རྒྱལ་སྤྱིའི་བཙོན་པའི་དྲང་བདེན་ཉིན་མོ་སྲུང་གཙི་བྱས།

དེ་རིང་རྒྱལ་སྤྱིའི་བཙོན་པའི་དྲང་བདེན་ཉིན་མོ་དང་བསྟུན་བོད་ཀྱི་བུད་མེད་ལྷན་ཚོགས་དབུས་ས་གཉིས་ནས་རྒྱ་ནག་གཞུང་གིས་ད་བར་ཁྲིམས་འགལ་གྱིས་བཙོན་འཇུག་བྱས་པའི་བོད་མིའི་ཐོ་གཞུང་ཕྱིར་བསྒྲགས་བྱེད་དགོས་པ་སོགས་ཀྱི་དགོས་འདུན་ཁག་ཅིག་བཏོན་འདུག

དེ་རིང་དྷ་སའི་མེག་གྷན་ཁྲོམ་གཞུང་གི་བཞི་མདོ་རུ། བོད་ཀྱི་བུད་མེད་ལྷན་ཚོགས་ཀྱི་དབུས་ས་གཉིས་ནས་རྒྱལ་སྤྱིའི་བཙོན་པའི་དྲང་བདེན་ཉིན་མོ་(International Prisoners’ Justice Day)དང་བསྟུན། རྒྱ་ནག་གཞུང་གི་བཙན་འོག་ཏུ་མནར་གཅོད་མྱངས་དང་མྱོང་བཞིན་པའི་བོད་ཀྱི་བཙོན་པ་རྣམས་ཀྱི་པར་རིས་འགྲེམ་སྤེལ་བྱས་ཏེ། འཛམ་གླིང་མཉམ་འབྲེལ་རྒྱལ་ཚོགས་དང་འགྲོ་བ་མིའི་ཐོབ་ཐང་གི་ཚོགས་སྡེ་ཁག་གིས་རྒྱ་ནག་གཞུང་ལ་གནོན་ཤུགས་སྤྲོད་དགོས་པའི་རེ་སྐུལ་ཞུས་སོང་།

དབུས་བོད་ཀྱི་བུད་མེད་ལྷན་ཚོགས་ཀྱི་ཚོགས་གཙོ་བསྟན་འཛིན་སྒྲོལ་མ་ལགས་ཀྱིས་འདི་གའི་གསར་འགོད་པར། བོད་ནང་ཡོད་པའི་བོད་མི་ཚོར་མི་ཞིག་ཡིན་པའི་ཆ་ནས་གཞི་རྩའི་འགྲོ་བ་མིའི་ཐོབ་ཐང་དང་། རང་གི་རྣམ་དཔྱོད་བེད་སྤྱོད་བྱ་རྒྱུའི་རང་དབང་མེད་པར་བོད་འདི་རྒྱའི་བཙོན་ར་ལྟ་བུ་ཞིག་ཆགས་ཡོད་སྟབས། བོད་ཀྱི་བུད་མེད་ལྷན་ཚོགས་ངོས་ནས་བོད་ནང་ཡོད་པའི་བོད་མི་ཚང་མ་ཆབ་སྲིད་བཙོན་པར་ངོས་འཛིན་བྱེད་ཀྱི་ཡོད། ཅེས་དང་། ཕྱི་ལ་ཡོད་པའི་བོད་མི་ཚོས་ལས་འགུལ་སོགས་བརྒྱུད་ནས་རྒྱ་ནག་གཞུང་ལ་གནོན་ཤུགས་སྤྲོད་དགོས་པ་དེ་གལ་ཆེན་པོ་ཡིན་པ་དང་། དེས་བོད་ནང་གི་བོད་མི་ཆབ་སྲིད་བཙོན་པ་ཚོར་ཕན་ཐོགས་འབྱུང་གི་ཡོད་པ་མངོན་གསལ་ཡིན་སྐོར་བརྗོད་བྱུང་།

དབུས་བུད་མེད་ལྷན་ཚོགས་ཀྱི་ཡོངས་ཁྱབ་བསྒྲགས་གཏམ་ནང་། རྒྱ་ནག་གཞུང་གིས་བོད་བཙན་འཛུལ་བྱས་པ་ནས་བཟུང་དུས་ཡུན་རིང་པོར་གཞིར་ལུས་བོད་མི་ཚོས་རང་གི་གཞི་རྩའི་འགྲོ་བ་མིའི་ཐོབ་ཐང་ཙམ་ལག་བསྟར་བྱས་པར་དབང་ཤེད་ཀྱིས་བཙན་བཟུང་དང་མནར་གཅོད་ཚད་མེད་གཏོང་བ། དབང་མེད་ཀྱིས་གར་སོང་ཆ་མེད་དུ་གྱུར་བཅུག་པ་སོགས་ཀྱིས་གནོད་འཚེ་འཕོག་(ཕོག)ཡུལ་དུ་འགྱུར་(གྱུར)ཡོད། བཙོན་ཁང་ནང་བཙོན་པ་ཚོར་སྙིང་རྗེ་སྤུ་ཙམ་མེད་པའི་སྡུག་སྦྱོང་ཚད་མེད་བཏང་བར་བརྟེན་ནས་མང་པོ་ཞིག་བཙོན་ཁང་རང་ནང་འདས་གྲོངས་སུ་གྱུར་(འགྱུར)བཞིན་ཡོད་ཅེས་དང་། བཙོན་པའི་ནང་མི་དགའ་ཉེ་ཚོར་བཙོན་པ་གར་ཡོད་སོགས་ཀྱི་གནས་ཚུལ་མཁོ་སྤྲོད་བྱེད་ཀྱི་མེད་པ་སོགས་ཀྱི་སྐོར་བཀོད་འདུག

