ཕྱི་ཚེས་ ༢༦ ཉིན་རྒྱ་གར་གྱི་པཎ་ཇབ་མངའ་སྡེའི་གཞུང་འཛིན་པ་(J. M Balamurugan)ལགས་ཀྱིས་ཅན་ཌི་སྒར་གྲོང་ཁྱེར་དུ་གནས་སྡོད་བོད་ཀྱི་ཨ་མ་ཊ་རི་སཱ་ཞེས་ཞུ་ཡི་ཡོད་པའི་ཨ་ཅག་ཚེ་རིང་སྒྲོལ་དཀར་ལགས་སུ་ཁོང་མོའི་སྤྱི་ཚོགས་ཞབས་ཞུར་ཆེ་བསྟོད་དུ་རོགས་དངུལ་ཧིན་སྒོར་འབུམ་ ༣ གནང་ཡོད་འདུག
ཨ་ཅག་ཚེ་རིང་སྒྲོལ་དཀར་ལགས་ནས་ཁོང་མོ་སྒེར་གྱི་ངོ་དེབ་ཐོག་གནས་ཚུལ་དེ་སྤེལ་བའི་ནང་། མངའ་སྡེའི་གཞུང་འཛིན་པ་(J. M Balamurugan)ལགས་ནས་ཁོང་མོར་བསྔགས་བརྗོད་གནང་བ་དེས། སྔར་ལས་ལྷག་པའི་སྤྱི་ཚོགས་ཞབས་ཞུའི་ཐོག་ཧུར་བརྩོན་བྱ་དགོས་པའི་སྐུལ་མ་ཐེབས་སོང་སྐོར་བཀོད་འདུག་ལ། མངའ་སྡེ་གཞུང་ནས་དགའ་ལྡན་ཕོ་བྲང་གི་དྲུང་ཆེ་བསྟན་འཛིན་སྟག་ལྷ་ལགས་སུའང་འབྲེལ་བ་ཞུས་ཏེ། ཨ་ཅག་ཚེ་རིང་སྒྲོལ་དཀར་ལགས་ཀྱི་སྤྱི་ཕན་ཞབས་ཞུའི་ལས་དོན་ལ་བསྔགས་བརྗོད་གནང་ཡོད་འདུག
ཁ་སང་ཕྱི་ཚེས ༣༠ ཉིན་དགའ་ལྡན་ཕོ་བྲང་གི་དྲུང་ཆེ་བསྟན་འཛིན་སྟག་ལྷ་ལགས་ཀྱིས། པཎ་ཇབ་མངའ་སྡེའི་གཞུང་འཛིན་པ་སྐུ་ཞབས་ J. M Balamurugan ཡི་མཚན་ཐོག་ཏུ་འཕྲིན་ཡིག་ཅིག་བསྐུར་གནང་བའི་ནང་། ཚེ་རིང་སྒྲོལ་དཀར་ལགས་བརྒྱུད་ཁྱེད་ནས་ཁོང་མོའི་སྤྱི་ཚོགས་ཞབས་ཞུར་གཟིགས་རྟོག་དང་རོགས་རམ་གནང་བ་ང་ཚོས་ཤེས་རྟོགས་བྱུང་ཞིང་། ཁོང་མོས་སྨན་བཅོས་ཀྱི་དགོས་མཁོ་ཆེ་བའི་མི་རྣམས་ལ་སྨན་བཅོས་ཀྱི་ཐད་ནས་རོགས་རམ་གནང་བར་བསྔགས་བརྗོད་བྱེད་ཀྱི་ཡོད། ཁྱེད་ཀྱིས་ཁོང་མོར་རོགས་རམ་དང་རྒྱབ་སྐྱོར་གནང་བར་བཀའ་དྲིན་ཆེ། ཞེས་སོགས་འཁོད་འདུག
རོགས་དངུལ་དེ་མངའ་སྡེའི་གཞུང་འཛིན་གྱི་རོགས་སྐྱོར་མ་དངུལ་ནས་གནང་བ་ཞིག་ཡིན་འདུག་ལ། ཕྱི་ལོ་ ༢༠༢༡ དང་ ༢༠༢༢ ནང་རོགས་དངུལ་དེ་ཅན་ཌི་སྒར་ཁུལ་གྱི་ཉམ་ཐག་དགོས་མཁོ་ཅན་དང་ནད་མནར་བ་ཚོའི་ཆེད་དུ་གཏོང་དགོས་ཀྱི་ཡོད་འདུག
ཨ་ཅག་ཚེ་རིང་སྒྲོལ་དཀར་ལགས་ནི་བལ་ཡུལ་སྦོག་ར་བྱམས་པ་གླིང་གཞིས་ཆགས་སུ་སྐྱེས་འཚར་བྱུང་ཞིང་། ཆུང་དུས་ནས་བོད་ཁྱིམ་སློབ་གྲྭའི་ནང་འཛུལ་ཞུགས་ཀྱིས་འཛིན་རིམ་ ༡༢ ཐོན་རྗེས། ཅན་ཌི་སྒར་མཐོ་སློབ་ཏུ་ཕྱིན་པ་དང་། མཐོ་སློབ་ཀྱི་སློབ་ལོ་དང་པོ་ནས་བཟུང་སྤྱི་ཚོགས་འབྲེལ་མཐུད་པའི་(Public Relations officer)ཕྱག་ལས་གནང་ཡོད་འདུག མཐོ་སློབ་ཀྱི་ལོ་ངོ་ ༥ རིང་ས་གནས་གཞོན་ནུའི་ཚོགས་མི་དང་རྒྱུན་ལས་གནང་སྟེ། ཅན་ཌི་སྒར་དུ་ཡོང་བའི་ནད་པ་མང་པོར་རོགས་རམ་གནང་ཡོད་འདུག ཁོང་མོ་འཛིན་རིམ་ ༨ པར་བསླེབས་སྐབས་ཕ་མ་གཉིས་སྐུ་གྲོངས་ཡོད་པ་དང་། མིང་སྲིང་ ༥ ཡོད་པའི་ནང་ནས་ཁོང་མོ་རྒན་ཤོས་དེ་ཡིན་སྟབས། ཕ་མ་གཉིས་ཀྱི་ཚབ་བྱས་ཏེ་སྤུན་ཆུང་བ་རྣམས་ལ་ལྟ་སྐྱོང་གནང་ཡོད་པ་མ་ཟད། ནད་པ་སྟོང་ཕྲག་མང་པོར་དྭང་བླངས་ཀྱིས་སྨན་པར་བསྟེན་གཏུག་དང་སྐད་སྒྱུར་གྱི་རོགས་གནང་སྟེ་ལོ་ངོ་ ༢༠ ལྷག་འགྲོ་བཞིན་ཡོད་འདུག
དཔལ་ལྡན།
She got recognition with some token from Punjab government but did she got any recognition from Tibetan community or exile government so far. She is given recognition, it will inspire others.
ཅན་ཌི་སྒར་གྲོང་ཁྱེར་དུ་གནས་སྡོད་བོད་ཀྱི་ཨ་མ་ཊ་རི་སཱ་ཞེས་ཞུ་ཡི་ཡོད་པའི་ཨ་ཅག་ཚེ་རིང་སྒྲོལ་དཀར་ལགས་སུ་ཁོང་མོའི་སྤྱི་ཚོགས་ཞབས་ཞུར་ཆེ་བསྟོད་དུ་རོགས་དངུལ་ཧིན་སྒོར་འབུམ་ ༣ གནང་ཡོད་འདུག Wonderful job!:)