རྒྱལ་ཚོགས་ཀྱི་འབྲེལ་མཐུད་པ་སྐལ་ལྡན་མཚོ་མོ་ལགས་ཀྱིས་རྒྱ་ནག་གིས་བོད་ཀྱི་ཆོས་དང་རིག་གཞུང་། ཁོར་ཡུག་སོགས་རྩ་གཏོར་གཏོང་གི་ཡོད་པ་སྙན་གསེང་ཞུས་པ་དང་སྦྲགས། སུད་སིའི་གཞུང་ནས་བོད་ནང་གི་འགྲོ་བ་མིའི་ཐོབ་ཐང་སྐོར་ལ་ལོ་འཁོར་ཞིབ་འཇུག་འདོན་དགོས་པའི་འབོད་སྐུལ་ཞུས་ཡོད་པ་རེད།
ད་ལྟའི་ཆར་སུད་སིའི་རྒྱལ་ས་བྷན་ནང་སྟོན་ཀའི་གྲོས་ཚོགས་འཚོགས་ཀྱི་ཡོད་པའི་སྐབས་དང་བསྟུན། སུད་སིའི་གཞུང་གིས་རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་སྟངས་སྲུང་སྐྱོབ་བྱ་སླད། སུད་སི་གྲོས་ཚོགས་འཐུས་མིའི་འགན་འཁྲི་ཞེས་པའི་བརྗོད་གཞིའི་སྟེང་ནང་མོལ་ཉན་ཞིབ་ཀྱི་ཚོགས་འདུ་ཞིག་བསྡུས་པའི་སྟེང་། སུད་སི་དོན་གཅོད་འཆི་མེད་རིག་འཛིན་ལགས་དང་ལས་བྱེད་སྐལ་ལྡན་མཚོ་མོ་ལགས་གཉིས་མཉམ་ཞུགས་གནང་སྟེ། རྒྱ་ནག་གཞུང་གིས་བོད་ཀྱི་ཆོས་དང་རིག་གཞུང་རྒྱ་སྒྱུར་གྱི་གཙོས་བོད་ནང་གི་བོད་མི་རྣམས་ལ་འགྲོ་བ་མིའི་ཐོབ་ཐང་མེད་པའི་གནས་སྟངས་སོགས་འགྲེལ་བརྗོད་གནང་ཡོད་འདུག
སྐབས་དེར་སུད་སིའི་དོན་གཅོད་ལས་ཁུངས་ཀྱི་རྒྱལ་ཚོགས་ཀྱི་འབྲེལ་མཐུད་ལས་བྱེད་སྐལ་ལྡན་མཚོ་མོ་ལགས་ཀྱིས། རྒྱ་ནག་གིས་ཕྱི་ལོ་ ༡༩༥༩ ལོར་བོད་ལ་བཙན་འཛུལ་བྱས་པའི་དབང་སྒྱུར་གྱི་བརྒྱུད་རིམ་ངོ་སྤྲོད་དང་སྦྲགས། རྒྱ་ནག་གཞུང་གིས་བོད་ནང་གི་སློབ་གྲྭ་ཁག་གི་སློབ་གྲྭའི་ནང་སློབ་ཚན་རྣམས་བོད་ཡིག་གི་ལམ་ནས་སློབ་ཁྲིད་བྱེད་རྒྱུའི་ཚབ་ཏུ་རྒྱ་ཡིག་གི་ལམ་ནས་སློབ་ཁྲིད་བྱེད་བཞིན་ཡོད་སྟབས། བོད་རིགས་སློབ་མ་རྣམས་མཐོ་སློབ་ཐོན་རྗེས་བོད་ཡིག་འབྲི་ཀློག་དང་བོད་སྐད་རྒྱག་མི་ཤེས་པའི་གནས་སྟངས་སུ་འགྱུར་བཞིན་ཡོད་པ་དང་། རྒྱ་ནག་གཞུང་གིས་བོད་ཀྱི་ཆོས་དང་རིག་གཞུང་། ངོ་བོ་བཅས་རྒྱ་ནག་དམར་ཤོག་གི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཅན་དུ་སྒྱུར་བཞིན་ཡོད་སྐོར་དང་། རྒྱ་ནག་གིས་བོད་ས་བཙན་འཛུལ་བྱས་པ་ནས་བོད་ནང་གི་བོད་མིར་དམ་དྲག་གིས་འགྲོ་བ་མིའི་ཐོབ་ཐང་རྡོག་རོལ་བཏང་དང་གཏོང་མུས་ཡིན་པ་དང་། བོད་ཀྱི་ཁོར་ཡུག་སོགས་གཏོར་བཤིག་གཏོང་གི་ཡོད་པའི་དངོས་ཡོད་ཀྱི་གནས་སྟངས་སྐོར་སྙན་གསེང་ཞུས་ཡོད་པ་རེད།