དེ་རིང་གི་རྒྱལ་སྤྱིའི་བཙོན་པའི་དྲང་བདེན་ཉིན་མོ་དང་བསྟུན་ནས་དབུས་སའི་བུད་མེད་ལྷན་ཚོགས་ངོས་ནས་མཉམ་འབྲེལ་རྒྱལ་ཚོགས་དང་རྒྱལ་སྤྱིའི་འགྲོ་བ་མིིའི་ཐོབ་ཐང་གི་ཚོགས་སྡེ་ཁག་ལ་རེ་སྐུལ་ཞུས་པའི་ནང་། རྒྱ་ནག་གཞུང་ལ་༧པཎ་ཆེན་རིན་པོ་ཆེ་མཆོག་དང་ཁོང་གི་སྐུ་འཁོར་ནང་མི་དང་བཅས་པའི་གནས་སྟངས་ཕྱི་གསལ་ནང་གསལ་བཟོ་དགོས་པའི་གནོན་ཤུགས་སྤྲོད་དགོས་པ་དང་། རྒྱ་ནག་གཞུང་གིས་བོད་ལ་བཙན་འཛུལ་བྱས་པ་ནས་བཟུང་ད་བར་ཁྲིམས་འགལ་གྱིས་བཙོན་འཇུག་བྱས་པའི་བོད་མིའི་ཐོ་གཞུང་ཕྱིར་བསྒྲགས་བྱེད་དགོས་པ། བོད་རིགས་བཙོན་པ་དང་དམིགས་བསལ་བུད་མེད་བཙོན་པའི་གནས་སྟངས་རྟོག་ཞིབ་ཆེད་རྒྱལ་ཚོགས་ཀྱི་སྐུ་ཚབ་ཅིག་བོད་ནང་གཏོང་དགོས་པ། རྒྱ་ནག་གཞུང་གིས་བོད་མི་དང་ཡུ་གུར་ཚོའི་ཆེད་དུ་བཙུགས་པའི་རྒྱལ་གཅེས་ཆོས་གཅེས་ཀྱི་ལས་འགུལ་རྣམས་མཚམས་འཇོག་དགོས་པ་སོགས་བཀོད་འདུག

རྒྱལ་སྤྱིའི་བཙོན་པའི་དྲང་བདེན་ཉིན་མོ་ཞེས་པ་དེ་ནི་ཕྱི་ལོ་ ༡༩༧༤ ལོར་ཁེ་ན་ཌར་བཙོན་པའི་ཐོབ་ཐང་ལ་རྒྱབ་སྐྱོར་དང་བཙོན་ཁང་ནང་དུས་མིན་རྐྱེན་འདས་སོང་བའི་བཙོན་པ་རྣམས་ལ་གདུང་སེམས་མཉམ་སྐྱེད་བྱ་བའི་ལས་འགུལ་ཞིག་གི་ཐོག་ནས་མགོ་བརྩམས་པ་ཞིག་ཡིན་ཞིང་། རིམ་པས་ཁེ་ན་ཌའི་ས་ཁུལ་མང་པོའི་ནང་བཙོན་པའི་ཚོགས་སྡེ་མི་ཉུང་བ་ཐོན་ཏེ། ཕྱི་ལོ་ ༡༩༧༩ ལོའི་ཟླ་ ༨ ཚེས་ ༡༠ ཉིན་བཙོན་པར་དོན་སྙིང་ལྡན་པའི་ལས་ཀ་དང་གླ་ཕོགས་དགོས་པའི་ཐོབ་ཐང་དང་། བཙོན་པར་དོན་ཕན་ལྡན་པའི་ཤེས་ཡོན་དང་སྦྱོར་བརྡར་དགོས་པ། སྨན་བཅོས་ཀྱི་ཐོབ་ཐང་། སྨྲ་བརྗོད་དང་ཆོས་དད་རང་དབང་གི་ཐོབ་ཐང་སོགས་གཞི་རྩའི་ཐོབ་ཐང་ཁག་དགོས་པའི་ཡོངས་ཁྱབ་རེ་འདུན་བཏོན་ཡོད་པ་རེད་འདུག