རྒྱ་གར་ནས་ཕྱིའི་རྒྱལ་ཁབ་ཁག་ཏུ་སློབ་སྦྱོང་དང་ལས་དོན་སོགས་ཀྱི་དོན་དུ་སྐྱོད་མཁན་ཚོར་འགོག་ཁབ་དང་པོ་བརྒྱབ་ནས་ཉིན་གྲངས་ ༨༤ མ་ཟིན་སྔོན་དུ་འགོག་ཁབ་གཉིས་པ་རྒྱག་ཆོག་གི་ཡོད་པའི་དམིགས་བསལ་གྱི་མཐུན་རྐྱེན་བསྐྲུན་ཡོད་པས་ཡིག་ཆ་ཁག་སྟོན་དགོས་པའི་ལམ་སྟོན་གནང་འདུག
བོད་མིིའི་སྒྲིག་འཛུགས་ཀྱི་ཏོག་དབྱིབས་གཉན་རིམས་ ༡༩ ལས་དོན་ཚོགས་ཆུང་གི་གསར་འགོད་གསལ་བསྒྲགས་ཐེངས་ ༦༨ པ་གནང་བ་ལྟར་ན། བདུན་ཕྲག་འདིའི་ནང་རྒྱ་གར་དང་བལ་ཡུལ་ནང་དགུང་ལོ་ཆེ་ཤོས་ ༩༦ དང་ཆུང་ཤོས་ ༦ བཅས་ཚུད་པའི་བོད་མི་གྲངས་ ༡༤༨ ལ་ཏོག་ནད་ཕོག་ཡོད་པ་དང་། ནད་པའི་ཁྲོད་ནས་མི་ ༨༢ སྐྱེས་པ་དང་ ༦༦ བུད་མེད་ཡིན་འདུག་ལ། ཏོག་ནད་ཀྱིས་འདས་གྲོངས་སུ་ཕྱིན་པ་གཅིག་ཀྱང་བྱུང་མེད་འདུག དེ་བཞིན་རྒྱ་གར་ནང་དུ་ཏོག་དབྱིབས་འགོག་ཁབ་གཉིས་ཀ་ཐོབ་ཟིན་པ་མི་གྲངས་ ༡༩།༧༧༡ དང་། འགོག་ཁབ་དང་པོ་ཐོབ་མཁན་མི་གྲངས་ ༢༧།༡༦༦ ཡོད་པ་བཅས་རྒྱ་གར་ནང་འགོག་ཁབ་ཐོབ་པའི་གྲངས་འབོར་དེ་བརྒྱ་ཆ་ ༨༦།༦ ཆགས་འདུག བལ་ཡུལ་ནང་འགོག་ཁབ་དང་པོ་དང་གཉིས་པ་གཉིས་ཀ་ཐོབ་ཟིན་པའི་མི་གྲངས་ ༤༠༣ དང་། འགོག་ཁབ་དང་པོ་ཐོབ་པའི་མི་གྲངས་ ༡༠༤༥ ཁྱོན་བརྒྱ་ཆ་ ༡༧།༧༣ ཙམ་ཆགས་ཀྱི་ཡོད་འདུག
གསལ་བསྒྲགས་སྐབས་སྨན་པ་མཚམས་གཅོད་ལགས་ཀྱིས། བདུན་ཕྲག་འདིའི་ནང་རྒྱ་གར་ནང་གི་ས་གནས་གྲངས་ ༡༢ དང་བལ་ཡུལ་ནང་ས་གནས་གྲངས་ ༦ ལ་རང་ཁྱིམ་དུ་འགོག་དབྱེ་ཟུར་འཇོག་ཁང་དུ་བཞུགས་པའི་མི་གྲངས་ ༤༩༥ དང་ཚོགས་སྡེའི་ཟུར་བཀག་ནང་བཞུགས་པའི་མི་གྲངས་ ༥༣༧ ཡོད་འདུག འདས་པའི་ལོ་གཅིག་དང་ཕྱེད་ཀ་ཙམ་གྱི་རིང་ལ་བོད་ཀྱི་སྨན་རྩིས་ཁང་དང་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ནས་མཉམ་སྦྲེལ་གྱིས་གསོ་རིག་ལུས་སེམས་ནུས་གསོའི་སྨན་ཁྱོན་བསྡོམས་མི་གྲངས་ ༣༨།༡༢༤ ལ་རིན་མེད་བགོ་འགྲེམས་གནང་ཡོད་པ་དང་། དེ་བཞིན་འདས་པའི་ཟླ་བ་གཅིག་ནང་བཙན་བྱོལ་བོད་མིའི་གཞིས་ཆགས་ཁག་དང་སློབ་གྲྭ་ཁག་གི་འགན་འཛིན་དང་སློབ་སྤྱི་བརྒྱུད་རང་ལོ་ ༤ ནས་ ༡༧ བར་གྱི་ཕྲུ་གུ་རྣམས་ལ་གསོ་རིག་ལུས་སེམས་ནུས་གསོའི་སྨན་བགོ་འགྲེམས་ཞུས་དང་ཞུ་བཞིན་ཡོད་པ་རེད། འདི་ལོའི་ཕྱི་ཟླ་ ༦ ཚེས་ ༣༠ བར་ཏོག་ནད་ཕོག་པ་རྣམས་ལ་བོད་ཀྱི་སྨན་རྩིས་ཁང་ནས་མི་རིགས་དང་ལོ་ན་སོགས་དབྱེར་མེད་ཀྱི་ཐོག་ནས་མི་གྲངས་ ༥༥༦༧ ལ་སྨན་རིན་མེད་དུ་སྤྲད་ཡོད་པ་དང་། དེ་བཞིན། རྒྱ་གར་ནང་ས་གནས་གྲངས་ ༡༡ ལ་བོད་མི་གྲངས ༥༩༩ དང་བལ་ཡུལ་ནང་ས་གནས་གྲངས་ ༣ ལ་མི་གྲངས་ ༤ བཅས་ཁྱོན་མི་གྲངས་ ༦༠༣ ཏོག་ནད་ཕོག་ཡོད་མེད་བརྟག་དཔྱད་གནང་། ཏོག་དབྱིབས་གཉན་རིམས་ཀྱི་ནད་གཞིའི་ཆེད་དུ་མདུན་སྐྱོད་ཞབས་ཞུ་བ་རྣམས་ལ་སེམས་ཁམས་འཕྲོད་བསྟེན་གྱི་ཐད་ཟབ་སྦྱོང་གོ་སྒྲིག་གནང་ཡོད་པ་མ་ཟད། ཏོག་དབྱིབས་གཉན་རིམས་ནད་གཞི་ཕོག་པའི་མི་གྲངས་ ༣༤ ཙམ་ལ་ཁ་པར་བརྒྱུད་འབྲེལ་གཏུགས་བྱས་ཏེ་སློབ་གསོ་ལམ་སྟོན་གནང་ཐུབ་ཡོད་སྐོར་བརྗོད་འདུག
སྨན་པ་མཚམས་གཅོད་ལགས་ཀྱིས། ཏོག་དབྱིབས་གཞི་རྩ་མེད་དུ་མ་སོང་བར་དུ་ཚང་མས་སྔོན་འགོག་གི་ཐབས་ལམ་བསྟེན་རྒྱུ་གལ་ཆེན་པོ་ཡིན་པ་བསྐྱར་དུ་དྲན་སྐུལ་ཞུ་ཡི་ཡིན། ད་ལྟའི་ཆར་རྒྱ་གར་གྱི་ལྷོ་ཤར་ཨེ་ཤ་ཡའི་ཁུལ་མང་པོ་ཞིག་ལ་ཆར་དུས་མགོ་བཙུགས་ཡོད་པས། ཆར་པའི་དུས་སུ་དམིགས་བསལ་གྱིས་ཚ་བ་དང་། ཆར་ཆུ་ལ་བརྟེན་ནས་ཆུ་ཡུར་དང་ཆུ་མཛོད་གཙང་མ་མེད་པ་སོགས་ལ་བརྟེན་ནས་དུག་སྦྲང་དང་གཉན་སྲིན་གཞན་མང་པོ་ཡོང་ནས་ན་ཚ་མང་པོ་ཡོང་གི་ཡོད་པ་རེད། མི་མང་ཚོས་ཆུ་མཛོད་དང་ཆུ་ཡུར་གཙང་མ་བཟོ་རྒྱུ་གལ་ཆེན་པོ་ཡིན་པས་ཐུགས་སྣང་གནང་རོགས་གནང་ཞུ་ཡི་ཡིན། ཞེས་ལམ་སྟོན་གནང་འདུག
