ལྡོག་ནས་མི་ཞིག་འཛུམ་གྱིས་ཕྱུག་ནས་ཡོང་ན་རྔ་མ་རིལ་རིལ་གཡུག་གི་ཡོད། མདོར་ན་ཁོང་ཁྲོས་གཏན་ནས་མི་ཕན་པས། ཆོས་ལུགས་ཚང་མས་ཁྲོང་ཁྲོའི་ཉེས་དམིགས་བཤད་དེ་བྱམས་བརྩེ་དགོས་པར་བཤད་པ་བཞིན། ཆོས་ལུགས་སོ་སོར་ལྟ་གྲུབ་འདྲ་མིན་ཡོད་པ་ནི་སྒེར་གྱི་གནད་དོན་ཞིག་ཡིན། ཐམས་ཅད་ལ་ཁམས་དང་མོས་པ་མི་འདྲ་བས་ཆོས་ལུགས་མི་འདྲ་བ་ཙམ་ལས། ཚང་མས་སེམས་པ་བཟང་པོ་བྱ་རྒྱུ་སྐོར་ལ་གསུང་གི་ཡོད་ལ། ངོས་ནས་ཀྱང་གཙོ་འདོན་བྱས་ནས་བཤད་ཀྱི་ཡོད། གཉིས་ནས་ཆོས་ལུགས་ཚང་མར་མཐུན་སྒྲིལ་བྱ་རྒྱུ་ནི་གལ་ཆེན་མཐོང་གི་ཡོད་པས། ངོས་ནས་ཆོས་ལུགས་ཚང་མར་གུས་ཞབས་བྱེད་མུས་ཡིན་པ་དང་། ཆོས་ལུགས་འདྲ་མིན་གྱི་ཆོས་པ་མང་པོས་ངོས་ལ་དགའ་མོས་བྱེད་ཀྱི་ཡོད་པ་རེད། དེ་བཞིན་ངོས་ཀྱིས་ཚང་མར་འཛུམ་བསྟན་པ་དང་། འགྲོ་བ་མི་ཚང་མ་གཅིག་འགྱུར་གྱི་འདུ་ཤེས་འཛིན་ནས་འགྲོ་ཡི་ཡོད་པས་ཡིན། ཞེས་གསུངས་སོང་།
དཔལ་ལྡན།
