བོད་ཀྱི་གཞུང་འབྲེལ་མིན་པའི་ཚོགས་པ་བཞི་ཡིས་སྤྱི་འཐུས་ཀྱི་དམ་འབུལ་ཞུ་ཡུལ་གཉིས་ཆགས་པ་དེ་བཅའ་ཁྲིམས་ནང་གསལ་ཆ་མེད་ཀྱང་ལམ་ལུགས་ལྟར་དུ་ངོས་ལེན་བྱེད་དགོས་པའི་འབོད་སྐུལ་དོན་ཚན་བཞི་སྤེལ་སོང་།
Press Conference of Four Tibetan NGOs at Norbu House on
4th August 2021. Image:Tibet times
དེ་རིང་སྔ་དྲོའི་ཆུ་ཚོད་ ༡༡ སྟེང་བཞུགས་སྒར་དྷ་སའི་ནོར་བུ་གསོལ་མགྲོན་ཁང་དུ། བོད་ཀྱི་གཞུང་འབྲེལ་མ་ཡིན་པའི་ཚོགས་པ་བོད་ཀྱི་གཞོན་ནུ་ལྷན་ཚོགས་དང་། བོད་ཀྱི་བུད་མེད་ལྷན་ཚོགས། བོད་ཀྱི་རྒྱལ་ཡོངས་མང་གཙོ་ཚོགས་པ། བོད་རང་བཙན་སློབ་ཕྲུག་ཚོགས་པ་བཅས་བཞི་ཐུན་མོང་གིས། ད་ལྟའི་བོད་མི་མང་སྤྱི་འཐུས་ལྷན་ཚོགས་ཀྱི་དཀའ་རྙོག་དང་འབྲེལ་ནས་གསར་འགོད་གསལ་བསྒྲགས་ཤིག་བསྐོངས་བའི་ཐོག དབུས་འོས་བསྡུ་ལྷན་ཁང་གི་གཙོས་འབྲེལ་ཡོད་ཕྱོགས་ཚང་མས་ཁྲིམས་སྒྲིག་འགྲེལ་བརྗོད་བྱ་རྒྱུ་དེེ་ཕར་བཞག་སྟེ། ཞི་འགྲིག་གི་ཆེད་དུ་སྐབས་ ༡༧ པའི་བདམས་ཐོན་སྤྱི་འཐུས་རྣམས་ཀྱི་དམ་འབུལ་ཞུ་ཡུལ་ཁག་གཉིས་ཆགས་པ་དེ་དག་བཅའ་ཁྲིམས་ནང་གསལ་ཆ་མེད་ཀྱང་། དེ་སྔ་ཚོགས་གཙོ་རེས་མོས་བྱེད་པའི་ལམ་ལུགས་ཡོད་པ་བཞིན་ངོས་ལེན་གནང་སྟེ་གྲོས་ཚོགས་བསྐྱར་གསོ་གནང་དགོས་སྐོར་གྱི་འབོད་སྐུལ་དོན་ཚན་བཞི་སྤེལ་སོང་།
དེ་ཡང་གཞུང་འབྲེལ་མ་ཡིན་པའི་ཚོགས་པ་བཞི་ཐུང་མོང་གི་ཡིག་ཐོག་བསྒྲགས་གཏམ་ནང་། ཕྱི་ལོ་ ༢༠༢༡ ཟླ་ ༦ ཚེས་ ༨ ཉིན་བདམས་ཐོན་སྤྱི་འཐུས་ ༤༤ ནས་དམ་འབུལ་ཞུ་ཡུལ་ཁག་གཉིས་བྱས་ནས་ཕུལ་ཟིན་པ་དེ་དག་བཅའ་ཁྲིམས་ནང་གསལ་ཆ་མེད་ཀྱང་། དེ་སྔ་ཚོགས་གཙོ་རེས་མོས་བྱེད་པའི་ལམ་ལུགས་ཡོད་པ་བཞིན་ད་ཆ་ནང་ཁུལ་ཁྲིམས་སྒྲིག་གི་འགྲེལ་བཤད་ལས་གལ་ཆེ་བ། བོད་མིའི་རྩ་དོན་འཐབ་རྩོད་ཀྱི་གཞི་རྩ་བོད་མིའི་དམངས་གཙོའི་གཞུང་འདི་བཞིན་བསྐྱར་གསོ་དང་། རྒྱུན་གནས་ཡོང་ཆེད་ཐོག་མར་སྤྱི་འཐུས་རྣམས་བཞུགས་མོལ་ཚོགས་འདུ་ཚོགས་ཏེ་མང་མོས་གང་བྱུང་ཐོག་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་ཚོགས་གཞོན་འོས་འདེམས་དང་། འཛིན་སྐྱོང་བཀའ་ཤག་གི་བཀའ་བློན་འོས་འདེམས་སོགས་གྲོས་ཚོགས་ཀྱི་ལས་རིམ་སྔར་རྒྱུན་བཞིན་འགྲོ་ཐུབ་པ་གང་མགྱོགས་འགོ་འཛུགས་གནང་རྒྱུར་དབུས་འོས་བསྡུ་ལས་ཁང་གི་གཙོས་འབྲེལ་ཡོད་ཕྱོགས་ཚང་མས་དགོངས་བཞེས་གནང་རོགས། ཞེས་འབོད་སྐུལ་གནང་འདུག
