གྲྭ་ཚུལ་ཁྲིམས་རྒྱ་མཚོ་ལགས་ཀྱི་བཙོན་ཁང་གི་གནས་ཚུལ་ཞིག་ཕྱི་ལ་ཐོན།

རྒྱ་ནག་གཞུང་གིས་མི་ལོ་ ༡༩ ཡི་བཙོན་འཇུག་ཁྲིམས་ཐག་བཅད་པའི་བླ་བྲང་དགོན་པའི་དགེ་འདུན་པ་གྲྭ་ཚུལ་ཁྲིམས་རྒྱ་མཚོ་ལགས་ཀྱི་བཙོན་འཇུག་དུས་ཡུན་ཟླ་ ༦ ཉུང་འཕྲི་བྱས་འདུག

Tsultrim Gyatso, Tibetan political prisoner in Tibet.(Image:@weiquanwang)

ཟླ་འདིའི་ཕྱི་ཚེས་ ༡༧ ཉིན་རྒྱ་ནག་གི་འགྲོ་བ་མིའི་ཐོབ་ཐང་སྲུང་སྐྱོབ་ཀྱི་འབྲེལ་མཐུད་ཁང་(Networks of Chinese Human Rights Defenders) གིས་གནས་ཚུལ་སྤེལ་བ་ལྟར་ན། འདས་ལོའི་ཕྱི་ཟླ་ ༤ པའི་ནང་ཀན་སུ་ཞིང་ཆེན་གྱི་ཐན་ཤུ་གྲོང་ཁྱེར་གྱི་འབྲིང་རིམ་མི་མང་ཁྲིམས་ཁང་ཟེར་བས། བོད་བླ་བྲང་དགོན་པའི་དགེ་འདུན་པ་ཆབ་སྲིད་བཙོན་པ་གྲྭ་ཚུལ་ཁྲིམས་རྒྱ་མཚོ་ལགས་ལ་ཚེ་བཙོན་གྱི་དུས་ཡུན་ཟླ་བ་ ༦ གིས་ཉུང་འཕྲི་བྱས་ཡོད་འདུག

གནས་ཚུལ་དེའི་ཐད་འབྲིང་རིམ་མི་མང་ཁྲིམས་ཁང་དེས། བོད་ཀྱི་ཆབ་སྲིད་བཙོན་པ་གྲྭ་ཚུལ་ཁྲིམས་རྒྱ་མཚོ་ལགས་ཀྱིས་རང་གི་ནག་ཉེས་ལ་ངོས་ལེན་དང་བློ་འགྱོད་བྱས་པ་མ་ཟད། བཙོན་འཇུག་དུས་ཡུན་རིང་བཙོན་ཁང་གི་སྒྲིག་ལམ་ཁག་ལ་བརྩི་སྲུང་བྱས་པ་དང་། དེ་བཞིན་བཙོན་ཁང་གི་བཀོད་འདོམ་པའི་ཁ་ལ་ཉན་པ་དང་བཅོས་བསྒྱུར་སོང་བར་བརྟེན་བཙོན་འཇུག་དུས་ཡུན་ཆག་ཡང་བཏང་ཡོད་སྐོར་བརྗོད་འདུག

ད་ལན་ཁོང་གི་བཙོན་འཇུག་དུས་ཡུན་ཉུང་འཕྲི་བྱས་པ་ཐེངས་གཉིས་པ་དེ་ཆགས་ཡོད་འདུག དེ་ཡང་ཕྱི་ལོ་ ༢༠༡༤ ལོར་རྒྱ་ནག་གི་ཁྲིམས་ཁང་ཞིག་གིས་ཁོང་གི་ཚེ་བཙོན་དུས་ཡུན་ལོ་ ༡༩ ལ་ཉུང་འཕྲི་བྱས་ཡོད་སྟབས། ད་ལྟའི་གནས་སྟངས་འོག་ཁོང་ཕྱི་ལོ་ ༢༠༢༦ ལོའི་ཟླ་ ༡༡ པའི་ནང་བཙོན་གྲོལ་འཐོབ་དགོས་པ་ཞིག་ཆགས་ཡོད་ཀྱང་། གྲྭ་ཚུལ་ཁྲིམས་རྒྱ་མཚོ་ལགས་ལ་ཚེ་བཙོན་ཐོག ད་དུང་ལོ་ ༧ རིང་ཆབ་སྲིད་ཀྱི་ཐོབ་ཐང་འཕྲོག་ཡོད་པར་བརྟེན། བཙོན་གྲོལ་ཐོབ་རྗེས་སུའང་བཟང་བཙོན་དང་། ཉེན་རྟོག་པའི་སོ་ལྟ་འོག་ནས་འགྲིམ་འགྲིམ་སོགས་ཀྱི་རང་དབང་མེད་པ་རེད།