བདེ་ལེགས་སྨན་ཁང་གི་སྨན་པ་བསྟན་འཛིན་རྣམ་གྲོལ་ལགས་ཀྱིས། ད་ལྟའི་ཆར་རྒྱ་གར་ནང་ཏོག་དབྱིབས་གཉན་རིམས་ཀྱི་ནད་གཞི་ཕོག་པའི་མི་གྲངས་ཉུང་དུ་འགྲོ་བཞིན་ཡོད་ཀྱང་། ན་ཚ་འགོས་རྒྱུའི་ཉེན་ཁ་ཡོད་པར་བརྟེན་ཚང་མས་སྔོན་འགོག་གི་ཐབས་ལམ་ཁག་ལྷོད་གཡེང་མེད་པར་མུ་མཐུད་ལག་བསྟར་གནང་རྒྱུ་གལ་ཆེན་པོ་རེད། དེ་བཞིན་ཏོག་དབྱིབས་གཉན་རིམས་ཀྱི་ནད་རྟགས་ཐོན་པ་ཡིན་ན་ངེས་པར་དུ་བརྟག་དཔྱད་གནང་དགོས་རྒྱུ་གལ་ཆེན་པོ་ཆགས་ཀྱི་འདུག ད་ལྟའི་ཆར་ཏོག་དབྱིབས་གཉན་རིམས་ཀྱི་སྔོན་འགོག་ཐབས་ལམ་ལེགས་ཤོས་ནི་ཏོག་དབྱིབས་འགོག་ཁབ་རྒྱག་རྒྱུ་དེ་ཡིན་པར་བརྟེན། ཚང་མས་ངེས་པར་དུ་ཏོག་དབྱིབས་འགོག་ཁབ་རྒྱག་རོགས་གནང་ཞུ་ཡི་ཡིན། རྒྱ་གར་ནང་དུ་ཏོག་དབྱིབས་འགོག་ཁབ་དང་པོ་ (Covishield) བརྒྱབ་ནས་ཉིན་གྲངས་ ༨༤ རྗེས་སུ་འགོག་ཁབ་གཉིས་པ་རྒྱག་གི་ཡོད་པ་རེད། འོན་ཀྱང་རྒྱ་གར་ནས་ཕྱིའི་རྒྱལ་ཁབ་ཁག་ཏུ་སློབ་སྦྱོང་དང་ལས་དོན་སོགས་ཀྱི་དོན་དུ་བསྐྱོད་མཁན་རྣམས་ལ་འགོག་ཁབ་དང་པོ་བརྒྱབ་ནས་ཉིན་གྲངས་ ༨༤ མ་ཟིན་སྔོན་དུ་འགོག་ཁབ་གཉིས་པ་རྒྱག་ཆོག་གི་ཡོད་པའི་དམིགས་བསལ་གྱི་མཐུན་རྐྱེན་བསྐྲུན་ཡོད་པ་དང་ཡིག་ཆ་སྟོན་དགོས་པའི་ལམ་སྟོན་གནང་གི་འདུག ཅེས་བརྗོད་སོང་།
གཞན་ཡང་། ཁ་སང་ཕྱི་ཚེས་ ༡༦ ཉིན་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་གོ་སྒྲིག་འོག་ཨ་རི་ནེའུ་ཡོག་དང་ནེའུ་ཇར་སི་བོད་རིགས་སྨན་ཞབས་ཚོགས་པ་དང་། བྱང་ཀ་ལི་ཕོར་ནི་ཡ་བོད་རིགས་སྤྱི་མཐུན་འཕྲོད་བསྟེན་ཚོགས་ཆུང་གི་དྭང་བླངས་སྨན་ཞབས་པ་བདུན་དང་རྒྱ་གར་ནང་གི་སྨན་ཞབས་པ་བདུན་བཅས་ཁྱོན་སྨན་ཞབས་པ་ ༡༤ རྣམས་ལ་བོད་མིའི་སྤྱི་ཚོགས་ཁྲོད་དང་བླངས་ཐོག་ཞབས་ཞུ་སྒྲུབ་པར་ཐུགས་རྗེ་ཆེ་ཞུའི་མཛད་སྒོ་སྟབས་བདེ་ཞིག་ཚོགས་ཡོད་པ་དང་། སྐབས་དེར་སྨན་ཞབས་པ་རྣམ་པས་བཙན་བྱོལ་བོད་མིའི་ཏོག་དབྱིབས་ནད་པ་མང་ས་ཁག་ཏུ་དྭང་བླང་ཞབས་ཕྱི་ཞུས་པའི་མྱོང་ཚོར་དང་ལས་བསྡོམས་སོགས་སྙན་སྒྲོན་ཞུས་ཡོད་པ་དང་སྦྲགས། ས་གནས་དང་ཚོགས་པ་སོ་སོའི་ངོས་ནས་མཐུན་འགྱུར་ཧ་ཅང་ཡག་པོ་གནང་བར་ཐུགས་རྗེ་ཆེ་ཞུས་ཡོད་པ་དང་། སློབ་ཕྲུག་རྣམས་ནས་ངེས་པར་དུ་ཁ་རས་གྱོན་དགོས་རྒྱུ་གལ་ཆེན་པོ་ཡིན་སྐོར་དང་། སློབ་གྲྭའི་འབྲེལ་ཡོད་ལས་བྱེད་ནས་སློབ་ཕྲུག་རྣམས་ལ་ཁ་རས་ངེས་པར་དུ་གྱོན་དགོས་སྐོར་ལམ་སྟོན་ནན་པོ་གནང་དགོས་པའི་འབོད་སྐུལ་གནང་ཡོད་འདུག
མཛད་སྒོའི་ཐོག་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས། མིའི་མི་ཚེ་ནང་ནད་ན་ཚ་ཕོག་པའི་སྐབས་ཀྱི་དཀའ་ངལ་དང་། བཟའ་བཏུང་མེད་པ་བཅས་ནི་དཀའ་ངལ་ཆེ་ཤོས་ཤིག་ཆགས་ཀྱི་ཡོད་པ་རེད། དཀའ་ངལ་འཕྲད་པའི་སྐབས་རོགས་པ་བྱེད་མཁན་བོད་མི་ཡིན་པ་དང་ང་ཚོའི་བརྒྱུད་ལ་བྱམས་སྙིང་རྗེའི་རང་བཞིན་ཡོད་པ་དེ་མངོན་གྱི་ཡོད། བོད་མི་མང་ཚོགས་ལ་ཏོག་དབྱིབས་གཉན་རིམས་ཀྱི་ཛ་དྲག་དཀའ་ངལ་འཕྲད་པའི་སྐབས་འདིར་ཨ་རི་ནས་ཕེབས་པའི་སྨན་ཞབས་པ་དང་རྒྱ་གར་ནང་གི་སྨན་ཞབས་པས་དྭང་བླངས་ཐོག་འགན་ཁུར་བཞེས་ཏེ་ཕྱག་ལས་ཧུར་ཐག་གནང་བར་ངས་འཛིན་སྐྱོང་བཀའ་ཤག་དང་བོད་མིའི་སྒྲིག་འཛུགས་ཀྱི་ངོས་ནས་ཐུགས་རྗེ་ཆེ་ཞུ་རྒྱུ་ཡིན། བོད་པའི་སྤྱི་ཚོགས་ཡར་རྒྱས་གཏོང་བར་གཞན་རྟེན་གྱི་བསམ་བློ་དོར་ཏེ་ང་རང་ཚོ་བོད་མི་ནང་ཁུལ་རོགས་པ་མང་པོ་བྱས་ཚེ་ཁ་ཡོད་ལག་ཡོད་ཀྱི་རང་ཁ་རང་གསོ་ཡོང་གི་རེད། རང་ཉིད་ཀྱི་ལས་དོན་རྣམས་གཞན་ལ་མ་བཅོལ་བར་རང་ངོས་ནས་སྒྲུབ་རྒྱུའི་འབད་བརྩོན་བྱེད་དགོས་སྐོར་གསུངས་ཏེ་དྭང་བླངས་སྨན་ཞབས་པ་རྣམས་ལ་ཐུགས་རྗེ་ཆེ་ཞུའི་ཕྱག་འཁྱེར་གནང་ཡོད་འདུག
གསར་འགོད་པ། བསྟན་འཛིན་ཕུར་བུ།
