རྒྱལ་ཚོགས་ཀྱི་འཐུས་མི་རྒྱལ་ཁབ་ཁག་གིས་རྒྱ་ནག་གཞུང་ནས་བོད་དང་ཤིན་ཅང་། ཧོང་ཀོང་བཅས་ནང་གི་འགྲོ་བ་མིའི་ཐོབ་ཐང་ལ་བརྩི་བཀུར་དགོས་པའི་སྐུལ་འདེད་དང་འབྲེལ། རྒྱ་ནག་གིས་གྲངས་ཉུང་མི་རིགས་ས་ཁུལ་དུ་དམིགས་བསལ་དམ་དྲག་བྱེད་བཞིན་པར་སྐྱོན་བརྗོད་བྱས་ཡོད་འདུག
བོད་མིའི་སྒྲིག་འཛུགས་ཀྱི་གཞུང་འབྲེལ་དབྱིན་ཡིག་དྲ་བའི་སྟེང་གནས་ཚུལ་སྤེལ་བ་ལྟར་ན། ཁ་སང་འཛམ་གླིང་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ལྷན་ཚོགས་ཐེངས་ ༤༨ པའི་ཐོག ཌེན་མག་དང་འཇར་མན། ནེ་ཐར་ལན་ཌི། སི་ཝེ་ཌན། ཨ་རི། ཡུ་རོབ་མཐུན་ཚོགས་བཅས་ཀྱི་འཐུས་ཚབ་རྣམ་པས་རྒྱ་ནག་གཞུང་གིས་བོད་དང་། ཤར་ཊུར་ཀི་སི་ཐན་(ཤིན་ཅང་)། ཧོང་ཀོང་བཅས་ནང་གི་འགྲོ་བ་མིའི་ཐོབ་ཐང་ལ་བརྩི་བཀུར་དགོས་པའི་སྐུལ་འདེད་བྱས་ཡོད་འདུག
དེ་ཡང་ཨ་རིའི་འཐུས་ཚབ་ཀྱིས་ལྷན་ཚོགས་སྟེང་བསྒྲགས་གཏམ་ཞིག་སྤེལ་བའི་ནང་། རྒྱ་ནག་གཞུང་གིས་བོད་ནང་འཆར་གཞི་དང་ལྡན་པའི་ཐོག་ནས་མི་རིགས་དབྱེ་འབྱེད་ཀྱི་སྲིད་ཇུས་སྤེལ་བ་དང་། དཔལ་འབྱོར་ཆེད་དུ་བཀོལ་སྤྱོད་ལོག་པ་བྱེད་པ། བོད་ཀྱི་སྲོལ་རྒྱུན་རིག་གཞུང་གཏོར་བཅོམ་གཏོང་བཞིན་པ། དེ་བཞིན་བོད་ནང་གི་བོད་མིའི་ཆོས་དད་དང་སྐད་ཡིག་རང་དབང་བཅས་པར་ཚད་བཀག་དོ་དམ་བྱེད་བཞིན་པར་བློ་འཚབ་ཡོད་སྐོར་གྱི་སྐྱོན་བརྗོད་དྲག་པོ་བྱས་ཡོད་ཅིང་། ཡུ་རོབ་མཐུན་ཚོགས་དང་དེའི་ཚོགས་ཁོངས་རྒྱལ་ཁབ་ ༢༦ གི་ཚབ་བྱས་ཏེ་ཧྥ་རན་སི་ཡིས། རྒྱ་ནག་གཞུང་གིས་རང་གི་རྩ་ཁྲིམས་དང་རྒྱལ་སྤྱིའི་ཁྲིམས་སྒྲིག་ཁག་ལ་བསྟུན་ཏེ་རྒྱ་ནག་ནང་ལོགས་དང་། ལྷག་པར་དུ་བོད་དང་ཤར་ཊུར་ཀི་སི་ཐན་(ཤིན་ཅང་)། ལྷོ་སོག་(ནང་སོག་) བཅས་ཀྱི་འགྲོ་བ་མིའི་ཐོབ་ཐབ་དང་གྲངས་ཉུང་མི་རིགས་ཀྱི་ཐོབ་ཐང་ལ་བརྩི་བཀུར་དགོས་སྐོར་བརྗོད་འདུག
