ཁ་སང་བལ་ཡུལ་གྱི་འཕགས་ཤིང་ཁུལ་དུ་རང་བདེན་ཚོགས་ཆུང་གི་ཚོགས་མི་འོས་བསྡུ་བྱེད་སྐབས་བལ་གཞུང་ཉེན་རྟོག་པས་ས་གནས་གཞིས་མགོ་དང་བརྒྱ་དཔོན་གཉིས་འཛིན་བཟུང་བྱས་ཡོད་ཀྱང་ཁག་ཐེག་འོག་ཀློད་གྲོལ་བཏང་ཡོད་འདུག
ཁ་སང་དགོང་མོའི་ཆུ་ཚོད་ ༦།༣༠ ཙམ་གྱི་སྟེང་། བལ་ཡུལ་འགྲོ་བ་མིའི་ཐོབ་ཐང་ཚན་པའི་ལས་བྱེད་བཟང་པོ་ལགས་ཀྱིས་ཁག་ཐེག་གནང་བ་བརྒྱུད། ཁ་སང་བལ་ཡུལ་ཉེན་རྟོག་པས་འཛིན་བཟུང་བྱས་པའི་འཕགས་ཤིང་ས་གནས་གཞིས་མགོ་ཀརྨ་རྒྱལ་མཚན་ལགས་དང་བརྒྱ་དཔོན་ནོར་བུ་ལགས་གཉིས་ཀློད་གྲོལ་བཏང་བ་དང་། བཙན་འཕྲོག་བྱས་པའི་འོས་བསྡུའི་ཐོ་འགོད་མ་དེབ་ཀྱང་ཕྱིར་སྤྲད་ཡོད་འདུག འོན་ཀྱང་། ཀ་ཐི་མཎ་ཌིའི་འཕགས་པ་ཤིང་ཀུན་ཁུལ་གྱི་བཙན་བྱོལ་བོད་མིའི་ས་གནས་རང་བདེན་ཚོགས་ཆུང་གི་སྐབས་བཅུ་པའི་དངོས་གཞིའི་འོས་བསྡུ་གནང་བར་དཀའ་ངལ་འཕྲད་སྲིད་པའི་སེམས་འཚབ་བྱེད་ཀྱིན་འདུག
འདི་གའི་གསར་འགོད་པས་ཁ་པར་བརྒྱུད་བལ་ཡུལ་ནང་གི་འབྲེལ་ཡོད་བོད་མི་ཞིག་ལ་དྲིས་པར་ཁོང་གིས། ཁ་སང་སྔོན་འགྲོའི་འོས་བསྡུ་བྱེད་བཞིན་པའི་སྐབས་སུ་གློ་བུར་དུ་བལ་ཡུལ་ཉེན་རྟོག་པ་བཅུ་གྲངས་ཤིག་ཡོང་སྟེ། འོས་བསྡུའི་དཔེ་སྐྱེལ་ཐོ་འགོད་དང་འབྲེལ་བའི་མ་དེབ་བཙན་གྱིས་འཕྲོག་པ་མ་ཟད། འཕགས་ཤིང་ས་གནས་གཞིས་མགོ་ཀརྨ་རྒྱལ་མཚན་ལགས་དང་བརྒྱ་དཔོན་ནོར་བུ་ལགས་གཉིས་བཙན་གྱིས་ཉེན་རྟོག་ཁང་དུ་འཁྲིད་དེ་འདྲི་རྩད་བྱས་ཡོད་སྐོར་དང་། ད་ལྟ་གཞིས་མགོ་དང་བརྒྱ་དཔོན་གཉིས་ཀློད་ཚར་ཡོད་ཀྱང་། མ་འོངས་བདུན་ཕྲག་གཅིག་རིང་ཉིན་ལྟར་ཆད་ལྷག་མེད་པར་ས་གནས་ཉེན་རྟོག་ཁང་དུ་ཐོ་འགོད་བྱེད་དུ་འགྲོ་དགོས་ཀྱི་ཡོད་སྐོར་བརྗོད་བྱུང་།
ཡང་གནས་ཚུལ་མཁོ་སྤྲོད་པའི་བརྗོད་པ་ལྟར་ན། ཉེན་རྟོག་ཁང་དུ་གཞིས་མགོ་ཀརྨ་རྒྱལ་མཚན་ལགས་དང་བརྒྱ་དཔོན་ནོར་བུ་ལགས་གཉིས་སུ་འོས་བསྡུ་བྱེད་ལུགས་བྱེད་སྟངས་དང་བལ་ཡུལ་གཞུང་གི་ཆོག་མཆན་ཡོད་མེད། དེ་བཞིན། འོས་བསྡུའི་སྐབས་མི་སྣ་སུ་དང་སུ་བསླེབས་ཡོད་མེད་སོགས་ཀྱི་སྐོར་ནས་འདྲི་རྩད་བྱས་ཡོད་ཅིང་། ད་རེས་གཞིས་མགོ་དང་བརྒྱ་དཔོན་གཉིས་ཉེན་རྟོག་ཁང་དུ་འཁྲིད་ཡོད་པ་ལས་གཞན་ལག་ལྕགས་བརྒྱབ་པ་དང་། ཉེན་རྟོག་ཁང་དུ་དམ་དྲག་སོགས་གང་ཡང་བྱས་མེད་པ་མ་ཟད། ས་གནས་བོད་མི་གཞན་སུ་ལའང་འདྲི་རྩད་འཛིན་བཟུང་སོགས་ཀྱི་དཀའ་ངལ་བཟོས་མེད་འདུག
ད་ལན་བལ་ཡུལ་གཞུང་གིས་བཙན་བྱོལ་བོད་མིའི་རང་བདེན་ཚོགས་ཆུང་གི་འོས་བསྡུར་དམ་དྲག་བྱས་པ་ཐོག་མ་ལྟ་བུ་ཆགས་འདུག་ལ། འདི་གའི་གསར་འགོད་པས་ས་གནས་གཞིས་མགོ་ཀརྨ་རྒྱལ་མཚན་ལགས་སྒེར་ལ་འབྲེལ་བ་བྱས་ཀྱང་མཐུད་ཐུབ་མ་སོང་། གནས་ཚུལ་མཁོ་སྤྲོད་པས། ས་གནས་གཞིས་མགོ་ནས་རང་བདེན་ཚོགས་ཆུང་གི་ཚོགས་མིའི་དངོས་གཞིའི་འོས་བསྡུ་དེ་བདུན་ཕྲག་རྗེས་མའི་རེས་གཟའ་སྤེན་པའི་སྔོན་ལ་བྱེད་ཐབས་གནང་གི་ཡོད་ཀྱང་། ད་ལྟའི་ཆར་འོས་བསྡུ་གནང་བར་བལ་ཡུལ་གཞུང་ནས་ཆོག་མཆན་འཐོབ་མིན་གཏན་འཁེལ་མེད་སྟབས། སེམས་འཚབ་བྱེད་ཀྱི་ཡོད་སྐོར་བརྗོད་བྱུང་།
གསར་འགོད་པ། སྐལ་བཟང་སྦྱིན་པ།
