ཆོས་དབྱིངས་སྐྱིད་རྒྱལ་སྤྱིའི་བུད་མེད་འདུར་རྒྱུག་ཁྲོད་ཨང་བདུན་པ་རེད་འདུག

དེ་རིང་རྒྱལ་སྤྱིའི་བུད་མེད་ཀྱི་འདུར་རྒྱུག་ཁྲོད་བོད་ཀྱི་བུ་མོ་ཆོས་དབྱིངས་སྐྱིད་ཀྱིས་དུས་ཡུན་ཆུ་ཚོད་ ༡།༣༡ དང་སྐར་ཆ་བཞིའི་ནང་ཨང་བདུན་པ་བླངས་ཡོད་འདུག
དེ་རིང་ཉིན་རྒྱབ་ཆུ་ཚོད་དང་པོའི་སྟེང་ཉི་ཧོང་གི་རྒྱལ་ས་ཊོ་ཀེའོ་(Tokyo) རྒྱལ་སྤྱིའི་བུད་མེད་ཀྱི་སྤྱི་ལེ་ ༢༠ ཡི་འདུར་རྒྱུག་འགྲན་སྡུར་ཁྲོད་བུད་མེད་  ༥༨  ནས་མཉམ་ཞུགས་བྱས་ཏེ། ཡུ་རོབ་ཀྱི་རྒྱལ་ཁབ་ཨི་ཊ་ལའི་ཨན་ཊོ་ནེ་ལཱ་ (Antonella Palmisano) ཡིས་དུས་ཡུན་ཆུ་ཚོད་ ༡།༢༩ དང་སྐར་ཆ་ ༡༢ ནང་ཨང་དང་པོ་བླངས་ཤིང་། ཨང་གཉིས་པ་ཀོ་ལོམ་བྷེ་ཡའི་སན་ཌི་ར་ (Sandra Arenas)། རྒྱ་རིགས་ལུའི་ཧོན་ཨང་གསུམ་པ་བཅས་བླངས་ཡོད་པའི་ཁྲོད། བོད་ཕྱི་ནང་གཉིས་ཀྱི་བོད་མི་མང་པོའི་དོ་སྣང་བྱེད་ཡུལ་དུ་གྱུར་བའི་བུ་མོ་ཆོས་དབྱིངས་སྐྱིད་ཀྱིས་འཛམ་གླིང་གི་བུད་མེད་འདུར་རྒྱུག་པ་ཨང་བདུན་པ་བླངས་ཡོད་འདུག

ཆོས་དབྱིངས་སྐྱིད་ལགས་ཀྱིས་ཐོག་མར་ཕྱི་ལོ་ ༢༠༡༢ ལོར་ལོན་ཊོན་དུ་བསྡུས་པའི་རྒྱལ་སྤྱིའི་བུད་མེད་ཀྱི་འདུར་རྒྱུགས་འགྲན་བསྡུར་ཁྲོད་ཨང་གཉིས་པ་བླངས་པ་དང་། བོད་པའི་ལོ་རྒྱུས་ཁྲོད་འཛམ་གླིང་ཨོ་རྩེད་ཁྲོད་གཟེངས་རྟགས་ལེན་མཁན་བོད་རིགས་ལུས་རྩེད་པ་ཐོག་མ་དེ་ཆགས། དེའི་རྗེས་བསྟུད་མར་རྒྱ་ནག་ནང་ལོག་དང་རྒྱལ་སྤྱིའི་རྩེད་འགྲན་ཁག་མང་པོའི་ནང་ཞུགས་ཏེ་རྒྱལ་ཁ་བླངས་ཡོད་པ་དང་། ཕྱི་ལོ་ ༢༠༡༦ དང་ ༢༠༡༨ ལོར་རྒྱལ་སྤྱིའི་ལུས་རྩལ་མཉམ་འབྲེལ་མཐུན་ཚོགས་ཀྱི་རྒྱལ་སྤྱིའི་བུད་མེད་ཀྱི་འདུར་རྒྱུག་འགྲན་སྡུར་ཁྲོད་ཨང་རིམ་དང་པོ་བླངས་ཡོད་པ་སོགས་སྔ་གཞུག་ཏུ་རྒྱལ་སྤྱི་དང་རྒྱ་ནག་རྒྱལ་ཡོངས་ནང་ནས་ཨང་དང་པོ་དང་གཉིས་པའི་གཟེངས་རྟགས་མང་པོ་ཐོབ་ཡོད་པ་རེད།

བོད་རིགས་བུ་མོ་ཆོས་དབྱངས་སྐྱིད་ལགས་ནི། ཕྱི་ལོ་ ༡༩༩༠ ཟླ་ ༡༡ ཚེས་ ༡༡ ཉིན་ཨ་མདོ་མཚོ་སྔོན་མཚོ་བྱང་ཁུལ་འདབ་བཞི་རྫོང་། ཝ་མགྱོགས་ཡུལ་ཚོ་མཚོ་བྱང་སྡེ་བ་རུ་སྐྱེས་ཤིང༌། ས་གནས་སློབ་ཆུང་ལོ་རིམ་ལྔ་པ་བར་བཏོན་རྗེས། ནུབ་མཚོ་མི་རིགས་བཅའ་སྡོད་སློབ་གྲྭ་རུ་འཛིན་རིམ་བདུན་པའི་བར་བཏོན་ཡོད། དེའི་རྗེས་མཚོ་སྔོན་ཞིང་ཆེན་ལུས་རྩལ་སློབ་གྲྭས་ཆེད་དུ་གདན་ཞུ་གནང་པ་ལྟར། ༢༠༡༠ ལོར་སློབ་གྲྭ་དེར་འཛུལ་ཞུགས་ཀྱིས་ལུས་རྩལ་ཐོག་དངོས་སུ་སྦྱོང་བརྡར་མགོ་འཛུགས་གནང་ཡོད་འདུག

གསར་འགོད་པ། སྐལ་བཟང་སྦྱིན་པ།