དེ་བཞིན་ཌེན་མག་གིས། རྒྱ་ནག་གཞུང་ངོས་ནས་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཆེས་མཐོའི་སྐུ་ཚབ་དང་རང་དབང་ཅན་གྱི་དབྱེ་ཞིབ་པ་རྣམས་ལ་འགྲོ་བ་མིའི་ཐོབ་ཐང་གི་གནས་སྟངས་ལ་རྟོག་ཞིབ་ཆེད་དུ་རྒྱ་ནག་ནང་སྐོར་བསྐྱོད་བྱ་རུ་འཇུག་དགོས་སྐོར་དང་། ནེ་ཐར་ལན་ཌིའི་སྐུ་ཚབ་ཀྱིས་ཀྱང་རྒྱ་ནག་གཞུང་གིས་བོད་ནང་གསར་འགོད་རང་དབང་དང་། ཆོས་དད་རང་དབང་ལ་དམ་དྲག་བྱེད་བཞིན་པར་བློ་འཚབ་ཆེན་པོ་ཡོད་སྐོར་བརྗོད་འདུག་ཅིང་། སི་ཝེ་ཌན་གྱིས་རྒྱ་ནག་གཞུང་གིས་གྲངས་ཉུང་མི་རིགས་དང་། འགྲོ་བ་མིའི་ཐོབ་ཐང་རྩོད་ལེན་པ། གསར་འགོད་པ་བཅས་ལ་ཆེད་མངག་དམ་དྲག་བྱེད་བཞིན་པ་ནི་འགྲོ་བ་མིའི་ཐོབ་ཐང་རྡོག་རོལ་བཏང་བ་ཞིག་ཡིན་སྐོར་སྐྱོན་བརྗོད་བྱས་འདུག
བདུན་ཕྲག་སྔོན་མར་སུད་སིའི་གྲོང་ཁྱེར་ཇི་ནི་ཝར་རྟེན་གཞི་བྱས་པའི་སྐུ་ཚབ་དོན་གཅོད་ལས་ཁུངས་ཀྱི་རྒྱལ་ཚོགས་ཀྱི་འབྲེལ་མཐུད་ལས་བྱེད་སྐལ་ལྡན་མཚོ་མོ་ལགས་ཀྱིས་སུད་སིའི་གྲོང་ཚོགས་ཀྱི་ཉན་ཞིབ་སྟེང་བོད་ནང་གི་ད་ལྟའི་གནས་སྟངས་སྤྱི་དང་སྐད་གཉིས་སློབ་གསོའི་སྐོར་སོགས་སྙན་གསེང་ཞུས་པ་དང་སྦྲགས། སུད་སི་གཞུང་ངོས་ནས་བོད་ནང་གི་འགྲོ་བ་མིའི་ཐོབ་ཐང་སྐོར་གྱི་ལོ་འཁོར་སྙན་ཐོ་འདོན་དགོས་གལ་དང་། སུད་སིའི་གྲོས་ཚོགས་ཀྱིས་ཨ་རི་ལྟར་བོད་ནང་འགྲོ་འོང་འདྲ་མཉམ་གྱི་ཁྲིམས་གཏན་འབེབ་གནང་དགོས་པ། རྒྱ་ནག་གཞུང་གིས་སུད་སིར་གནས་སྡོད་བཙན་བྱོལ་བོད་མི་རྣམས་ལ་དངོས་ཤུགས་བརྒྱུད་གསུམ་ནས་གནོན་ཤུགས་དང་ཤུགས་རྐྱེན་སྤྲོད་ཐབས་བྱེད་བཞིན་པར་ཞིབ་འཇུག་དགོས་སྐོར་གྱི་རེ་སྐུལ་ཞུས་ཡོད་ཅིང་། ད་ལན་རྒྱལ་ཚོགས་ཀྱི་ལྷན་ཚོགས་སྟེང་སུད་སིའི་སྐུ་ཚབ་ཀྱིས། རྒྱ་ནག་གཞུང་གིས་གྲངས་ཉུང་མི་རིགས་རྣམས་གང་བྱུང་འཛིན་བཟུང་བཀག་ཉར་བྱེད་བཞིན་པར་སྐྱོན་བརྗོད་དང་སྦྲགས། རྒྱ་ནག་གཞུང་ངོས་ནས་བོད་ནང་གི་འགྲོ་བ་མིའི་ཐོབ་ཐང་ལ་བརྩི་བཀུར་དགོས་པའི་སྐུལ་འདེད་བཏང་ཡོད་འདུག
གསར་འགོད་པ། པ་སངས་ཚེ་རིང་།