དེ་བཞིན། སྐབས་ ༡༧ པའི་སྤྱི་འཐུས་ལྷན་ཚོགས་ཟིན་པའི་རྗེས། ཕྱོགས་ཚང་མས་བསྟན་སྲུང་དམར་ནག་གཉིས་དཔང་པོར་བཞག་ནས་སླད་ཕྱིན་ཆད། སྐབས་ ༡༦ པའི་སྤྱི་འཐུས་ལྷན་ཚོགས་དང་ཆེས་མཐོའི་ཁྲིམས་ཞིབ་ཁང་དབར་བྱུང་བའི་རྙོག་གླེང་དང་། སྐབས་ ༡༧ པའི་སྤྱི་འཐུས་དང་སྲིད་སྐྱོང་བཅས་ཀྱི་དམ་འབུལ་ཞུ་ཕྱོགས་དང་འབྲེལ་ནས་ཁྲིམས་སྒྲིག་དང་མཐུན་མིན་གྱི་གླེང་རྙོག་རིགས་རྩ་བ་ནས་གླེང་སློང་མི་བྱ་རྒྱུའི་ཁས་ལེན་དགོས་པ་དང་། སྤྱི་ལྷན་ངོས་ནས་བཅའ་ཁྲིམས་བསྐྱར་བཅོས་ཟིན་བྲིས་ཚོགས་ཆུང་ཞིག་ཆེད་འཛུགས་ཀྱིས། ད་ལྟ་བཙན་བྱོལ་བོད་མིའི་བཅའ་ཁྲིམས་ནང་ཁ་གསལ་མེད་པ་དང་། འགྲེལ་བཤད་བྱེད་ཕྱོགས་མི་འདྲ་བའི་སྐྱོན་ཆ་དང་དོགས་གནས་རྣམས་སེལ་དགོས་སྐོར་འཁོད་འདུག
གཞན་ཡང་། དམངས་གཙོའི་སྤྱི་ཚོགས་ནང་བསམ་ཚུལ་བརྗེ་རེས་དང་ལྟ་བ་ལངས་ཕྱོགས་མཐུན་མིན་གྱི་རྩོད་གླེང་ཡོང་ཆོག་པ་ཡིན་ནའང་། བོད་མིའི་སྒྲིག་འཛུགས་འདི་བཙན་བྱོལ་གྱི་སྒྲིག་འཛུགས་ཤིག་ཡིན་པའི་ཐོག དམངས་གཙོ་ལས་ཆོལ་གསུམ་ཆིག་སྒྲིལ་གྱིས་བོད་ཀྱི་བདེན་མཐའ་གསལ་བའི་འཐབ་རྩོད་ནང་ཞུགས་རྒྱུ་དེ་ཡིན་སྟབས། རྒྱ་ཆེའི་མང་ཚོགས་ངོས་ནས་ཚོར་སྣང་དང་། གཡམ་རྒྱུག ཆོལ་ཁག་དང་ཆོས་ལུགས། ལུང་ཚན་བཅས་ཀྱི་ཕྱོགས་ཞེན་གྱི་དབང་དུ་མ་སོང་བར། ཡིད་གཟབ་དང་བབ་ལྷིང་བརྟན་གསུམ་གྱི་ཐོག་ནས་བོད་མིའི་རྩ་དོན་འཐབ་རྩོད་ཀྱི་ལས་འགུལ་ནང་སྔར་ལྷག་མཉམ་ཞུགས་དང་མདུན་སྐྱོད་བྱ་དགོས་པའི་རེ་སྐུལ་ཞུས་འདུག་ལ། གཞུང་འབྲེལ་མིན་པའི་ཚོགས་པ་བཞི་ཐུན་མོང་ནས་གསར་འགོད་གསལ་བསྒྲགས་གྲུབ་རྗེས། བོད་མིའི་སྒྲིག་འཛུགས་ཀྱི་འབྲེལ་ཡོད་ལྷན་ཁང་ཁག་ལ་ཆེད་བཅར་ཞུས་ཏེ་རེ་སྐུལ་ཞུ་རྒྱུ་ཡིན་པ་དང་། སྐབས་ ༡༧ པའི་བདམས་ཐོན་སྤྱི་འཐུས་སྒེར་ཚང་མར་གློག་འཕྲིན་བརྒྱུད་རེ་སྐུལ་ཡི་གེ་འབུལ་རྒྱུ་ཡིན་སྐོར་དང་། དེ་བཞིན་སྤྱི་འཐུས་ཕྱོགས་ཁག་གི་སྐུ་ཚབ་རྣམ་པ་དང་ཐུག་འཕྲད་ཞུ་རྒྱུ་ཡིན་སྐོར་བརྗོད་སོང་ལ། སྤྱི་ལྷན་གྱི་དཀའ་རྙོག་འདི་མ་སེལ་བར་དུ་ཚོགས་པ་བཞི་ངོས་ནས་འགན་འཁུར་བའི་ཐོག་ནས་གནས་སྟངས་ལ་དཔག་པའི་ཐབས་ལམ་འཚོལ་རྒྱུ་ཡིན་སྐོར་བརྗོད་སོང་།