འདི་གའི་གསར་འགོད་པས་བོད་གནས་ཉམས་ཞིབ་པ་པདྨ་རྒྱལ་ལགས་སུ་རྒྱ་ནག་གིས་བོད་རིགས་ཆབ་སྲིད་བཙོན་པ་རྣམས་ཀྱི་བཙོན་འཇུག་དུས་ཡུན་ཉུང་འཕྲིའི་རྒྱུ་རྐྱེན་སྐོར་དྲིས་པར་ཁོང་གིས། སྤྱིར་རྒྱ་ནག་གཞུང་གིས་ཆབ་སྲིད་བཙོན་པ་རྣམས་བཙན་བཀོལ་ངལ་རྩོལ་དུ་གཏོང་གི་ཡོད་ལ། རེ་འགར་བཀག་ཉར་སྐབས་གཅར་རྡུང་སོགས་བྱས་པའི་རྐྱེན་གྱིས་ནད་པ་ཆགས་ཀྱི་ཡོད་པ་དང་། བཙོན་པའི་འཕྲོད་བསྟེན་བདེ་འཇགས་སོགས་ཀྱི་འགན་དེ་རྒྱ་ནག་གཞུང་ལ་ཡོད་པར་བརྟེན། ནག་ཉེས་ངོས་ལེན་བྱས་ཡོད་ཚུལ་དང་སྒྲིག་ལམ་ཡག་པོ་སྲུང་ཡོད་ཚུལ་སོགས་ལ་ཁ་གཡར་ཏེ་བཙོན་པ་རྣམས་གློད་གྲོལ་དང་བཙོན་འཇུག་དུས་ཡུན་ཉུང་འཕྲི་བྱེད་ཀྱི་ཡོད་པ་རེད་བསམ་གྱི་འདུག ཅེས་བརྗོད་བྱུང་།

རྒྱ་ནག་གཞུང་གིས་ཆ་བགོས་བྱས་པའི་ཀན་སུ་ཞིང་ཆེན་ཀན་ལྷོ་བོད་རིགས་རང་སྐྱོང་ཁུལ་གྱི་ཁོངས་གཏོགས་བསང་ཆུ་རྫོང་གི་བླ་བྲང་བཀྲ་ཤིས་འཁྱིལ་དགོན་པའི་གྲྭ་ཚུལ་ཁྲིམས་རྒྱ་མཚོ་ལགས་ནི། ཕྱི་ལོ་ ༢༠༠༨ ལོའི་ཕྱི་ཟླ་ ༣ ཚེས་ ༡༤ ཉིན་བསང་ཆུ་རྫོང་དུ་༧གོང་ས་མཆོག་བོད་ལ་གདན་འདྲེན་ཞུ་དགོས་ཞེས་པ་སོགས་ཀྱི་འབོད་སྒྲ་བསྒྲགས་ཏེ་རྒྱ་ནག་གཞུང་ལ་ངོ་རྒོལ་བྱེད་མཁན་གཙོ་བོའི་གྲས་སུ་ཡོད་ཅིང་། ངོ་རྒོལ་རྗེས་སུ་བསང་ཆུ་རྫོང་ནས་བྲོས་བྲོལ་དུ་ཕྱིན་ཡོད་ཀྱང་། ལོ་དེའི་ཕྱི་ཟླ་ ༥ ཚེས་ ༢༢ ཉིན་འཛིན་བཟུང་བྱས་ནས་ལོ་གཅིག་ཙམ་གྱི་རྗེས་ཏེ། ཕྱི་ལོ་ ༢༠༠༩ ཟླ་ ༥ ཚེས་ ༢༡ ཉིན་ཀན་ལྷོ་འབྲིང་རིམ་མི་མང་ཁྲིམས་ཁང་ཟེར་བས་རྒྱལ་ཁབ་ཀྱི་བདེ་འཇགས་ལ་ཉེན་ཁ་བཟོས་པའི་ནག་ཉེས་འོག་ཚེ་བཙོན་གྱི་ཁྲིམས་ཐག་བཅད་ཡོད་པ་རེད།

གསར་འགོད་པ། པ་སངས་ཚེ་རིང་།