ཡང་སྐབས་དེར་སྐལ་ལྡན་མཚོ་མོ་ལགས་ཀྱིས་སུད་སིའི་གཞུང་ལ་བོད་ནང་གི་འགྲོ་བ་མིའི་ཐོབ་ཐང་གི་རང་དབང་སྲུང་སྐྱོབ་དགོས་སྐོར་ལ་འབོད་སྐུལ་དོན་ཚན་གསུམ་ཞུས་པའི་ནང་། སུད་སིའི་གཞུང་གིས་རྒྱ་ནག་དང་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་སྐོར་ལ་ཞིབ་འཇུག་ལོ་འཁོར་སྙན་ཐོ་འདོན་དགོས་པདང་། ཨ་རི་ནང་ལྟར་སུད་སི་གྲོས་ཚོགས་ནས་བོད་ནང་ཕར་འགྲོ་ཚུར་འོང་གི་ཁྲིམས་གཏན་འབེབས་གནང་དགོས་པ། དེ་བཞིན་རྒྱ་ནག་གཞུང་གིས་སུད་སི་ནང་གནས་སྡོད་བཙན་བྱོལ་བོད་མི་རྣམས་ལ་གནོན་ཤུགས་སྤྲོད་བཞིན་པའི་ཐད་ཞིབ་འཇུག་དང་ལྟ་རྟོག་གནང་དགོས་པ་བཅས་ཀྱི་ཞུ་སྐུལ་གནང་ཡོད་པ་རེད།
ད་རེས་སུད་སིའི་གྲོས་ཚོགས་སུ་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་སྐོར་གྱི་ཉན་ཞིབ་ཚོགས་འདུ་དེ་ནི། སུད་སིའི་གྲོས་ཚོགས་བོད་དོན་རྒྱབ་སྐྱོར་ཚོགས་པ་དང་སུད་སིའི་གྲོས་ཚོགས་ཀྱི་འགྲོ་བ་མིའི་ཐོབ་ཐང་སྲུང་སྐྱོབ་ཚོགས་པ། དེ་བཞིན་སུད་སིའི་གྲོས་ཚོགས་རྒྱ་ནག་མཛའ་འབྲེལ་ཚོགས་པ་དང་སུད་སིའི་གྲོས་ཚོགས་རྒྱལ་སྤྱིའི་གདུང་སེམས་མཉམ་སྐྱེ་ཚོགས་པ་བཅས་ཀྱི་གོ་སྒྲིག་འོག་བྱུང་བ་ཞིག་ཡིན་པ་རེད།
གཞན་ཡང་ཉན་ཞིབ་ཐོག་རྒྱ་ནག་དང་ལྷན་དུ་སུད་སིའི་གཞུང་ལ་མཉམ་འབྲེལ་གྱི་གོ་སྐབས་དང་རྒྱལ་སྤྱིས་རྒྱ་ནག་ནང་གི་འགྲོ་བ་མིའི་ཐོབ་ཐང་སྲུང་སྐྱོབ་ལ་རྒྱབ་སྐྱོར་གྱི་གནས་སྟངས། འཛམ་གླིང་རྒྱལ་ཁབ་ཚང་མ་མཉམ་འབྲེལ་གྱིས་འགྲོ་བ་མིའི་ཐོབ་ཐང་སྲུང་སྐྱོབ་བྱེད་ཕྱོགས་སོགས་ཀྱི་སྐོར་ལ་གླེང་མོལ་གནང་ཡོད་ཅིང་། ད་ལན་གྱི་ཉན་ཞིབ་ཚོགས་འདུའི་ཐོག་སུད་སིའི་གྲོས་ཚོགས་འཐུས་མི་དང་རྒྱལ་སྤྱིའི་ཉེ་ཡངས་ཚོགས་པ། ཁྲིམས་རྩོད་པ་དང་ཉམས་ཞིབ་པ་སོགས་གནད་ཡོད་མི་སྣ་མང་པོས་མཉམ་ཞུགས་བྱས་ཡོད་འདུག
གསར་འགོད་པ། སྐལ་བཟང་སྦྱིན་པ།