གསར་འགོད་པ། པ་སངས་ཚེ་རིང་།
༄༄། མི་མང་གིས་མངོན་འདོད་ཡིན་མིན་ལ་མ་སྟོས་པར་བོད་མིའི་ཚོགས་པ་ཆེ་ཤོས་བཞི་ཡི་དབུས་རྒྱན་ནས་ཐུགས་འཁུར་ཆེ་སྐྱེས་གནང་བར་མངག་བརྗོད་དང་ཐུགས་རྗེ་ཆེ་ཞུ་བ་དང་ཆབས་ཅིག་རང་རེའི་མང་གཙོའི་སྒྲིགས་ཚུགས་འདི་ཚང་མས་ཐུགས་རེ་ཡོད་པ་བཞིན་༧གོང་ས་༧སྐྱབས་མགོན་ཆེན་པོ་མཆོག་གི་དགོང་གཞི་ལྟར་སྔོན་ཡོད་བཞིན་མང་གཙོའི་རྐ་བ་གསུམ་བཅའ་ཁྲིམས་གྱི་དགོང་དོན་ལྟར་དགོས་དུས་བཅའ་ཁྲིམས་དང་འགལ་བའི་ཐབ་ཤེས་དང་ལམ་ཁ་ཞིག་མེད་པ་མ་ཟད་ རྩ་ཁྲིམས་རིན་པོ་ཆེ་ལ་འབྲེལ་བརྗོད་གནང་སྟངས་ལ་གསལ་ཁ་མེད་པ་དང་གོ་བ་ལོག་འགྲུབ་བྱ་གི་ཡོད་ཚེ་དེར་ཕན་པའི་ཆེད་དུ་དེར་འབྲེལ་ཡོད་མཛད་གཙོ་རྣམས་པ་དང་བཅའ་ཁྲིམས་ཐོག་མཁྱེན་ཡོན་ཡོད་པའི་མཁས་དབང་དང་དེ་བཞིན་ཕྱི་ནང་ཁྲིམས་དཔོན་དང་ཁྲིམས་རྩོད་པ་གདན་ཞུ་གནང་སྟེ་གསལ་བཤད་གནང་ཐུབ་པ་བྱུང་ན་ཐུགས་ཕན་གསོད་པ་ཞིག་མི་ཡོང་ངམ་བསམ་པའི་རྨོང་འཆར་ཞིག་ཞུ་འདོད་འདིར་བཀོད་པ་ཡིན་གུས་འདུད་བཅས།།
ཁྲིམས་རྫུན་གསུམ་རང་གནས་སུ་ལོག་དགོས་པ་མ་ཚད་དེ་ལ་དམ་འབུལ་བྱེད་མཁན་སུ་བྱུང་ལ་ངོས་ལེན་གཏན་ནས་མེད།
རྗེས་སུ་ཡིད་རངས་དང་བསྔགས་བརྗོད་ཡོད་། ཡིན་ན་ཡང་ད་ལྟའི་དཀའ་ངལ་དེ་བཅའ་ཁྲིམས་སྲུང་སྐྱོབས་ཟེར་བའི་ཐ་སྙད་དེ་ལ་ཐུག་པ་ནས་བཅའ་ཁྲིམས་ཕར་བཞག་ནས་ལམ་དང་ལུགས་སྲོལ་ལ་ཁ་ཕྱོགས་དགོས་གསུང་པ་དེ་ཁྲིམས་འགལ་ནས་སྒྲིག་འགལ་ལ་ཁ་ཕྱོགས་བཅུག་མ་རེད་དམ་། བཅའ་ཁྲིམས་ནི་བཙན་བྱོལ་བོད་མིའི་བླ་གནས་སའི་ཁྲིམས་ཡིག་ངོ་མ་དེ་ཡིན་ན་བཅའ་ཁྲིམས་ལ་འགན་ཁུར་ནས་མ་འོངས་བོད་ཀྱི་མང་གཙོའི་འཕེལ་རིམ་ལ་ནག་ཐིག་མ་ཕོག་པའི་ཐབས་ལམ་ཚོལ་དགོས་པ་དེ་བཙན་བྱོལ་བོད་མི་ཚང་མས་ལས་འགན་ཞིག་ཡིན་པ་བཅའ་ཁྲིམས་དོན་ཚན་བཅུ་གསུམ་ནང་གསལ་བའི་བོད་ཀྱི་ཡུལ་མིའི་ལས་འགན་ཡིན་པའི་ངོས་ཞུ་གི་ཡོད་།