མངའ་རིས་སུ་བོད་མི་ཚོར་ཞིབ་བཤེར་དམ་དྲག་བྱེད་བཞིན་ཡོད་འདུག 

 རྒྱ་ནག་གཞུང་གིས་ཕྱི་ཟླ་ ༩ ཚེས་མགོ་ནས་བཟུང་བོད་ཀྱི་མངའ་རིས་ས་ཁུལ་གྱི་མཐོ་ལྡིང་གྲོང་ཚོ་དང་རྩ་མདའ་རྫོང་གི་ཡུལ་ཤོག་དྲུག་ཙམ་ནང་བོད་མི་ཚོའི་ཁ་པར་ལ་ཞིབ་བཤེར་དང་ཨང་གྲངས་བསྡུ་ཉར་སོགས་བྱས་ཏེ། མི་སུ་དང་སུ་ལ་འབྲེལ་བ་བྱེད་བཞིན་ཡོད་པའི་སྐོར་སོགས་ལ་ཞིབ་བཤེར་དང་དམ་དྲག་ཤུགས་ཆེན་བྱེད་བཞིན་ཡོད་འདུག

འདི་ག་བོད་ཀྱི་དུས་བབ་གསར་ཁང་ལ་ཁུངས་ལྡན་གནས་ཚུལ་མཁོ་སྤྲོད་གནང་མཁན་གྱིས། གནས་ཚུལ་དེ་འདི་ལོར་ཡུལ་དེའི་ནང་དམག་སྒར་གསར་འཛུགས་དང་འབྲེལ་ནས། ས་གནས་བོད་མི་ཚོར་རྒྱལ་ཁབ་བདེ་འཇགས་ཞེས་པའི་མིང་ཐོག་ནས་བོད་མི་ཚོས་ས་མཚམས་ཀྱི་གནས་ཚུལ་ཁག་ཕྱི་ལ་གཏོང་གི་ཡོད་མེད་ཀྱི་དོགས་གཞིའི་རྐྱེན་གྱིས་བྱས་པ་ཞིག་ཆགས་ཡོད་པ་དང་། ཁ་པར་ནང་དུ་ས་གནས་ཀྱི་གནས་ཚུལ་དང་པར་རིས་སོགས་ཡོད་མེད་ནས་རྩད་ཞིབ་ཤུགས་ཆེར་བྱེད་བཞིན་ཡོད་སྐོར་བརྗོད་བྱུང་།

རྒྱ་དཀར་ནག་གཉིས་ཀྱི་ས་མཚམས་རྩོད་གཞི་དང་འབྲེལ་ནས་བོད་ནང་གི་ས་མཚམས་ཀྱི་ཡུལ་མི་ཚོར་རྒྱ་ནག་གཞུང་གིས་དེ་སྔ་ནས་དམ་དྲག་དང་དོགས་ཟོན་གྱི་ཞིབ་བཤེར་ཤུགས་ཆེན་བྱེད་བཞིན་ཡོད་པ་མ་ཟད། འདས་ལོའི་ལོ་མཇུག་ཙམ་ནས་རྒྱ་ནག་གཞུང་གིས་རྒྱ་དཀར་ནག་གི་མཐའ་མཚམས་ས་ཐིག་(LAC)ཕྱོགས་སུ་ཁེལ་བའི་བོད་ཀྱི་གྲོང་ཚོ་ཁག་གི་བྱིས་པ་དང་རྒས་འཁོགས་ཕུད་པའི་གཞན་ཕོ་མོ་དབྱེར་མེད་ཀྱིས་གྲོང་མི་ཡོངས་ལ་དམག་སྦྱོང་སྤྲད་དེ། མཐའ་མཚམས་སྲུང་སྐྱོབ་སླད་དམག་འཁྲུག་རྒྱག་དགོས་ཟེར་བའི་དམག་དོན་ལས་འགུལ་སྤེལ་ཡོད་སྐོར་བརྗོད་པ་ལྟར། རྒྱ་གར་དུས་བབ་གསར་ཁང་སོགས་ཀྱིས་སྤེལ་བའི་གནས་ཚུལ་ནང་། རྒྱ་ནག་གཞུང་གིས་བོད་ཀྱི་ས་མཚམས་ཁག་གི་ཁྱིམ་ཚང་རེའི་ཁྱིམ་མི་གཅིག་ངེས་པར་དུ་བཅིངས་གྲོལ་དམག་མིར་ཞུགས་བཅུག་སྟེ། རྒྱ་དཀར་ནག་བར་རྩོད་རྙོག་ཏུ་གྱུར་བའི་ས་མཚམས་སྲུང་སྐྱོབ་བྱེད་དགོས་པའི་ལས་གཞི་རིམ་པར་སྤེལ་་བཞིན་ཡོད་པ་རེད།

སྤྱིར་ན་རྒྱ་ནག་གཞུང་གིས་དེང་སྐབས་བོད་མི་ཚོའི་ཁ་པར་ནང་ཕྱི་ཕྱོགས་སུ་འབྲེལ་འདྲིས་བྱས་ཡོད་མེད་དང་། ༧གོང་ས་མཆོག་གི་སྐུ་པར་ཉར་ཚགས་བྱས་ཡོད་མེད་ཐད་ཞིབ་བཤེར་ཤུགས་ཆེན་བྱེད་བཞིན་པ་མ་ཟད། ཉེ་བའི་ཉིན་ཤས་རིང་རྫ་དབོན་པོ་ཕྱོགས་སུ་ས་གནས་ཡུལ་མི་ཚོའི་ཁྲོད་གང་བྱུང་ཞིབ་བཤེར་དང་༧གོང་ས་མཆོག་གི་སྐུ་པར་ཉར་ཚགས་བྱས་ཡོད་པའི་ཉེས་མིང་འོག སྔ་གཞུག་ཏུ་བོད་མི་ ༡༡༣ ལྷག་སེར་ཤུལ་རྫོང་དུ་བཙན་ཁྲིད་བཀག་སྐྱིལ་བྱས་ཡོད་པ་མ་ཟད། ད་ལྟའི་ཆར་བོད་མི་དེ་དག་གི་གནས་སྟངས་གོ་མེད་ཚོར་མེད་དུ་གྱུར་ཡོད་པ་རེད།

རྒྱ་གར་ལྷོ་ཕྱོགས་ཀྱི་གསར་འགོད་པ་དོན་འགྲུབ་བཀྲ་ཤིས།